NAHUME 1
1
1 Molaetso ka ga Ninefe. Lokwalo lwa ponatshegelo ya ga Nahume wa Moelekoše.
Jehofa o galefela Ninefe
2Jehofa ke Modimo o o lefufa,
mme o a busolosa;
Jehofa o a busolosa,
mme o tletse bogale;
Jehofa o ipusolosetsa
baganetsi ba gagwe,
o bolokela baba ba gagwe bogale.
3Jehofa o bonya go galefa,
o mogolo mo nonofong,
mme ga a ketla a atlholela
yo o molato gope;
Jehofa o na le tsela ya gagwe
mo setsuatsueng le mo ledimong,
mme maru ke lorole
lwa dinao tsa gagwe.
4O tle a kgalemele lewatle,
a le tšhese,
mme a kgadise dinoka tsotlhe;
Bašana a topetege le Karemela,
le sethunya sa Lebanone
se topetege.
5Dithaba di a mo tlakaselela,
le makhubu a tlhapologe,
lefatshe le gogomoge
fa pele ga gagwe,
ee, lobopo le tsotlhe
tse di agileng mo go lone.
6E mang yo o ka emang
fa pele ga kgakalo ya gagwe?
E mang yo o ka nnang
mo tšhakgalong
ya bogale jwa gagwe?
Tšhakgalo ya gagwe
e goromediwa jaaka molelo,
le mafika a phatlakanngwe
ke ene.
7Jehofa o molemo,
ke kago e e thata ya phemelo
mo motlheng wa tlalelo;
mme o itse ba ba mo ikanyang.
8O tlaa fedisetsa ruri felo ga one
motse ka morwalela
o o penologang,
baba ba gagwe
o tlaa ba konatelela mo lefifing.
9Ana lo tlhatlhanya eng
ka ga Jehofa?
O tlaa fedisetsa ruri;
patikego ga e ketla
e tsoga lwa bobedi.
10Gonne le fa ba ntse jaaka mitlwa
e e nganaganyeng,
le fa ekete ba itlopetse
ka go nwa ga bone,
ba tlaa lailelwa ruri
jaaka dirite tse di omeletseng.
11Go dule mongwe mo go wena
yo o tlhatlhanyang bosula
ka ga Jehofa,
yo o gakololang boikepo.
12Go bua jaana Jehofa, a re:
“Le fa ba tletse nonofo,
ba bile ba le bantsi,
ba tlaa rengwa fela jalo,
mme o tlaa fetela koo.
Le fa ke go patikile
ga nketla ke tlhola ke go patika.
13Jaana ke tlaa roba
jokwe ya gagwe ke e tlosa
mo go wena,
ke tlaa komoganya dikgolego
tse di go golegileng.”
14Jehofa o ntshitse taolo ka ga gago,
gore go se tlhole go jalwa
ga leina la gago:
“Ke tlaa kgaola ke tlosa
mo ntlong ya medimo ya gago
setshwantsho se se setilweng,
le setshwantsho se se thetsweng;
ke tlaa go direla phupu,
gonne o maswe thata.”
15 Bonang, mo dithabeng
go tla dinao tsa yo o tlang
le mafoko a a molemo,
yo o bolelang kagiso!
Tshegetsa mediro ya gago
wena Juta,
o tlhomamise maikano a gago,
gonne motho wa boikepo
ga a ketla a tlhola a go ralala;
o kgaoletswe ruri.
Currently Selected:
NAHUME 1: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.