उत्पत्ति 38
38
यहूदा अदिक आऊन सास्स तामार
1अवा दिनगोळ दा हिंग आत कि यहूदा तान वार्टगोळ हाती टु होटोदुन, अदिक हीरा हेसुर इन ऊंद अदुल्लामवासी मंळसा अन हाती ड्यारा हाक्कु आऊन हाती ईरली कुरतुन. 2अल यहूदा शुआ हेसुर इन ऊंद कनानी मंळसा अन पोर इक नोळदुन; अदिक आकिन से मदा माळकु आकिन हाती होदुन. 3आक व्हाट्यादी ईत्तुर, अदिक आकी ऊंद पार आदुन; अदिक यहूदा आऊन हेसुर एर ईटदुन. 4अदिक आक मात व्हाट्यादी ईत्तुर, अदिक ऊंद पार आदुन; अदिक आऊन हेसुर ओनान ईटकु आत. 5बाक आकी अदिक ऊंद पार आत, अदिक आऊन हेसुर शेला ईटकु आत; अदिक या समय आऊन जनम आत आ समय यहूदा कजीब नगर दा ईरतोगोन.
6अदिक यहूदा तामार हेसुर इन आर्त से धोड्डेव पार एर उन मदा माळ कोट्टुन. 7लेकीन यहूदा अन आव धोड्डेव पार एर यहोवा अन नजर दा दुष्ट ईरोन, इदुरसाटी प्रभु आऊक कोंद बुट्टुन. 8आग यहूदा ओनान से अंदुन, “तान अतक्या अन हाती होग, अदिक आकिन सांगुळ मैदाण आगोद धर्म पुरा माळकु तान वार्ट उन साटी औलाद पैदा माळ.” 9ओनान रा जानसोन संतान रा नानोर कहलुसतीदील; इदुरसाटी हिंग आत कि याग आव तान अतक्या अन हाती होदुन, आग आव जमीन मा तान वीर्य केडुकु नाश माळ बुट्टुन, यदुर देल हिंग आग बाळुल कि आऊन वार्ट उन हेसुर देल वंश नळु बाळुल. 10ईद क्याल्सा जो आव माळदुन अदुर देल यहोवा खुश आगीदील अदिक प्रभु आऊक भी कोंद बुट्टुन. 11आग यहूदा ई अंज्क इन कारण कि हिंग आगबाळुल कि तान वार्टुर घाई शेला भी सायुल, तान सास्सा तामार से अंदुन, “यागासताका नान पार शेला स्याणा आगेगालुन आगासताका तान आप्प उन मान्या अच रांड्यागीत ईर.” इदुरसाटी तामार तान आप्प उन मान्या होगकु ईरली कुरतुर.
12हापाळ समय बितुसदुर मा यहूदा अन हिंग्स जो शुआ अन पोर ईरोर, आक सोतोदुर; बाक यहूदा अन दुख इन दिनगोळ होगदुर मा तान संगी हीरा अदुल्लामवासी सांगुळ तान मर्र-म्यांडागोळ चुट्टी कडावाळेर हाती तिम्ना नगर इक होदुन. 13अदिक तामार इक ईद समाचार सिक्त, “नीन मॉव तान मर्र-म्यांडागोळ्द चुट्टी कळसुसोर साटी तिम्ना नगर इक होगेत्यान.” 14आग तामार तान रांड्यागीत इन कपळा ईळ्सदुर, अदिक तान बाय घुंघट देल होचकोमकु ऊंद चादर गुंळ्स कोंडुर अदिक तिम्ना अन हादी मा एनैम इन प्रवेश दरवाजा मा कुरतोदुर. आक ईद इदुरसाटी माळदुर यतिकी आकिन देर शेला हारोदव आगेगीदुन अदिक आऊन से आकिन मदा माळकु आगीदील.
15याग यहूदा आकी नोळदुन, आकी आव वेश्या सम्सदुन; यतिकी आक तान बाय होचकोमकु ईटीदुर. 16आव हादी मा टु आकिन दी तिर्गदुन, अदिक आकिन से अनली कुरतुन, “नानी तान हाती बरगोळ,” यतिकी आऊक मालुम ईला ईरोद कि आक आऊन सास्सा हुळ.
अदिक आक अनली कुरतुर, “अगर ना नीनी तान हाती बरगोळाईन, रा नी नानी येन कोट्या?”
17आव अंदुन, “ना नीनी तान झुंड दा टु ऊंद मर्री अन पाड्डा कळु बुळाईन.”
आग तामार अंदुर, “अदरी कळासताका अदुर बदला दा येन कोट्या?”
18आव केळदुन, “नी येन चाहसत्या?”
आक उत्तर कोट्टुर, “तान मुहर, अदिक बाजुबन्द, अदिक तान कय इन छळी.” आग आव आकी अव सामान कोट्टुन, अदिक आकिन हाती होदुन, अदिक आक आऊन से व्हाट्यादी ईत्तुर. 19आग आक येदकु होटोदुर, अदिक तान घुंघट ईळ्सकु तान रांड्यापन इन पहनावा मात हाक्क कोंडुर.
20याग यहूदा तान अदुल्लामवासी संगी इन कय दा अद मर्र इन पाड्डा आ आर्त इन साटी कळुदुन, गहान ईटकु वस्तु आ आर्त इन कय देल बिळस्कु तरूल; रा अल आऊक आ आर्त सिकीदील. 21आव ईत्त आत्त लॉकुरी केळदुन कि, “आक वेश्या येल आर, एनैम इन हादी मा कुरतोगोर?”
आंदुर अंदुर, “ईल यारू वेश्या यागलु ईरोर अच ईला.”
22इदुरसाटी आव यहूदा अन हाती वापस बंदकु अंदुन, “नानी आक सिकीदील; अदिक आ जागा नोर लॉकुर अंदुर, ‘ईल रा यातोदु वेश्या ईरालुर.’”
23“आग यहूदा अंदुन, ठीक आद, अव निशान इन बंधक वस्तु आकिन हाती इच ईरगोळ, ईलारा नाव लॉकुर तुच्छ आळुकु आदेव; नोळ, ना मर्री इन पाड्डा कळु बुटीदीन, लेकीन आक नीनी सिकीदील.”
24लगभग मुर तींगुळ बाद्दा यहूदा अक ईद समाचार सिक्त, “नीन सास्सा तामार व्यभिचार माळ्यार; बल्की आक व्यभिचार देल व्हाट्यादी भी आगेग्यार.”
आग यहूदा अंदुन, “आकी व्हार्या तरी कि आकी होत्ताकु आगुल.”
25याग आकी व्हार्या तेगुकु आगोद, आग आक, तान मॉव उन हाती ईद अनकु कळुदुर, “या मंळसा अन ई सामान हुन, आऊन से अच ना व्हाट्यादी आईन,” बाक आक ईद भी अनकु कळुदुर, “अरू रा सही कि ईद मुहर, अदिक बाजुबन्द, अदिक छळी यार्द हुन.”
26यहूदा अव समान नोळतेला अच पहचान्स कोंडुन अदिक अंदुन, “आक रा नान कम दोषी आर, यतिकी ना अच आकी शेला अन हिंग्स आगोर से रोक्सीदिन.” यहूदा आकी बाक यागलु कय हचीदिल.
27याग आकिन हाळोद समय बत्त, आग ईद पता हत्त कि आकिन व्हाट्या दा येढ्ढ चिकोर आर. 28याग आक हाळुली कुरतुर आग ऊंद पार ऊंद कय व्हार्या बत्त, अदिक दाई क्याचांद धागा हुडुकु आऊन कय दा ईद अनतेला कटदुर, “पयले ईवा पैदा आग्यान.” 29लेकीन आव तान कय बुळ्क जेळदुन अदिक आऊन वार्ट उन जनम आऊन से पयला आत. आग दाई अंदुर, “नी पयले व्हार्या होट्टुर दा समर्थ आद!” इदुरसाटी आऊन हेसुर पेरेस ईटकु आत.#मत्ती 1:3 30हिंद आऊन वार्ट यार्द कय दा क्याचांद सुत कटकु ईरोद पेरेस आदुन, अदिक आऊन हेसुर जेरह#38:30 क्याचांद या चमकीला ईटकु आत
Currently Selected:
उत्पत्ति 38: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
