ମୂଲୁ 6
6
ମାଣ୍ସିତି ଲାଗେଏତାୟି
1ଇଲେକିଁ ଦାର୍ତିତା ମାଣ୍ସିୟାଁ ଏ଼ପାଆ଼ହାଲି ମା଼ଟ୍ହେରି, ଅ଼ଡ଼େ ଏ଼ୱାରାକି ହା଼ରେକା ପ଼ଦାୟାଁ ଜାର୍ନା ଆ଼ତୁ। 2ଏଚିବେ଼ଲା ମାହାପୂରୁତି ମୀର୍କା#6:2 ଲାକପୂରୁତି ଲ଼କୁ ମାଣ୍ସିତି ପ଼ଦାୟାଁଣି ଅ଼ଜୁତି ମେସାହାଁ, ଏ଼ୱାରି ଆମ୍ବାଆରାଇଁ ମ଼ନ କିତେରି ଏ଼ୱାସିକାଣି ବୀହା ଆ଼ତେରି। 3ଏଚେଟିଏ ପ୍ରବୁ ଏଲେଇଚେସି, “ନା଼ ଜୀୱୁ ମାଣ୍ସି ତା଼ଣା କା଼ଲେଏ ଡ଼ୟେଏ, ଇଚିହିଁ ଏ଼ୱାରି ଲାଗେଏତି ଜିରୁତା ଏ଼ୱାରି ଆଙ୍ଗା ଗାଟାରି; ଏ଼ଦାଆଁତାକି ଏ଼ୱାରି ବାର୍ସା ସ଼କ଼ଡ଼ି ବାର୍ସା ଆ଼ନେ।” 4ଏଚିବେ଼ଲା ଦାର୍ତିତା ହା଼ରେକା ବା଼ଡ଼୍ୟୁ ଗାଟାରି ମାଚେରି, ଇଞ୍ଜାଁ ମାହାପୂରୁତି ମୀର୍କା ମାଣ୍ସିତି ମା଼ସ୍କା ତଲେ ଡୂରାଲିଏ, ଏ଼ୱାସିକା ତା଼ଣାଟି ମୀର୍କା ଜାର୍ନା ଆ଼ତେରି; ଏ଼ୱାରି ଜିକେଏ ତଲି କା଼ଲାତି ୱେ଼ଙ୍ଗିତି ବା଼ଡ଼୍ୟୁ ଗାଟାରି ମାଚେରି।
5ଏଚେଟିଏ ପ୍ରବୁ ମେସ୍ତେସି, ଦାର୍ତିତା ମାଣ୍ସିତି ଲାଗେଏତାୟି ହା଼ରେକା ଗାଡି ଅ଼ଡ଼େ ତାମି ହିୟାଁତି ଅଣ୍ପୁତା ବାରେ ଲାଗେଏତାୟି। 6ଏ଼ଦାଆଁତାକି ମାହାପୂରୁ ଦାର୍ତିତା ମାଣ୍ସିଇଁ ରାଚି କିହାଁ ତାନି ମ଼ନତା ଦୁକୁ କିତେସି। 7ଏଚେଟିଏ ପ୍ରବୁ ଏଲେଇଚେସି, “ନା଼ନୁ ଦାର୍ତିତା କେ଼ପିତି ମାଣ୍ସିଇଁ, ଅ଼ଡ଼େ ମାଣ୍ସି ତଲେ ଜୀୱୁଗାଟି ଜ଼ନ୍ତ ଅ଼ଡ଼େ ପଟା କା଼ଟି ଇଞ୍ଜାଁ ବାଣ୍ତିତଲେ ତା଼କିନି ଜ଼ନ୍ତଣି ନା଼ସା କିଇଁ, ଇଚିହିଁ ନା଼ନୁ ଏ଼ୱାସିକାଣି ଗା଼ଡ଼ି କିତାକି ଦୁକୁ କିହିମାଇଁ।” 8ସାମା ନ଼ହଁ ପ୍ରବୁ ନ଼କିତା କାର୍ମା ବେଟାଆ଼ତେସି।
ନ଼ହଁତି କାତା
9ନ଼ହଁ ବେ଼ଲାତି କାତା ଈଦି। ନ଼ହଁ ଏ଼ ବେ଼ଲାତା ଦାର୍ମୁଗାଟାସି ଅ଼ଡ଼େ ସୁଦୁ ମାଣ୍ସି ମାଚେସି; ଅ଼ଡ଼େ ମାହାପୂରୁ ତା଼ଣା ମା଼ନି ତଲେ ତା଼କିମାଚେସି। 10ନ଼ହଁକି ସେମ, ହାମ ଅ଼ଡ଼େ ଜେପତ୍ ଈ ତୀନି ଜା଼ଣା ମୀର୍କା ମାଚେରି।
11ଏଚିବେ଼ଲାତା ଦାର୍ତି ମାହାପୂରୁ ନ଼କିତା ଲାଗେଏତି ମାଣ୍କି ଅ଼ଡ଼େ ପା଼ପୁତା ନେଞ୍ଜାମାଚେ। 12ଇଞ୍ଜାଁ ମାହାପୂରୁ ଦାର୍ତିତି ସିନିକିତେସି, ଏ଼ଦି ଲାଗେଏ ତ଼ଞ୍ଜା ଆ଼ତେ, ଏ଼ନାଆଁତାକି ଇଚିହିଁ ଦାର୍ତିତି ବାରେ ଜୀୱୁ ଗାଟାଇ ଲାଗେଏ ଆ଼ହାମାଚେରି।
13ଏଚେଟିଏ ମାହାପୂରୁ ନ଼ହଁଇଁ ଏଲେଇଚେସି, “ନା଼ ନ଼କିତା ବାରେ ଜୀୱୁଗାଟି କୂଡ଼ାତି ନା଼ସା କିନି ଦିନା ଏଦାତେୟିଏ; ଇଚିହିଁ ଏ଼ୱାରି ତା଼ଣାଟି ଦାର୍ତି ପା଼ପୁ ତଲେ ନେଞ୍ଜାମାନେ; ଅ଼ଡ଼େ ମେହ୍ମୁ ନା଼ନୁ ଦାର୍ତି ତଲେ ଏ଼ୱାରାଇଁ ନା଼ସା କିଇଁ। 14ନୀନୁ ନିଙ୍ଗେ ତାକି ହିଏଣି#6:14 ଦେବଦାରୁ ମା଼ର୍କାତି ୱେସ୍କା ତଲେ ର଼ ଏ଼ୟୁ ଜା଼ଜା କେ଼ପାମୁ; ଏ଼ ବିତ୍ରା ବାକ୍ରାୟାଁ କିହାଁ ହା଼ନିତି ହିଞ୍ଜୁ ତଲେ ବିତ୍ରା ବାହ୍ରି ରୁବାମୁ। 15ଏ଼ଦାଆଁ ଇଲେକିଁ କେ଼ପାମୁ, ଲାମ୍ବା ତୀନି ୱାଞ୍ଜା ହା଼ତା, ଅ଼ସାରା ଦୁଇ କ଼ଡ଼ି ଦସ ହା଼ତା, ପାଡ୍ଣି କଡ଼େ ଦସ ହା଼ତା। 16ଲାକ ର଼ ହା଼ତା ପିସାହାଁ କା଼ନ୍ତା ପିହ୍ମୁ, ଅ଼ଡ଼େ ତାନି ଦାରିତା ଦୁୱେରି ଇଟାମୁ; ଅ଼ଡ଼େ ଡ଼଼ଇ, ମାଦି ଇଞ୍ଜାଁ ଲାକ ତୀନି ପାରୁ କିମୁ। 17ଇଞ୍ଜାଁ ହା଼ଗୁ ଡ଼଼ଇକା ଏଚେକା ନେ଼ଞ୍ଜିମାନି ଜୀୱୁଗାଟି ଜ଼ନ୍ତ ମାନୁ, ଏ଼ ବାରେ ନା଼ସା କିହାଲି ତାକି ମେହ୍ମୁ ନା଼ନୁ ଦାର୍ତିତି ରା଼ଜି ବୀଡ଼ୱି କିଇଁ, ଏଚେଟିଏ ଦାର୍ତିତା ମାନି ବାରେ ଜୀୱୁଗାଟି ଜ଼ନ୍ତ ହା଼ନୁ। 18ସାମା ନା଼ନୁ ମୀ ତଲେ ର଼ ରା଼ଜିମା଼ନା କିଇଁ; ଏଚେଟିଏ ନୀନୁ ନୀ ଡକ୍ରି, ନୀ ମୀର୍କା, ଅ଼ଡ଼େ କୁଡ଼୍ୟାସିକା ତଲେ ଏ଼ୟୁ ଜା଼ଜାତା ହ଼ଡ଼୍ଦେରି। 19ଅ଼ଡ଼େ ଜୀୱୁ ନୀଟ୍ହାଲି ବାରେ ଜ଼ନ୍ତଜିୱେଡ଼ି ର଼ ର଼ ଜ଼ଡ଼ୁ ନୀ ତଲେ ଜା଼ଜାତା ଅ଼ମୁ। 20ବାରେ କୂଡ଼ାତି ପଟା କା଼ଟି ଅ଼ଡ଼େ ବାରେ କୂଡ଼ାତି ଜ଼ନ୍ତଜିୱେଡ଼ି ଅ଼ଡ଼େ ବାଣ୍ତିତଲେ ତା଼କିନି ଜ଼ନ୍ତ, ବାରେ କୂଡ଼ାତି ର଼ ର଼ ଜ଼ଡ଼ୁ ଆ଼ହିଁ, ଜୀୱୁ ନୀଟ୍ହାଲି ନୀ ତା଼ଣା ୱା଼ନୁ। 21ଅ଼ଡ଼େ ନୀନୁ ମିଙ୍ଗେ ଅ଼ଡ଼େ ଏ଼ୱାସିକା ତାକି, ବାରେ କୂଡ଼ାତି କା଼ଦି ତାଚାହାଁ ମୀ ତା଼ଣା କୂଡ଼ିକିମୁ।” 22ଏଚେଟିଏ ନ଼ହଁ ମାହାପୂରୁ ଏ଼ନିକିହିଁ ହୁକୁମି ହୀତେସି ଏଲେକିହିଁଏ ବାରେ କାମା କିତେସି।
Currently Selected:
ମୂଲୁ 6: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
