ପର୍ତମ୍ମୁ 14
14
ଅବ୍ରାମନ୍ ଲୋଟନ୍ଆଡଙ୍ ଆଡନୋବ୍
1ଉଞ୍ଜି ରାଜାନ୍, ସିନିଅରନ୍ ବାବିଲୋନନ୍ ଆରାଜା ଅପ୍ରାପଲନ୍, ଇଲ୍ସରରନ୍ ଆ ରାଜା ଅରିୟୋକନ୍, କଦର୍ଲାୟୋନ୍ ଆରାଜା ଏଲମନ୍ ଆରି ଗୋଇମନ୍ ଆରାଜା ତିଦିଲ୍, 2କେନ୍ଆନିଞ୍ଜି ସଦୋମନ୍ ଆରାଜା ବିରା, ଅମୋରାନ୍ ଆରାଜା ବିର୍ସା, ଅଦ୍ମାରନ୍ ଆରାଜା ସିନାବ୍, ସବୋଇମରନ୍ ଆରାଜା ସିମେବରନ୍ ଡ ସୋୟରନ୍ ଆରାଜା ଆ ବିରୁଦଲୋଙ୍ ଅଲ୍ଜୁଜ୍ଜେନ୍ ଆସନ୍ ଜିରେଞ୍ଜି । 3କେନ୍ ଅଡ଼୍କୋଞ୍ଜି ସିଦିମନ୍ ଆପଡ଼ିଆଲୋଙ୍, ଗାରାମ୍ଗାମନ୍ ବସିଡ୍ ସମେଁୟ୍ଣ୍ଡ୍ରାନ୍ ରୁକ୍କୁଲଞ୍ଜି । 4ଆନିଞ୍ଜି ବାର ବର୍ସେଙ୍ ଜାୟ୍ କଦର୍ଲାୟୋମରନ୍ ଆ ରାଜା ଆବର୍ନେ ମାନ୍ନେଲେ ଡକୋଲଞ୍ଜି ବନ୍ଡ ତେର ବର୍ସେଙ୍ଲୋଙ୍ ଆନିନ୍ଆଡଙ୍ ଅଃମାନ୍ନେଲଜି । 5ତିଆସନ୍ ସଉଦ ବର୍ସେଙ୍ଲୋଙ୍ କଦର୍ଲାୟୋମରନ୍ ଆରାଜା ଡ ଆଗଡ଼ି ରାଜାଞ୍ଜି ଜିର୍ରେ ଅସ୍ତରୋତ୍ କର୍ଣ୍ଣଇମ୍ଲୋଙନ୍ ରପାଇଅମନ୍ ଆମନ୍ରାଜିଆଡଙ୍, ଅମରେ ସୁସିଅନ୍ ଆମନ୍ରାଜିଆଡଙ୍ ଡ ସାବି କିରିଆତଇମଲୋଙନ୍ ଏମିଅନ୍ ଆମନ୍ରାଜିଆଡଙ୍, 6ଡ ଏଲପାରଣନ୍ ଜାୟ୍ ସେଇରନ୍ ଆବରୁ ଆଡ୍ରକୋତଞ୍ଜି ଉରିଅନ୍ ଆମନ୍ରାଜିଆଡଙ୍ ଅଃବାରେଏଞ୍ଜି । 7ଆନିଞ୍ଜି ତି ଆଡ୍ରକୋନେଲୋଙ୍ ସିଲଡ୍ ୟର୍ରନ୍ ଅଇନମିସ୍ପଟନ୍, କାଦେସନ୍ ଜିର୍ରେ ଅମାଲେକିଅଞ୍ଜି ଆଡେସା ଅଡ଼୍କୋନ୍ ଡ ଅତ୍-ସସୋନ୍-ତାମର୍ବାଜି ଇମୋରିଅନ୍ ଆମନ୍ରାଜିଆଡଙ୍ ଅଃବାରେଏଞ୍ଜି । 8ତିଆସନ୍ ସଦୋମନ୍ ଆରାଜା, ଅମୋରାନ୍ ଆରାଜା, ଅଦ୍ମାନ୍ ଆରାଜା, ସବୋୟିମନ୍ ଆରାଜା ଡ ବିଲା ସୋୟରନ୍ ଆରାଜା, କେନ୍ ମନ୍ଲୟ୍ ରାଜାଞ୍ଜି ମାୟ୍ଲନ୍ 9ଏଲମନ୍ କଦର୍ଲାଅମରନ୍ ଆରାଜା, ଗୋଇମନ୍ ତିଦିଅଲନ୍ ଆରାଜା, ସିନିଅରନ୍ ଅମ୍ରାପଲନ୍ ଆରାଜା ଡ ଇଲ୍ଲାସରନ୍ ଅରିଅକନ୍ ଆରାଜା, କେନ୍ ଉଞ୍ଜି ରାଜାଞ୍ଜି ସରିନ୍ ସିଦିମନ୍ ଆପଡ଼ିଆଲୋଙ୍ ଅଲ୍ଜୁଜ୍ଜେଏଞ୍ଜି । 10ସିଦିମ୍ ପଡ଼ିଆଲୋଙନ୍ ଲବ ମିଞଲ୍ ଜୋଲ୍ଲାନ୍ ଗୋଗୋୟ୍ ଡକୋଏନ୍, ସଦୋମ୍ ଡ ଅମୋରାନ୍ ଆରାଜାଜି ଆଜିର୍ରେଞ୍ଜି ଆଡିଡ୍ ଜୋଲ୍ଲାଲୋଙନ୍ ଲାଙ୍ଲେନ୍ନେ ଗଲୋଏଞ୍ଜି, ଆରି ଲାଙ୍ଲେନେ ଆନିଞ୍ଜି ବରୁବାନ୍ ଜିରେଞ୍ଜି । 11ତିଆସନ୍ ଆନିଞ୍ଜି ସଦୋମ୍ ଡ ଅମୋରାନ୍ ଅଡ଼୍କୋନ୍ ଆନର୍ଜେ ଡ ଜନୋମଞ୍ଜି ଜୁରୁଲେ ପାଙ୍ଲେ ଜିରେଞ୍ଜି । 12ଅବ୍ରାମନ୍ ଆପୁତ୍ରା, ଲୋଟନ୍ ସଦୋମଗଡ଼ାଲୋଙନ୍ ଡକୋଲନ୍, ଲୋଟନ୍ ଡ ଆନର୍ଜେଞ୍ଜି ନିୟ୍ ଅଡ଼୍କୋନ୍ ପାଙ୍ଲେ ଜିରେଞ୍ଜି ।
13ତିଆଡିଡ୍ ଅବୟ୍ନେ ଜୁଜ୍ଜେଲୋଙନ୍ ସିଲଡ୍ ଆରଡ଼ୁରେନ୍ ଅବୟ୍ ଏବ୍ରିଅବାୟ୍ ଅବ୍ରାମନ୍ଆଡଙ୍ ଇୟ୍ଲେ ଅବ୍ଜନାଏ, ତି ଆବନେଡ଼ା ଅବ୍ରାମନ୍ ଇସ୍କୋଲନ୍ ଡ ଆନେରନ୍ ଆବୋଞାଙ୍ ଇମୋରିଅନ୍ ଲୋଙନ୍ ଅରାନୁବନ୍ ଆଜାୟ୍ତା ଡକୋଲଞ୍ଜି ଆରି ଆନିଞ୍ଜି ଅବ୍ରାମନ୍ ଆଡନେମର୍ ଡକୋଏଞ୍ଜି । 14ତି ଆଡିଡ୍ ଅବ୍ରାମନ୍ ଆପୁତ୍ରାନ୍ଆଡଙ୍ ଞମ୍ଲେ ଆପ୍ରାଙେଞ୍ଜି ଆ କବର ଅମ୍ଡଙ୍ଡାଲେ ଜୁଜ୍ଜେନ୍ ଆସିଙନ୍ ଡକୋଲନ୍ ଆକ୍ରୋଡେଞ୍ଜି ଆମନ୍ରାଜି ଜୁଜ୍ଜେନ୍ ଆଞଙ୍ନେଜି । ତିଆସନ୍ ୟାଗିସ ଅଟର୍ଜଣ ମନ୍ରାଞ୍ଜି ସରିନ୍ ବନେରା-ମରଞ୍ଜି ସନ୍ଡୋଙ୍ଲେ ଦାନ ଗଡ଼ାନ୍ ଜାୟ୍ ଇୟେଞ୍ଜି । 15ତି ସିଲଡ୍ଲ୍ଲନ୍ ଆନିନ୍ ଆକମ୍ବାରିଞ୍ଜିଆଡଙ୍ ବାଗୁ ଦଡ଼ ଏମ୍ମେଲନ୍ ତଗଲନ୍ ଆଡିଡ୍ ବନେରାମରଞ୍ଜିଆଡଙ୍ ଅବ୍ଗେଗେଏଞ୍ଜି, ଆରି ଆନିଞ୍ଜି ଆନିଞ୍ଜିଆଡଙ୍ ଦମେସକନ୍ ଆର୍କାବଡ଼ିଗଡ ଓବାନ୍ ଜାୟ୍ ଆନିଞ୍ଜିଆଡଙ୍ ସନ୍ଡୁଙ୍ଲେ ଗଙ୍ଲେପାଙେଞ୍ଜି । 16ଅଡ଼୍କୋନ୍ ଆନର୍ଜେ ଡ ଆପୁତ୍ରାନ୍ ଲୋଟନ୍ ଡ ଆଡୁକ୍ରିଞ୍ଜି ଡ ଅଡ଼୍କୋନ୍ ଆମନ୍ରାଞ୍ଜିଆଡଙ୍ ଆବ୍ଡିଡ୍ଲେ ଓରୋଙ୍ଲାୟ୍ ।
ଅବ୍ରାମନ୍ଆଡଙ୍ ମଲ୍କିସେଦକନ୍ ଆ ଆସିର୍ବାଦ
17କେନ୍ ଅନ୍ତମ୍ ଅବ୍ରାମନ୍ କଦର୍ଲାୟୋମରନ୍ଆଡଙ୍ ଆରି ଆଡନେ ରାଜାଞ୍ଜିଆଡଙ୍ ଅଃବାରେଲେ ଆୟର୍ରନାଞନ୍ ସିଲଡ୍, ସଦୋମନ୍ ଆରାଜା ଆନିନ୍ ସରିନ୍ ଆର୍ରନବାଙ୍ ଆସନ୍ ଶାବି ଆଗର୍ଡବାନ୍ ଆଗରାମ୍ଗାମ୍ ରାଜାନ୍ ଆଗର୍ଡବାନ୍ ଇୟେନ୍ । 18ସାଲେମନ୍ ଆରାଜା ମଲ୍କିସେଦକନ୍ ରୁଟିନ୍ ଡ ଦ୍ରାକ୍ୟାଡାନ୍ ଞମ୍ଲେ ପାଙ୍ଲାୟ୍, ଆନିନ୍ ଅଡ଼୍କୋନ୍ ସିଲଡ୍ ସୋଡ଼ା ଇସ୍ୱର ଆରାଓଡ଼ା ଡକୋଏନ୍, 19ଆନିନ୍ ଅବ୍ରାମନ୍ଆଡଙ୍ ଆସିର୍ବାଦଲେ ବରେନ୍, “ଅବ୍ରାମନ୍ ରୁଆଙନ୍ ଡ ପୁର୍ତିନ୍ ଆଗନବ୍ଡେଲ୍ ସୋଡ଼ା ଇସ୍ୱରନ୍ ଆସିର୍ବାଦଅମ୍ତୋ । 20ଅଡ଼୍କୋନ୍ ସିଲଡ୍ ସୋଡ଼ା ଇସ୍ୱରନ୍ ସନେଙ୍କେନ୍ ଡେଏତୋ, ଆନିନ୍ ବନେରା ମର୍ନମ୍ଞ୍ଜିଆଡଙ୍ ଅସିଲୋଙ୍ନମ୍ ସୋରୋପ୍ପାୟେନ୍ ।” ସିଲଡ୍ଲ୍ଲନ୍ ଅବ୍ରାମନ୍ ଅଡ଼୍କୋନ୍ ଆଜିନିସ ଆନର୍ଜେ ସିଲଡ୍ ମଲ୍କିସେଦକନ୍ଆଡଙ୍ ଦସମାଂସନ୍ ତିୟେନ୍ । 21ତି ସିଲଡ୍ଲ୍ଲନ୍ ସଦୋମନ୍ ଆରାଜା ଅବ୍ରାମନ୍ଆଡଙ୍ ବରେନ୍, “ଆମନ୍ ପରାଙେନ୍ ଆନର୍ଜେ ଅଡ଼୍କୋନ୍ ଡକ୍କୋଆ, ବନ୍ଡ ମନ୍ରାଞେଞ୍ଜି ଆବ୍ୟରିଁୟ୍ ।”
22ଅବ୍ରାମନ୍ ସଦୋମ୍ ଆରାଜାଆଡଙ୍ ଜାଲଙ୍ଲେ, “ଞେନ୍ ରୁଆଙନ୍ ଡ ପୁର୍ତିନ୍ ଆଗନବ୍ଡେଲ୍ମର୍ ଇସ୍ୱରନ୍ ଆମଙ୍ବା ତେକ୍କେ ସିଲନ୍ ପର୍ମାଡ଼ାତନାୟ୍, 23ଞେନ୍ ଆମନ୍ ଆତେ ଇନ୍ନିଙ୍ ଅଃପାଙେ, ଅବୟ୍ ତାଡ଼େରନ୍ ଅଡ଼େ ପାଣ୍ଡୋୟଁୟ୍ ଆଜନିବାଡ୍ ନିୟ୍ ଅଃପାଙେ, ଆମନ୍ ତିକ୍କି ବର୍ତନେ, ଞେନ୍ ଅବ୍ରାମନ୍ଆଡଙ୍ ଅବ୍ଗମାଙ୍ଲାୟ୍ । 24ଡାଙ୍ଗାଡ଼ାମର୍ଞେଞ୍ଜି ଇନି ଜୋମେଞ୍ଜି, ତି ଆତେତୁମ୍ ପାଙ୍ତେ, ଆରି ଞେନ୍ ସରିନ୍ ଆଜିର୍ରେଞ୍ଜି ଆ ସନାୟ୍ସିମର୍ଜି, ଆନିଞ୍ଜି, ଆନେର୍ରନ୍, ଇସ୍କୋଲନ୍ ଡ ମମ୍ରିନ୍ ରମ୍ମଙ୍ ରମ୍ମଙ୍ ବନ୍ତା ଜାଏତଜି ।”
Currently Selected:
ପର୍ତମ୍ମୁ 14: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
