Osea 7
7
Ũthũku na Ũng'endu wa Ĩsilaeli
1“Yĩla ngwenda kũvosya Ĩsilaeli,
nĩw'o nonaa ũthũku wa Evalaimu,
na meko mathũku ma Samalia maivuanw'a.
Nĩmakenganaa,
ing'ei nitũlaa nyũmba,
andũ athũku nĩmaveneaa angĩ syĩndũ nzĩanĩ.
2Ĩndĩ maimanyaa ngoonĩ syoo,
kana nĩnĩlilikanaa ũthũku woo w'onthe.
Naĩ syoo nimathyũlũlũkĩte,
na nonaa naĩ isu kĩla ĩvinda.”
3Matanĩthasya mũsumbĩ na ũthũku woo,
na anini ma mũsumbĩ na ũvũngũ woo.
4Onthe nĩ ilaalai,
mailyĩ ta ĩiko yĩ mwaki,
yĩla mũui wa mĩkate ũte na vata wa kũyĩkitanĩĩsya,
kuma yĩla ũkũkima mũtu nginya yĩla mũtu wĩkaata.
5Mũthenyanĩ wa mboka ya mũsumbĩ,
anini make nĩmamililwe nĩ ndivai,
na eekwatany'a na ala me kĩvũthya.
6Nũndũ ngoo syoo ivyũvaa ta mwaki wa ndumbĩa,
ĩvindanĩ yĩla mavangĩte kwĩka ũthũku,
ũthatu woo ũendeeaa kwongeleka ũtukũ w'onthe;
kwakya nĩwakanaa ta ũmũĩ wa mwaki.
7Onthe mavyũvĩte ta mwaki wa ndumbĩa,
na nĩmoaa atongoi moo.
Asumbĩ moo nĩmoaawa,
na vai ũmwe ũmbĩkaĩlaa.
8“Evalaimu nũvulanaa na mbaĩ ingĩ,
ailyĩ ta mũkate ũte mũalyũle.
9Aeni nĩmaĩsaa vinya wake,
ĩndĩ we ndamanyaa.
Mũtwe wake wusũĩte mbuĩ,
ĩndĩ we ndamanyaa kana nĩ mũkũũ.
10Ngathĩĩo sya andũ ma Ĩsilaeli nimasikatĩte,
ĩndĩ maikwenda kũsyokea Mwĩai Ngai, Ngai woo,
o na maikwenda kũmũmantha nũndũ wa maũndũ aa onthe.
11“Evalaimu ailyĩ ta ĩvũĩ ĩtumanu na yĩte ũndũ yĩsĩ,
ekaĩlaa Misili na aithi Asuli kũvoya ũtethyo.
12Maendete ngamekĩsya mũteo wakwa;
ngamakusya mavalũke ta nyũnyi sya yayaya.
Ngamakany'a nũndũ wa meko moo mathũku.
13Kyeva nĩ kwoo, nũndũ nĩmandiie!
Wanangĩko nĩ kwoo, nũndũ nĩmaleanĩte nakwa!
O na kau no nende kũmovosya, maneeneaa ũvũngũ.
14“Maimbĩkaĩlaa na ngoo syaw'o,
ĩndĩ makayaa me mokomonĩ moo.
Nĩmathaithaa mayĩtemanga maivoya ngetha ya mbaa mbeke na ndivai,
nĩmaleanaa nakwa.
15O na vala nĩnamamanyĩisye na namekĩa vinya,
nĩmavangaa maũndũ mathũku ĩũlũ wakwa.
16Mayĩsaa kũnzyokea nyie Ũla wĩ Ĩũlũ Mũno;
mailyĩ ta ũta mũthũku.
Atongoi moo makooawa na ũvyũ,
nũndũ wa ndeto syoo nthũku.
Ũndũ ũsu ũkatuma mathekeewa nĩ nthĩ ya Misili.”
Currently Selected:
Osea 7: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011