उत्पत्ति 2
2
1ई प्रकार आकाश अदिक पृथ्वी अदिक जो येनारा अदुर्दा आद अदुर्द रचना पुरा आत. 2अदिक परमेश्वर तान क्याल्सा यदरी आव माळतोगोन सातवा दिशी पुरा माळदुन, अदिक आव तान माळदव पुरा क्याल्सागोळ से सातवा दिशी आराम माळदुन.#इब्रानिगोळ 4:4-10 3अदिक परमेश्वर सातवा दिशी इक आशीष कोट्टुन अदिक पवित्र ठहरूसदुन; यतिकी अदुर्दा आव जगत इन रचना अन तान सप्पा क्याल्सा देल आराम ताकोंडुन.
मंळसा अन्द उत्पत्ति
4आकाश अदिक पृथ्वी इन रचना अन्द वृत्तान्त ईद आद कि याग अव उत्पन्न आदव मतलब या दिशी यहोवा परमेश्वर पृथ्वी अदिक आकाश इक माळदुन: 5आग मैदान इन यातोदु पौधा जमीन मा ईला ईरोद, न मैदान इन यातोदु श्याण मार्र उगुसकु ईरोद, यतिकी यहोवा परमेश्वर पृथ्वी मा नीर ईला बरसुसीदुन, अदिक जमीन मा खेती माळोरसाटी याऊ मंळसा भी ईला ईरोन; 6तरी भी कोहरा पृथ्वी टु येळतोगोद यदुर देल पुरा जमीन हस आगतोगोद.
7आग यहोवा परमेश्वर मंळसा अक जमीन इन मुण्ण देल माळदुन, अदिक आऊन मुग्ग दा जीवन इन श्वास ऊरदुन; अदिक मंळसा#2:7 पयला मंळसा आदम जित्ता प्राणी आगेदुन.#१ कुरिन्थि 15:45
8अदिक यहोवा परमेश्वर पूर्व इन दी अदन दा ऊंद वाटीका हचदुन, अदिक अल मंळसा अक यारी आव माळीदुन, ईट बुट्टुन. 9अदिक यहोवा परमेश्वर जमीन टु सप्पा प्रकार इन मार्र, जो नोळदुर दा मन मोहक अदिक अऊर काय तीनदुर दा वळ्लेव आव, हचदुन, अदिक बगीचा अन बीच दा जीवन इन मार्र इक अदिक भला अदिक बुरा अन ग्यान इन मार्र भी हचदुन.#प्रकाशितवाक्य 2:7; 22:2; 2:14
10आ वाटीका अक हस माळोरसाटी ऊंद महा गांगा अदन टु होळ्त अदिक अल टु मुंद वाळुसकु नाक धारागोळ दा वाटसेत.#यहेजकेल 11:12 11पयला धारा अन हेसुर पीशोन ईरोद; ईद अदा हुन जो हवीला हेसुर इन पुरा द्याश इक येल व्हान्ना सीकतद, घेरस्कु आद. 12आ द्याश इन व्हान्ना वळ्लीद ईरतद; अल मोती अदिक सुलैमानी कल्ल भी सीकताव. 13दुसरा गांगा अन्द हेसुर गीहोन आद; ईद अदा हुन जो कूश इन पुरा द्याश इक घेरस्कु आद. 14अदिक तीसरा गांगा अन्द हेसुर हिद्देकेल आद; ईद अदा हुन जो अश्शूर इन पूर्व इन दी वाहुसतद. अदिक चौथा गांगा अन्द हेसुर फरात आद.
15आग यहोवा परमेश्वर मंळसा अक हुळकु अदन इन वाटीका दा ईट बुट्टुन, कि आव अल क्याल्सा माळुल अदिक आ वाटीका अन्द रक्षा माळुल. 16अदिक यहोवा परमेश्वर मंळसा अक ईद आग्या कोट्टुन, “नी वाटीका अन्द सप्पा मार्र इन काय बेझीझक आगकु तीन सकत्या; 17लेकीन भला या बुरा अन ग्यान इन जो मार्र आद, अदुर्द काय नी यागलु तिनबाळेत: यतिकी या दिशी नी अदुर्द काय तिनद्या अदा दिशी जरूर सोत्या.”#रोमियों 6:23
18बाक यहोवा परमेश्वर अंदुन, “आदम उन आबना ईरोद वळ्लीद हैलेच; ना आऊन साटी ऊंद उपयुक्त सहायक माळाईन जो आऊन से मेल तीनुल.” 19अदिक यहोवा परमेश्वर जमीन दा टु सप्पा जाती इन वनपशु अदिक आकाश इन सप्पा प्रकार इन पक्षीगोळ इक माळकु आदम उन हात्ती तंदुन कि आव नोळुल अदिक अऊर हेसुर येन येन ईटतान; अदिक आदम सप्पा जित्ता प्राणीगोळ इक जो जो हेसुर कोट्टुन, अदा अऊर हेसुर आगेत.#भजन संहिता 8:6 20अदिक आदम सप्पा मान्ना दाकळव पशुगोळ, आकाश इन पक्षीगोळ, अदिक जमीन इन सप्पा वनपशु उन हेसुर ईटदुन, लेकीन आदम उक योग्य सहायक सिकीदील.
21आग यहोवा परमेश्वर आदम उक भारी जप दा हाकबुट्टुन, अदिक याग आव मींगेदुन आग आव आऊन ऊंद पसली तेगुकु अदुर जागा दा मास तुमदुन. 22अदिक यहोवा परमेश्वर आ पसली इक जो आदम दा टु तेगदीदुन, आर्त माळदुन; अदिक आकी आदम उन हात्ती तंदुन. 23आग आदम अंदुन,
“ईग ईक नान येलुगोळ दा टु येलु अदिक नान मास दा टु मास हुळ;
इदुरसाटी ईकीन हेसुर आर्त आदीत,
यतिकी ईक गंळ्स दा टु तेगुकु आग्यार.”#उत्पत्ति 29:14; २ शमूएल 5:1; १ कुरिन्थि 11:8; १ तीमुथियुस 2:13
24ई कारण मंळसा तान मोय-आप्प उक बिटकु तान हिंग्स उन सांगुळ ईत्तान, अदिक आंदुर येढ्ढु मुंदुर ऊंद तन आदार.#मत्ती 19:5; १ कुरिन्थि 6:16; इफिसिगोळ 5:31
25आदम अदिक आऊन हिंग्स येढ्ढु बिना कपळा देल ईरोर, लेकीन नाचोर ईला.
Currently Selected:
उत्पत्ति 2: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
