Est-Kĩk 8
8
Mũsumbĩ Ainenga Ayuti Mwanya Meyũkitĩe
1Mũthenyanĩ o ũsu, Mũsumbĩ Aasuelo nĩwanengie Esita syĩndũ syonthe ila syaĩ sya Amani, ũla waĩ mũmaitha wa Ayuti. Molitekai nĩwookie kwa mũsumbĩ nĩkwĩthĩwa Esita aĩ anamũtavya ũndũ maileny'e. 2Mũsumbĩ nĩwaumisye mbete yake ya kwĩkĩa mũulĩ, ĩla waĩ anoosa kuma kwa Amani na amũnenga Molitekai. Esita nĩwamũnengie Molitekai syĩndũ syonthe ila syaĩ sya Amani asũvĩae.
3Esita nĩwasyokie kũmwĩsũva mũsumbĩ atulĩtye ndu maũũnĩ make, aĩĩte nĩ kana avĩndũe mũvango mũthũku wa Amani nzyawa ya Akaki ũla waseũvĩtye wa kũaa Ayuti. 4Mũsumbĩ nĩwookĩlilye ĩla ndata yake ya thaavu amwelekelye Esita. 5Esita nĩwookĩlile aũngama mbee wake. Nĩwaisye atĩĩ, “Ethĩwa nũkwona wĩ waĩlu we mũsumbĩ, na nĩwendeeaw'a ninyie, na ethĩwa ũndũ ũũ nũkwoneka wĩ ũseo kwaku, nĩkũandĩkwe ũtw'ĩo ũleanĩte na ũla waandĩkĩtwe valũanĩ wa Amani, ĩla nzyawa ya Akaki na mwana wa Ametatha. Valũa ũsu aandĩkĩte nĩ kana Ayuti onthe ala me isionĩ ila we mũsumbĩ ũsumbĩkĩte moawe. 6Ndonya ata nyie kũmĩĩsya kwona andũ ma mbaĩ yakwa maiminwa, na andũ ma nyũmba yakwa mayũawa?”
7Nĩvo ĩndĩ Mũsumbĩ Aasuelo weeie Esita na Molitekai ũla Mũyuti atĩĩ, “Nĩnumisye mwĩao Amani ooawa kwa kũsũw'a na nakũnenga we Esita syĩndũ syake syonthe, nũndũ wa mũvango wake mũthũku wa kwenda kũaa Ayuti. 8#Nda 6.8 Ũtw'ĩo wumĩtw'e nĩ mũsumbĩ na kũĩkĩĩthw'a na mũulĩ wa kĩ-ũsumbĩ ndũtonya kũvetwa. Ĩndĩ ũu wĩ o vo, nĩmũtonya kũandĩka mũkatavya Ayuti ũndũ o na wĩva ũla mũkwenda mũitũmĩa ĩsyĩtwa yakwa, na kũwũĩkĩĩthya kwa kwĩkĩa ũvano ũsu wa kĩ-ũsumbĩ.”
9Matukũ mĩongo ĩlĩ na atatũ mwei wa katatũ, ũla wĩtawa Sivani, Molitekai nĩweetie athũkũmi ma mũsumbĩ ala matethasya wĩa wa kũandĩka, na ameaĩa maandĩke maũndũ onthe ala wamatavisye. Valũa isu nĩsyatwaĩwe Ayuti, makavana, na anini moo ala maĩ isionĩ isu syonthe syĩ ĩana na mĩongo ĩlĩ na mũonza. Isio isu syaumĩte India kũvika Ethiovia. Valũa isu syaandĩkĩtwe na ithyomo ila ineenawa isionĩ isu, na o ta ũu ikaandĩkĩwa Ayuti na kĩthyomo kĩla kyoo. 10Valũa isu syaandĩkĩtwe nĩ Molitekai ĩsyĩtwanĩ ya Mũsumbĩ Aasuelo, na kũĩkĩĩthw'a kwa kwĩkĩwa mũulĩ wa kĩ-ũsumbĩ. Nĩvo ĩndĩ andũ amwe matũmiwe matwaa valũa isu makuĩtwe nĩ mbalasi sya mũsumbĩ ila syaendaa syĩkalaatĩte mũno.
11Ũtw'ĩo ũsu wa mũsumbĩ nĩweetĩkĩlĩtye Ayuti onthe nthĩnĩ wa kĩla ndũa nene kũmbana vamwe na kwĩtetea kwa kũkita na amaitha moo. Nĩmeetĩkĩlĩtw'e kũaa na kũmina vyũ asikalĩ onthe ma kaũ ma mbaĩ sya kĩsio o na kĩva, ala matonya kũmavithũkĩa vamwe na iveti na syana syoo. O ta ũu nĩmeetĩkĩlĩtw'e kwosa ta mũtavo syĩndũ sya amaitha moo. 12Mũthenya ũla wanyuvĩtwe kwondũ wa Ayuti kwĩka maũndũ asu nthĩnĩ wa isio syonthe ila Mũsumbĩ Aasuelo wasumbĩkĩte, waĩ wa matukũ ĩkũmi na atatũ mwei wa ĩkũmi na ilĩ, naw'o nĩ mwei wa Atali.
12a Valũa ũsu waandĩkĩtwe ta ũũ: 12b“Kuma vala nĩĩ nyie Aasuelo Mũsumbĩ Mũnene, valũa ũũ ũmũvikĩe inyw'ĩ makavana ma isio sya nthĩ ĩana na mĩongo ĩlĩ na mũonza, kuma nthĩ ya India kũvika nthĩ ya Ethiovia, na kwa andũ ala aĩkĩĩku kwa ũsumbĩ witũ. Osai ngethi. 12cAndũ aingĩ nĩmakwatawa nĩ ngathĩĩo mũno, yĩla mataĩwa kaingĩ na kwĩkwa nesa nĩ andũ ala mamatethasya. Andũ asu nĩmendaa kwĩka naĩ andũ ma ũsumbĩ witũ, na o na mbee wa ũu nĩmaseũvĩasya mĩvango mĩthũku ala mamatethasya. 12dMekaa ũu nĩkwĩthĩwa monaa maendeea nesa na maikwatwa nĩ ngũlũ. Andũ asu maitũngaa mũvea nũndũ wa maũndũ maseo ala mekĩtwe nĩ andũ angĩ. Nũndũ wa kwĩthukĩĩsya maikathĩĩwa nĩ andũ atumanu na athũku, mekwatasya kana makavonoka ũsilĩlo wa Ngai, ũla ũmenete ũthũku na wonaa maũndũ onthe. 12eMavinda maingĩ andũ aingĩ ala matongoetye nĩmalikaw'a mavĩtyonĩ ma kũaa andũ mate ĩvĩtyo, na mayĩka maũndũ angĩ mathũku mataalyũlwa, nũndũ wa kũingĩĩw'a nĩ anyanyae ala manengetwe wĩa wa kũtongoesya andũ. 12fAnyanyae asu maitũmĩa ũkengani na ũthũku ũla wĩ ngoonĩ syoo, nĩmaalyũlaa mĩvango mĩseo ya ala masumbĩkĩte nĩ kana matetheke mo ene. 12gNgelekany'o ya maũndũ asu mathũku mekĩtwe nĩ andũ asu me mwĩkalo mũthũku na matũmĩaa ũtonyi woo naĩ, nĩmũtonya kũmyona mavukunĩ ala maandĩkĩtwe maũndũ ala meekĩkie tene, na o ta ũu kwa kũsisya maũndũ ala mekĩkĩte ĩvindanĩ yĩĩ.
12h “Ĩvindanĩ yĩla yũkĩte ngasisya wĩthĩe andũ onthe ũsumbĩnĩ wakwa nĩmekala na mũuo. 12iNgeanĩsya ũu kwa kũalyũla nzĩa ila twĩkaa maũndũ, na kwa kũsiasya nesa maũndũ ala nĩeteawe.
12k “Kwa sisyai maũndũ ala mekĩtwe nĩ Amani mwana wa Ametatha, kuma nthĩ ya Masendonia. We nĩ mũeni ũte ũndũ ũileny'e naitũ, na ũte na ngoo nzeo ta yakwa, ĩndĩ nĩnamũthokisye. 12lAmani nĩwĩthĩĩtwe aitanĩa moseo ala twĩkaa andũ ma mbaĩ syonthe, kũvikĩa o na eetwa ĩthe waitũ, na weethĩa kĩla ĩvinda nũtulĩlaw'a ndu anengwe ndaĩa nĩ andũ onthe, nũndũ nĩ we ũnaĩ wa kelĩ kwa ũnene ũsumbĩnĩ. 12mĨndĩ nũndũ wa kwĩthĩwa atasiĩĩa ũng'endu wake, nĩwaseũvisye mĩvango ya kũmbũaa na kwosa ũsumbĩ wakwa. 12nAitũmĩa ũseleke na ũvũngũ nĩwakũlilye nĩ kana Molitekai, ũla watangĩĩie thayũ wakwa oawe, vamwe na Esita, mũtetheesya wakwa ũte ĩvĩtyo, na o ta ũu andũ ma mbaĩ yoo yonthe. 12oAsũanĩaa kana kwa kwĩka ũu nũkũtuma tũtethĩwa twĩna ũsũvĩo, na ainengane ũsumbĩ wa Avelisia ũtw'ĩke wa andũ ma Masendonia.
12p “Ĩndĩ nĩnĩmanyĩte kana Ayuti, ala mendaa kũminwa nĩ mũndũ ũsu mũumanĩe mũno, ti andũ athũku, ĩndĩ nĩ andũ masumbĩkĩtwe nĩ mĩao mĩtheu mũno, 12qna nĩ syana sya Ngai ũla wĩ thayũ, ũla wĩ ĩũlũ mũno, Mwene Ũtonyi W'onthe, ũla wĩthĩĩtwe aitongoesya ũsumbĩ ũũ witũ nesa mũno ĩvindanĩ yĩĩ yakwa, o na ĩvindanĩ ya aaũmae makwa.
12r “Kwoou nĩ ũseo mũikeke kwĩanana na valũa ila inatũmiwe nĩ Amani mwana wa Ametatha, nĩkwĩthĩwa mũndũ ũsu, ũla ũneekie maũndũ asu, nũnooaiwe vamwe na andũ make kwa kũsũw'a mũvĩanĩ wa ndũa ya Susa, nũndũ Ngai ũla ũsumbĩkaa syĩndũ syonthe, o kwa mĩtũkĩ nũnamũnengie ũkany'o ũla ũnamwaĩlĩte.
12s “Kwoou ambai valũa ũũ kĩla vandũ ũsomwe nĩ andũ, na ekanai na Ayuti mekale kwĩanana na mĩao yoo, na mũimatetheesya nĩ kana mũthenyanĩ wa ĩkũmi na itatũ wa mwei wa ĩkũmi na ilĩ, ũla wĩtawa Atali, Ayuti mokite na andũ ala memavithũkĩa ĩvindanĩ yĩu yĩtw'ĩtwe ya kũmamina. 12tNgai ũla ũsumbĩkaa syĩndũ syonthe atw'ĩkĩthĩtye mũthenya ũũ wĩthĩwe wa ũtanu kwa andũ make ala wanyuvie, vandũ va wĩthĩwe mũthenya ũla meminwa.
12u “Kwoou mwĩlilikana mũthenya ũsu na ũtanu ta mũthenya wa vata mũno katĩ wa mĩthenya yenyu ya mboka, nĩ kana wĩthĩe ĩvindanĩ yĩĩ na yĩla yũkĩte ũkeethĩawa wonany'o wa ũtangĩĩo kwitũ na kwa andũ ma Velisia ala aĩkĩĩku, ĩndĩ wĩthĩawe ũlilikany'o wa kũminwa kwa andũ ala mavangaa kũtwĩka naĩ. 12vKĩla ndũa na kĩla nthĩ ĩla ĩteatĩĩa mwĩao wa valũa ũũ, ngamyananga na ĩtumo na kũmĩvĩvya na mwaki nĩ mũthatu. Ĩkaanangwa wĩthĩe ndĩsĩlwa nĩ andũ, na kwongela ũu wĩthĩe mavinda onthe nĩmenetwe nĩ nyamũ sya kĩthekanĩ na nyũnyi.”
13Ũtw'ĩo ũsu waĩ ũtavanw'e ta mwĩao isionĩ syonthe sya Velisia, na kũmanyĩka nĩ kĩla mũndũ nĩ kana Ayuti meyũmbany'e kwĩyĩĩvanĩsya kwa amaitha moo mũthenya ũsu wavika. 14Kwoou andũ asu matũmĩtwe nĩmatũlile mbalasinĩ isu syatũmĩkaa mavatanĩ ma mũsumbĩ, na syathi isembete mũno kwĩanana na mwĩao wa mũsumbĩ. Ũtw'ĩo ũsu waandĩkĩwe ndũanĩ nene ya Susa.
15Molitekai nĩwaumie nyũmba kwa mũsumbĩ ekĩĩte ngũa ndaasa ya kĩ-ũsumbĩ yaĩ ya langi wa mbuluu na ũngĩ mweũ; ngũa nzeo ndũmu yailyĩ ta ndune na ngovia ya thaavu mbanake ya kĩ-ũsumbĩ. Andũ ala maĩ ndũanĩ ya Susa nĩmalonzanilye mũno nũndũ wa kũtana na kwĩw'a mũyo. 16Ayuti nĩmeethĩiwe na ũtanu, na kwĩw'a mũyo na meew'a me eanĩe ta andũ makwata ũsindi. 17Ayuti ma kĩla kĩsio na ndũa syonthe kũla mwĩao na ũtw'ĩo wa mũsumbĩ wavikaa, nĩmeethĩawa na ũtanu na kwĩw'a mũyo. Nĩmaseũvisye mboka na meethĩwa na ĩvinda ya kũthũmũa. Andũ aingĩ ma nthĩ isu nĩmatw'ĩkie Ayuti nũndũ nĩmambĩĩie kũkĩa Ayuti.
Currently Selected:
Est-Kĩk 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
Est-Kĩk 8
8
Mũsumbĩ Ainenga Ayuti Mwanya Meyũkitĩe
1Mũthenyanĩ o ũsu, Mũsumbĩ Aasuelo nĩwanengie Esita syĩndũ syonthe ila syaĩ sya Amani, ũla waĩ mũmaitha wa Ayuti. Molitekai nĩwookie kwa mũsumbĩ nĩkwĩthĩwa Esita aĩ anamũtavya ũndũ maileny'e. 2Mũsumbĩ nĩwaumisye mbete yake ya kwĩkĩa mũulĩ, ĩla waĩ anoosa kuma kwa Amani na amũnenga Molitekai. Esita nĩwamũnengie Molitekai syĩndũ syonthe ila syaĩ sya Amani asũvĩae.
3Esita nĩwasyokie kũmwĩsũva mũsumbĩ atulĩtye ndu maũũnĩ make, aĩĩte nĩ kana avĩndũe mũvango mũthũku wa Amani nzyawa ya Akaki ũla waseũvĩtye wa kũaa Ayuti. 4Mũsumbĩ nĩwookĩlilye ĩla ndata yake ya thaavu amwelekelye Esita. 5Esita nĩwookĩlile aũngama mbee wake. Nĩwaisye atĩĩ, “Ethĩwa nũkwona wĩ waĩlu we mũsumbĩ, na nĩwendeeaw'a ninyie, na ethĩwa ũndũ ũũ nũkwoneka wĩ ũseo kwaku, nĩkũandĩkwe ũtw'ĩo ũleanĩte na ũla waandĩkĩtwe valũanĩ wa Amani, ĩla nzyawa ya Akaki na mwana wa Ametatha. Valũa ũsu aandĩkĩte nĩ kana Ayuti onthe ala me isionĩ ila we mũsumbĩ ũsumbĩkĩte moawe. 6Ndonya ata nyie kũmĩĩsya kwona andũ ma mbaĩ yakwa maiminwa, na andũ ma nyũmba yakwa mayũawa?”
7Nĩvo ĩndĩ Mũsumbĩ Aasuelo weeie Esita na Molitekai ũla Mũyuti atĩĩ, “Nĩnumisye mwĩao Amani ooawa kwa kũsũw'a na nakũnenga we Esita syĩndũ syake syonthe, nũndũ wa mũvango wake mũthũku wa kwenda kũaa Ayuti. 8#Nda 6.8 Ũtw'ĩo wumĩtw'e nĩ mũsumbĩ na kũĩkĩĩthw'a na mũulĩ wa kĩ-ũsumbĩ ndũtonya kũvetwa. Ĩndĩ ũu wĩ o vo, nĩmũtonya kũandĩka mũkatavya Ayuti ũndũ o na wĩva ũla mũkwenda mũitũmĩa ĩsyĩtwa yakwa, na kũwũĩkĩĩthya kwa kwĩkĩa ũvano ũsu wa kĩ-ũsumbĩ.”
9Matukũ mĩongo ĩlĩ na atatũ mwei wa katatũ, ũla wĩtawa Sivani, Molitekai nĩweetie athũkũmi ma mũsumbĩ ala matethasya wĩa wa kũandĩka, na ameaĩa maandĩke maũndũ onthe ala wamatavisye. Valũa isu nĩsyatwaĩwe Ayuti, makavana, na anini moo ala maĩ isionĩ isu syonthe syĩ ĩana na mĩongo ĩlĩ na mũonza. Isio isu syaumĩte India kũvika Ethiovia. Valũa isu syaandĩkĩtwe na ithyomo ila ineenawa isionĩ isu, na o ta ũu ikaandĩkĩwa Ayuti na kĩthyomo kĩla kyoo. 10Valũa isu syaandĩkĩtwe nĩ Molitekai ĩsyĩtwanĩ ya Mũsumbĩ Aasuelo, na kũĩkĩĩthw'a kwa kwĩkĩwa mũulĩ wa kĩ-ũsumbĩ. Nĩvo ĩndĩ andũ amwe matũmiwe matwaa valũa isu makuĩtwe nĩ mbalasi sya mũsumbĩ ila syaendaa syĩkalaatĩte mũno.
11Ũtw'ĩo ũsu wa mũsumbĩ nĩweetĩkĩlĩtye Ayuti onthe nthĩnĩ wa kĩla ndũa nene kũmbana vamwe na kwĩtetea kwa kũkita na amaitha moo. Nĩmeetĩkĩlĩtw'e kũaa na kũmina vyũ asikalĩ onthe ma kaũ ma mbaĩ sya kĩsio o na kĩva, ala matonya kũmavithũkĩa vamwe na iveti na syana syoo. O ta ũu nĩmeetĩkĩlĩtw'e kwosa ta mũtavo syĩndũ sya amaitha moo. 12Mũthenya ũla wanyuvĩtwe kwondũ wa Ayuti kwĩka maũndũ asu nthĩnĩ wa isio syonthe ila Mũsumbĩ Aasuelo wasumbĩkĩte, waĩ wa matukũ ĩkũmi na atatũ mwei wa ĩkũmi na ilĩ, naw'o nĩ mwei wa Atali.
12a Valũa ũsu waandĩkĩtwe ta ũũ: 12b“Kuma vala nĩĩ nyie Aasuelo Mũsumbĩ Mũnene, valũa ũũ ũmũvikĩe inyw'ĩ makavana ma isio sya nthĩ ĩana na mĩongo ĩlĩ na mũonza, kuma nthĩ ya India kũvika nthĩ ya Ethiovia, na kwa andũ ala aĩkĩĩku kwa ũsumbĩ witũ. Osai ngethi. 12cAndũ aingĩ nĩmakwatawa nĩ ngathĩĩo mũno, yĩla mataĩwa kaingĩ na kwĩkwa nesa nĩ andũ ala mamatethasya. Andũ asu nĩmendaa kwĩka naĩ andũ ma ũsumbĩ witũ, na o na mbee wa ũu nĩmaseũvĩasya mĩvango mĩthũku ala mamatethasya. 12dMekaa ũu nĩkwĩthĩwa monaa maendeea nesa na maikwatwa nĩ ngũlũ. Andũ asu maitũngaa mũvea nũndũ wa maũndũ maseo ala mekĩtwe nĩ andũ angĩ. Nũndũ wa kwĩthukĩĩsya maikathĩĩwa nĩ andũ atumanu na athũku, mekwatasya kana makavonoka ũsilĩlo wa Ngai, ũla ũmenete ũthũku na wonaa maũndũ onthe. 12eMavinda maingĩ andũ aingĩ ala matongoetye nĩmalikaw'a mavĩtyonĩ ma kũaa andũ mate ĩvĩtyo, na mayĩka maũndũ angĩ mathũku mataalyũlwa, nũndũ wa kũingĩĩw'a nĩ anyanyae ala manengetwe wĩa wa kũtongoesya andũ. 12fAnyanyae asu maitũmĩa ũkengani na ũthũku ũla wĩ ngoonĩ syoo, nĩmaalyũlaa mĩvango mĩseo ya ala masumbĩkĩte nĩ kana matetheke mo ene. 12gNgelekany'o ya maũndũ asu mathũku mekĩtwe nĩ andũ asu me mwĩkalo mũthũku na matũmĩaa ũtonyi woo naĩ, nĩmũtonya kũmyona mavukunĩ ala maandĩkĩtwe maũndũ ala meekĩkie tene, na o ta ũu kwa kũsisya maũndũ ala mekĩkĩte ĩvindanĩ yĩĩ.
12h “Ĩvindanĩ yĩla yũkĩte ngasisya wĩthĩe andũ onthe ũsumbĩnĩ wakwa nĩmekala na mũuo. 12iNgeanĩsya ũu kwa kũalyũla nzĩa ila twĩkaa maũndũ, na kwa kũsiasya nesa maũndũ ala nĩeteawe.
12k “Kwa sisyai maũndũ ala mekĩtwe nĩ Amani mwana wa Ametatha, kuma nthĩ ya Masendonia. We nĩ mũeni ũte ũndũ ũileny'e naitũ, na ũte na ngoo nzeo ta yakwa, ĩndĩ nĩnamũthokisye. 12lAmani nĩwĩthĩĩtwe aitanĩa moseo ala twĩkaa andũ ma mbaĩ syonthe, kũvikĩa o na eetwa ĩthe waitũ, na weethĩa kĩla ĩvinda nũtulĩlaw'a ndu anengwe ndaĩa nĩ andũ onthe, nũndũ nĩ we ũnaĩ wa kelĩ kwa ũnene ũsumbĩnĩ. 12mĨndĩ nũndũ wa kwĩthĩwa atasiĩĩa ũng'endu wake, nĩwaseũvisye mĩvango ya kũmbũaa na kwosa ũsumbĩ wakwa. 12nAitũmĩa ũseleke na ũvũngũ nĩwakũlilye nĩ kana Molitekai, ũla watangĩĩie thayũ wakwa oawe, vamwe na Esita, mũtetheesya wakwa ũte ĩvĩtyo, na o ta ũu andũ ma mbaĩ yoo yonthe. 12oAsũanĩaa kana kwa kwĩka ũu nũkũtuma tũtethĩwa twĩna ũsũvĩo, na ainengane ũsumbĩ wa Avelisia ũtw'ĩke wa andũ ma Masendonia.
12p “Ĩndĩ nĩnĩmanyĩte kana Ayuti, ala mendaa kũminwa nĩ mũndũ ũsu mũumanĩe mũno, ti andũ athũku, ĩndĩ nĩ andũ masumbĩkĩtwe nĩ mĩao mĩtheu mũno, 12qna nĩ syana sya Ngai ũla wĩ thayũ, ũla wĩ ĩũlũ mũno, Mwene Ũtonyi W'onthe, ũla wĩthĩĩtwe aitongoesya ũsumbĩ ũũ witũ nesa mũno ĩvindanĩ yĩĩ yakwa, o na ĩvindanĩ ya aaũmae makwa.
12r “Kwoou nĩ ũseo mũikeke kwĩanana na valũa ila inatũmiwe nĩ Amani mwana wa Ametatha, nĩkwĩthĩwa mũndũ ũsu, ũla ũneekie maũndũ asu, nũnooaiwe vamwe na andũ make kwa kũsũw'a mũvĩanĩ wa ndũa ya Susa, nũndũ Ngai ũla ũsumbĩkaa syĩndũ syonthe, o kwa mĩtũkĩ nũnamũnengie ũkany'o ũla ũnamwaĩlĩte.
12s “Kwoou ambai valũa ũũ kĩla vandũ ũsomwe nĩ andũ, na ekanai na Ayuti mekale kwĩanana na mĩao yoo, na mũimatetheesya nĩ kana mũthenyanĩ wa ĩkũmi na itatũ wa mwei wa ĩkũmi na ilĩ, ũla wĩtawa Atali, Ayuti mokite na andũ ala memavithũkĩa ĩvindanĩ yĩu yĩtw'ĩtwe ya kũmamina. 12tNgai ũla ũsumbĩkaa syĩndũ syonthe atw'ĩkĩthĩtye mũthenya ũũ wĩthĩwe wa ũtanu kwa andũ make ala wanyuvie, vandũ va wĩthĩwe mũthenya ũla meminwa.
12u “Kwoou mwĩlilikana mũthenya ũsu na ũtanu ta mũthenya wa vata mũno katĩ wa mĩthenya yenyu ya mboka, nĩ kana wĩthĩe ĩvindanĩ yĩĩ na yĩla yũkĩte ũkeethĩawa wonany'o wa ũtangĩĩo kwitũ na kwa andũ ma Velisia ala aĩkĩĩku, ĩndĩ wĩthĩawe ũlilikany'o wa kũminwa kwa andũ ala mavangaa kũtwĩka naĩ. 12vKĩla ndũa na kĩla nthĩ ĩla ĩteatĩĩa mwĩao wa valũa ũũ, ngamyananga na ĩtumo na kũmĩvĩvya na mwaki nĩ mũthatu. Ĩkaanangwa wĩthĩe ndĩsĩlwa nĩ andũ, na kwongela ũu wĩthĩe mavinda onthe nĩmenetwe nĩ nyamũ sya kĩthekanĩ na nyũnyi.”
13Ũtw'ĩo ũsu waĩ ũtavanw'e ta mwĩao isionĩ syonthe sya Velisia, na kũmanyĩka nĩ kĩla mũndũ nĩ kana Ayuti meyũmbany'e kwĩyĩĩvanĩsya kwa amaitha moo mũthenya ũsu wavika. 14Kwoou andũ asu matũmĩtwe nĩmatũlile mbalasinĩ isu syatũmĩkaa mavatanĩ ma mũsumbĩ, na syathi isembete mũno kwĩanana na mwĩao wa mũsumbĩ. Ũtw'ĩo ũsu waandĩkĩwe ndũanĩ nene ya Susa.
15Molitekai nĩwaumie nyũmba kwa mũsumbĩ ekĩĩte ngũa ndaasa ya kĩ-ũsumbĩ yaĩ ya langi wa mbuluu na ũngĩ mweũ; ngũa nzeo ndũmu yailyĩ ta ndune na ngovia ya thaavu mbanake ya kĩ-ũsumbĩ. Andũ ala maĩ ndũanĩ ya Susa nĩmalonzanilye mũno nũndũ wa kũtana na kwĩw'a mũyo. 16Ayuti nĩmeethĩiwe na ũtanu, na kwĩw'a mũyo na meew'a me eanĩe ta andũ makwata ũsindi. 17Ayuti ma kĩla kĩsio na ndũa syonthe kũla mwĩao na ũtw'ĩo wa mũsumbĩ wavikaa, nĩmeethĩawa na ũtanu na kwĩw'a mũyo. Nĩmaseũvisye mboka na meethĩwa na ĩvinda ya kũthũmũa. Andũ aingĩ ma nthĩ isu nĩmatw'ĩkie Ayuti nũndũ nĩmambĩĩie kũkĩa Ayuti.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011