ମୂଲୁ 48
48
ଇପ୍ରୟିମ ଅ଼ଡ଼େ ମନଃସିଇଁ ଜାକୁବତି ବ଼ର
1ଏଚର ଦିନା ଡା଼ୟୁ ଆମ୍ବାଆସି ଜସେପଇଁ କାବ୍ରୁ ହୀହାଁ ଏଲେଇଚେସି; “ମେହ୍ମୁ ମୀ ଆ଼ବା ଆ଼ଡିହିଲଅସି,” ଏଚେଟିଏ ଏ଼ୱାସି ତାନି ରୀ ମୀର୍କା, ମନଃସି ଅ଼ଡ଼େ ଇପ୍ରୟିମଇଁ ତାନି ତଲେ ଅ଼ତେସି। 2ଏଚେ଼ତା ଜାକୁବଇଁ ଆମ୍ବାଆସି ଏଲେଇଚେସି, “ମେହ୍ମୁ ନୀ ମୀର୍ଏସି ଜସେପ ନୀ ତା଼ଣା ୱା଼ହାମାନେସି,” ଏଚେଟିଏ ଜାକୁବ ତାଙ୍ଗେ ଆ଼ଟ୍ୱା କିହାଁ ପା଼ସ୍ପନିତା ନିଙ୍ଗାହାଁ କୁଗିତେସି। 3ଏଚେଟିଏ ଜାକୁବ ଜସେପଇଁ ଏଲେଇଚେସି, “କିଣାନ ଦେ଼ସାତା ଲୂସ୍ ଇନି ଟା଼ୟୁତା ବାରେ ବା଼ଡ଼୍ୟୁଗାଟି ମାହାପୂରୁ ନାଙ୍ଗେ ତ଼ଞ୍ଜାଆ଼ହାଁ ବ଼ର ହୀହାଁ ଏଲେଇଞ୍ଜା ମାଞ୍ଜାତେସି। 4ମେହ୍ମୁ, ନା଼ନୁ ନିଙ୍ଗେ ବେ଼ଲି ଏ଼ପା କିହାଁ ହା଼ରେକା କୂଡ଼ା କିୟାଇଁ, ନୀ ତା଼ଣାଟି ହା଼ରେକା କୂଲୁ ଆ଼ନେରି; ଇଞ୍ଜାଁ ନୀ ୱା଼ହିମାନି କୂଡ଼ା ତାକି କା଼ଲେଏତି ଅଦିକାରା ତାକି ଈ ଦେ଼ସା ହୀଇଁ।”
5ଏ଼ଦାଆଁତାକି ମିସର ଦେ଼ସାତା ନୀ ତା଼ଣା ନା଼ ୱା଼ନି ନ଼କେଏ ନୀ ଏମିନି ରୀ ମୀର୍କା ମିସରତା ଜାର୍ନା ଆ଼ତେରି, ଏ଼ୱାରି ନା଼ କୂଡ଼ା ଆ଼ନେରି; ରୁବେନ୍ ଅ଼ଡ଼େ ସିମିୟନ ଲେହେଁ ଇପ୍ରୟିମ ଅ଼ଡ଼େ ମନଃସି ଏ଼ୱାରି ନା଼ ମୀର୍କା ଆ଼ନେରି। 6ଇଞ୍ଜାଁ ଈୱାରି ଡା଼ୟୁ ଏମିନି ନୀ ମୀର୍କା ଜାର୍ନା ଆ଼ନେରି, ଏ଼ୱାରି ନୀ ମୀର୍କା ଆ଼ନେରି, ଅ଼ଡ଼େ ପା଼ଣ୍ୱା ତାୟିୟାଁ ଦ଼ରୁତଲେ ଜାହା ଜାହାରା ଅଦିକାରାତା ୱେ଼ଙ୍ଗିନେରି। 7ପଦନ୍ ଅରାମଟିଏ କିଣାନ ଦେ଼ସାତା ନା଼ ୱା଼ନି କା଼ଲାତା ଇପ୍ରାତାତା ଏଜାଲି ହିରେ ହେକ ମାଣ୍ମ୍ବନିଏ ରାହେଲ ଜିରୁତା ନା଼ ତା଼ଣେଏ ହା଼ତେ; ଏଚେଟିଏ ନା଼ନୁ ଏମ୍ବାଆଁ ଇପ୍ରାତାତା ଇଚିହିଁ ବେତଲିହିମତି ଜିରୁ ଦାରିତା ଏ଼ଦାଣି ଦା଼ନା କିତେଏଁ।
8ଏଚେଟିଏ ଜାକୁବ ଜସେପ ମୀର୍କାଣି ମେସାହାଁ ୱେଚେସି, “ଈୱାରି ଆମ୍ବାଆରି ?”
9ଏଚେଟିଏ ଜସେପ ଆ଼ବାଇଁ ଏଲେଇଚେସି, “ଈୱାରି ନା଼ ମୀର୍କା, ମାହାପୂରୁ ଈୱାରାଇଁ ଈ ଦେ଼ସାତା ନାଙ୍ଗେ ହୀହାମାଞ୍ଜାନେସି।” ଏଚେଟିଏ ଜାକୁବ ଏଲେଇଚେସି, “ଏ଼ୱାରାଇଁ ନା଼ ତା଼ଣା ତାମୁ, ନା଼ନୁ ଏ଼ୱାରାଇଁ ବ଼ର ହୀଇଁ।” 10ଏଚିବେ଼ଲାତା ଜାକୁବ ବୁଡ଼୍ହା ଆ଼ତାକି ନେହିକିଁ ମେସାଲି ଆ଼ଡାଆତେସି। ଏ଼ଦାଆଁତାକି ଜସେପ ତାନି ତା଼ଣା ଏ଼ୱାରାଇଁ ତାଚାଲିଏ, ଏ଼ୱାସି ଏ଼ୱାରାଇଁ ପମାହାଁ ନଣ୍ତିତେସି। 11ଇଞ୍ଜାଁ ଜାକୁବ ଜସେପଇଁ ଏଲେଇଚେସି, “ନା଼ନୁ ଅଣ୍ପାମାଚେଏଁ ନୀ ମୂମ୍ବୁ ଅ଼ଡ଼େ ଏଚେଲା ମେସାଲି ଆ଼ଡଅଁ; ସାମା ମେହ୍ମୁ ମାହାପୂରୁ ନିଙ୍ଗେ ଅ଼ଡ଼େ ନୀ କୂଡ଼ା ଜିକେଏ ନାଙ୍ଗେ ମେସ୍ପି କିୟାତେସି।” 12ଏଚେ଼ଟିଏ ଜସେପ ତାଞ୍ଜିଗାଟାଣି ରୀ କୁଦ୍ଗୁୟାଁଟି ଏ଼ୱାରାଇଁ ଅ଼ହାଁ ତା଼ନୁ ମୁନୁ କୁତାହାଁ ଜହରା କିତେସି।
13ଏଚେଟିଏ ଜସେପ ଏ଼ ରିଆରାଇଁ ଅ଼ହାଁ ତାନି ଟିଃନି କେୟୁତା ଇପ୍ରୟିମଇଁ ଆସାହାଁ ଜାକୁବତି ଟେ଼ବ୍ରି ୱାକି ଅ଼ଡ଼େ ଟେ଼ବ୍ରି କେୟୁତା ମନଃସିଇଁ ଆସାହାଁ ଜାକୁବତି ଟିଃନି ୱାକି ନିପ୍ହେସି। 14ଏଚେଟିଏ ଜାକୁବ ତାନି ଟିଃନି କେୟୁ ଦା଼ସାହାଁ ଊଣା ଇପ୍ରୟିମ ତା଼ର୍ୟୁଁ ଲାକ ଇଟିତେସି, ଇଞ୍ଜାଁ ମନଃସି ତା଼ର୍ୟୁଁ ଲାକ ଟେ଼ବ୍ରି କେୟୁ ଇଟିତେସି, ଏ଼ୱାସି ଅଣ୍ପୁ ତଲେ କେସ୍କା ତିରିମ୍ଣିପ୍ହେସି, ଇଚିହିଁ ମନଃସି ପା଼ଣ୍ୱା ମାଚେସି। 15ଏଚେଟିଏ ଏ଼ୱାସି ଜସେପଇଁ ବ଼ର ହୀହାଁ ଏଲେଇଚେସି, “ଏମିନି ମାହାପୂରୁ ନ଼କିତା ନା଼ ଆକୁୟାଁ ଅବ୍ରାହାମ ଅ଼ଡ଼େ ଇସାହାକ ତା଼କାମାଚେରି, ଆମିନି ମାହାପୂରୁ ଜାର୍ନା ଦିନାଟିଏ ନୀଞ୍ଜୁ ପାତେକା ପ଼ହିପାଡି କିହାମାଞ୍ଜାନେସି, 16ଆମିନି ଦୂତୁ, ବାରେ କସ୍ତଟି ନାଙ୍ଗେ ଗେଲ୍ପାମାଞ୍ଜାନେସି, ଏ଼ୱାସି ଈ କକାରାଇଁ ବ଼ର ହୀପେସି; ଈୱାରି ନା଼ ଦ଼ରୁଟି ଅ଼ଡ଼େ ନା଼ ଆକୁ ଆ଼ବାୟାଁ ଅବ୍ରାହାମ ଅ଼ଡ଼େ ଇସାହାକ ଦ଼ରୁଟି ୱେ଼ଙ୍ଗାପେରି, ଇଞ୍ଜାଁ ଈୱାରି ଦେ଼ସା ବିତ୍ରା ପାଡାଆ଼ହାଁ ହା଼ରେକା ଲ଼କୁ କିୟାପେସି।”
17ଏଚିବେ଼ଲା ଇପ୍ରୟିମ ତା଼ର୍ୟୁଁ ଲାକ ତାଞ୍ଜିତି ଟିଃନି କେୟୁ ଇଟିତାଣି ମେସାହାଁ ଜସେପ ରା଼ହାଁ ଆ଼ଆତେସି; ଏ଼ଦାଆଁତାକି ଇପ୍ରୟିମ ତା଼ର୍ୟୁଁଟି ମନଃସି ତା଼ର୍ୟୁଁତା ଏ଼ଦାଆଁ ଇଟାଲି କେୟୁ ପେର୍ହେସି, 18ଅ଼ଡ଼େ ଜସେପ ଏଲେଇଚେସି, “ଆ଼ବା, ଇଲେକିଁ ଆ଼ଏ, ଈୱାସି ପା଼ଣ୍ୱା; ଈୱାଣି ତା଼ର୍ୟୁଁତା ନୀ ଟିଃନି କେୟୁ ଇଟାମୁ।”
19ସାମା ତାମି ଆ଼ବା ରା଼ହାଁ ଆ଼ଆନା ଏଲେଇଚେସି, “ଏ଼ ମୀର୍ଏଣା ନା଼ନୁ ପୁଞ୍ଜାମାଇଁ; ନା଼ନୁ ପୁଞ୍ଜାମାଇଁ, ଏ଼ୱାସି ଜିକେଏ ର଼ କୂଲୁ ଆ଼ନେସି, ଏ଼ୱାସି ଜିକେଏ କାଜାସି ଆ଼ନେସି; ସାମା ତାମି ଊଣା ତାୟି ଏ଼ୱାଣି ତା଼ଣାଟି କାଜାସି ଆ଼ନେସି ଅ଼ଡ଼େ ଏ଼ୱାଣି କୂଡ଼ା ହା଼ରେକା କୂଲୁ ଆ଼ନେରି।”
20ଏ଼ ଦିନା ଏ଼ୱାସି ଏ଼ୱାରାଇଁ ବ଼ର ହୀହାଁ ଏଲେଇଚେସି, “ଇସ୍ରାୟେଲ କୂଡ଼ା ବ଼ର ହୀନି ବେ଼ଲାତା ମୀ ଦ଼ରୁ ଆସାହାଁ ଏଲେଇଞ୍ଜାନେରି, ‘ମାହାପୂରୁ ମିଙ୍ଗେ ଇପ୍ରୟିମ ଅ଼ଡ଼େ ମନଃସି ଲେହେଁ କିୟାପେସି।’” ଇଲେକିହିଁ ଜାକୁବ ମନଃସି ତା଼ଣାଟି ଇପ୍ରୟିମଇଁ ନ଼କି କିତେସି।
21ଏଚେ଼ଟିଏ ଜାକୁବ ଜସେପଇଁ ଏଲେଇଚେସି, “ମେହ୍ମୁ ନା଼ନୁ ହା଼ହିମାଇଁ; ସାମା ମାହାପୂରୁ ମୀ ତଲେ ଡ଼ୟିନେସି ଅ଼ଡ଼େ ମିଙ୍ଗେ ଆକୁ ଆ଼ବାୟାଁ ଦେ଼ସାତା ୱେଣ୍ତେ ଅୟାନେସି। 22ନା଼ନୁ ନା଼ କାଣ୍ତା ଅ଼ଡ଼େ ଆମ୍ବୁ ତଲେ ଇମରିୟ ଲ଼କୁତି କେୟୁଟି ଏମିନି ବା଼ଗା ବେଟାଆ଼ହାମାଇଁ, ମୀ ତାୟିୟାଁ କିହାଁ ଏ଼ ଆଗାଡ଼ା ବା଼ଗା ନିଙ୍ଗେ ହିୟାତେଏଁ।”
Currently Selected:
ମୂଲୁ 48: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
