ପାର୍ତୁମ୍ 3
3
ଲୋକୁ ମାଟା ମାନାଇକା
1ସଦାପ୍ରବୁ ମାପୁରୁଦି ତିଆର୍ କିତିମାନି ଜାତୁଆଙ୍ଗ୍ ଲୋଇରାନ୍ ସାରାସ୍ ୱିଜୁୱାନିକା ମାଣାନ୍ ସାଲାକି ମାର୍ହାତ୍ । ଅର୍ଲେନ୍ ୱାଦ୍ ଆଇମାଦିଙ୍ଗ୍ ୱେନ୍ବାତାତ୍, “ଏ, ଇକା ସତ୍ ନୋ, ଡଡିଦି ଏମେ ମାରାତି ପଲ୍ ତିନ୍ଡ୍ରେଙ୍ଗ୍ ମାପୁରୁ ମିଙ୍ଗିଁ ମାନା କିତାମାନାନ୍ ?” 2ଆଇମା ସାରାସ୍ତିଙ୍ଗ୍ ଇର୍ହାତ୍, “ମାପୁ ଡଡିଦି ୱିଜୁ ମାରାକାଣି ପଲ୍ ତିନ୍ଡ୍ରେଙ୍ଗ୍ ଆଟ୍ନାପ୍; 3କେବଲ୍ ଡଡିଦି ନାଡ଼ିମିମାନି ମାରାତି ପଲ୍ତି ବିସୟ୍ତାନ୍ ମାପୁରୁ ଇର୍ହାମାନାନ୍ ମିରୁ ଆକା ତିନ୍ମାଟ୍ କି ମୁଟ୍ମାଟ୍, ଆକା କିତିଙ୍ଗ୍ ସାନିଦେର୍ ।”
4ସାରାସ୍ ଆଇମାଦିଙ୍ଗ୍ ଇର୍ହାତ୍, “ମିରୁ ଏମେ ଜାକ୍ବା ସାଇଦେର୍; 5ମାତର୍ ମାପୁରୁ ନେସ୍ନାନ୍, ମିରୁ ଏମେ ନାଣ୍ତିଙ୍ଗ୍ ଆକା ତିନିଦେର୍, ଆୟା ନାଣ୍ତିଙ୍ଗ୍ ମି କାଣୁକୁ ରେଆନେ, ଆବେଟ୍କୁ ମିରୁ ମାପୁରୁଦି ୱାଜା ନେଗିକା ମାରି ତାଗ୍ଇ ବୁଦି ନେସ୍ନିଦେର୍ ।”
6ଆବେଟ୍ ଆଇମା ଆୟା ମାରାନ୍ତି ନେଗିସାୱିଦି ପଲ୍ ମାରି କାଣାଗାଦି ଲବ୍ ମାରି ବୁଦିସିନି ଆସା ସୁଡ଼ୁଜି ଆବେଟ୍କୁ ପଲ୍ କୟ୍ଜି ତିର୍ହାତ୍, ମାରି ନିଜେଦି କନ୍ଲିଙ୍ଗ୍ ସିତାତ୍, ୱାନ୍ ବା ତିର୍ହାନ୍ । 7ଆବେଟ୍ ୱାରି କାଣୁକୁ ରେଆତେ, ୱାର୍ ନିଜେ ନାଗାଡ଼ା ମାନିକା ସୁଡ଼ୁଜି ସେମାର୍ ଆଜି ତଗା ମାରାନ୍ତି ଆକୁ ଗୁତ୍ସି ଆରାତାର୍ ।
8ଆବେଟ୍ ମିଲିମିଲିକା ବେଡ଼ାଦୁ ଡଡିଦି ଲୋଇ ବୁଲାସାଲାନି ସଦାପ୍ରବୁ ମାପୁରୁଦି ମାଟା ୱେନ୍ଜି ଆଦମ ନି ୱାନି ଆଡ଼ିସି ସଦାପ୍ରବୁ ମାପୁରୁଦି ଲାକ୍ତୁରାନ୍ ଡଡିଦି ମାରାକା ଲୋଇ ମାର୍ଗିତାର୍ । 9ଆବେଟ୍କୁ ସଦାପ୍ରବୁ ମାପୁରୁ ଆଦମତିଙ୍ଗ୍ କୁକ୍ସି ଇର୍ହାନ୍, “ମିରୁ ଏମେମାନୁ ?”
10ୱାନ୍ ଇର୍ହାନ୍, “ନାନୁ ଡଡିଦି ଲୋଇ ନି ମାଟା ୱେନ୍ଜି ନିଜେଦି ଡୁମୁଣ୍ତାଦି ଉଣ୍ତିଙ୍ଗ୍ ତିଲାଜି ମାରିଗିତା ମାନା ।”
11ମାପୁରୁ ଇର୍ହାନ୍, “ମିରୁ ନାଗାଡ଼ା ମାନିଦେର୍, ଇକା ଏନ୍ ମିଙ୍ଗିଁ ୱେର୍ତାନ୍ ? ନାନୁ ଏମେ ମାରାନ୍ତି ପଲ୍ ତିନ୍ଡ୍ରେଙ୍ଗ୍ ମାନା କିତାମାର୍ହା, ଆକା ନ ମିରୁ ତିର୍ହିଦେର୍ ?”
12ଆଦମ ଇର୍ହାନ୍, “ନିନୁ ଏମେ ଆଇମାଦିଙ୍ଗ୍ ନା ତଡ଼ ଆଦେଙ୍ଗ୍ ସିତିମାନି, ୱାଦ୍ ନାଙ୍ଗିଁ ଆୟା ମାରାନ୍ତି ପଲ୍ ସିତାତ୍, ଆବେଟ୍କୁ ନାନୁ ତିର୍ହାର୍ ।”
13ନାସ୍ତିୱାଲେ ସଦାପ୍ରବୁ ମାପୁରୁ ଆଇମାଦିଙ୍ଗ୍ ଇର୍ହାନ୍, “ଇୟାୱାଜା ଏନ୍ଧା କିତି ?” ଆଇମା ଇର୍ହାତ୍, “ସାରାସ୍ ନାଙ୍ଗିଁ ବାଣ୍ତିସ୍କିତାତ୍, ଆବେଟ୍କୁ ନାନୁ ତିର୍ହା ।”
ମାପୁରୁଦି ଦଣ୍ତ୍
14ଆବେଟ୍ ସଦାପ୍ରବୁ ମାପୁରୁ ସାରାସ୍ତିଙ୍ଗ୍ ଇର୍ହାନ୍, “ଇୟା ପାଣି କିତିମାନି ଉଣ୍ତିଙ୍ଗ୍ ନିନୁ ୱିଜୁ ନାର୍କୁ ମାରି ବନ୍ତି ଜାତୁଆଙ୍ଗାଁ ମାଡ଼ାନ୍କୁ ନାଣ୍ତ ଆନାଦୁରିଆ ଆତି, ମିରୁ ନିଜେଦି ପୋଟାସାରି ବୁଲାସାଲାକିନି ମାରି ଜିବନ୍ତୁ ଦୁଡ଼ି ତିନିଜି ଜିନି । 15ମାରି ନାନୁ ମି ଆଇମାଦି ମାନୁ, ମାରି, ମି କୁଟୁମ୍ ମାରି ତାନି କୁଟୁମ୍ ଲୋଇ ସାତ୍ରୁ ସନାତ୍; ୱାନ୍ ନି ତାଲାଦିଙ୍ଗ୍ ଡାକ୍ନାନ୍ ମାରି ନିନୁ ୱାନି କାଲ୍ତିଙ୍ଗ୍ ଅଦ୍ଗିନି ।”
16ଆବେଟ୍ ୱାନ୍ ଆଇମାଦିଙ୍ଗ୍ ଇର୍ହାନ୍, “ନାନୁ ନି ଜନମ୍କିନି କାସ୍ଟୁ ନାଣ୍ତ ପିରିସ୍କିନା, ନିନୁ ନପିଦାନ୍ କଡ଼ ଜନମ୍କିନି; ମାରି, କନଲି ଉଣ୍ତିଙ୍ଗ୍ ନି ଆସା ତେବାନାତ୍, ୱାନ୍ ମି ମୁସୁକୁ ସାସନ୍ କିନାନ୍ ।”
17ମାରି ୱାନ୍ ଆଦମଦିଙ୍ଗ୍ ଇର୍ହାନ୍, “ଏମେ ମାରାନ୍ତି ପଲ୍ ତିନି ବିସୟ୍ତାନ୍ ନାନୁ ମିଙ୍ଗିଁ ମାଟା ସିଜି ଇର୍ହାମାର୍ହା, ଆକା ତିନ୍ମାଟ୍, ନିନୁ ନି ଆଇମାଦି ମାଟା ଆସ୍ସି ଆକା ତିର୍ଇମାନି; ଆଦେଙ୍ଗ୍ ନି ଉଣ୍ତିଙ୍ଗ୍ ବୁମି ଆନାଦୁରିଆ ଆତାତ୍; ମିରୁ ଜିନିମାଡ଼ିନି ମାଣାନ୍ କାସ୍ଟୁଦାନ୍ ଆବେଟ୍ତାନ୍ ଉଣିତିନିକା ପଇନିଦେର୍ । 18ଆବେଟ୍ତାନ୍ ସାମ୍ ମାରି ବୁଟା ମାରାନ୍ ଲାଟା ନେର୍ନାତ୍, ମାରି, ମିରୁ ଡଡିଦି କୁସା ତିନିଦେର୍ । 19ମିରୁ ଏମେ ସିକ୍ଲାଦାନ୍ ତିଆର୍ ଆତିମାନିଦେର୍, ଆବେନୁ ମିସାଇ ସାନ୍ଦି ମୋକମ୍ତି ରୁନ୍ ତେଲାଜି ପାଣିକିଇତିଙ୍ଗ୍ ଉଣିକା ପୁଟ୍ନାତ୍, ଏଣ୍ତେସ୍କି ମିରୁ ସିକ୍ଲା ମାରି ସିକ୍ଲାଦୁ ମାରିଡ଼େସି ମିସାନିଦେର୍ ।” 20ତାନିୱେନ୍କା ଆଦମ ନିଜେଦି ଆଡ଼ିସ୍ଦି ଦରୁ ହବା ସିତାନ୍, ଏଣ୍ତେସ୍କି ୱାଦ୍ ଜିବନ୍ମାନି ଲୋକା ଆଇସି ଆତାତ୍ । 21ମାରି ସଦାପ୍ରବୁ ମାପୁରୁ ଜାତୁଦି ତଲୁଦାନ୍ ଆଙ୍ଗିଁପାସିୟା ତିଆର୍ କିଜି ଆଦମ ମାରି ୱାନି ଆଡ଼ିସିଙ୍ଗ୍ ଆରିସ୍ କିତାନ୍ ।
ଆଦମ ମାରି ହବା ଡଡିଦାନ୍ ପେରାୟ୍ଆନିକା
22ତାନିୱେନ୍କା ସଦାପ୍ରବୁ ମାପୁରୁ ଇର୍ହାନ୍, “ସୁଡ଼ୁଦୁ, ଲୋକୁ ନେଗିକା ନି ତାଗ୍ଇ ବୁଦି ପୋଇଜି ମା ୱାଜା ଅରେନ୍ ଆତାମାନାନ୍,” ମାରି ଇଲେଇ ୱାନ୍ ଏଣ୍ତେସ୍ କିୟୁ ସାକ୍ସି ସାୱି ମାରାନ୍ତି ପଲ୍ ବା କଇଜି ତିନ୍ଜି ୱିଜୁଦିନ୍ତି ଜିବନ୍ ଆଏଜି, 23ଇୟାଉଣ୍ତିଙ୍ଗ୍ ସଦାପ୍ରବୁ ମାପୁରୁ ଏଦନ ଡଡିଦାନ୍ ୱାରିଙ୍ଗ୍ ସପ୍ତା ପେରିତାନ୍ ମାରି ୱାନ୍ ଏମେ ସିକ୍ଲାଦାନ୍ ତିଆର୍ ଆତାମାର୍ହାନ୍, ଆବେନ୍ ପାଣି କିଦେଙ୍ଗ୍ ୱାନିଙ୍ଗ୍ ସର୍ପେ କିତାନ୍ । 24ଇୟାୱାଜା ୱାନ୍ ଆଦମତିଙ୍ଗ୍ ପେରିତାନ୍; ମାରି, ସାୱି ମାରାନ୍ତି ସାରି ରକିୟା କିନି ଉଣ୍ତିଙ୍ଗ୍ ଏଦନ ଡଡିଦି ୱେଡ଼ାସନି ତରିନ୍ କିରୁବଗଣ ମାରି ସାରିବେଡ଼ିତି ତିରିବ୍ନି ଜାୟ୍ ସିନି କାଣ୍ତା ତିଆର୍ କିତାନ୍ ।
Currently Selected:
ପାର୍ତୁମ୍ 3: Koo25
Highlight
Copy
Compare
Share
Want to have your highlights saved across all your devices? Sign up or sign in
The Konda Porja Bible © The Word for the World International and Konda Porja Translation Samithi, Dasamanthpur, Odisha 2025
