उत्पत्ति 13
13
अब्राहम अदिक लूत उन अलग आगोद वर्णन
1आग अब्राहम तान हिंग्स अदिक तान सप्पा संपत्ती हुडुकु, लूत उक भी सांगुळ हुडुकु, मिस्त्र अक बिटकु कनान इन दक्षिण द्याश दा बंदुन. 2अब्राहम मर्र-म्यांडागोळ, वस्ता-गोसी, अदिक व्हान्ना बेळ्ली इन हापाळ धनी ईरोन. 3बाक आव दक्षिण द्याश टु नळुकु बेतेल इन हात्ती अदा जागा मा पोहचुसदुन, येल आव पयले तान ड्यारा नीदरूसीदुन, जो बेतेल अदिक ऐ इन बीच दा आद. 4ईद जागा आ वेदी इन हुन, यदरी आव पयले माळीदुन; अदिक अल अब्राहम मात यहोवा से प्रार्थना माळदुन.
5लूत उन हात्ती भी, जो अब्राहम उन सांगुळ नळोन, मर्र-म्यांडागोळ, वस्ता-गोसीगोळ, अदिक ड्यारा ईरव. 6इदुरसाटी आ द्याश दा आ दिनगोळ साटी येक्कुल जागा ईला ईरोद कि आंदुर सांगुळल्या ईरूल: यतिकी आंदुर हात्ती हापाळ धन ईरोद इदुरसाटी आंदुर सांगुळल्या ईर सकीदील. 7अब्राहम अदिक लूत उन मर्र-माट्ट, अदिक वस्ता-गोसी नोर चरवाहागोळ दा झगळा आत. आ समय दा कनानी अदिक परिज्जी लॉकुर आ द्याश दा ईरतोगोर.
8आग अब्राहम लूत से अनली कुरतुन, “नान अदिक नीन बीच, अदिक नान अदिक नीन चरवाहागोळ बीच दा झगळा आग बाळुल; यतिकी नाव लॉकुर वार्ट-बंधु आयेव. 9इदुरसाटी नी नान से अलग आगेग, येन नीन मुंद पुरा द्याश हैलेच? अगर नी ऊजवा कय दी होद्या, रा ना डाक्या कय दी होगाईन; अगर नी डाक्या कय दी होद्या, रा ना ऊजवा कय दी होगाईन.”
10आग लूत कण्ण नेगुकु, यरदन गांगा अन हात्ती गोळोद सप्पा तराई नोळदुन कि अद सप्पा सिंचकु आद. यागासताका यहोवा सदोम अदिक गमोरा अक नाश ईला माळीदुन, आगासताका सोअर इन हादी ताका अद तराई यहोवा अन बगीचा, अदिक मिस्त्र द्याश इन घाई ऊपजाऊ ईरोद. 11इदुरसाटी लूत तान साटी यरदन इन सप्पा तराई नीवळुस्कु पूर्व दी होटोदुन, अदिक आंदुर आबुर-दाबुर से अलग आगेदुर. 12अब्राहम कनान द्याश दा ईत्तुन, लेकीन लूत आ तराई इन नगरगोळ दा ईरली कुरतुन; अदिक तान ड्यारा सदोम इन हात्ती नीदरूसदुन. 13सदोम इन लॉकुर यहोवा अन लेखा दा हापाळ बुरा अदिक पापी ईरोर.
अब्राहम उन हेब्रोन उक होगोद
14याग लूत अब्राहम से अलग आगेदुन आग अदुर बाद्दा यहोवा अब्राहम से अंदुन, “कण्ण नेगुकु या जागा मा नी आय अल टु उत्तर-दक्षिण, पूर्व-पश्चिम, नाकु दी नोळ. 15यतिकी याट जमीन नीनी कांळ्सतद, आ सप्पा जागा ना नीनी अदिक नीन वंश इक युग युग इन साटी कोळाईन. 16अदिक ना नीन वंश इक पृथ्वी इन धुळा अन किनकागोळ घाई माळाईन, ईल ताका कि जो यावारा पृथ्वी इन धुळा अन किनकागोळी आळु सक्यान आवा नीन वंश भी आळु सक्यान. 17येळ, ई द्याश इन लंबाई अदिक चौळाई दा नळु वयाळ, यतिकी ना अदरी नीनी का कोळाईन.” 18ईदुर बाद्दा अब्राहम तान ड्यारा बिचकु, मम्रे अन बांज मार्रगोळ बीच जो हेब्रोन दा ईरव, होगकु ईरली कुरतुन; अदिक अल भी आव यहोवा अन्द ऊंद वेदी माळदुन.
Currently Selected:
उत्पत्ति 13: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
Videos for उत्पत्ति 13
Ep 37. Genesis 13: How Do Famine and Wealth Both Test Faith?
The Bible Show
Ep 41. Genesis 17: What Does the Covenant of Circumcision Really Mean?
The Bible Show
Ep 42. Genesis 18 Part 1: Abraham Fails Again, and Sarah Laughs at God
The Bible Show
Ep. 45 Genesis 19 Part 2: Can God Redeem Even the Worst Family History?
The Bible Show