उत्पत्ति 36
36
एसाव उन वंशावली
(१ इतिहास 1:34-37)
1एसाव जो एदोम भी कहलुसतान, आऊन ईद वंशावली हुन. 2एसाव रा कनानी पोरगोळ सांगुळ मदा माळदुन; मतलब हित्ती एलोन इन पोर आदा अक, अदिक ओहोलीबामा अक जो अना अन पोर, अदिक हिब्बी सिबोन इन नाती ईरोर.#उत्पत्ति 26:34 3बाक आव इश्माएल इन पोर बासमत इक भी, जो नबायोत इन आकतींग ईरोर, मदा माळदुन.#उत्पत्ति 28:9 4आदा रा एसाव उन द्वारा एलीपज उक, अदिक बासमत रूएल उक जनम कोट्टुर. 5अदिक ओहोलीबामा यूश, अदिक यालाम, अदिक कोरह उक पैदा माळदुर, एसाव इन ईंदुर अच चिकोर कनान द्याश दा पैदा आदुर.
6एसाव तान हिंग्सुर, अदिक पोर-पारगोळ, अदिक मान्यागोळोव सप्पा जनावरगोळ, अदिक तान मर्र-म्यांडा; अदिक वस्ता गोसी पयला सप्पा जनावरगोळ, अदिक तान सप्पा सम्पती इक, जो आव कनान द्याश दा जमा माळीदुन, हुडुकु तान वार्ट याकूब उन हाती टु दुसरा द्याश इक होटोदुन. 7यतिकी आंदुर्द सम्पती ईट आगेगीत, कि आंदुर तान सांगुळ ईला ईट सकोर; अदिक हापाळ जनावरगोळ कारण आ द्याश दा, येल आंदुर परदेशी आगकु ईर तोगोर, अव समुस सकीदील. 8एसाव जो एदोम भी कहलुसतद, सेईर हेसुर इन पहाळी द्याश दा ईरली कुरतुन.
9सेईर हेसुर इन पहाळी द्याश दा ईरावाळेर एदोम उन मूल मंळसा एसाव इन वंशावली ईद हुन. 10एसाव उन पारगोळ हेसुर ईव हू; मतलब एसाव उन हिंग्स आदा अन पार एलीपज, अदिक एसाव उन हिंग्स बासमत उन पार रूएल. 11अदिक एलीपज उन ई पारगोळ आदुर; मतलब तेमान, ओमार, सपो, गाताम, अदिक कनज. 12एसाव उन पार एलीपज उन तिम्ना हेसुर इन ऊंद रखैल ईरोर, याक एलीपज इन द्वारा अमालेक इक जनम कोट्टुर: एसाव उन हिंग्स आदा अन वंश दा ईंदुर अच पैदा आदुर. 13रूएल इन ई पारगोळ आदुर; मतलब नहत, जेरह, शम्मा, अदिक मिज्जा एसाव उन हिंग्स बासमत इन वंश दा ईंदुर अच पैदा आदुर.
14ओहोलीबामा जो एसाव उन हिंग्स, अदिक सिबोन उन नातुगीत अदिक अना अन पोर ईरोर, आकिन ई पारगोळ आदुर: मतलब आक एसाव उन द्वारा यूश, यालाम अदिक कोरह अक जनम कोट्टुर.
एदोम उन अधिपती
15एसाव उन पारगोळ दा अधिपती ईंदुर ईरोर: एसाव उन धोळ पार एलीपज उन वंश दा टु तेमान अधिपती, ओमार अधिपती, सपो अधिपती, कनज अधिपती, 16कोरह अधिपती, गाताम अधिपती, अमालेक अधिपती एलीपज उन वंशीगोळ दा टु, एदोम द्याश दा ईंदुर अच अधिपती आदुर; अदिक ईंदुर अच आदा अन वंश दा पैदा आदुर.
17एसाव उन पार रूएल उन वंश दा ईंदुर स्याणा आदुर; मतलब नहत अधिपती, जेरह अधिपती, शम्मा अधिपती, मिज्जा अधिपती रूएल वंशिगोळ दा टु, एदोम द्याश दा ईंदुर अच अधिपती आदुर; अदिक ईंदुर अच एसाव उन हिंग्स बासमत इन वंश दा पैदा आदुर.
18एसाव उन हिंग्स ओहोलीबामा इन वंश दा ईंदुर पैदा आदुर; मतलब यूश अधिपती, यालाम अधिपती, कोरह अधिपती, अना अन पोर ओहोलीबामा जो एसाव उन हिंग्स ईरोर आकिन वंश दा ईंदुर अच पैदा आदुर. 19एसाव जो एदोम भी कहलुसतान, आऊन वंश ईव अच हु, अदिक आंदुर अधिपती भी ईंदुर अच आदुर.
सेईर इन वंशावली
20सेईर जो होरी हेसुर इन जाती नव ईरोन, आऊन ई चिकोर आ द्याश दा पयला टु उच ईरतोगोर; मतलब लोतान, शोबाल, सिबोन, अना, 21दीशोन, एसेर, अदिक दीशान: एदोम द्याश दा सेईर इन ईंदुर अच होरी जातीवाळेर अधिपती आदुर.
22लोतान उन पार, होरी, अदिक हेमाम ईरोर; अदिक लोतान उन आकतींग तिम्ना ईरोर.
23शोबाल उन ई पारगोळ आदुर: मतलब आल्वान मानहत, एबल, शपो, अदिक ओनाम.
24अदिक सीदोन उन ई पारगोळ आदुर: अय्या, अदिक अना; ईव आवा अना हुन यारी सुनसान जागा दा तान आप्प सिबोन उन गधागोळी आळ्स्त आळ्स्त बीसी नीर इन झरनागोळ सीकदव. 25अदिक अना अक दीशोन हेसुर ईनव पार आदुन, अदिक आवा अना अक ओहोलीबामा हेसुर ईनोर पोर आदुर. 26दीशोन उक ई पारगोळ आदुर: हेमदान, एशबान, यित्रान, अदिक करान.
27एसेर उन ई पारगोळ आदुर: बिल्हान, जावान, अदिक अकान.
28दीशान उन ई पारगोळ आदुर: ऊस, अदिक अरान.
29होरी जाती नोर अधिपती ईंदुर लॉकुर आदुर: लोतान अधिपती, सिबोन अधिपती, शोबाल अधिपती, अना अधिपती, 30दीशोन अधिपती, एसेर अधिपती, दीशान अधिपती; सेईर द्याश दा होरी जाती नोर ईंदुर अच अधिपती आदुर.
एदोम उन राजा
(१ इतिहास 1:43-54)
31बाक याग इस्त्राएलगोळ मा राज्य माळावाळेर राजागोळ पयले एदोम द्याश मा ई राजागोळ राज्य माळदुर; 32बोर उन पार बेला एदोम दा राज्य माळदुन, अदिक आऊन शहर इन हेसुर दिन्हाबा आद. 33बेला अन सोत्तुर मा, बोस्रा निवासी जेरह उन पार योबाब आऊन जागा मा राजा आदुन. 34योबाब उन सोत्तुर मा, तेमानियों अन निवासी हूशाम आऊन जागा मा राजा आदुन. 35बाक हूशाम उन सोत्तुर मा, बदद उन पार हदद आऊन जागा मा राजा आदुन ईव आवा हुन याव मिद्यानियागोळी मोआब इन द्याश दा हारूस कोंडुन, अदिक आऊन शहर इन हेसुर अबीत आद. 36बाक हदद उन सोत्तुर मा, मस्रेकावासी सम्ला आऊन जागा मा राजा आदुन. 37बाक सम्ला अन सोत्तुर मा, शाऊल जो महानद इन तटवाला रहोबोत नगर इन ईरोन, आव आऊन जागा मा राजा आदुन. 38शाऊल उन सोत्तुर मा, अकबोर उन पार बाल्हानान आऊन जागा मा राजा आदुन. 39अकबोर उन पार बाल्हानान उन सोत्तुर मा, हदर आऊन जागा मा राजा आदुन अदिक आऊन शहर इन हेसुर पाऊ आद; अदिक आऊन हिंग्स उन हेसुर महेतबेल आद, जो मेजाहाब इन नाती अदिक मत्रेद उन पोर ईरोर.
40एसाव उन वंश दा जो अधिपती ईरोर आंदुरव हेसुर: तिम्ना, अलवाह, यथेथ, 41ओहोलीबामा अधिपती, एला अधिपती, पीनोन अधिपती, , 42कनज अधिपती, तेमान अधिपती, मिबसार अधिपती, 43मग्दीएल अधिपती, ईराम अधिपती एदोम वंशीगोळ जो द्याश इक तान माळ कोंडीदुर, आऊन निवास जागा दा ईंदुर अच अधिपती आदुर; अदिक एदोमी जाती इन मूल मंळसा एसाव हुन.
Currently Selected:
उत्पत्ति 36: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
