ହାନାୟି 8
8
ରୀ ଲମ୍ବର ମର୍ଡ଼ି - ପାନାୟାଁ
1ଏଚେଟିଏ ପ୍ରବୁ ମ଼ସା ଅ଼ଡ଼େ ହାରଣଇଁ ଏଲେଇଚେସି, “ମୀରୁ ପା଼ର ତା଼ଣା ହାଜାହାଁ ଏ଼ୱାଣାଇଁ ଏଲେଇଞ୍ଜୁ, ପ୍ରବୁ ଈ କାତା ଏଲେଇଞ୍ଜି ମାନେସି, ନା଼ ସେ଼ବା କିୟାଲି ତାକି ନା଼ ଲ଼କୁଣି ହାଜାଲି ହୀମୁ।” 2“ସାମା ନୀନୁ ଏ଼ୱାରାଇଁ ହାଜାଲି ହୀଆସାରେ, ନା଼ନୁ ମୀ ବାରେ ମିସର ଦେ଼ସାତି ପାନାୟାଁ ତଲେ ଡଣ୍ତ ହିୟାଇଁ। 3ନିଲ କାଡା ପାନାୟାଁ ତଲେ ନେଞ୍ଜିନେ, ଏଚେଟିଏ ଏ଼ ବାରେ ପାନାୟାଁ ହ଼ଚାହାଁ ମୀ ଇଲୁତା, ମୀ ଡୂରିନି ଇଲୁତା, ପା଼ସ୍ପନିତା, ମୀ ହ଼ଲିୟାଙ୍ଗା ଇଲୁତା, ମୀ ଲ଼କୁ ଲାକ, ମୀ ହଲୁତା ଅ଼ଡ଼େ ଗୁଣ୍ତା ୱୀସ୍କିନି ତା଼ଣା ହ଼ଡ଼୍ଗାୱା଼ନୁ। 4ଇଞ୍ଜାଁ ନୀ ଲାକ ଅ଼ଡ଼େ ମୀ ଲ଼କୁ ଅ଼ଡ଼େ ହ଼ଲିୟାଙ୍ଗା ଲାକ ଗେ଼ମିନୁ।”
5ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ହାରଣଇଁ ୱେହ୍ମୁ, ନୀନୁ କାଡା, ନା଼ଡ଼ା ଅ଼ଡ଼େ ବାନ୍ଦାୟାଁ ଲାକ ନୀ କେୟୁତି ବାଡ଼୍ଗା ଦା଼ସାହାଁ ମିସର ଦେ଼ସାତା ପାନାୟାଁ ତାପିକିମୁ।” 6ଏଚେଟିଏ ହାରଣ ମିସରତି ବାରେ ଏ଼ୟୁ ଲାକ ତାନି କେୟୁ ପେର୍ହାଲିଏ, ପାନାୟାଁ ହ଼ଚାହାଁ ମିସର ଦେ଼ସାତି ସା଼ରିୱାକି ଆ଼ହାହାଚୁ। 7ଏଚିବେ଼ଲା ଗୂର୍କା ତାମି ଗାର୍ଡ଼ି ତଲେ ଏଲେକିହିଁଏ କିହାଁ ମିସର ଦେ଼ସାତା ପାନାୟାଁ ତାତେରି।
8ଏଚେଟିଏ ପା଼ର ମ଼ସା ଅ଼ଡ଼େ ହାରଣଇଁ ହା଼ଟିକିହାଁ ଏଲେଇଚେସି, “ମା଼ ତା଼ଣାଟି ମା଼ ଲ଼କୁ ତା଼ଣାଟି ଈ ବାରେ ପାନାୟାଁ ହେକ ଆ଼ହାଲି ତାକି ପ୍ରବୁ ତା଼ଣା ପ୍ରା଼ତାନା କିଦୁ; ଏଚେଟିଏ ନା଼ନୁ ପ୍ରବୁତି ପୂଜା କିହାଲି ତାକି ଲ଼କୁଣି ହାଜାଲି ହୀଇଁ।”
9ଏଚେଟିଏ ମ଼ସା ପା଼ରଇଁ ଏଲେଇଚେସି, “ନା଼ ତାକି ବଡପଣ କିମୁ; ପାନାୟାଁ ଏ଼ନିକିଁ ମୀ ତା଼ଣାଟି ଅ଼ଡ଼େ ମୀ ଇଲ୍କାଟି ହେକ ଆ଼ହାଁ ୱାର୍ଇ କାଡାତା ଡ଼ୟିନୁ, ନିଙ୍ଗେ ଅ଼ଡ଼େ ମୀ ହ଼ଲିୟାଙ୍ଗା ଅ଼ଡ଼େ ଲ଼କୁ ତାକି ପ୍ରବୁ ତା଼ଣା ଏଚେଲା ଈ ପ୍ରା଼ତାନା କିଇଁ ?”
10ଏ଼ୱାସି ଏଲେଇଚେସି, “ୱିଏ କିଦୁ।” ଏଚେଟିଏ ମ଼ସା ଏଲେଇଚେସି, “ମା଼ ପ୍ରବୁ ମାହାପୂରୁ ଲେହେଁ ଆମ୍ବାଆସି ହିଲଅସି, ଈଦାଣି ନୀନୁ ଏ଼ନିକିଁ ପୁଞ୍ଜି, ଏ଼ଦାଆଁତାକି ନୀ ବ଼ଲୁ ଲେହେଁ ଆ଼ପେ। 11ପାନାୟାଁ ମୀ ତା଼ଣାଟି ଅ଼ଡ଼େ ମୀ ଇଲ୍କା, ହ଼ଲିୟାଙ୍ଗା ଅ଼ଡ଼େ ବାରେ ଲ଼କୁ ତା଼ଣାଟି ହେକ ଆ଼ହାଁ ୱାର୍ଇ କାଡାତା ଡ଼ୟିନୁ।” 12ଏଚେଟିଏ ମ଼ସା ଅ଼ଡ଼େ ହାରଣ ପା଼ର ତା଼ଣାଟି ପାଙ୍ଗାତା ହାଚେରି; ଇଞ୍ଜାଁ ମ଼ସା ପା଼ର କ଼ପାଟି ତାଚାମାନି ପାନାୟାଁ ତାକି ପ୍ରବୁ ତା଼ଣା ପ୍ରା଼ତାନା କିତେସି। 13ଏଚେଟିଏ ପ୍ରବୁ ମ଼ସାତି ବ଼ଲୁ ଲେହେଁ କିୟାଲିଏ, ଇଲୁତା, ଆଂଗେଣିତା ଅ଼ଡ଼େ ଗୁଡିୟାତା ବାରେ ପାନାୟାଁ ହା଼ତୁ। 14ଏଚେଟିଏ ଲ଼କୁ ଏ଼ ବାରେ ପାନାୟାଁ କୂଡ଼ି କିହାଲିଏ ଦେ଼ସା ଗାନ୍ଦା ଆ଼ହାହାଚେ। 15ସାମା ପା଼ର, କସ୍ତ ଗୁଚା ଆ଼ହାଲିଏ, ପ୍ରବୁତି ବ଼ଲୁ ଲେହେଁ ତାନି ହିୟାଁତି ଆ଼ଟ୍ୱା କିତେସି ଅ଼ଡ଼େ ଏ଼ୱାରି କାତାତା ମ଼ନ ହୀଆତେସି।
ତିନି ଲମ୍ବର ମର୍ଡ଼ି - ପେ଼ଣ୍କା
16ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ହାରଣଇଁ ଏଲେଇନାମୁ, ବାରେ ମିସର ଦେ଼ସାତା ଏ଼ନିକିଁ ପେ଼ଣ୍କା ଆ଼ନୁ, ଏ଼ଦାଆଁତାକି ନୀନୁ ନୀ ବାଡ଼୍ଗା ଲାକ ପେର୍ହାଁ ବୂମିତି ଦୂଡ଼ିତା ୱେ଼ମୁ।” 17ଏଚେଟିଏ ଏ଼ୱାରି ଏଲେକିହିଁ କିତେରି; ହାରଣ ତାନି କେୟୁତି ବାଡ଼୍ଗା ଦା଼ସାହାଁ ବୂମିତି ଦୂଡ଼ିତା ୱେ଼ଚାଲିଏ, ମାଣ୍ସି ଅ଼ଡ଼େ ଜ଼ନ୍ତୟାଁ ଆଙ୍ଗାତା ପେ଼ଣ୍କା ଆ଼ତୁ; ଇଞ୍ଜାଁ ମିସର ଦେ଼ସା ବୂମିତି ବାରେ ଦୂଡ଼ି ପେ଼ଣ୍କା ଆ଼ତୁ। 18ଏଚିବେ଼ଲା ମିସର ଦେ଼ସାତି ଗୂର୍କା ଜିକେଏ ଜାହାରା ଗାର୍ଡ଼ି ତଲେ ଏଲେକିହିଁଏ ପେ଼ଣ୍କା ତାଚାଲି ମା଼ଟ୍ହେରି, ସାମା ଆ଼ଡାଆତେରି; ଏଚେଟିଏ ମାଣ୍ସିୟାଁ ଅ଼ଡ଼େ ଜ଼ନ୍ତୟାଁ ଆଙ୍ଗାତା ପେ଼ଣ୍କା ଆ଼ତୁ। 19ଏଚେଟିଏ ଗୂର୍କା ପା଼ରଇଁ ଏଲେଇଚେରି, “ଈଦି ମାହାପୂରୁ କେୟୁତି କାମା,” ଆ଼ତି ଜିକେଏ ପ୍ରବୁତି ବ଼ଲୁ ଲେହେଁ ପା଼ରତି ମ଼ନ ଆ଼ଟ୍ୱା ଆ଼ତେ, ଇଞ୍ଜାଁ ପା଼ର ଏ଼ୱାରି ବ଼ଲୁତା ମ଼ନ ହୀଆତେସି।
ସା଼ରି ଲମ୍ବର ମର୍ଡ଼ି - ନା଼ସା କିନି ପାଟୁକି ୱୀହାଁୟାଁ
20ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ଲା଼ଇଏ ନିଙ୍ଗାହାଁ ପା଼ର ନ଼କିତା ନିମୁ; ମେହ୍ମୁ, ଏ଼ୱାସି ଏ଼ୟୁ ଦାରି ୱା଼ତିସାରେ, ନୀନୁ ଏ଼ୱାଣାଇଁ ଈ କାତା ଏଲେଇନାମୁ, ପ୍ରବୁ ଏଲେଇଞ୍ଜି ମାନେସି, ନା଼ ସେ଼ବା କିୟାଲି ତାକି ନା଼ ଲ଼କୁଣି ହାଜାଲି ହୀମୁ। 21ଅ଼ଡ଼େ ନା଼ ଲ଼କୁଣି ହାଜାଲି ହୀଅତି, ଆତିହିଁ ନା଼ନୁ ମୀ ଲାକ ଅ଼ଡ଼େ ମୀ ହ଼ଲିୟାଙ୍ଗା ଲାକ ଅ଼ଡ଼େ ମୀ ଲ଼କୁତି ଲାକ ଅ଼ଡ଼େ ନୀ ଇଲୁ ବିତ୍ରା ଇଲେତି ନା଼ସା କିନି ପାଟୁକି ୱୀହାଁୟାଁ ପାଣ୍ତାଇଁ, ଏ଼ ପାଟୁକି ୱୀହାଁୟାଁ ମିସର ଲ଼କୁତି ଇଲୁ ଅ଼ଡ଼େ ବାସା ଟା଼ୟୁତା ନେଞ୍ଜିନୁ। 22ଇଞ୍ଜାଁ ଦାର୍ତି ବିତ୍ରା ୱାର୍ଇ ନା଼ନୁ ପ୍ରବୁତେଏଁ, ଈ କାତା ନିଙ୍ଗେ ୱେସାଲି ତାକି ଏ଼ ଦିନା ନା଼ ଲ଼କୁତି ବାସା ଟା଼ୟୁ ଗ଼ସନ୍ ରା଼ଜି ଏଟ୍କା କିଇଁ; ଏମ୍ବାଆଁ ନା଼ସା କିନି ପାଟୁକି ୱୀହାଁୟାଁ ଆ଼ଉ।” 23ନା଼ନୁ ନା଼ ଲ଼କୁ ଅ଼ଡ଼େ ନୀ ଲ଼କୁ ବିତ୍ରା ବା଼ଗା#8:23 ଏବ୍ରି ହା଼ଡା ତଲେ ଗେଲ୍ପିଇଁ କିଇଁ; ୱିଏ ଈ ସିନା ଆ଼ନେ। 24ଏଚେଟିଏ ପ୍ରବୁ ଏଲେକିହିଁଏ କିତେସି; ଏଚେଟିଏ ପା଼ର ଅ଼ଡ଼େ ତାମି ହ଼ଲିୟାଙ୍ଗା ଇଜ ନା଼ସା କିନି କାଜା କାଜା ପାଟୁକି ୱୀହାଁୟାଁ ଆ଼ତୁ; ଇଞ୍ଜାଁ ବାରେ ମିସର ଦେ଼ସାତା ନା଼ସା କିନି ପାଟୁକି ୱୀହାଁୟାଁ ତାକି ବାରେ ନସ୍ତ ଆ଼ତେ।
25ଏଚିବେ଼ଲା ପା଼ର ମ଼ସା ଅ଼ଡ଼େ ହାରଣଇଁ ହା଼ଟିକିହାଁ ଏଲେଇଚେସି, “ମୀରୁ ହାଜାହାଁ ମୀ ମାହାପୂରୁ ତାକି ଈ ଦେ଼ସାତା ପୂଜା କିଦୁ।”
26ଏଚେଟିଏ ମ଼ସା ଏଲେଇଚେସି, “ଏଲେ କିତିସାରେ ନେହେଁ ଆ଼ଏ; ଏଲେ କିତିସାରେ, ମା଼ମ୍ବୁ ପ୍ରବୁ ମାହାପୂରୁ କ଼ସମି ମିସର ଲ଼କୁତି ଅ଼ପାଆଗାଟି ପୂଜା କିହାଲି ଆ଼ନେ; ମେହ୍ଦୁ ମିସର ଲ଼କୁ ନ଼କିତା ଏ଼ୱାରି ଅ଼ପାଆଗାଟି ପୂଜା କିତିସାରେ, ଏ଼ୱାରି କି ମାଙ୍ଗେ ୱାଲ୍କା ୱେ଼ଚାନା ପା଼ୟଅରି ? 27ଏ଼ଦାଆଁତାକି ମା଼ମ୍ବୁ ତୀନି ଦିନା ଜିରୁ ବାଟାତା ହାଜାହାଁ ମା଼ ପ୍ରବୁ ମାହାପୂରୁ ଏ଼ନି ହୁକୁମି ହିୟାନେସି, ଏଲେକିହିଁ ଏ଼ୱାଣି କ଼ସମି ପୂଜା କିନମି।”
28ଏଚେଟିଏ ପା଼ର ଏଲେଇଚେସି, “ନା଼ନୁ ମିଙ୍ଗେ ହାଜାଲି ହିୟାଇଁ, ମୀରୁ ବାଟାତା ହାଜାହାଁ ମୀ ପ୍ରବୁ ମାହାପୂରୁ କ଼ସମି ପୂଜା କିଦୁ; ସାମା ହା଼ରେକା ହେକ ହାଲାଆଦୁ, ଇଞ୍ଜାଁ ମାଙ୍ଗେ ତାକି ଜିକେଏ ପ୍ରା଼ତାନା କିଦୁ।”
ଏଚେଟିଏ ମ଼ସା ଏଲେଇଚେସି, “ମେହ୍ମୁ, ନା଼ନୁ ନୀ ତା଼ଣାଟି ହାଜାହାଁ ପ୍ରବୁ ନ଼କିତା ପ୍ରା଼ତାନା କିଇଁ, ଏଚେଟିଏ ନୀ ତା଼ଣାଟି ଅ଼ଡ଼େ ନୀ ହ଼ଲିୟାଙ୍ଗା ତା଼ଣାଟି ଅ଼ଡ଼େ ନୀ ଲ଼କୁ ତା଼ଣାଟି ୱିଏ ବାରେ ନା଼ସା କିନି ପାଟୁକି ୱୀହାଁୟାଁ ହେକ ଆ଼ନୁ; ସାମା ପ୍ରବୁତି କ଼ସମି ପୂଜା କିହାଲି ତାକି ଲ଼କୁ ହାନି କାତା ପା଼ର ଅ଼ଡ଼େ ୱେଣ୍ତେ ନା଼ଡ଼ିକିଅତି।” ଏଚେଟିଏ ମ଼ସା ପା଼ର ତା଼ଣାଟି ହ଼ଚା ହାଜାହାଁ ପ୍ରବୁ ତା଼ଣା ପ୍ରା଼ତାନା କିତେସି।
ଏଚେଟିଏ ପ୍ରବୁ ମ଼ସାତି ପ୍ରା଼ତାନା ଲେହେଁ ପା଼ର ତା଼ଣାଟି ଅ଼ଡ଼େ ତାମି ହ଼ଲିୟାଙ୍ଗା ଇଞ୍ଜାଁ ଲ଼କୁ ତା଼ଣାଟି ବାରେ ନା଼ସା କିନି ପାଟୁକି ୱୀହାଁୟାଁ ହେକ କିତେସି; ରଣ୍ତି ଜିକେଏ ଡ଼ୟାଆତୁ। ନୀଏଁ ଜିକେଏ ପା଼ର ତାନି ହିୟାଁ ଆ଼ଟ୍ୱା କିତେସି ଅ଼ଡ଼େ ଲ଼କୁଣି ହାଜାଲି ହୀଆତେସି।
Currently Selected:
ହାନାୟି 8: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
