ପର୍ତମ୍ମୁ 4
4
କଇନନ୍ ଡ ଏବଲନ୍
1ଆଦମନ୍ ଆ ଡୁକ୍ରିନ୍ ସରିନ୍ ଆଡ୍ରକୋଲଞ୍ଜି ସିଲଡ୍#4:1 ଆମରାୟ୍ଲନ୍, ଆନିନ୍ ତିଲ୍କୋଡେନ୍ । ଆରି ଆନିନ୍ ଅବୟ୍ ଓବ୍ବାସିଜନ୍ କୋଡେନ୍ କି ବର୍ରନେ, “ପ୍ରବୁନ୍ କାନକାରମ୍ ଆଗ୍ରାମ୍ଲିଞେନ୍ ଆସନ୍ ଞେନ୍ ଅବୟ୍ ଓବ୍ବାସିଜନ୍ ଞାଙ୍ଲାୟ୍ ।” ତିଆସନ୍ ଆନିନ୍ ଆଞୁମନ୍ କଇନ ଅବ୍ଞୁମେନ୍ । 2ଆନିନ୍ ଆରି ଅବୟ୍ ଓବ୍ବାସିଜନ୍ କୋଡେନ୍, ଆଞୁମନ୍ ଏବଲ୍ ଅବ୍ଞୁମେନ୍ । ଆରି ଏବଲନ୍ ତୁର୍ମେନ୍ ମର୍ ଡକୋଏନ୍, ବନ୍ଡ କଇନନ୍ ଅର୍ରମର୍ ଡକୋଏନ୍ । 3ବଡିନା, ପ୍ରବୁନ୍ ଆଞୁମ୍ଲୋଙ୍ ଅନମଙନ୍ ସନୋରୋପ୍ପାୟନ୍ ଆସନ୍ କଇନନ୍ ଅସୋୟ୍ ଜନ୍ରୋମନ୍ ପାଙ୍ଲାୟ୍ । 4ଆରି ଏବଲନ୍ ନିୟ୍ ଆ ଗୋସ୍ସାଲୋଙନ୍ ସିଲଡ୍ ଆପର୍ତମ୍ମୁ କୋଡ୍ ମେଣ୍ଡାନ୍ ଅବୟ୍ ପାଙ୍ଲାୟ୍, ଆରି ତିଆତେ ରବ୍ବୁଏନ୍, କି ଆକରିନ୍ ଅନମଙନ୍ ତିୟେନ୍ । ଆରି ପ୍ରବୁନ୍ ଏବଲନ୍ ଆନମଙ୍ ଜାଏନ୍ । 5ବନଡ୍ କଇନନ୍ଆଡଙ୍ ଆରି ଆନମଙନ୍ ପ୍ରବୁନ୍ ଅଃଜାଲୋ, ତିଆସନ୍ କଇନନ୍ ମୁସୁକାମେନ୍, ଆରି ବରାବେନ୍ 6ତିଆସନ୍ ପ୍ରବୁନ୍ କଇନନ୍ଆଡଙ୍ ବରେନ୍, “ଆମନ୍ ଇନିବା ବବ୍ରାବ୍ତନ୍ ? ଆରି ଇନିବା ଆମନ୍ ଡୁକ୍କଲନ୍ ଅମ୍ମୁସୁକାତନ୍ ? 7ମନଙ୍ କାବ୍ବାଡ଼ାନ୍ ଲୁମେଣ୍ତେନ୍, ଅନମଙ୍ନମ୍ ଇସ୍ୱରନ୍ ଜାତେ; ବନ୍ଡ ଆମନ୍ ମନଙ୍ କାବ୍ବାଡ଼ାନ୍ ଅଃଲୁମ୍ଲଡେନ୍, ଇର୍ସେନ୍ ଡୁଆରାଲୋଙନ୍#4:7 ଅମଙ୍ବାନମ୍ ଡକୋତନ୍, ଆମନ୍ ମନଙ୍ କାବ୍ବାଡ଼ାନ୍ ଲୁମ୍ଲେ ଇର୍ସେନ୍ଆଡଙ୍ ଅବ୍ନାରେଆ ।”
8କଇନନ୍ ଆବୋଞାଙନ୍ ଏବଲନ୍ଆଡଙ୍ ବରେନ୍, “ମାଆ ବସେଙନ୍ ଏୟେ ।” ଆନିଞ୍ଜି ବସେଙନ୍ ଆଡ୍ରକୋଲଞ୍ଜି ଆଡିଡ୍ କଇନନ୍ ଆବୋଞାଙନ୍ ଏବଲନ୍ଆଡଙ୍ ତ୍ତିଡ୍ଲେ ରବ୍ବୁଏନ୍ ।
9ପ୍ରବୁ କଇନନ୍ଆଡଙ୍ ବରେନ୍, “ବୋଞାଙ୍ନମ୍ ଏବଲନ୍ ଅଡ଼େଙ୍ଗା ?” ଆନିନ୍ ବର୍ରନେ, “ଞେନ୍ ଜନା ତଡ୍, ଞେନ୍ ଇନି ବୋଞାଙ୍ନେନ୍ ଆ ତନୁର୍ଡାମର୍ ପଙ୍ ?”
10ପ୍ରବୁନ୍ ବର୍ରନେ, “ଆମନ୍ ଇନିବା ଏନ୍ନେଲେ ଆକାବାଡ଼ା ଲୁମେନ୍ ? ବୋଞାଙ୍ନମ୍ ଆମିଞାମ୍ ଆୟନେ ଞେନ୍ ଲବଲୋଙନ୍ ସିଲଡ୍ ଅମ୍ଡଙ୍ଲାୟ୍ । 11ଅଙ୍ଗା ଆଡିଡ୍ ଆମନ୍ ବୋଞାଙ୍ନମ୍ ଏବଲନ୍ଆଡଙ୍ ରବ୍ବୁଏନ୍ ଆରି ବୋଞାଙ୍ନମ୍ ଆମିଞାମ୍ ଲବନ୍ ବେବ୍ବେଡେନ୍ । ତିଆସନ୍ ଅଙ୍ଗା ଆ ଲବଲୋଙ୍ ବୋଞାଙ୍ନମ୍ ଆମିଞାମ୍ ଜତଡେନ୍ ତି ଆଲବଲୋଙ୍ ସିଲଡ୍ ଆମନ୍ ନମି ସନୟ୍ପନ୍ ଞାଙେନ୍ । 12ଆମନ୍ କାବ୍ବାଡ଼ାଲନ୍ ଜନ୍ରୋମନ୍ ବିଡେନ୍ ନିୟ୍ ଡେନ୍, ଇନ୍ନିଙ୍ ଅଃପଡାବାୟ୍; ଆରି ଅସିଙ୍ତଡନ୍ ଆ ମନ୍ରା ଅନ୍ତମ୍ ଅଡ଼େତେ ଅଡ଼େନ୍ନେ ପୁର୍ତିଲୋଙନ୍ ବୁଲ୍ଲେ ବୁଲ୍ଲେଲେ ଆଡ୍ରକୋତନ୍ ଆମନ୍ରା ଅନ୍ତମ୍ ଡେତମ୍ ।”
13କଇନନ୍ ପ୍ରବୁଆଡଙ୍ ବରେନ୍, “କେନ୍ ଆ ଡନଣ୍ଡାୟ୍ ଞେନ୍ ସଏଲେ ଅଃରପ୍ତିଆୟ୍ । 14ଆମନ୍ ଞେନ୍ଆଡଙ୍ କେନ୍ ଆଡ୍ରକୋନେଲୋଙ୍ ସିଲଡ୍ ଗଙ୍ତିଡ୍ଲିଁୟ୍ ଆରି ମୁକାବାନମ୍ ସିଲଡ୍ ସସତିଁୟ୍ । ପୁର୍ତିଲୋଙନ୍ ଅସିଙ୍ତଡନ୍ ଡ ଅଡ଼େତେ ଅଡ଼େନ୍ନେ ବୁଲ୍ଲେ ବୁଲ୍ଲେଲେ ଆଡ୍ରକୋତନ୍ ଆମନ୍ରା ଅନ୍ତମ୍ ଡେଲିଁୟ୍, ଆରି ଆନା ଜାକିଁୟ୍ ଞେନ୍ଆଡଙ୍ ରବାଙ୍ଲିଁୟ୍ଡେନ୍ ଆନିନ୍ ଞେନ୍ଆଡଙ୍ ରବ୍ବୁତିଁୟ୍ ।”
15ପ୍ରବୁନ୍ ଆନିନ୍ଆଡଙ୍ ବରେନ୍, “କେନ୍ ଆସନ୍ ଆନ୍ନିଙ୍ କଇନନ୍ଆଡଙ୍ ରବ୍ବୁଏନ୍ଡେନ୍, ଆନିନ୍ ସାତଗୁନ ଡନଣ୍ଡାୟନ୍ ଞାଙ୍ତେ ।” ଆରି ଆନ୍ନିଙ୍ ଆନିନ୍ଆଡଙ୍ ଗିୟ୍ଲେ ଏଙ୍ଗାଲେ ରପ୍ତି ଅଃର୍ରବୁଏଜି, ତିଆସନ୍ ପ୍ରବୁନ୍ କଇନନ୍ ଆସନ୍ ଅବୟ୍ ଅରମ୍ମଡନ୍ ଡକ୍କୋଏନ୍ । 16ତିସିଲଡ୍ ପ୍ରବୁନ୍ ଆମଙ୍ଲୋଙ୍ ସିଲଡ୍ କଇନନ୍ ଡୁଙ୍ଲନ୍ ଜିରେନ୍ ଆରି ଏଦନନ୍ ଆଡ୍ରୁଙ୍ୟୁଙ୍ଗଡ୍ ନୋଦ୍ ଆଞୁମ୍ ଅବୟ୍ ଡରକୋନେଲୋଙନ୍ ଇୟ୍ଲେ ଡକୋଲନେ ।
କଇନନ୍ ଆ କେଜ୍ଜା
17ଆରି କଇନନ୍ ଆ ଡୁକ୍ରିନ୍ ସରିନ୍ ଆର୍ଲୁଡେନ୍ ଆନିନ୍ ତିଲ୍କୋଡେନ୍ ଆରି ଆନିନ୍ ଅବୟ୍ ଓବ୍ବାସିଜନ୍ କୋଡେନ୍ ଆଞୁମନ୍ ଅନୁକ । ଆରି ଆନିନ୍ ଅବୟ୍ ଗଡ଼ାନ୍ ଗବ୍ଡେଲେନ୍ ଆରି ଆ ଡାଙ୍ଗାଡ଼ାଅନନ୍ ଆଞୁମ୍ ଅନ୍ତମ୍ ତି ଆ ଗଡ଼ାନ୍ ଆଞୁମ୍ ଅନୁକ ଗାମ୍ଲେ ଅବ୍ଞୁମେନ୍ । 18ଅନୁକନ୍ ଆ ଡାଙ୍ଗାଡ଼ାଅନ୍ ଇରଦ, ଆରି ଇରଦନ୍ ଆ ଡାଙ୍ଗାଡ଼ାଅନ୍ ମଉୟାୟେଲ, ମଉୟାଏଲନ୍ ଆ ଡାଙ୍ଗାଡ଼ାଅନ୍ ମତୁସାଏଲନ୍ ଆରି ମତୁସାଏଲନ୍ ଆ ଡାଙ୍ଗାଡ଼ାଅନ୍ ଲେମକ । 19ଲେମକନ୍ ଆ ଡୁକ୍ରି ବାଗୁ, ଆମ୍ମୁଙ୍ ବଜନ୍ ଆଞୁମ୍ ଆଦା ଡ ଆତିକ୍କି ବଜନ୍ ଆଞୁମ୍ ସିଲ୍ଲା ଡକୋଏନ୍ । 20ଆଦାନ୍ ଜାବଲନ୍ଆଡଙ୍ କୋଡେନ୍, ଆନିନ୍ ତମ୍ୱୁସିଙ୍ଲୋଙନ୍ ଡକୋଲନ୍ ଆରି ଆନିନ୍ ଜନ୍ତୁନ୍ ଆବ୍ରନ୍ତେଞ୍ଜି ଆମ୍ମୁଙ୍ ଆ କେଜ୍ଜାମର୍ ଡକୋଏନ୍ । 21ଆବୋଞାଙନ୍ ଆଞୁମ୍ ଜୁବଡ଼, ଆନିନ୍ ଗଡେରାଜନ୍ ଡ ପିରୋଡ଼ୋଜନ୍ ଆତନ୍ଡ୍ରୁବ୍ ଆ ଆମ୍ମୁଙ୍ ଆ କେଜ୍ଜାମର୍ ଡକୋଏନ୍ । 22ସିଲ୍ଲାନ୍ ଆ ଡାଙ୍ଗାଡ଼ାଅନ୍ ତୁବଲନ୍-କଇନନ୍, ଆନିନ୍ ପିତ୍ତଡ଼ନ୍ ଡ ଲଆଙନ୍ ବାତ୍ତେ ଏର୍ଜାଡ଼ିକାନ୍ ଆଞନର୍ରମ୍ ଆ ତନ୍ରୁବ୍ମର୍ ଡକୋଏନ୍ । ତୁବଲନ୍-କଇନନ୍ ଆତନାନ୍ ଅବୟ୍ ଡକୋଏନ୍ ଆଞୁମନ୍ ନୟମା । 23ଲେମକନ୍ ଆ ଡୁକ୍ରିନ୍ଞ୍ଜିଆଡଙ୍ ବରେନ୍,
“ଏ ଆଦା ଡ ସିଲ୍ଲା, ଅମ୍ଡଙ୍ବା; ଏ ଲେମକନ୍ ଆଡୁକ୍ରିଜି, ଆମ୍ୱେଞ୍ଜି ବର୍ନେଞେନ୍ ଡାଲୁଡ୍ବା; ଅବୟ୍ ଡାଙ୍ଗାଡ଼ାମରନ୍ ଞେନ୍ଆଡଙ୍ ଆତ୍ରିଲିଞନ୍ ଆସନ୍ ଡୁଲ୍ତିଡ୍ଡାଲନ୍ ଆନିନ୍ଆଡଙ୍ ରବ୍ବୁଲାୟ୍ ।
24ଆନା କଇନନ୍ଆଡଙ୍ ରବ୍ବୁତେ ସାତଗୁନ୍ ଡନଣ୍ଡାୟନ୍ ଞାଙେନ୍ ଡେନ୍,
ଆନା ଲେମକନ୍ଆଡଙ୍ ରବ୍ବୁତେ ଆନିନ୍ ୟାକୁଡ଼ି ସୋଓଡ଼ ଗୁନ ଡନଣ୍ଡାୟନ୍ ଞାଙ୍ତେ ।”
ସେତନ୍ ଡ ଇନୋସନ୍
25ଆଦମନ୍ ଡ ଅବାନ୍ ଆରି ଅବୟ୍ ଓବ୍ବାସିଜନ୍ କୋଡେଞ୍ଜି । ଅବାନ୍ ବର୍ରନେ, “ଆନାଆଡଙ୍ କଇନନ୍ ରବ୍ବୁଏନ୍, ଆପାଲ୍ତେଙନ୍ ଇସ୍ୱରନ୍ ଓବ୍ବାସିଜନ୍ ତିୟ୍ଲିଁୟ୍ ।” ତିଆସନ୍ ଆଞୁମନ୍ ସେତ ଅବ୍ଞୁମେନ୍ । 26ସେତନ୍ ଆ ଡାଙ୍ଗାଡ଼ାଅନ୍ ଇନୋସ । ଇନୋସନ୍ ଆବନେଡ଼ା ସିଲଡ୍ ମନ୍ରାଞ୍ଜି ଇସ୍ୱରନ୍ ଆମଙ୍ବା ପାର୍ତନାନେନ୍ ସୁସୁଏଞ୍ଜି ।
Currently Selected:
ପର୍ତମ୍ମୁ 4: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
