ହାନାୟି 38
38
ହୂଡିନି ପିଣ୍ତା କିନାୟି
(ହାନାୟି ୨୭:୧-୮)
1ଏଚେଟିଏ ଏ଼ୱାସି ସିଟିମ ମା଼ର୍କା ତଲେ ପା଼ସା ହା଼ତା ଲାମ୍ବା, ପା଼ସା ହା଼ତା ଅ଼ସାରା ଅ଼ଡ଼େ ତୀନି ହା଼ତା ପାଡ୍ଣି ସା଼ରି କନ ହିଚୁତା ହୂଡିନି ପୂଜା ପିଣ୍ତା ତିୟାରା କିତେସି। 2ଇଞ୍ଜାଁ, ଏ଼ଦାଣି ସା଼ରି କନ ଲାକ କମ୍କା କିହାଁ ପିତାଡ଼ା ୱା଼ରି କିତେସି; ଏ଼ କମ୍କା ବାରେ ଏମ୍ବାତି ବା଼ଗା ଆ଼ତୁ। 3ଅ଼ଡ଼େ ଏ଼ୱାସି ପୂଜା ପିଣ୍ତାତି ବାରେ ଗିନା ସିପା, ଇଚିହିଁ, ଦାର୍ମ୍ବୁ ଡ଼େୱିନି ଗ଼ରା, ହିଚୁ ଡ଼େୱିନି ହାଟ୍ୱା, କାଜା ସିପା, ତିନି ଡେ଼ଡ଼ା ବା଼ଲା ଅ଼ଡ଼େ ହିଚୁ ଗ଼ରା, ଈ ବାରେ ଆ଼ସ୍ତି ପିତାଡ଼ା ତଲେ ତିୟାରା କିତେସି। 4ଈ ପୂଜା ପିଣ୍ତାତି କାତି ଡ଼଼ଇଟିଏ ମାଦି ପାତେକା ପିତାଡ଼ାତି ଜା଼ଲି କିତେସି। 5ଇଞ୍ଜାଁ, ଟେଙ୍ଗା ପେତାଲି ତାକି ଏ଼ ପିତାଡ଼ା ଜା଼ଲିତି ସା଼ରି କନତା ସା଼ରିଗଟା କାଡ୍ୱାୟାଁ କିତେସି। 6ଅ଼ଡ଼େ ଏ଼ୱାସି ସିଟିମ ମା଼ର୍କାତି ଟେଙ୍ଗାୟାଁ କିହାଁ ପିତାଡ଼ା ତଲେ ୱା଼ରି କିତେସି। 7ପୂଜା ପିଣ୍ତା ଡେ଼କାଲି ଏ଼ ଦାରିତି ଲାକ କାଡ୍ୱାୟାଁଣା ଟେଙ୍ଗା ପେନ୍ଦିତେସି; ଇଞ୍ଜାଁ, ପା଼ଗେଡ଼ି ପିସାହାଁ ମା଼ର୍ନୁ ପା଼ଟା ତଲେ ପୂଜା ପିଣ୍ତା ତିୟାରା କିତେସି।
ପିତାଡ଼ା ଏ଼ୟୁ କୁଣ୍ତି କିନାୟି
(ହାନାୟି ୩୦:୧୮)
8ଅ଼ଡ଼େ ଏମିନି ଇୟାସିକା ଆଣ୍ତ୍ୱିଆ଼ନି ତୂମୁ ଦୁୱେରିତା ସେ଼ବା କାମା କିହିମାଚୁ, ଏ଼ ସେ଼ବା କାମା କିହିମାଚି ଇୟାସିକା ପିତାଡ଼ା ତଲେ କେ଼ପାମାଚି ଦାର୍ପେଣି ତଲେ ଏ଼ ନର୍ହା କଡିନି କୁଣ୍ତି ଅ଼ଡ଼େ କୁଣ୍ତି କୁଗିନି ପିଣ୍ତା ତିୟାରା କିତୁ।
ତୂମୁତି ଆଂଗେଣି କିନାୟି
(ହାନାୟି ୨୭:୯-୧୯)
9ଏଚେଟିଏ ଏ଼ୱାସି ତୂମୁତି ଆଂଗେଣି ତିୟାରା କିତେସି; ଟିଃନି ଆଂଗେଣିତି ଟିଃନି ଦାରି ରୁତି ଦବ୍ଲା ପା଼ତାଡ଼ା ଲୂଲୁ ତଲେ ପା଼ସା କ଼ଡ଼ି ହା଼ତା ଟା଼ଟିନି ହିମ୍ବରି କେ଼ପିତେସି। 10ଏମ୍ବାତି କଡ଼େଗଟା ମୁଣ୍ତାୟାଁ ଅ଼ଡ଼େ କଡ଼େଗଟା ପତ୍ପିଆ଼ତି କଟ୍ଲାୟାଁ#38:10 କଟ୍ଲାୟାଁ/ପା଼ଟା ଅ଼ଡ଼େ ମୁଣ୍ତା ଆ଼ଟ୍ୱା ତଲେ ନିପ୍ନାଇ । ପିତାଡ଼ା ତଲେ ଅ଼ଡ଼େ ମୁଣ୍ତାୟାଁତି ଡ:ଙ୍କିୟାଁ ଅ଼ଡ଼େ ତୀଗାୟାଁ ୱେଣ୍ତିତାଇ ମାଚୁ। 11ଟେ଼ବ୍ରି ୱାକିତି ଟା଼ଟିନି ହିମ୍ବରି ପା଼ସା କ଼ଡ଼ି ହା଼ତା, ଇଞ୍ଜାଁ, ଏମ୍ବାତି କଡ଼େଗଟା ମୁଣ୍ତାୟାଁ, ଅ଼ଡ଼େ କଡ଼େଗଟା ପତ୍ପିଆ଼ତି କଟ୍ଲାୟାଁ ପିତାଡ଼ା ଅ଼ଡ଼େ ମୁଣ୍ତାୟାଁତି ଡ:ଙ୍କିୟାଁ ଅ଼ଡ଼େ ତୀଗାୟାଁ ୱେଣ୍ତି ମାଚୁ। 12ୱେ଼ଡ଼ା କୂଡ଼୍ନି ୱାକିତି ଟା଼ଟିନି ହିମ୍ବରି ଦୁଇ କ଼ଡ଼ି ଦସ ହା଼ତା ମାଚେ, ଏମ୍ବାତି ଦସଗଟା ମୁଣ୍ତାୟାଁ ଅ଼ଡ଼େ ଦସଗଟା ପତ୍ପିଆ଼ତି କଟ୍ଲାୟାଁ, ଇଞ୍ଜାଁ, ମୁଣ୍ତାତି ଡ:ଙ୍କିୟାଁ ଅ଼ଡ଼େ ତୀଗାୟାଁ ୱେଣ୍ତି ମାଚୁ। 13ୱେ଼ଡ଼ା ହ଼ପୁ ୱାକି ତାକି ଦୁଇ କ଼ଡ଼ି ଦସ ହା଼ତା ମାଚେ। 14ଦୁୱେରିତି ରକୱାକି ତାକି ପନ୍ଦର ହା଼ତା ଟା଼ଟିନି ହିମ୍ବରି ଅ଼ଡ଼େ ଏମ୍ବାତି ତୀନିଗଟା ମୁଣ୍ତାୟାଁ ଅ଼ଡ଼େ ତୀନିଗଟା ପତ୍ପିଆ଼ତି କଟ୍ଲାୟାଁ ମାଚୁ। 15ଏଲେକିହିଁଏ ଅ଼ର ୱାକି ତାକି ମାଚୁ। ଆଂଗେଣି ଦୁୱେରି ଦାରି ଇତାଲା ଟଟ ଅ଼ଡ଼େ ଆତାଲା ଟଟ ପନ୍ଦର ହା଼ତା ଟା଼ଟିନି ହିମ୍ବରି ଅ଼ଡ଼େ ଏମ୍ବାଆଁ ତୀନିଗଟା ମୁଣ୍ତାୟାଁ ଅ଼ଡ଼େ ତୀନିଗଟା ପତ୍ପିଆ଼ତି କଟ୍ଲାୟାଁ ମାଚୁ। 16ଆଂଗେଣିତି ସା଼ରି ୱାକିତି ବାରେ ଟା଼ଟିନି ହିମ୍ବରି ରୁତି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା ଆ଼ହାମାଚେ। 17ଇଞ୍ଜାଁ ମୁଣ୍ତାୟାଁତି ପତ୍ପିଆ଼ତି କଟ୍ଲାୟାଁ ବାରେ ପିତାଡ଼ା ମାଚୁ; ମୁଣ୍ତାୟାଁତି ଡ:ଙ୍କିୟାଁ ଅ଼ଡ଼େ ତୀଗାୟାଁ ୱେଣ୍ତିତାଇ ମାଚୁ; ଏମ୍ବାତି ସିଣ୍ତିୟାଁ ୱେଣ୍ତି ୱା଼ରି କିତାଇ; ଇଞ୍ଜାଁ, ୱେଣ୍ତି ତୀଗାୟାଁ ତଲେ ଆଂଗେଣିତି ବାରେ ମୁଣ୍ତାୟାଁ ଆଣ୍ତାମାଚୁ। 18ଅ଼ଡ଼େ ଆଂଗେଣି ଦୁୱେରିତି ପ୍ଡିକ୍ନି ହିମ୍ବରି ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା କିତାୟି ଅ଼ଡ଼େ ଆଂଗେଣିତି ଟା଼ଟନି ହିମ୍ବରି ସମାନା ଏ଼ଦି ଲାମ୍ବା କଡ଼େ ହା଼ତା ଅ଼ସାରା ପା଼ସା ହା଼ତା ପାଡ୍ଣି ମାଚେ। 19ଇଞ୍ଜାଁ, ଏମ୍ବାତି ପିତାଡ଼ାତି ସା଼ରିଗଟା ମୁଣ୍ତାୟାଁ, ସା଼ରିଗଟା ପତ୍ପିଆ଼ତି କଟ୍ଲାୟାଁ, ୱେଣ୍ତିତି ଡ:ଙ୍କିୟାଁ ଅ଼ଡ଼େ ଏମ୍ବାତି ସିଣ୍ତି ୱେଣ୍ତି ୱା଼ରି କିତାଇ ଅ଼ଡ଼େ ୱେଣ୍ତିତି ତୀଗାୟାଁ ମାଚୁ। 20ଇଞ୍ଜାଁ, ଆଣ୍ତ୍ୱିଆ଼ନି ତୂମୁ ଅ଼ଡ଼େ ଆଂଗେଣି ସା଼ରି ୱାକିତି ବାରେ କୁଟିୟାଁ ପିତାଡ଼ା ମାଚୁ।
ତୂମୁତା ଲେ଼ମ୍ବିତି ଆ଼ସ୍ତି
21ଲେ଼ବିୟ ଲ଼କୁତି କାମା ତାକି ହାରଣ ପୂଜେରା ମୀର୍ଏସି ଇତାମର ତା଼ଣାଟି ମ଼ସାତି ହୁକୁମି ଲେହେଁ ଆଣ୍ତ୍ୱିଆ଼ନି ତୂମୁ, ଇଚିହିଁ, ସା଼କି ଲେହେଁତି ଆଣ୍ତ୍ୱିଆ଼ନି ତୂମୁତି ଲେକା କିତି ଆ଼ସ୍ତି, ଈ ବାରେ ଲେକା କିୱିଆ଼ତେ।
22ପ୍ରବୁ ମ଼ସାକି ଏମିନି ହୁକୁମି ହୀହାମାଚେସି, ଏ଼ ଲେକା ତଲେ ଜୀହୁଦା କୂଡ଼ାଟି ଜାର୍ନା ଆ଼ହାମାଚି ହୁର ତାଙ୍ଗା ମୀର୍ଏସି ଉରି ମୀର୍ଏସି ବସ୍ଚଲେଲ ଏ଼ ବାରେ ତିୟାରା କିହାମାଚେସି। 23ଅ଼ଡ଼େ ନୀଲି, ହେୟାଁ, ନେତେରି ୱା଼ଣା ରୁତି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା କିତେସି, ପତ୍ହାସି ଅ଼ଡ଼େ ବୁଦିଗାଟି ହିମ୍ବରିକା ଆଲିନି ଦାନ୍ କୂଡ଼ାତା ଜାର୍ନା ଆ଼ତି ଅହିସାମକ ମୀର୍ଏସି ଅହଲିୟାବ ସା଼ୟେମି କିନାସି ମାଚେସି।
24ସୁଦୁ ଟା଼ୟୁ ତିୟାରା କିନି ବାରେ କାମାତା ଈ ବାରେ ବାଂଗାରା ଲାଗିତେ, ଇଚିହିଁ, ଦା଼ନାତି ବାରେ ବାଂଗାରା ସୁଦୁ ଟା଼ୟୁତି ସେକଲ ତଲେ କଡ଼େ ନ଼ହଁ ତାଲନ୍ତ#38:24 ତାଲନ୍ତ/୧ ତାଲନ୍ତ ୩୪ କେ଼ଜି ।, ସା଼ତା ୱାଞ୍ଜା କଡ଼େ ଦସ ସେକଲ#38:24 ସେକଲ/୧ ସେକଲ ର଼ ଦିନାତି କୂଲି । ବାଂଗାରା ମାଚେ। 25ଇଞ୍ଜାଁ, କୁଲମିତି ଲେକା କିତି ଲ଼କୁତି ୱେଣ୍ତି ସୁଦୁ ଟା଼ୟୁତି ସେକଲ ତଲେ ର଼ ୱାଞ୍ଜା ତାଲନ୍ତ, ର଼ ମା଼ଣା ସା଼ତା ୱାଞ୍ଜା ତୀନିକ଼ଡ଼ି ପନ୍ଦର ସେକଲ ମାଚେ। 26ଲେକା କିତି ବାରେ ଲ଼କୁ ତାକି, ଇଚିହିଁ, ଆମ୍ବାଆରି କଡ଼େ ବାର୍ସା, ଅ଼ଡ଼େ କଡ଼େ ବାର୍ସାଟିଏ ଆଗାଡ଼ା ଆ଼ହାମାଚେ, ଏ଼ ସ଼ ଲାକେ ତୀନି ମା଼ଣା ପା଼ସାୱାଞ୍ଜା ଦୁଇ କ଼ଡ଼ି ଦସଜା଼ଣା ଲ଼କୁ ବିତ୍ରା ବାରେ ଜା଼ଣା ତାକି ର଼ ର଼ ବେକା#38:26 ର଼ ବେକା/୫/୭ ଗ୍ରାମ ବ଼ଜୁ ।, ଇଚିହିଁ, ସୁଦୁ ଟା଼ୟୁତି ସେକଲ ଲେକା ତଲେ ଆଦା ସେକଲ ହୀନାୟି ମାଚେ। 27ଇଞ୍ଜାଁ ଏ଼ ର଼ ମା଼ଣା ତାଲନ୍ତ ୱେଣ୍ତି ତଲେ ସୁଦୁ ଟା଼ୟୁ ଅ଼ଡ଼େ ଏଟ୍କା କିନି ହିମ୍ବରିକାତି ପତ୍ପିଆ଼ତି କଟ୍ଲାୟାଁ କିତେରି, ର଼ ୱାଞ୍ଜା ପତ୍ପିଆ଼ତି କଟ୍ଲାୟାଁ ତାକି ର଼ ୱାଞ୍ଜା ତାଲନ୍ତ, ଇଚିହିଁ ର଼ ର଼ ପତ୍ପିଆ଼ତି କଟ୍ଲା ତାକି ର଼ ର଼ ତାଲନ୍ତ ୱେଣ୍ତି କାର୍ଚୁ ଆ଼ତେ। 28ଇଞ୍ଜାଁ ଏ଼ ର଼ ମା଼ଣା ସା଼ତା ୱାଞ୍ଜା ତୀନି କ଼ଡ଼ି ପନ୍ଦର ସେକଲ ୱେଣ୍ଡି ତଲେ ଏ଼ୱାସି ମୁଣ୍ତାୟାଁ ତାକି ଡ:ଙ୍କିୟାଁ ତିୟାରା କିତେସି ଅ଼ଡ଼େ ଏମ୍ବାତି ସିଣ୍ତିୟାଁ କିହାଁ ତୀଗାୟାଁ ଆଟ୍ହେସି। 29ଇଞ୍ଜାଁ, ଦା଼ନା କିତି ପିତାଡ଼ା ତୀନି କ଼ଡ଼ି ଦସ ତାଲନ୍ତ ରୀ ମା଼ଣା ସା଼ରି ୱାଞ୍ଜା ସେକଲ ମାଚେ। 30ଇଞ୍ଜାଁ ଏ଼ୱାସି ଏ଼ଦାଣି ତଲେ ଆଣ୍ତ୍ୱିଆ଼ନି ତୂମୁ ଦୁୱେରିତି ପତ୍ପିଆ଼ତି କଟ୍ଲା, ପିତାଡ଼ାତି ପୂଜା ପିଣ୍ତା ଅ଼ଡ଼େ ଏମ୍ବାତି ପିତାଡ଼ା ଜା଼ଲି ଅ଼ଡ଼େ ପୂଜା ପିଣ୍ତାତି ବାରେ ଗିନା ସିପା, 31ଇଞ୍ଜାଁ ଆଂଗେଣିତି ସା଼ରି ୱାକିତି ପତ୍ପିଆ଼ତି କଟ୍ଲାୟାଁ ଅ଼ଡ଼େ ଆଂଗେଣି ଦୁୱେରିତି ପତ୍ପିଆ଼ତି କଟ୍ଲାୟାଁ ଇଞ୍ଜାଁ ବାସା ଟା଼ୟୁତି ବାରେ କୁଟିୟାଁ ଅ଼ଡ଼େ ଆଂଗେଣି ସା଼ରି ୱାକିତି ବାରେ କୁଟିୟାଁ ତିୟାରା କିତେସି।
Currently Selected:
ହାନାୟି 38: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
