उत्पत्ति 23
23
सारा अन सायोद अदिक नळसोद आगोद
1सारा रा ऊंद सौ सताईस वर्ष ताका होदुर; अदिक याग सारा अन ईट ऊमर आत; 2आग आक किर्यतर्बा दा सोतोदुर. ईद रा कनान द्याश दा आद, अदिक इदरी हेब्रोन भी अनकु आगतद. इदुरसाटी अब्राहम सारा अन साटी वर्लली अल होदुन.
3आग अब्राहम लाश इन हाती टु येदकु हित्तीगोळ से अनली कुरतुन, 4“ना बीच दा पावना अदिक परदेशी आईन; नानी तान बीच दा मरघट साटी हिंग जागा कोळी जो नान खुद इन आगुल, ताकी ना तान सोत्तकु हिंग्स उक नळ्स सकाईन.”#इब्रानिगोळ 11:9-13; प्रेरितगोळ 7:16
5हित्ती अन लॉकुर अब्राहम से अंदुर, 6“हे नावम प्रभु, नाम्द केळ; नी नाम बीच दा धोड्डेव प्रधान आय. नाम कब्र दा टु यदरी नी चाहास्या अदुर्दा तान सोत्तुर इक नळ्स; नाम दा टु याऊ नीनी तान कब्र ताकोमोर से रोक्सतीदिल, कि तान सोत्तुर इक अदुर्दा नळ्स सकतीदिल.”
7आग अब्राहम येदकु नीदुरदुन, अदिक हित्तीगोळ मुंद, जो आ द्याश इन ईरावाळेर ईरोर, नमस्कार माळकु अनली कुरतुन, 8“अगर नीम्द ईद इच्छा आद कि ना तान सोत्तुर इक नळ्सकु तान कण्ण देल दुर माळाईन, रा नांद प्रार्थना आद, कि सोहर उन पार एप्रोन से नान साटी विनती माळी, 9कि आव तान मकपेलावाळा गुफा, जो आऊन भूमी इन सीमा मा आद; अदुर्द पुरा किमत ताकोमकु नानी कोट बुळ, कि अद नीम बीच दा मरघट साटी नांद खुद इन भूमी आगुल.”
10एप्रोन रा हित्तीयो अन बीच दा अल कुर्तकु ईरोन, इदुरसाटी यास हित्ती आऊन नगर इन फाटक टु आगकु अंदर होगतोगोर, आंदुर मुंद एप्रोन अब्राहम से अंदुन, 11“हे नान प्रभु; नांद मात केळ; ना नीनी आ गुफा केई सांगुळ नान संबंधीगोळ मुंद कोळेतीन, नी ईदुर दा तान हिंग्स उक नळ्स बुळ.”
12अब्राहम मात आ लॉकुरी बांगकु नमस्कार माळदुन 13अदिक लॉकुर्द केळतेला अच एप्रोन से अंदुन, “नांद मात केळ, नीनी ना आ केई इंद किमत कोळाईन, नी ईदरी स्वीकार माळकोम ताकी ना तान हिंग्स उक नळ्स सकाईन.”
14ईद केळतेला अच एप्रोन अब्राहम से अंदुन, 15“हे नान प्रभु, नांद मात केळ; ई केई इन किमत सिर्फ नाक सौ शेकेल चांदी इन सिक्का आद, लेकीन ईद नीन साटी अदिक नान साटी येनु हैलेच, नी तान हिंग्स उक मुण्ण कोटबुळ.” 16अब्राहम एप्रोन इन मात मान्सकु आऊक आस किमत इन चांदी तौलुसकु कोट्टुन, यास आव हित्तीगोळ मुंद अनतेला केळीदुन, मतलब नाक सौ ईत्ता शेकेल जो व्यापारीगोळ दा नळुतोगव.
17इदुरसाटी एप्रोन उन अद केई अदिक गुफा, जो मकपेला दा मम्रे अन हाती ईरोद, अदिक केई इन सप्पा मार्र जो अदुर्दा अदिक अदुर नाकु दी सीमा अन अंदर ईरव. 18सप्पा अब्राहम उक कोट्ट बुट्टुन, यास भी मुंदुर हित्ती इन शहर इन फाटक मा जमा आगीदुर, आ सप्पा मुंदुर मुंद अद संपत्ती अब्राहम उन अधिकार दा पक्का रीति देल होट्ठबत्त.
19अदुर बाद्दा अब्राहम तान हिंग्स सारा अक मकपेला अन केई इन गुफा दा नळ्स कोंडुन, जो कनान द्याश इन मम्रे, मतलब हेब्रोन इन हाती ईरोद. 20ई प्रकार हित्तीगोळ द्वारा अद केई अदिक अदुर दाकळोद गुफा मरघट इन रूप दा अब्राहम उन अधिकार दा कोटकु आत.
Currently Selected:
उत्पत्ति 23: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
