ମୂଲୁ 39
39
ଜସେପ ଅ଼ଡ଼େ ପଟିପର ଡକ୍ରି
1ଜସେପ ମିସର ଦେ଼ସାତା ତାପି ଆ଼ହାଲିଏ, ପା଼ରତି ର଼ କାମା କିନାସି ଇଚିହିଁ, ମିସରତି ପଟିପର ଦ଼ରୁତି କ଼ସ୍କା ମୁହେଁ କାଜାସି, ଆମିନି ଇସ୍ମାୟେଲ ଲ଼କୁ ତା଼ଣାଟି ତାପି ଆ଼ହାମାଚେ ଏ଼ୱାରି ତା଼ଣାଟି କଡାମାଚେସି। 2ସାମା ପ୍ରବୁ ଜସେପ ତଲେ ମାଚେସି, ଏ଼ଦାଆଁତାକି ଏ଼ୱାସି ପାଡାଆ଼ତେସି; ଅ଼ଡ଼େ ଏ଼ୱାସି ମିସରତି ସା଼ୱୁକାରି ଇଜ ଡ଼ୟିତେସି। 3ଏଚେଟିଏ ପ୍ରବୁ ଜସେପ ତଲେ ମାନେସି ଅ଼ଡ଼େ ଏ଼ୱାସି ଏମିନି କାମା କିହିମାଚେସି, ପ୍ରବୁ ଏ଼ୱାଣି କେୟୁଟି ଏ଼ ବାରେ ତୀରି କିହି ମାନେସି, ଈ ବାରେ ତାନି ସା଼ୱୁକାରି ମେସ୍ତେସି। 4ଏ଼ଦାଆଁତାକି ଜସେପ ଏ଼ୱାଣି ନ଼କିତା କାର୍ମା ବେଟାଆ଼ହାଁ ଏ଼ୱାଣି କାମାତାକି ଆ଼ଚିତେସି, ଇଞ୍ଜାଁ ପଟିପର ଜସେପଇଁ ଇଲୁତି କାଜାସି କିହାଁ ତାନି କେୟୁତା ବାରେ ହେର୍ପିତେସି। 5ଇଲେକିହିଁ ଏ଼ୱାସି ଜସେପଇଁ ତାନି ଇଲୁ ଇଞ୍ଜାଁ ବାରେ ଦ଼ନତି କାଜାସି କିତି ଦିନାଟିଏ ପ୍ରବୁ ଜସେପ ତାକି ଏ଼ ମିସରତି ଲ଼କୁ ଇଲୁତି ବ଼ର ହୀତେସି; ଅ଼ଡ଼େ, ଇଲୁ ଇଞ୍ଜାଁ ବୂମିତି ବାରେ ଆର୍ନାତା ପ୍ରବୁତି ବ଼ର ୱା଼ତେ। 6ଏ଼ଦାଆଁତାକି ପଟିପର ଜସେପ କେୟୁତା ତାନି ଦ଼ନତି ଇଲେତି ଅଦିକାରା ହୀତେସି, କି ଏ଼ୱାସି ତାନି ତିନି କା଼ଦି ପିସ୍ପେ ଏ଼ନାଆଁ ସିନିକିଆତେସି। ଜସେପ ଅ଼ଜୁ ଅ଼ଡ଼େ ସା଼ୟା ୱା଼ଣାତା ନେହିଁ ତ଼ଞ୍ଜା ଆ଼ହିମାଚେସି।
7ଅ଼ଡ଼େ ଈ ବାରେତି ଡା଼ୟୁ ତାନି ସା଼ୱୁକାରିତି ଡକ୍ରି ଜସେପଇଁ ମ଼ନ କିହାଲି ମା଼ଟ୍ହେ; ଏ଼ଦାଆଁତାକି ଏ଼ଦି ଏଲେଇଚେ, “ନୀନୁ ନା଼ ତଲେ ଡୂରାମୁ।” 8ସାମା ଜସେପ ତାନି ସା଼ୱୁକାରି ଡକ୍ରିନି ଏଲେଇଚେସି, “ସିନିକିମୁ, ଈ ଇଲୁତା ଏ଼ନାୟି ମାନେ ନା଼ ସା଼ୱୁକାରି ଏ଼ଦାଆଁ ସିନିକିହି ହିଲଅସି, ଏ଼ୱାସି ନା଼ କେୟୁତା ବାରେ ହେର୍ପା ମାଞ୍ଜାନେସି। 9ଈ ଇଲୁତା ନା଼ କିହାଁ ଆମ୍ବାଆସି କାଜାସି ହିଲଅସି; ନୀନୁ ଏ଼ୱାଣି ଡକ୍ରିତି, ଏ଼ଦାଆଁତାକି ନିଙ୍ଗେ ପିସ୍ପେ ନାଙ୍ଗେ ବାରେ ଅଦିକାରା ମାନେ। ଏ଼ଦାଆଁତାକି ନା଼ନୁ ଏ଼ନିକିଁ ଇଲେତି ଲାଗେଏତି କାଜା କାମା ଅ଼ଡ଼େ ମାହାପୂରୁ କ଼ପାଟି ପା଼ପୁ କିଇଁ ?” 10ଆ଼ତିଜିକେଏ ଏ଼ ଆୟାଟି ଦିନାତାକି ଦିନା ଜସେପଇଁ ଏଲେଇନେ; ସାମା ଜସେପ ତାନି ତଲେ ଡୂରାଲି କି ତାନି ଦାରିତା ଡ଼ୟାଲି ମ଼ନ କିଅସି।
11ଏଚେଟିଏ ର଼ ଦିନା ଜସେପ ତାନି କାମା ତାକି ଇଲୁ ବିତ୍ରା ହାଚେସି, ଇଞ୍ଜାଁ ଏ଼ ଇଜତି ହ଼ଲିୟାଙ୍ଗା ଆମ୍ବାଆରି ହିଲାଆତେରି। 12ଏ଼ଦାଆଁତାକି ଏ଼ଦି ଜସେପତି ବାସ୍ତେରି ଆସାହାଁ “ନା଼ ତଲେ ଡୂରାମୁ ଇଞ୍ଜିଁ।” ରେଲାଜିକା କିତେ; ସାମା ଜସେପ ତାନି କେୟୁତା ବାସ୍ତେରି ପିସାହାଁ ପାଙ୍ଗାତା ହ଼ଟେସି। 13ଏଚେ଼ତା ଏ଼ ଆୟାଟି ଜସେପ ତାନି କେୟୁତା ତାନି ବାସ୍ତେରି ପିସାହାଁ ପାଙ୍ଗାତା ହଟିମାନାଣି ମେସ୍ତେ, 14ଏଚିବେ଼ଲା ଏ଼ଦି ତାନି ଇଜତି ଲ଼କୁଣି ହା଼ଟାହାଁ ଏଲେଇଚେ, “ସିନିକିଦୁ, ଈୱାସି ମା଼ ତଲେ ଲାଜାତି କାମା କିହାଲି ତାକି ର଼ ଏବ୍ରି ଲ଼କୁଇଁ ତାଚାମାନେସି; ଏ଼ୱାସି ନା଼ ତଲେ ଡୂରାଲି ତାକି ବିତ୍ରା ନା଼ ତା଼ଣା ୱା଼ହାମାଚେସି; ଏଚେଟିଏ ନା଼ନୁ କାଜା ଗିୟାଁତଲେ କା଼ଲୱି ଆ଼ତେଏଁ; 15ନା଼ କାଜା ଗିୟାଁତଲେ ହା଼ଟିତାଣି ୱେଞ୍ଜାହାଁ, ଏ଼ୱାସି ତାନି ବାସ୍ତେରି ନା଼ ତା଼ଣା ପିସା, ପାଙ୍ଗାତା ହ଼ଟେସି।”
16ଇଞ୍ଜାଁ ଏ଼ ଆୟାଟି ତାନି ସା଼ୱୁକାରି ଇଜ ୱା଼ନି ପାତେକା ଏ଼ ବାସ୍ତେରି ତାନି ତା଼ଣା ଇଟାହାଁ ଡ଼ୟିତେ। 17ଏଚେଟିଏ ଏ଼ଦି ତାନି ଡକ୍ରାଇଁ ଏ଼ କାତେଏ ଏଲେଇଚେ, “ନୀନୁ ଏମିନି ଏବ୍ରି ହ଼ଲେଏଣାଇଁ ମା଼ ତା଼ଣା ତାଚାମାଞ୍ଜି, ଏ଼ୱାସି ନା଼ ତଲେ ଲାଜାତି କାମା କିହାଲି ନା଼ ତା଼ଣା ୱା଼ହାମାଚେସି। 18ଇଞ୍ଜାଁ ନା଼ନୁ କାଜା ଗିୟାଁତଲେ ହା଼ଟାଲିଏ ଏ଼ୱାସି ନା଼ ତା଼ଣା ଈ ବାସ୍ତେରି ପିସାହାଁ ପାଙ୍ଗାତା ହ଼ଟେସି।”
19ଏଚିବେ଼ଲାତା “ନୀ ହ଼ଲେଏସି ନାଙ୍ଗେ ଇଲେକିହିଁ ଲେ଼ମ୍ବାତେସି,” ତାନି ଡକ୍ରିନି ଗୂତିଟି ଈ କାତା ୱେଞ୍ଜାହାଁ ଜସେପତି ସା଼ୱୁକାରି ଗାଡି କାର୍ବି ଆ଼ତେସି। 20ଅ଼ଡ଼େ ଜସେପତି ସା଼ୱୁକାରି ଏ଼ୱାଣାଇଁ ଅ଼ହାଁ ରାଜାତି କା଼ୟିଦି ଗାଟାରି ଡ଼ୟିନି ତା଼ଣା କାୟିଦିତା ଇଟିତେସି; ଏଚେଟିଏ ଜସେପ ଏ଼ କାୟିଦିତା ଡ଼ୟିତେସି। 21ସାମା ପ୍ରବୁ ଜସେପ ତଲେ ମାଚେସି, ଇଞ୍ଜାଁ ଏ଼ୱାଣାଇଁ କାର୍ମା ଆ଼ହାଁ କାୟିଦିତା କା଼ଃନାଣି ନ଼କିତା ନେହାସି କିତେସି। 22ଏଚେଟିଏ ଏ଼ କାୟିଦି କା଼ଃନାସି କାୟିଦି ଇଲୁତି ବାରେ କାୟିଦିତା ମାନାରି ମୁହେଁ ଅଦିକାରା ଜସେପକି ହୀତେସି ଅ଼ଡ଼େ ଏ଼ୱାରି ଏ଼ନା ଏ଼ନାଆଁ କିତେରି ଏ଼ ବାରେତି କାଜାସି ଏ଼ୱାସି ଆ଼ତେସି। 23କାୟିଦି ଇଲୁ ସିନିକିନାସି ଜସେପକି ହୀପ୍କିଆ଼ତି ଏ଼ନି କାମା ସିନିକିଆତେସି, ଇଚିହିଁ ପ୍ରବୁ ଏ଼ୱାଣି ତଲେ ମାଚେସି; ଇଞ୍ଜାଁ ଏ଼ୱାସି ଏ଼ନାଆଁ କିତେସି ଏ଼ଦାଆଁ ପ୍ରବୁ ତୀରି କିତେସି।
Currently Selected:
ମୂଲୁ 39: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
