उत्पत्ति 21
21
इसहाक उन जनम
1यहोवा ह्यांग अंदीदुन हांग अच सारा अन सुधी ताकोमकु आकिन सांगुळ तान वादा अन्द अनुसार माळदुन. 2सारा व्हाट्यादी ईत्तुर अदिक आक अब्राहम उक याग आव हाळाबाट्ट आगेगीदुन, परमेश्वर इन नीवळुस्द समय दा सारा ऊंद पार उक जनम कोट्टुर. 3अब्राहम आ पार उन हेसुर इसहाक ईटदुन यारी सारा पैदा माळीदुर. 4याग आऊन पार इसहाक येट्ट दिन इनव आदुन, आग अब्राहम परमेश्वर उन आग्या अन अनुसार आऊन खतना माळदुन. 5इसहाक उन जनम इन समय अब्राहम उन उमर ऊंद सौ वर्ष इन ईरोद. 6सारा अंदुर, “नानी परमेश्वर खुशी देल तुम कोंडुन अदिक जो यावारा ईद मात केळ्यान, आव भी खुश आदान.” 7अदिक आक ईद भी अंदुर, “अब्राहम से याव अनतोगोन कि सारा चिग्द उक हाल कुळस्यार? लेकीन ना आऊन हाळाबाट्ट इन समय दा आऊक ऊंद पार कोट्टीन.”
8अदिक आव पार वाळुसदुन अदिक आऊंद हाल बिळसुस्कु आत; अदिक इसहाक उन हाल बिळसुसा दिशी अब्राहम धोळ्द ऊमोद कोट्टुन.
हाजिरा अदिक इश्माएल उक तेगुकु आगोद
9लेकीन सारा नोळदुर कि मिस्त्री हाजिरा अन पार, जो अब्राहम से पैदा आगीदुन, मज्याक हार्स्त कांळ्सदुन. 10ईद कारण आक अब्राहम से अंदुर, “ई दासी अक पार उन सांगुळ तेगुकोम: यतिकी ई दासी अन पार नान पार इसहाक उन सांगुळ हिस्सेदार आगतीदील.” 11ईद मात अब्राहम उक तान पार उन कारण बुरा हत्त. 12आग परमेश्वर अब्राहम से अंदुन, “आ पार अदिक तान दासी अन कारण नीनी बुरा हतबाळुल; जो मात सारा नीन से अनतार, अदरी मान्स, यतिकी जो नीन वंश अनकु आदान अद इसहाक से अच नळदीत. 13दासी इन पार से भी ना ऊंद जाती पैदा माळाईन इदुरसाटी आव नीन वंश हुन.”
14इदुरसाटी अब्राहम व्हातर्या जल्दी यदकु रोट्टी अदिक नीर देल तुमकु तोगुल इन झ्वारा भी हाजिरा अदिक आकिन पार उक कोट्टुन, अदिक आकी अल टु होगली हेळदुन हाजिरा अल टु होट्ट बुट्टुर अदिक बेर्शेबा अन आळी दा भटकुसतेला ईत्तुर. 15याग झ्वारा अन नीर खतम आगेत, आग आक पार उक झाळी इन ल्यालमा बिट बुट्टुर. 16अदिक आक तीर इन थप्पा अन दुरी मा होगकु आऊन दी बाँय माळकु कुर्तोदुर, “यतिकी आक तान पार उन वर्लोद अदिक आऊन परेशानी नोळ ईला सकोर.” अदिक अल कुर्तकु उच आक वर्लली कुरतुर.
17परमेश्वर आ पार उन वर्लोद केळदुन अदिक स्वर्ग टु परमेश्वर उन दूत हाजिरा से केळदुर, “हे हाजिरा, येन आत नी? अंजबाळ; यतिकी परमेश्वर पार उन वर्लोद केळ कोंडुन. 18ईग येळ, तान पार उक नेगु, यतिकी ना आऊन से ऊंद धोळ्द जाती पैदा माळाईन.” 19ईद अनतेला परमेश्वर हाजिरा अक ऊंद भाय तोर्सदुन, आक आ भाय दा टु नीर तेगुकु तान पार उक कुळ्सदुर. 20आव पार परमेश्वर उन अनुग्रह देल धोड्डेव आगेदुन अदिक आव पारान हेसुर इन सुनसान जागा दा ईरतोगोन; अदिक धनुषधारी बन्सेदुन. 21आव पारान हेसुर इन आळी दा ईरतोगोन; अदिक आऊन मोय आऊन साटी मिस्त्र द्याश टु ऊंद आर्त बेळसुसदुर.
अबीमेलेक उन सांगुळ अब्राहम उन वादा
22आ दिनगोळ दा हींग आत कि अबीमेलेक तान सेनापती पीकोल उक सांगुळ हुडुकु अब्राहम से अनली कुरतुन, “जो येनारा नी माळत्या अदुर दा परमेश्वर नीन सांगुळ ईरतान; 23इदुरसाटी नी परमेश्वर उन कसम तिन कि नी नानी, नान वंशगोळ से अदिक नान भावी पीढ़ीगोळ से यागलु ध्वाका माळतीदील, लेकीन नी नाम मा दया माळेत ह्यांग ना नीन से माळीदिन.”
24अदिक अब्राहम अंदुन, “ना नीन से वादा माळतीन.”
25अदिक अब्राहम अबीमेलेक उक ऊंद भाय इन बारा दा जो अबीमेलेक उन दासगोळ ताकत देल ताकोम कोंडीदुर, उलाहना कोट्टुन. 26आग अबीमेलेक अंदुन, “ना जानसालीन कि याव ईद क्याल्सा माळ्यान; अदिक नी भी नानी हेळीदिल, अदिक न ईदुर बारा दा ना ईदुर पयला केळीन.” 27आग अब्राहम मर्र-म्यांडा, अदिक वस्ता-गोसी अबीमेलेक उक कोट्टुन; अदिक आंदुर येढ्ढु मुंदुर आपस दा वादा माळदुर. 28अब्राहम येळ म्यांडा अन्द पाड्डागोळी झुंड टु अलग माळकु ईटदुन. 29आग अबीमेलेक अब्राहम से केळदुन, “ईव येळ पाड्डागोळ्द, जो नी अलग ईट्या, इऊर येन मतलब आद?”
30अब्राहम अंदुन, “नी ईव येळ पाड्डागोळी हुडु ताकी ईद नाम बीच गवाह ईत्तीत, कि ईद भाय ना अगळीन.” 31आंदुर येढ्ढु मुंदुर जो आ जागा मा आपस दा वादा माळीदुर, ईदा कारण अदुर्द हेसुर बेर्शेबा बीत्त.
32याग आंदुर बेर्शेबा दा वादा माळदुर, आग अबीमेलेक अदिक आऊन सेनापती पीकोल, येदकु पलिश्तीगोळ द्याश दा होटोदुर. 33बाक अब्राहम बेर्शेबा दा झाऊ#21:33 चिचकाय इन मार्र घाई मार्र उन ऊंद मार्र हचदुन, अदिक अल यहोवा जो सनातन परमेश्वर आन, आराधना माळदुन.#यशायाह 40:28; १ तीमुथियुस 1:17 34अब्राहम पलिश्तीगोळ द्याश दा हापाळ दिन ताका परदेशी आगकु ईत्तुन.
Currently Selected:
उत्पत्ति 21: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
