नेवताळा ना काम 15
15
यरुसलेम नी बठक
1अळतेण थोड़ाक माणहु युहद्या ह़ेर मे गेथा अंताकीया आवीन भरहो करन्या भाय-बेन्या ने ह़ीकाड़वा बाज ज्या: “कदीम मुसा नी रीतीन अनसारे तमारु खतनु नी हये ता तमु छुटकारो नी हात कर सको।” 2आना बारा मे पोलुस अने बरनाबास तीमनी वात पोर राजी नी हता करीन तीहया पोलुस नो अने बरनाबास नो वीरोद कर्या, अने वात मे जखड़ी पड़ ज्या। ता आहयु ठेराया, के पोलुस, अने बरनाबास, अने तीमनी मे गेथा थोड़ाक माणहु आहयी वात ना बारा मे नेवताळान्तां अने डायलान्तां यरुसलेम ह़ेर जाय।
3अने मंडळी ना माणहु तीमने थोड़ेक तक मेकवा ज्या; अने तीहया फीनीके अने सामर्या मे हतीन आड़जात्या ने मन फीराव्वा नी खबर ह़मळावता ज्या, अने आखा भरहो करन्या भायु आहयी खबर सी घण-जबर खुस हया। 4अने जत्यार तीहया यरुसलेम मे पुग्या, ता मंडळी ना माणहु, अने नेवताळा, अने डायला तीमने खुसी भेळ मळ्या, अने तीहया देखाड़्या के भगवान तीमनी ह़ाते हय्न केवा-केवा काम करलो। 5पण फरीसी पंथवाळा मे गेथा थोड़ाक माणहु जे भरहो करला हता, तीमनी मे गेथा थोड़ाक उठीन केदा, “ईमने खतना कराव्वा अने मुसा ना कायदा मानवा नो हुकम आपवा जोवे।”
6ता नेवताळा अने डायला आहयी वात ना बारा मे वीच्यार करवा करीन एक्ठा हया। 7#नेवताळा ना काम 10:1-43जत्यार पतरस ढेरेत वार तक झटा-पटी हय जवान अळतेण उबो हय्न तीमने केदो, “ए भायु, तमु जाणो, के ढेरेत दाड़ा पेले, भगवान तमारी मे गेथो मने टाळ लेदो, के मे आड़जात्या ने खुस-खबर नो बोल ह़मळावु अने ह़मळीन भरहो करे। 8#नेवताळा ना काम 10:44; 2:4अने आखा मन ने पारखवा वाळो भगवान ईमने बी आपणीन तेम चोखली आत्मा नो वाटो आपीन ईमना बारा मे गवाय देय; 9अने तीमना भरहा नी लारे तीमनु मन चोखु कर्यो, अने तीमनी अने अमारी वच मे कंय फरक नी राख्यो। 10ता हाव तमु भगवान ने काहा पारखी र्या? अने चेला ना बोचाटा मे मुसा ना कायदा ना वळा मेलीन काहा भार बणाय र्या, जे वळा ने आपणा आड़ा-बुड़ा लग नी उचल्या? 11नी, अमारो आहयो पक्को भरहो से के जे रीते तीहया मालीक ईसु नी दयान लारे पाप मे गेथा छुटकारो हात करहे; तीहयीत रीते आपणु हात करहु।”
12तीहया आखा होगा हय्न बरनाबास अने पोलुस नी वात ह़मळवा बाज र्या हता। अने तीहया सेलाण्या ना अने सेल-भात्या जुदा-कामु ना बारा मे केवा बाज र्या हता, जे सेलाण्या अने सेल-भात्या जुदा-कामु भगवान तीमनी लारे आखी जाती ना माणहु अगळ देखाड़लो हतो। 13साउल अने पोलुस की देदा अने अळतेण याकुब केवा बाज ज्यो, ए भायु, अने बेन्या हाव मारी वात ह़मळो। 14सीमोन आमने देखाड़्यो के भगवान आड़जात्या माणहु पोर गीण करीन आह़फा ना नाम जुगु टाळ लेदो। 15अने आहयी वात भगवान वगे गेथा वात केण्या माणहु नी वात सी मेळ बी खाय, जीसम तीमनी कीताप मे लीखलु से,
16आनीन अळतेण मे आवीन दावुद ना
ओदरला देस ने पासो बणावही,
अने तीना जुन्ला ह़ुनह़ान घोर ने
अळी पासो मजबुत बांदही।
17जीनी सी बचला आड़जात्या माणहु मालीक ने ह़ोदे तेम,
जे मारा नाम ना केवाये।
18आहयी वात तीहयोन-तीहयो मालीक केय, जे पेल्ना वारा मे कळ घड़ायी तां गेथो पीड़ीडीट केतो आय र्यो।
19“एतरे मारी ह़ला आहयी से” के “जे आड़जात्या मे गेथा भगवान भणी वळ र्या तीमने आपणु वेला नी पाड़वा जोवे। 20बाखीन आपणु ने तीमनीन्तां चीट्ठी लीख मोकलवा जोवे के, तीहया तीहयु खाणु नी खाय, जे रीती नी अनसारे वीटळ्ळु से, काहाके तीहयु मुर्ती पोर चड़ावलु से, अने छीनाळु सी छेटा रेय, अने गळु डाबीन मारला काना बी जानवर नु माह अने लोय नी खाय। 21काहाके पेल्ना वारा मे गेथात मुसा ना कायदा नो परच्यार करन्या ह़ेर-ह़ेर मे रीन। अने तीहया अराम ना दाड़ाडीट तीमना भक्ती ना घोर मे मुसा ना कायदा नी कीताप ह़मळावे।”
आड़जात्या भरहो करन्या ने चीट्ठी लीखे
22आहयी वात ह़मळीन आखी मंडळी ना माणहु ने, ईसु ना नेवताळा ने अने पुडारी ने वारु लाग्यु, अने तीहया वीच्यार काड्या के आपणी मे गेथा थोड़ाक माणहु टाळया। अने तीहया यहुदा ने टाळ्या, जे बरसबा केवाये। अने सीलास ने टाळ्या, जे तीहया भायु मे मुख्यो हतो; अने तीमने पोलुस अने बरनाबास ह़ाते अंताकीया मे मोकल्या। 23अने आहयी चीट्ठी लीखीन तीमना हाते मोकल्या, तीनी मे लीखलु हतु:
“ए अंताकीया मे, अने सीरीया मे, अने कीलीकीया मे रेण्या आड़जात्या भायु, तमने ईसु ना नेवताळा वगे गेथु अने पुडारी वगे गेथु आवही अने आवजो कीया! 24आमु आहयु ह़मळ्ळा से के अमारी मे गेथा थोड़ाक माणहु तमारीन्तां आवीन जेवी-तेवी वात कीन भंगलाड़ देदला से; अने तमारा जीव ने घबराड़ देदला से। पण आमु तीमने हुकम नी आपला हता। 25एतरे आमु आखान-आखा एक-मन्या हय्न वीच्यार काडला से के आमु अमारी मे गेथा जे माणहु ने टाळला से, तीहया माणहु ने अमारा मोंगाळ्ळा बरनाबास अने पोलुस भेळता तमारीन्तां मोकलया तेम। 26आहया माणहु एवा से, जे मालीक ईसु मसी ना नामे आह़फा नो जीव लग आपवा तीयार हय जेला हता। 27अने आमु ईमनी ह़ाते यहुदा अने सीलास ने मोकल्ला से, आहया तमने मोडे आखी वात की देहे। 28चोखली आत्मा ने अने आमने तालेत मालम पड़्यु के आहयी काम नी वात सोड़ीन तमारी पोर कानो अळी भार नी मेलवा जोवे: 29अने काम नी वात आहयी से, तमु मुर्ती पोर चड़ावलु खाणु नी खाजो। अने गळु डाबीन मारला काना बी जानवर नु माह नी खाजो, अने काना बी जानवर नु लोय नी खाजो। अने छीनाळु नी करजो। आसम करीन तमु आहयी आखी वात सी सेटा रेजो ता तमारु भलु हयहे।”
30आसम करीन तीहया आहयी चीट्ठी लीन अंताकीया ज्या, अने तां जाय्न तीहया आखा माणहु ने भेळा करीन तीहयी चीट्ठी तीमने आप देदा। 31अने तीहया ते चीट्ठी मे लीखलु भणीन घण खुस हय ज्या। 32यहुदा अने सीलास जे भगवान वगे गेथी वात केण्या माणहु हता, तीहया बी ढेरेत वात कीन तीमने तीहया भायु ने हीम्मत आप्या। अने तीमना भरहा ने टणको कर्या। 33अने तीहया थोड़ाक दाड़ा तां र्या, अने अळतेण तीहया ते भायु ने आवह़ु अने आवजो कीन, जे तीमने मोकल्ला तीनीन तां पासा जत र्या। 34पण सीलास ने तां रेवा वारु लाग्यु।
35अने पोलुस अने बरनाबास अंताकीया मे थोड़ाक दाड़ा र्या: अने ढेरेत बीजा माणहु ह़ाते रीन तीहया माणहु ने ह़ीकाड़ता जाय्न मालीक ईसु नी खुस-खबर ह़मळाया।
पोलुस अने बरनाबास अलग हये
36थोड़ाक दाड़ा हय ज्या अने अळतेण पोलुस बरनाबास ने केदो “चाल, जे-जे ह़ेर मे आपणु खुस-खबर ह़मळाया, तीहया-तीहया ह़ेर मे जाय्न ईसु पोर भरहो करन्या भायु ने देखता के तीहया ह़ु करवा बाज र्या।” 37तत्यार बरनाबास नी हेर आहयी हती, के आपणु युहन्ना ने बी ह़ाते ली जता। जे मरकुस बी केवायतो हतो। 38#नेवताळा ना काम 13:13पण पोलुस तीने ह़ाते लीजवा वारु नी ह़मज्यो, काहाके तीहयो पेले पमफुल्या मे सात सोड़ देदलो अने मालीक भगवान ना काम मे सात नी देदो। 39अने तीमनी मे झगड़ो हय ज्यो: अने बरनाबास मरकुस ने लीन मोट्लु ढुंड्यु मे बहीन कुपरुस मे जत र्यो। 40पण पोलुस, सीलास ने टाळ्यो, अने भायु तीनी जुगु भगवान पांह दया मांगीन तीने मालीक ना ह़ात मे ह़ोप देदा। 41अने पोलुस सीरीया अने कीलीकीया ह़ेर ना परगणा मे ईसु नी मंडळी मे जाय्न तीमने ईसु ना भरहा मे टणका कर्यो।
Currently Selected:
नेवताळा ना काम 15: PPt2025
Highlight
Share
Copy
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
