ହାନାୟି 13
13
ମୂଲୁ ଜାର୍ନା ଆ଼ତାରାଇଁ ହେର୍ପିନାୟି
1ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, 2“ଇସ୍ରାୟେଲ ମୀର୍କା ବିତ୍ରାଟି ମାଣ୍ସି ଆ଼ପେସି କି ଜ଼ନ୍ତ ଆ଼ପେ, ଆମ୍ବାଆସି ତଲିଏ ଜାର୍ନା ଆ଼ନେସି, ଏ଼ ତଲିଏ ଜାର୍ନା ଆ଼ତି କକାସି ଆ଼ପେ କି ଜ଼ନ୍ତ ବିତ୍ରାତି ପ଼ତୁ ନା଼ କ଼ସମି ହେର୍ପାଦୁ; ଏ଼ ବାରେ ନା଼ୱି।”
ପୁଲା ଆଣ୍ତାଆତି ରୂଟିତି ପାର୍ବୁ
3ଏଚେଟିଏ ମ଼ସା ଲ଼କୁଣି ଏଲେଇଚେସି, “ଈ ଦିନାତି ଅଣ୍ପୁତା ଇଟାଦୁ, ଇଚିହିଁ ଈ ଦିନା ମୀରୁ ହ଼ଲିୟାଙ୍ଗା ଲେହେଁ ବାସା ଆ଼ହାମାଚି ମିସର ଦେ଼ସାଟି ହ଼ଚା ୱା଼ତେରି, ଅ଼ଡ଼େ ପ୍ରବୁ ତାନି ବା଼ଡ଼୍ୟୁ ତଲେ ଏମ୍ବାଟି ମିଙ୍ଗେ ହ଼ପ୍ହା ତାତାତେସି; ଏ଼ ଦିନା ପୁଲା ଆଣ୍ତିତି ରୂଟି ତିନଅତେରି। 4ମୀରୁ ଆବିବ୍ ଲେ଼ଞ୍ଜୁତି ଈ ଦିନା ହ଼ଚା ୱା଼ତେରି। 5ଅ଼ଡ଼େ କିଣାନ, ହୀତିୟ, ଇମରିୟ, ହିବିୟ, ଅ଼ଡ଼େ ଜିବୁସିୟ ଲ଼କୁତି ଏମିନି ଦେ଼ସା ମିଙ୍ଗେ ହୀହାଲି ପ୍ରବୁ ମୀ ଆକୁ ଆ଼ବାୟାଁ ତା଼ଣା ପାର୍ମାଣା କିହାମାଚେସି, ଏ଼ ପା଼ଲୁ ଅ଼ଡ଼େ କିର୍ୟାଁ ରେ଼ଚାୱା଼ନି ଦେ଼ସାତା ଏଚିବେ଼ଲା ଏ଼ୱାସି ମିଙ୍ଗେ ତାତାନେସି, ଏଚିବେ଼ଲା ମୀରୁ ଏ଼ ଲେ଼ଞ୍ଜୁ ଈ ସେ଼ବାତି କାମା କିଦେରି। 6ୱା଼ରା ପାତେକା ପୁଲା ଆଣ୍ତାଆତି ରୂଟି ତିଞ୍ଜେରି ଅ଼ଡ଼େ ସା଼ତା ଦିନାତା ପ୍ରବୁତି କ଼ସମି ପାର୍ବୁ କିଦେରି। 7ଇଞ୍ଜାଁ ଏ଼ ୱା଼ରା ପାତେକା ପୁଲା ଆଣ୍ତାଆତି ରୂଟି ତିଞ୍ଜେରି ଅ଼ଡ଼େ ମୀ ତା଼ଣା ପୁଲା ଆଣ୍ତିତି ରୂଟି ଡ଼ୟାଆପେ, ଅ଼ଡ଼େ ମୀ ବାରେ ଦେ଼ସାତା ପୁଲା ତ଼ଞ୍ଜା ଆ଼ଆପେ। 8ଇଞ୍ଜାଁ ଏ଼ ଦିନା ମୀରୁ ମୀ ମୀର୍କା ମା଼ସ୍କାଣି ୱେହ୍ଦେରି; ‘ମିସର ଦେ଼ସାଟି ମା଼ମ୍ବୁ ହ଼ଚା ୱା଼ତାଟି ପ୍ରବୁ ମାଙ୍ଗେ ତାକି ଏ଼ନି ଏ଼ନି କାବାଆ଼ନି କାମାୟାଁ କିହାମାଚେସି; ଏ଼ ବାରେତି ଅଣ୍ପାଲି ତାକି ଈ ପାର୍ବୁ ଆ଼ନେ।’ 9ଇଞ୍ଜାଁ ପ୍ରବୁତି ମେ଼ରା ଏ଼ନିକିହିଁ ମୀ ଗୂତିତା ଡ଼ୟିନେ, ଈଦାଆଁତାକି ଈଦି ର଼ ସିନା ଲେହେଁ ମୀ କେୟୁତା ଅ଼ଡ଼େ ମୀ କାନୁତି ଅଣ୍ପୁତା ଡ଼ୟିନେ; ଇଚିହିଁ ପ୍ରବୁ ତାନି ବା଼ଡ଼୍ୟୁଗାଟି କେୟୁ ତଲେ ମିସର ଦେ଼ସାଟି ମିଙ୍ଗେ ହ଼ପ୍ହା ତାଚା ମାଞ୍ଜାନେସି। 10ଈଦାଆଁତାକି ମୀରୁ ଈ କାଟୁତା ବାର୍ସା ତାକି ବାର୍ସା ଈ ମେ଼ରା ମା଼ନୱି ଆ଼ଦେରି।”
11“ପ୍ରବୁ ମିଙ୍ଗେ ଅ଼ଡ଼େ ମୀ ଆକୁ ଆ଼ବାୟାଁ ତା଼ଣା ଏମିନି ପାର୍ମାଣା କିହାମାନେସି, ଏଲେକିହିଁଏ ଏ଼ୱାସି ଏଚିବେ଼ଲା କିଣାନ ଲ଼କୁତି ଦେ଼ସାତା ହ଼ଡ଼୍ୱି କିହାଁ ମିଙ୍ଗେ ଏ଼ ଦେ଼ସା ହିୟାନେସି; 12ଏଚିବେ଼ଲା ମୀ ତା଼ଣା ଜାର୍ନା ଆ଼ନି ପା଼ଣ୍ୱା ମୀର୍କା ଅ଼ଡ଼େ ଜ଼ନ୍ତ ତା଼ଣାତି ମୂଲୁ ବେତା ପ୍ରବୁତି କ଼ସମି ଏଟ୍କା କିଦେରି; ବାରେ ପ଼ତୁ ପ୍ରବୁୱାୟି ଆ଼ନେ। 13ଇଞ୍ଜାଁ ମୀରୁ ମେ଼ଣ୍ତା ଡା଼ଲୁ ହୀହାଁ ବାରେ ମୂଲୁ ବେତାତି ଗା଼ଡ଼୍ଦେ ମୁକ୍ଲୱି କିଦେରି; ମୁକ୍ଲୱି କିଅତେରି, ଆତିହିଁ ତାନି ହେର୍କି ଡିକ୍ଦେରି; ସାମା ମୀ ମୀର୍କା ବିତ୍ରାଟି ମୂଲୁ ଜାର୍ନାଆ଼ତି ବାରେ ମୀର୍କାଣି ମୁକ୍ଲୱି କିନାୟି ମାନେ। 14ୱା଼ନି ଦିନାତା ମୀ ମୀର୍ଏସି ୱେଞ୍ଜାନେସି, ‘ଈଦି ଏ଼ନାୟି ?’ ଆତିହିଁ ମୀରୁ ଏ଼ୱାରାଇଁ ୱେହ୍ଦେରି, ‘ପ୍ରବୁ ଏଚିବେ଼ଲା ମାଙ୍ଗେ ତାନି ବା଼ଡ଼୍ୟୁଗାଟି କେୟୁତଲେ ମିସର ଦେ଼ସାଟି ହ଼ପ୍ହା ତାତାତେସି, 15ଏଚିବେ଼ଲା ପା଼ର ମାଙ୍ଗେ ପିସା ହିୟାଲି ତାନି ହିୟାଁତି ଆ଼ଟ୍ୱା କିୟାଲିଏ, ପ୍ରବୁ ମିସର ଦେ଼ସାତି ପା଼ଣ୍ୱା ମୀର୍କାଣି ଅ଼ଡ଼େ ଜ଼ନ୍ତତି ମୂଲୁ ବେତାତାଣି ବାରେ ପା଼ୟା ମାଚେସି; ଈଦାଣି ତାକି ମା଼ମ୍ବୁ ମୂଲୁ ବେତାତାଣି ପ୍ରବୁ କ଼ସମି ପୂଜା କିନମି; ସାମା ମା଼ ପା଼ଣ୍ୱା ମୀର୍କାଣି ମୁକ୍ଲୱି କିନମି। 16ଈଦି ସିନା ଲେହେଁ ମୀ କେୟୁତା ଅ଼ଡ଼େ ଆଙ୍ଗାତା ତୁର୍ନି ସାଜୁ ଲେହେଁ ମୀ କାନୁତା ଡ଼ୟିନେ; ଇଚିହିଁ ପ୍ରବୁ ତାନି ବା଼ଡ଼୍ୟୁଗାଟି କେୟୁ ତଲେ ମାଙ୍ଗେ ମିସର ଦେ଼ସାଟି ହ଼ପ୍ହା ତାତାତେସି।’”
ହା଼ଗୁ ମୁଣ୍ତା ଅ଼ଡ଼େ ହିଚୁ ମୁଣ୍ତା
17ଏଚେଟିଏ ପା଼ର ଲ଼କୁଣି ହାଜାଲି ହୀହାଲିଏ ପାଲେସ୍ତିୟ ଦେ଼ସାଟି ହାନି ଜିରୁ ଡାଗେ ଆ଼ତି ଜିକେଏ ପ୍ରବୁ ଏ଼ୱାରାଇଁ ଏ଼ ଜିରୁତା ତା଼କି କିଆତେସି; ଏ଼ନିଇଚିହିଁ ମାହାପୂରୁ ଏଲେଇଚେସି, “ଏଚିବେ଼ଲା ଲ଼କୁ ଜୁଜୁ ଆ଼ନାଣି ମେହ୍ନେରି, ଡା଼ୟୁ ଏ଼ୱାରି ତାମି ମ଼ନ ବାଦ୍ଲି କିହାଁ ମିସର ଦେ଼ସାତା ୱେଣ୍ଡା ହାନେରି।” 18ଈଦାଣି ତାକି ମାହାପୂରୁ ଏ଼ୱାରାଇଁ ସୁପ ସାମ୍ଦୁରି ବାଟାତି ଡ:କ୍ଣି ଜିରୁତା ତା଼କି କିତେସି ଅ଼ଡ଼େ ଇସ୍ରାୟେଲ ଲ଼କୁ ସାଜୁବାଜୁ ଆ଼ହାଁ ମିସରଟିଏ ହାଚେରି।
19ଇଞ୍ଜାଁ ମ଼ସା ଜସେପତି ଡୁମ୍କା ପେ଼ଡ଼୍କା ତାନି ତଲେ ଅ଼ତେସି; ଇଚିହିଁ ଏ଼ୱାସି ଇସ୍ରାୟେଲ ମୀର୍କାଣି ପାର୍ମାଣା କିୱିକିହାଁ ୱେସାମାଚେସି, “ମାହାପୂରୁ ସାତେଏ ମିଙ୍ଗେ ଜାତ୍ନୁ କିୟାନେସି; ଏଚିବେ଼ଲା ମୀରୁ ନା଼ ଡୁମ୍କା ପେ଼ଡ଼୍କା ଇମ୍ବାଟି ଅ଼ହିଁ ହାଜୁ।”
20ଏଚେଟିଏ ଏ଼ୱାରି ସୁକ୍କତଟିଏ ହାଜାହାଁ ବାଟାତି ଜାର୍ଣା ଦାରିତି ଏତମତା ତୂମୁୟାଁ ଗ଼ଞ୍ଜିତେରି। 21ଏ଼ୱାରି ଏ଼ନିକିଁ ଲା଼ଆଁୟାଁ ଅ଼ଡ଼େ ମାଦେନା ତା଼କାଲି ଆ଼ଡିନେରି, ଈଦାଣି ତାକି ପ୍ରବୁ ମାଦେନା ଜିରୁ ତା଼କି କିହାଲି ହା଼ଗୁ ମୁଣ୍ତା ଅ଼ଡ଼େ ଲା଼ଆଁୟାଁ ଉଜେଡ଼ି ହୀହାଲି ତାକି ହିଚୁ ମୁଣ୍ତା ତଲେ ମାଞ୍ଜାହାଁ ଏ଼ୱାରି ନ଼କିତା ହାଚେସି। 22ଏ଼ୱାସି ଲ଼କୁ ନ଼କିତା ମାଦେନା ହା଼ଗୁ ମୁଣ୍ତା ଅ଼ଡ଼େ ଲା଼ଆଁୟାଁ ହିଚୁ ମୁଣ୍ତା ଗୁଚି କିଆତେସି।
Currently Selected:
ହାନାୟି 13: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
