उबजणाय कीताप 34
34
दीना नी ईज्जत लेवा
1एक दाड़ो लीवा नी सोरी दीना, जे याकुब सी पयदा हयली हती, तीहया देस ना सोर्याम ने भेटवा करीन जी। 2तत्यार तीहया देस ना मुख्या हीव्वी हमोर नो सोरो सकेम तीने देख्यो, अने तीने ली जाय्न तीनी ह़ाते छीनाळु करीन तीनी ईज्जत ली लेदो। 3तत्यार तीनु मन याकुब नी सोरी दीना सी लाग ज्यु, अने तीहयो तीहयी सोरी सी मोंग नी वातु कर्यो, अने तीनी सी मोंग करवा बाज ज्यो। 4जत्यार सकेम आह़फा ना बाह हमोर ने केदो, “मने आहयी सोरी ने मारी लाडी बणवा करीन अपाड़ दे।”
5अने याकुब ह़मळ्यो के सकेम मारी सोरी दीना नी ईज्जत ली लेदलो से, पण तीना सोरा तीहयी टेमे जानवरु ह़ाते चोवगान मे हता, एतरे तीहयो तीमने आवते लग होगो र्यो। 6तत्यार सकेम नो बाह हमोर आवीन याकुब ह़ाते वात करवा करीन तीनीन्तां ज्यो। 7याकुब ना सोरा आहयु ह़मळतेत चोवगान मे गेथा घणा नराज हया अने खीजवाय्न पड़्या; काहाके सकेम याकुब नी सोरी नी ह़ाते छीनाळु करीन ईस्रायल ना घोराणा सी गंडाय नु आसवु काम करलो हतो, जीनु करवु वारु नी हतु। 8हमोर तीहया आखाम ने केदो, “मारा सोरा सकेम नु मन तमारी सोरी पोर घणु लागलु से, एतरे तीने तीनी लाडी हयवा नी लेदे तीने आप देवो। 9अने अमारी ह़ाते वेवा कर्या करो; तमारी सोरीम ने आमु ने आप्या करो, अने अमारी सोरीम ने तमु लीया करो। 10अने अमारी ह़ाते वहीन रेवो; अने आहयु देस तमारी अगळ पड़ र्यु; आनी मे रीन लेन-देन करो, अने आनी जागा ने तमारी जुगु ली लेवो।”
11अने सकेम बी दीना ना बाह अने भायु ने केदो, “कदी मारी पोर तमारी दया नी नींगा हय, ता जे कंय तमु मने केवो, तीहयु मे आपही। 12तमु मारी पांह केतरु बी देजु ह़ुका नी मांगो, ते बी मे तमु केय तीनी अनसारे आपही; पण ह़ेली सोरी ने मारी लाडी हयवा करीन मने आपो।”
13तत्यार आहयो वीच्यारीन के सकेम अमारी बेनेह दीना नी ईज्जत ली लेदलो से, याकुब ना सोरा सकेम अने तीना बाह हमोर ने चलाकी सी आहयो जपाप आप्या, 14“आमु ईसम काम नी कर सकया के काना वण-खतना वाळा अदमी ने अमारी बेनेह आपया; काहाके आनी सी अमारो वाक नीकळहे। 15आहयी वात पोर ते आमु तमारी मान लेहु के अमारीन तेम तमारी मे गेथा आखा अदमी नु खतनु करे। 16तत्यार आमु अमारा सोर्याम ने तमने आलहु, अने तमारा सोर्याम ने लावहु, अने तमारी ह़ाते वहीन बी रेहु, अने आपणु बेम एकीत घोराणा ना माणहु हय जहु। 17पण कदी तमु अमारी वात नी मानीन आह़फाम नु खतनु नी करो, ता आमु अमारा सोर्याम ने लीन आञे गेथा जत रेहु।”
18तीनी आहयी वात पोर हमोर अने तीनो सोरो सकेम खुस हया। 19अने तीहयो जुवान्यो जे याकुब नी सोरी ने घणो मोंग करतो हतो, आहया काम ने करवा मे तीहयो वार नी लगाड़्यो। तीहयो ते आह़फा ना बाह ना आखा घोराणा मे ढेरेत ईज्जत वाळो हतो।
20एतरे हमोर अने तीनो सोरो सकेम आह़फा ना ह़ेर ना झापला नी ह़ाते जाय्न ह़ेर वाळाम ने ह़मजाड़वा बाज ज्यो; 21“तीहया माणहु ते अमारी ह़ाते मेळ सी रेवा हींड र्या; एतरे तीमने आहया देस मे रीन लेन-देन करवा देवो; देखो, आहयु देस तीमनी जुगु बी ढेरेत से; तत्यार आमु तीमनी सोर्याम ने वेवा करीन लावे, अने आपणी सोर्याम ने आप्या करे। 22तीहया माणहु नीस्ता आहयी वात पोर अमारी ह़ाते रेवा अने एकीत घोराणा ना माणहु हय जवा करीन खुस से के तीमनीन तेम अमारा माणहु नु बी खतनु करे। 23ह़ु तीमना गाडरा अने बोकड़्या, अने गाय अने बोळद्या अने तीमना आखा जानवरु अने धन-दवलत आपणु नी हय जाय? आतरुत करे के आपणु आखा तीमनी वात मान लेय, ता तीहया आपणी ह़ाते रेहे।” 24एतरे जेतरा तीहया ह़ेर ना झापले गेथा नीकळता हता, तीहया आखा हमोर नी अने तीना सोरा सकेम नी वात मान्या; अने आखा अदमी नु खतनु कर्या, जेतरा तीहया ह़ेर ना झापले गेथा नीकळता हता।
25तीसरे दाड़े, जत्यार तीहया माणहु मांदला पड़ र्या हता, तत्यार आसम हयु के सीमोन अने लेवी नाम ना याकुब ना बे सोरा, जे दीना ना भाय हता, आपणी-आपणी तलवार लीन तीहया ह़ेर मे बीह्या वगर भराय्न आखा अदमी ने मार नाख्या। 26हमोर अने तीना सोरा सकेम ने तीहया तलवार वेर मार नाख्या, अने दीना ने सकेम ना घोर मे गेथी नीकाळ ली ज्या। 27याकुब ना सोरा आखाम ने मार नाखवा पोर बी हमलो करीन ह़ेर ने आनीन करते लुट लेदा के तीनी मे तीमनी बेनेह नी ईज्जत ली लेदा हता। 28तीहया गाडरा अने बोकड़्या, अने गाय अने बोळद्या, अने गदड़ा, अने ह़ेर अने चोवगान मे जेतरु धन हतु ली लेदा। 29तीहया आखाम ने, अने तीमना बाळ-बच्चा, अने बयराम ने बी हापकी ली ज्या, अने घोर-घोर मे जे कंय हतु, तीने बी तीहया लुट लेदा।
30तत्यार याकुब सीमोन अने लेवी ने केदो, “तमु जे आहया देस मे रेवा वाळा कनानीयो अने परीज्जीयो ना मन मे मारीन करते वेर पयदा करावला से, आनी सी तमु मने वेला मे नाख देदला से, काहाके मार ह़ाते थोड़ाक माणहु से, एतरे हाव तीहया एकठा हय्न मारी पोर हमलो करहे, अने मने मार नाक्खे, ता मे मारा घोराणा भेळ खत्तम हय जही।”
31तीहया केदा, “ह़ु तीहया अमारी बेनेह नी ह़ाते रंडीन तेम वेहवार करे?”
Currently Selected:
उबजणाय कीताप 34: PPt2025
Highlight
Copy
Compare
Share
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
