उत्पत्ति 33
33
याकूब उन एसाव से सिकोद
1अदिक याकूब कण्ण नेगुकु ईद नोळदुन, कि एसाव नाक सौ लॉकुर सांगुळ बरेत्यान. आग आव चिकोरी अलग-अलग वाट्सकु लियाह अदिक राहेल अदिक येढ्ढु दासीगोळ इक सौप्स बुट्टुन. 2अदिक आव सप्पा मुंदुर मुंद पारगोळ सांगुळ दासीगोळी आंदुर हिंद पारगोळ सांगुळ लियाह अक, अदिक सप्पा मुंदुर हिंद राहेल अदिक यूसुफ उक ईटदुन, 3अदिक खुद आ सप्पा मुंदुर मुंद वाळुसदुन अदिक येळ घन धरती मा बिदकु नमस्कार माळदुन, अदिक तान वार्टुन हात्ती पोहचुसदुन. 4आग एसाव आऊन से भेंट माळोर साटी ओळदुन, अदिक आऊक दिल देल हचकु, याद्दा देल चिपकुसकु चुम्सदुन; बाक आंदुर येढ्ढु मुंदुर वर्लली कुरतुर. 5आग एसाव कण्ण नेगुकु आर्तेरी अदिक चिकोरी नोळदुन; अदिक केळदुन, “ईंदुर जो नीन सांगुळ आर आंदुर यार उर?”
आव अंदुन, “ईंदुर नीन दास उन चिकोर उर, यारी परमेश्वर अनुग्रह माळकु नानी कोटान.” 6अदिक दासीगोळ तान तान चिकोरगोळ सांगुळ हाती बंदुर अदिक बांगकु नमस्कार माळदुर. 7हांग अच लियाह भी तान चिकोरगोळ सांगुळ हाती बंदुर, आक भी बांगकु नमस्कार माळदुर अदिक बाक राहेल इन सांगुळ यूसुफ भी बंदुन अदिक नमस्कार माळदुन.
8एसाव याकूब से केळदुन, “ईद धोळ दल, गोसी नानी येती कोट्ट, समझ दा बंदीदिल.”
याकूब अंदुन, “नान स्वामी, ना ईदुर द्वारा नींद अनुग्रह ताकोमोद चाहसतीन.”
9एसाव अंदुन, “हे नान वार्टा नान हाती सब येनारा आद. अदिक जो भी नींद आद, अदरी तांद अच हाती ईरगोळ.”
10याकूब अंदुन, “ईला! अगर नींद अनुग्रह नान मा आद, रा नान दी टु ई भेंटगोळी स्वीकार माळ कोम; यतिकी नीनी नोळकु हत्त कि ना परमेश्वर उन दर्शन माळ कोंडीन, अदिक नी नानी दिल देल स्वीकार भी माळ्द. 11इदुरसाटी ईद भेंट जो नीनी कळुकु आग्याद, ग्रहण माळ; यतिकी परमेश्वर नान मा अनुग्रह माळ्यान, अदिक नान हाती हापाळ आद.” याग आव आऊन से हापाळ विनती माळदुन, आग आव भेंट इक ग्रहण माळदुन.
12बाक एसाव अंदुन, “बर, नाव मुंद होगाता: अदिक ना नींद मुंद मुंद नळाईन.”
13याकूब अंदुन, “हे नान प्रभु, नी जान्सत्या कि नान सांगुळ स्यांण पारगोळ, अदिक म्यांडा मर्रगोळ अदिक गोसी जो हाल कोळावाळा आव, अगर ईत्ता जनावर ऊंद दिन भी येक्कुल नळ्सकु आदाव, रा सप्पा च्या सप्पा सोतोदव. 14ईदुर साटी नान प्रभु तान दास से मुंद होटुगुल, अदिक ना ई जनावरगोळ गती अन अनुसार, जो नान मुंद आद, अदिक चिकोर्द गती इन अनुसार धीरा धीरा नळुकु सेईर नगर दा तान प्रभु उन हाती पोहचुसाईन.”
15आग एसाव याकूब से अंदुन, “ना तान संगीगोळी नीन हाती बिट्ट बुळतीन.”
आग याकूब अंदुन, “येन ईदुर्द जरवत आद? नान मा नान प्रभु स्वामी इन अनुग्रह बन्सकु ईरूल, ईदा काफी आद.” 16इदुरसाटी एसाव अदा दिशी सेईर नगर इक होटोदुन. 17याकूब सुक्कोत इन दिशा दा मुंद वाळुसेदुन. अदिक अल तान साटी ऊंद मान्ना, अदिक जनावरगोळ साटी झोपळी माळदुन, ईदा कारण आ जागा अन्द हेसुर सुक्कोत#33:17 झोपळी अन मान्ना बित्त.
18अदिक याकूब जो पद्दनराम टु बंदीदुन, आव कनान द्याश इन शकेम नगर इन हाती कुशल देल पोहचुस्कु नगर इन मुंद ड्यारा निदरूसदुन. 19याता जागा मा आव ड्यारा नीदरूसदुन, आ जमीन इक आव शकेम उन आप्प, हमोर उन पारगोळ से ऊंद सौ चांदी इन मुद्रागोळ कोटकु कोंडीदुन. 20बाक याकूब अल ऊंद वेदी#33:20 कल्ल इन खंभा माळदुन, अदिक अदुर हेसुर आव एल-एलोहे-इस्त्राएल#33:20 इस्त्राएल इन परमेश्वर ईटदुन.
Currently Selected:
उत्पत्ति 33: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
