ପର୍ତମ୍ମୁ 27
27
ଜାକୁବନ୍ଆଡଙ୍ ଇସାକନ୍ ଆସିର୍ବାଏନ୍
1ଇସାକନ୍ ଆବ୍ରୁଡାଏନ୍ ସିଲଡ୍, ଆମଡନ୍ ଗିୟ୍ଲେ ଅଃରପ୍ତିଲୋ; ତିଆଡିଡ୍ ଆନିନ୍ ଆ ସୋଡ଼ା ଡାଙ୍ଗାଡ଼ାଅନନ୍ ଏସୋନ୍ଆଡଙ୍ ଓଡ୍ଡେଲେ ବରେନ୍, “ଏ ଡାଙ୍ଗଡ଼ାଅନନ୍,”
ସିଲତ୍ତେ ଆନିନ୍ ଜାଲଙ୍ଲେ ବରେନ୍, “ଗିଜା, ଞେନ୍ ତେନ୍ନେଡକୋ ।”
2ସିଲତ୍ତେ ଆନିନ୍ ଆନିନ୍ଆଡଙ୍ ବରେନ୍, “ଗିଜା, ଞେନ୍ ବୁଡାଲିୟ୍, ଅଙ୍ଗାଆଡିଡ୍ ଞେନ୍ ରବୁତିୟ୍, ତି ଆତେ ଞେନ୍ ଜନା ତଡ୍ ।” 3କାକୁର୍ତିତନାୟ୍, “ଆମନ୍ ଞଙାନମ୍ ଆରି ଅଆମନ୍ ଞମା, ଆରି ବେନ୍ତାବାଣ୍ ଇୟା, ଞେନ୍ ଆସନ୍ ଅବୟ୍ ପର୍ଗଡ଼ବନ୍ ତୁଙ୍ଲେ ପାଙାୟ୍ । 4ଆରି ଞେନ୍ ଏଙ୍ଗାଲେ ଆଜନୋମ୍ ଲଡୟ୍ତିଁୟ୍, ତି ଅନ୍ତମ୍ ଜନୋମନ୍ ଡିଁୟ୍ଲେ ଗାଗାନେନ୍ ଆସନ୍ ଅମଙ୍ବାଞେନ୍ ପାଙ୍ତିଁୟ୍; ସିଲତ୍ତେ ପରାନ୍ନାଞେନ୍ ଅନ୍ରଙ୍ ରବୁଏନ୍ ଆମ୍ମୁଙ୍ ଆମନ୍ଆଡଙ୍ ଆସିର୍ବାଦତମ୍ ।”
5ଇସାକନ୍ ଆଡାଙ୍ଗାଡ଼ାଅନନ୍ ଏସୋନ୍ଆଡଙ୍ କେନ୍ ଆବର୍ନେ ଆବ୍ରନେନ୍ ଆଡିଡ୍ ରିବିକାନ୍ ଅମ୍ଡଙେନ୍ । ତିଆସନ୍ ଏସୋନ୍ ପର୍ଗଡ଼ବ୍ଜେଲନ୍ ଆପନାଙ୍ବା ଆରିୟେନ୍ ଆଡିଡ୍, 6ରିବିକାନ୍ ଆଡାଙ୍ଗାଡ଼ାଅନନ୍ ଜାକୁବନ୍ଆଡଙ୍ ବରେନ୍, “ଗିଜା, ବୋଞାଙ୍ନମ୍ ଏସୋନ୍ ସରିନ୍ ଆପ୍ପେୟ୍ନମ୍ ଆକ୍ରଡାଡ଼ିଲଞ୍ଜି ଞେନ୍ ଅମ୍ଡଙ୍ଲାୟ୍, 7ଆନିନ୍ ଆନିନ୍ଆଡଙ୍ ବରେନ୍, ‘ଆମନ୍ ପର୍ଗଡ଼ବ୍ଜେଲନ୍ ପାଙ୍ଲେ ଞେନ୍ ଆସନ୍ ମନାଡମ୍ ଏମ୍ମେଲେ ଜନୋମନ୍ ଡିଞା, ସିଲତ୍ତେ ଞେନ୍ ଗାଗାନେନ୍ ସାଡ୍ଲେ ଅନ୍ରଙ୍ ରବୁଇଞନ୍ ଆମ୍ମୁଙ୍ ପ୍ରବୁ ଆତେମଡ୍ଲୋଙ୍ ଆମନ୍ଆଡଙ୍ ଆସିର୍ବାଦତମ୍ ।’ 8ତିଆସନ୍, ଡାଙ୍ଗାଡ଼ାଅନ୍, ନମିଞେନ୍ ଞେନ୍ ଆମନ୍ଆଡଙ୍ ଇନି ବାଞ୍ତମ୍, ବର୍ନେଞେନ୍ ଅମ୍ଡଙା । 9ଆମନ୍ ନମିଞେନ୍ ମଣ୍ତାନ୍ ଇୟ୍ଲେ ବାଗୁ ମନଙ୍ ଆଅମେଡ୍ ପାଙାୟ୍; ସିଲତ୍ତେ ଆପେୟ୍ନମ୍ ଏଙ୍ଗାଲେ ଲଡୟ୍ତେ, ତିଅନ୍ତମ୍ ଆମନ୍ନା ଆଜନୋମ୍ ଞେନ୍ ଡିଁୟ୍ଲେ ତିୟ୍ତାୟ୍ । 10ଆମନ୍ ତି ଆତେ ଆପ୍ପେୟ୍ନମ୍ ଆମଙ୍ ପାଙ୍ତିୟା; ସିଲତ୍ତେ ଆନିନ୍ ତିଆତେ ଗାଗାଲନ୍ ଅନ୍ରଙ୍ ରବୁଏନ୍ ଆମ୍ମୁଙ୍ ଆମନ୍ଆଡଙ୍ ଆସିର୍ବାଦତମ୍ ।”
11ତିଆଡିଡ୍ ଜାକୁବନ୍ ଆୟୋଙନ୍ ରିବିକାନ୍ଆଡଙ୍ ବରେନ୍, “ଗିଜା, ବୋୟାଁଙ୍ଞେନ୍ ଏସୋନ୍ ଆକୋରୋଡୋଙ୍, ବନ୍ଡ ଞେନ୍ ଆକୋରୋଡୋଙ୍ତଡ୍ । 12ତିଆସନ୍ ଅସମୟ୍ ବାପାନ୍ ଞେନ୍ଆଡଙ୍ ସୁଙେଲିୟ୍ଡେନ୍, ଞେନ୍ ଆଗନିୟ୍ଗିୟ୍ଲୋଙନ୍ ପାତିଆମର୍ ଡେତିଁୟ୍; ଏତେଲ୍ଡେନ୍ ଞେନ୍ ଆସିର୍ବାଦନ୍ ଏର୍ଞନାଙନ୍ ସନୟ୍ପନ୍ ଞାଙ୍ତାୟ୍ ।”
13ବନ୍ଡ ଆୟୋଙନ୍ ବର୍ରନେ, “ଡାଙ୍ଗାଡ଼ାଅନ୍, ତି ଆସନୟ୍ପ ଞେନ୍ଆଡଙ୍ ଗଟ୍ଟେଏତୋ, ବର୍ନେଞେନ୍ ଆମନ୍ ମାନ୍ନେଆ ଡ ଇୟ୍ଲେ ମେଣ୍ଡାଅନନ୍ ଇୟ୍ପାଙା ।” 14ସିଲତ୍ତେ ଜାକୁବନ୍ ତି ଆତେ ଆୟୋଙନ୍ ଆମଙ୍ ପାରାଙ୍ଲାଞନ୍ ସିଲଡ୍, ଆୟୋଙନ୍ ଆପେୟନ୍ ଆର୍ଲଡୟ୍ତେନ୍ ଅନ୍ତମ୍ ମନା ଡିଞେନ୍ । 15ସିଲତ୍ତେ ରିବିକାନ୍ ଅସିଙ୍ଲୋଙନ୍ ସୋଡ଼ା ଡାଙ୍ଗାଡ଼ାଅନ୍ ଏସୋନ୍ ଆ ମନଙ୍ ଅଙ୍ଗିନ୍ ଆମଙ୍ବାନ୍ ଆଡ୍ରକୋଏନ୍ ଆ ସନ୍ନା ଡାଙ୍ଗଡ଼ାଅନନ୍ଆଡଙ୍ ଅବ୍ରଏନ୍ । 16ଆରି ମେଣ୍ଡାଅନନ୍ ଆଉସାଲ୍ ପାଙ୍ଲେ ଆସିଲୋଙନ୍ ଡ ଆସଙ୍କାନ୍ ଆକୋରୋତଡ୍ଲୋଙନ୍ ବଲେନ୍ । 17ଆରି ତି ମନା ଆଡନିଞନ୍ ଆଜନୋମ୍ ଡ ରୁଟିନ୍ ଜାକୁବନ୍ ଆସିଲୋଙ୍ ତିୟେନ୍ ।
18ସିଲତ୍ତେ ଜାକୁବନ୍ ଆପେୟନ୍ ଆମଙ୍ ଇୟ୍ଲେ ବରେ, “ବାପା,” ଆନିନ୍ ଜାଲଙେନ୍, “ଗିଜା, ଞେନ୍ କେନ୍ତ୍ତେନେ ଡାଙ୍ଗାଡ଼ାଅନ୍, ଆମନ୍ ଆନ୍ନା ?”
19ଜାକୁବନ୍ ଆପେୟନ୍ଆଡଙ୍ ବରେନ୍, “ଞେନ୍ ଆସୋଡ଼ା ଡାଙ୍ଗଡ଼ାଅନମ୍ ଏସୋନ୍; ଆମନ୍ ଇନି ବାଁୟ୍ଲିୟ୍, ଞେନ୍ ତି ଆତେ ଲୁମ୍ଲାୟ୍,” ନମି କାକୁର୍ତିତନାୟ୍, “ଆମନ୍ ଡୋନା, ଆରି, ତଙ୍କୁମ୍ଲେ ପର୍ଗଡ଼ବ୍ଜେଲ୍ଞେନ୍ ଜୋମା, ସିଲଡ୍ ଆମନ୍ ଞେନ୍ଆଡଙ୍ ଆସିର୍ବାଦଇଁୟ୍ ।”
20ସିଲତ୍ତେ ଇସାକନ୍ ଆଡାଙ୍ଗାଡ଼ାଅନ୍ଆଡଙ୍ ବରେନ୍, “ଡାଙ୍ଗାଡ଼ାଅନ୍, ଆମନ୍ ଲଜିର୍ ତିଆତେ ଏଙ୍ଗାଲେ ଞାଙେନ୍ ?” ଆନିନ୍ ବର୍ନେ, “ପ୍ରବୁ ଇସ୍ୱରନମ୍ ଞେନ୍ଆଡଙ୍ ଅବ୍ରବାଙ୍ଲିୟ୍ ।”
21ଇସାକନ୍ ଜାକୁବନ୍ଆଡଙ୍ ଆରି ବରେନ୍, “ଡାଙ୍ଗାଡ଼ାଅନ୍, ଅମଙ୍ଞେନ୍ ଜିରାୟ୍, ଆମନ୍ ଆଜାଡ଼ିନ୍ ଡାଙ୍ଗାଡ଼ାଅନ୍ଞେନ୍ ଏସୋନ୍ ଅଡ଼େ ଇଜା, ଆମନ୍ଆଡଙ୍ ସୁଙେଲେ ଜନାତିଁୟ୍ ।” 22ସିଲତ୍ତେ ଜାକୁବନ୍ ଆପ୍ପେୟନ୍ ଇସାକନ୍ ଆମଙ୍ ଇୟେନ୍, ଆନିନ୍ ଆନିନ୍ଆଡଙ୍ ସୁଙେଲେ ବରେନ୍, “କେନ୍ ଆସର୍ରଙ୍ ଜାକୁବନ୍ ଆସର୍ରଙ୍, ବନ୍ଡ କେନ୍ ଆସି ଏସୋନ୍ ଆସି ଅନ୍ତମ୍ ।” 23ଇସାକନ୍ ଆନିନ୍ଆଡଙ୍ ଅଃମଲେଅଃରପ୍ତିଲୋ, ଇନିଆସନ୍ଗାମେଣ୍ଡେନ୍ ଜାକୁବନ୍ ଆସି ଏସୋନ୍ ଆସି ଅନ୍ତମ୍ ଆକୋରୋସିନ୍ ଡକୋଏନ୍ । ତିଆସନ୍ ଇସାକନ୍ ଜାକୁବନ୍ଆଡଙ୍ ଆସିର୍ବାଦଏନ୍ । 24ତି ସିଲଡ୍ଲ୍ଲନ୍ ଆନିନ୍ ବର୍ରନେ, “ଆମନ୍ ଆଜାଡ଼ିନ୍ ଡାଙ୍ଗାଡ଼ାଅନ୍ଞେନ୍ ଏସୋନ୍ ପଙ୍ ?” ଆନିନ୍ ବର୍ରନେ, “ଓଓ,ଞେନ୍ ଏସୋନ୍ ।” 25ତିଆଡିଡ୍ ଇସାକନ୍ ବର୍ରନେ, “ତିଡେନ୍ ଜେଲୁନ୍ ମଙ୍ବାଞେନ୍ ପାଙାୟ୍; ଞେନ୍ ଡାଙ୍ଗାଡ଼ାଅନ୍ଞେନ୍ ଆପନାଙ୍ ଆ ପର୍ଗଡ଼ବ୍ ଜେଲନ୍ ଜୋମ୍ତାୟ୍, ସିଲତ୍ତେ ଞେନ୍ ଆମନ୍ଆଡଙ୍ ଆସିର୍ବାଦତମ୍ ।” ସିଲତ୍ତେ ଆନିନ୍ ଆମଙ୍ବାନ୍ ପାଙ୍ଲେ ଆତ୍ରିୟେନ୍, ଇସାକନ୍ ତିଆତେ ଜୋମେନ୍; ଆରି, ଦ୍ରାକ୍ୟାଡାନ୍ ପାଙ୍ଲେ ଆତ୍ରିୟେନ୍, ତିଆତେ ଜାୟ୍ ଗାଏନ୍ । 26ତି ସିଲଡ୍ଲ୍ଲନ୍ ଆପେୟନ୍ ଇସାକନ୍ ବରେନ୍, “ଡାଙ୍ଗାଡ଼ାଅନ୍, ନମିଞେନ୍ ଅମଙ୍ଞେନ୍ ଜିର୍ରେ ଞେନ୍ଆଡଙ୍ କୋର୍କୋର୍ତମିୟ୍ ।” 27ତିଆଡିଡ୍ ଆନିନ୍ ଆମଙନ୍ ଇୟ୍ଲେ କୋର୍କୋର୍ତମେନ୍, ଇସାକନ୍ ଆସିନ୍ରିନ୍ ଆଲଙିଡ୍ ଞୁଲେ ଆନିନ୍ଆଡଙ୍ ଆସିର୍ବାଦଲେ ବରେନ୍, “ଗିଜା, ପ୍ରବୁ ଆ ଆସିର୍ବାଦ ଆଞନାଙ୍ ବସେଙନ୍ ଆଲଙିଡ୍ ଅନ୍ତମ୍ ଡାଙ୍ଗଡ଼ାଅଞେନ୍ ଆଲଙିଡ୍; 28ଇସ୍ୱରନ୍ ରୁଆଙନ୍ ଆ ସସିରାଡା ଡ ପୁର୍ତିନ୍ ଆଲବ ଆଜନେଲ୍ଜେଲ୍ ସିଲଡ୍ ଆଡ୍ରୁଙ୍ତନାଞନ୍ ଜଅ ଡ ଗୋଗୋୟ୍ ଜନ୍ରୋମନ୍ ଡ ଦ୍ରାକ୍ୟାଡାନ୍ ଆମନ୍ଆଡଙ୍ ତିୟମ୍ତୋ; 29ମନ୍ରାଞ୍ଜି ଆମନ୍ଆଡଙ୍ ସେବାଅମ୍ତଜି#27:29 ସାକେଅମ୍ତଜି ଆରି ଏର୍ଜାଡ଼ିକାନ୍ ଆ କେଜ୍ଜା ଆମନ୍ଆଡଙ୍ ଲୋମମ୍ତଜି; ଆମନ୍ କେଜ୍ଜାନମ୍ଜି ଆସୋଡ଼ାମର୍ ଡେଆ, ଆରି ଅୟୋଙ୍ନମ୍ଜି#27:29 ନନନମ୍ଜି ଆଅଞ୍ଜି ଆମନ୍ଆଡଙ୍ ଲୋମମ୍ତଜି; ଆନା ଆମନ୍ଆଡଙ୍ ସୟ୍ପତମ୍, ଆନିନ୍ ସନୟ୍ପନ୍ ଞାଙେତୋ, ଆରି, ଆନା ଆମନ୍ଆଡଙ୍ ଆସିର୍ବାଦତମ୍, ଆନିନ୍ ଆସିର୍ବାଦନ୍ ଞାଙେତୋ ।”
ଇସାକନ୍ ଆସିର୍ବାଦ ଆସନ୍ ଏସୋନ୍ ବେଡେନ୍
30କେନ୍ ଏନେଲେ ଇସାକନ୍ ଜାକୁବନ୍ଆଡଙ୍ ଆରାର୍ସିବାଦଏନ୍ ସିଲଡ୍ ଜାକୁବନ୍ ଆପ୍ପେୟନ୍ ଇସାକନ୍ ଆମଙ୍ ସିଲଡ୍ ଆଡ୍ରୁଙ୍ଲନ୍ ଆଡିଡ୍ ଆବୋଞାଙନ୍ ଏସୋନ୍ ବେନ୍ତାବାନ୍ ସିଲଡ୍ ଜିର୍ରାୟ୍ । 31ଆରି ଆନିନ୍ ଜାୟ୍ ମନା ଜନୋମନ୍ ଡିଞ୍ଲେ ଆପ୍ପେୟନ୍ ଆମଙ୍ ପାଙ୍ଲେ ବରେନ୍, “ବାପା, ଡୋନା ଡାଙ୍ଗଡ଼ାଅନମ୍ ଆପ୍ରାଙ୍ଲାଞନ୍ ଆ ପର୍ଗଡ଼ବ୍ଜେଲ୍ ଜୋମା, ସିଲତ୍ତେ ଆମନ୍ ଞେନ୍ଆଡଙ୍ ଆସିର୍ବାଦଇଁୟ୍ ।”
32ସିଲତ୍ତେ ଆପ୍ପେୟନ୍ ଇସାକନ୍ ବର୍ରନେ, “ଆମନ୍ ଆନ୍ନା ?” ଆନିନ୍ ବର୍ରନେ, “ଞେନ୍ ଡାଙ୍ଗାଡ଼ାଅନ୍ନମ୍, ଆପର୍ତମ୍ମୁଅନ୍ନମ୍ ଏସୋନ୍ ।”
33ତିଆଡିଡ୍ ଇସାକନ୍ ତକର୍ରେକାୟ୍ ବର୍ରନେ, “ଏତ୍ତେଲ୍ଡେନ୍ ପର୍ଗଡ଼ବ୍ଜେଲନ୍ ଆନା ଅମଙ୍ଞେନ୍ ପାଙ୍ଲାୟ୍ ? ଆମନ୍ ଅନ୍ରଙ୍ ଜିରାଞନ୍ ଆମ୍ମୁଙ୍ ଞେନ୍ ତିଆତେ ଜୋମ୍ଲେ ଆନିନ୍ଆଡଙ୍ ଆସିର୍ବାଦଲାୟ୍, ଆରି ଆନିନ୍ ଆସିର୍ବାଦନ୍ ଞାଙ୍ତେ ।”
34ଏସୋନ୍ ଆପେୟନ୍ ଆତଡ୍ଲୋଙ୍ କେନ୍ ଆବର୍ନେ ଆରମ୍ଡଙେନ୍ ସିଲଡ୍ ଇଃୟମ୍ଡାଲେ ଆକ୍ରାନ୍ ୟେୟେଡାଲନେ, ଆରି, ଆପେୟନ୍ଆଡଙ୍ ବରେନ୍, “ବାପା, ଞେନ୍ଆଡଙ୍, ଞେନ୍ ଜାୟ୍ ଆସିର୍ବାଦଇଁୟ୍ ।” 35ସିଲତ୍ତେ ଇସାକନ୍ ବର୍ରନେ, “ବୋଞାଙ୍ନମ୍ ପାତ୍ୟାଡାଲେ ଆଞରାଙ୍ତେନ୍ ଆସିର୍ବାଦନମ୍ ରାଉଲନେ ।” 36ଏସୋନ୍ ବର୍ରନେ, “ଆନିନ୍ ଞେନ୍ଆଡଙ୍ ବାଗୁତର କଣ୍ଡାୟ୍ ଲିଁୟ୍ । ଆଞୁମ୍ଡମନ୍ ପଙ୍ ଜାକୁବତଡ୍, ଆନିନ୍ ଆମ୍ମୁଙ୍ ସୋଡ଼ାବୋଞାଙନ୍ ଆଡନେ ରୁୟ୍ଲିଁୟ୍, ଆରି ଗିଜା, ନମି ଆସିର୍ବାଦଞେନ୍ ନିୟ୍ ରୁୟ୍ଲିଁୟ୍ । ଆନିନ୍ ଆରି ବର୍ରନେ, ଞେନ୍ ଆସନ୍ ଆମନ୍ ଅବୟ୍ଜା ଆସିର୍ବାଦନ୍ ଅଃଡକୋଲୋପଙ୍ ?”
37ସିଲତ୍ତେ ଇସାକନ୍ ଏସୋନ୍ଆଡଙ୍ ବରେନ୍, “ଗିଜା, ଞେନ୍ ଆନିନ୍ଆଡଙ୍ ସାଉକାରନମ୍ ଅମ୍ମେଲାୟ୍, ଆରି,ଆକୁତ୍ତମାନ୍ ଆମନ୍ରାଞ୍ଜି ଅଡ଼୍କୋନ୍ ଆନିନ୍ ଆଜାୟ୍ତାନ୍ ଏମ୍ମେଲାଜି, ଆରି ଜନ୍ରୋମନ୍ ଡ ଦ୍ରାକ୍ୟାଡାନ୍ ବାତ୍ତେ ଆନିନ୍ଆଡଙ୍ ଅଃବୋର୍ସାଲାୟ୍; ତିଆସନ୍ ଡାଙ୍ଗାଡ଼ାଅନ୍, ନମି ଆମନ୍ ଆସନ୍ ଆରି ଇନି ଲୁମ୍ଲେ ରପ୍ତିଆୟ୍ ?” 38ସିଲତ୍ତେ ଏସୋନ୍ ଆରି ବତର ଆପେୟନ୍ଆଡଙ୍ ବରେନ୍, “ବାପା, ଅମଙ୍ନମ୍ କେନ୍ ଆବୟନ୍ ପଙ୍ ଆସିର୍ବାଦନ୍ ଡକୋଏନ୍ ? ଏ ବାପା, ଞେନ୍ଆଡଙ୍ ନିୟ୍ ଆସିର୍ବାଦଇଁୟ୍ ।” କେନ୍ ଏନେଲେ ବରନ୍କି ଏସୋନ୍ ସୋଡ଼ା ସର୍ରଙନ୍ ବାତ୍ତେ ୟେୟେଡାଲନେ । 39ସିଲତ୍ତେ ଆପ୍ପେୟନ୍ ଇସାକନ୍ ଜାଲଙ୍ଲେ ବରେନ୍, “ଗିଜା, ଡରକୋନେନମ୍ ପୁର୍ତିନ୍ ଆସର୍ଡିଲନ୍#27:39 ଇନ୍ନିଙ୍ ଅନ୍ନେଲେନ୍ ଆଲବ ଡ ରୁଆଙନ୍ ସିଲଡ୍ ସସିରାଡାନ୍ ନଅଃସେଡାୟ୍ । 40ଆମନ୍ କଡ଼ିବନ୍ ବାତ୍ତେ ଅମେଙ୍ତମ୍ ଡ ବୋଞାଙ୍ନମ୍ ଆ କମ୍ୱାରି ଡେତମ୍, ବନ୍ଡ ଅଙ୍ଗାଆଡିଡ୍ ଜନିବାଡ୍ନମ୍ ଅବ୍ତଡ୍ତେ, ତିଆଡିଡ୍ ଡେନ୍ନାଲୋଙ୍ନମ୍ ସିଲଡ୍ ଆରାଙଙନ୍ ଗବ୍ଲୋତେ ।” 41କେନ୍ ଅନ୍ତମ୍ ଜାକୁବନ୍ ଆପେୟନ୍ ଆମଙ୍ ସିଲଡ୍ ଆସିର୍ବାଦନ୍ ଆଞରାଙେନ୍ ଆସନ୍ ଏସୋନ୍ ଆନିନ୍ ଆଡଙ୍ ସଙ୍ଗତାଲେ ଇୟମ୍ଲେ, “ଆପେୟ୍ଞେନ୍ ଆର୍ନବୁ ତୁୟାଲାୟ୍, ସିଲଡ୍ଲନ୍ ଞେନ୍ ଓବ୍ବାଞେନ୍ ଜାକୁବନ୍ଆଡଙ୍ ରବ୍ବୁତାୟ୍ ।” 42ବନ୍ଡ ଆସୋଡ଼ା ଡାଙ୍ଗଡ଼ାଅନନ୍ ଏସୋନ୍ ଆବର୍ନେ ରିବିକାନ୍ ଅମ୍ଡଙେନ୍; ସିଲତ୍ତେ ଆନିନ୍ ମନ୍ରାନ୍ ଆପ୍ପାୟ୍ଲେ ଆସନ୍ନା ଡାଙ୍ଗଡ଼ାଅନନ୍ ଜାକୁବନ୍ଆଡଙ୍ ବରେନ୍, “ଗିଜା, ବୋଞାଙ୍ନମ୍ ଏସୋନ୍ ଆମନ୍ଆଡଙ୍ ଆର୍ନବୁ ଆସନ୍ ଇୟମ୍ତେ । 43ତିଆସନ୍, ଡାଙ୍ଗାଡ଼ାଅନ୍, ବର୍ନେଞେନ୍ ଅମ୍ଡଙା; ଆମନ୍ ଆରୋଣନ୍ ଗଡ଼ା ଓବ୍ବାଞେନ୍ ଲାବନନ୍ ଆମଙ୍ବା ଜିରା । 44ଆରି, ବୋଞାଙ୍ନମ୍ ଆବନ୍ର୍ରାବ୍ ଅନ୍ରଙ୍ ସୟୁଏନ୍ ଜାୟ୍, ଅସୋୟ୍ ଡିନା ତେତ୍ତେ ଇୟ୍ଡକୋନା; 45ବୋଞାଙ୍ନମ୍ଆଡଙ୍ ଆମନ୍ ଇନି ଏଙ୍ଗାଏନ୍ ଆବନ୍ର୍ରାବନ୍ ଅନ୍ର୍ରଙ୍ ସୟୁଏନ୍ ଜାୟ୍ ଆମନ୍ ତେତ୍ତେ ଡକୋନା । ଞେନ୍ ମନ୍ରାନ୍ ଆପ୍ପାୟ୍ଲେ ତେତ୍ତେ ସିଲଡ୍ ଆମନ୍ଆଡଙ୍ ଇୟ୍ତାୟ୍ ଓରୋଙମ୍; ଆବଡିନ୍ନାନ୍ ବାଗୁବେନ୍ ଆଡଙ୍ ଇନିବା ଅବ୍ସେଡ୍ବେନ୍ ?”
ଇସାକନ୍ ଲାବନନ୍ ଆମଙ୍ବା ଜାକୁବନ୍ ଆପ୍ପାୟେନ୍
46ତି ସିଲଡ୍ଲ୍ଲନ୍ ରିବିକାନ୍ ଇସାକନ୍ଆଡଙ୍ ବରେନ୍, “କେନ୍ ଆଇତିୟ୍ ଆଡାଙ୍ଗଡ଼ିଜି ଆସନ୍ ପରାନ୍ନାଲୋଞେନ୍ ବରାବ୍ତିୟ୍; ଜାକୁବନ୍ କେନ୍ଆନିଞ୍ଜି ଅନ୍ତମ୍ ଇତିୟନ୍ ଆଡାଙ୍ଗଡ଼ିଜି, ଆଗ୍ରାମ୍ଗାମ୍, କେନ୍ ଆଡେସା ଆଡାଙ୍ଗଡ଼ିଜି ଆମଙ୍ସିଲଡ୍ ଅନ୍ନିଙ୍ ଆଡାଙ୍ଗଡ଼ିଆଡଙ୍ ବିବାଲନ୍ଡେନ୍, ତିଡେନ୍ ପରାନ୍ନାଲୋଞେନ୍ ଇନି ଆସୁକା ?”
Currently Selected:
ପର୍ତମ୍ମୁ 27: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
