ALOMI 9
9
Kyeva kĩnene kya Vaulo nũndũ wa ũlei wa Isilaeli
1Nĩneenaa w’o nthĩnĩ wa Klĩsto, ndiũneena ũvũngũ, wasya wa ngoo wakwa nũũkũsĩĩa vamwe nakwa nthĩnĩ wa Veva Mũtheu, 2kana nĩ na kyeva kĩnene na woo ũtathela ngoonĩ yakwa. 3#Kuma 32.32.Nũndũ nenda nyie mwene nĩthĩwe nĩ mũumanĩe na kũvetwa nthĩnĩ wa Klĩsto kwondũ wa ana‐a‐asa makwa, mbaĩ yakwa kwa mwĩĩ: 4#Kuma 4.22; Kũt 7.6; 14.1,2.nao nĩ Aisilaeli; kũtuwa ana nĩ kwoo, o na ĩla ndaĩa na motianĩo, na kũnengwa ĩla mĩao, na ũthũkũmi wa Ngai, na ala matho; 5#Alo 1.25; Mt 1.1; Lk 3.23; Yoa 1.1.nao, ala aasa nĩ moo, na Klĩsto aumie kwoo kwondũ wa mwĩĩ, ũla wĩ ĩũlũ wa onthe, ũtaĩĩtwe nĩ Ngai tene na tene. Ameni.
Matho ma Ngai mayaalea kwĩanĩwa
6 #
Alo 2.28; Mot 23.19. Ĩndĩ ti kwĩthĩwa ndeto ya Ngai nĩyaemiwe. Nũndũ onthe ala masyaiwe nĩ Isilaeli, ti onthe Isilaeli: 7#Mwa 21.12.o na onthe ti syana, ala ma ũsyao wa Avalaamu: ĩndĩ, Nthĩnĩ wa Isaka ũsyao waku ũketwa. 8#Aka 4.23.Kũilyĩ ati syana sya mwĩĩ ti syo syana sya Ngai: ĩndĩ o syana sya ũla watho italawa kwĩthĩwa nĩ ũsyao. 9#Mwa 18.10.Nũndũ ĩno nĩyo ndeto ya watho, Ĩvinda ta yĩĩ nĩngoka, na Sala akethĩwa na mwana. 10#Mwa 25.21.Na ti ũu w’oka; ĩndĩ Leveka aya ĩvu ya ũmwe, nake nĩ mũũme wake, asa waitũ Isaka,— 11na syana itanamba ũsyawa, o na itanamba kwĩka ũndũ ũseo kana ũthũku, nĩ kana kwenda kwa Ngai kwĩanana na kũnyuva kwake kwĩkale, ti kwa meko, ĩndĩ nĩ kwa ũla wĩtanaa, 12#Mwa 25.23.Leveka nĩwataviw’e, Ũla mũkũũ nũkathũkũma mũinae. 13#Mal 1.2,3.O ũndũ kũandĩkĩtwe, Yakovo nĩnamwendie, ĩndĩ Esau nĩnamũmenie.
Ti ati Ngai ti mũlũngalu
14 #
Kũt 32.4. Twĩasya ata ĩndĩ? Kwĩ ũte ũlũngalu kwa Ngai? Aiee, kũikethĩwe ũu. 15#Kuma 33.19.Nũndũ nĩwamwĩie Mose, Ngamwĩw’ĩa tei ũla nĩmwĩw’ĩaa, na ngamwĩw’ĩa ĩnee ũla nĩmwĩw’ĩaa. 16#Aev 2.8.Na kwa ũu ti wa ũla wendaa, kana wa ũla ũsembaa, ĩndĩ nĩ wa Ngai ũla wĩw’ĩaa tei. 17#Kuma 9.16.Nũndũ maandĩko memwĩa Valao, Kwondũ wa ũu nĩnakũũngamisye, nĩ kana nonan’ye vinya wakwa nthĩnĩ waku, na nĩ kana syĩtwa yakwa yĩtavanw’e nthĩ yonthe. 18#Kuma 4.21; 7.3; 9.12; 14.4,17.Kwa ũu amwĩw’ĩaa tei ũla ũkwenda kũmwĩw’ĩa, na ũla ũkwenda kũmya aiũmya.
Ngai ni mwene vinya w’onthe
19Ĩndĩ ũkambĩa Kũilyĩ ata kwĩkalaa aitwona na mavĩtyo? Nũndũ nũũ ũla wĩsiĩĩa kwenda kwake? 20#Isa 29.16; 45.9.Aiee, ĩndĩ we mũndũ, nue ũũ ũla ũmũkananĩsya Ngai? Kĩndũ kĩla kyoombiwe nĩkĩtonya kũmũtavya ũla wakyũmbie, Wambũmbĩe ũu kĩ? 21#Yel 18.6.Kana mũmbi nde na vinya ĩũlũ wa yũmba, kuma mũndonĩ ũmwe, kĩlungu kĩmwe kũmba mũio wĩthĩwe na ndaĩa, na kilungu kĩngĩ kumba mũio ũte wa ndaĩa? 22#Yel 50.25.Nata ethĩwa Ngai, akyenda kwonan’ya ũthatu wake, na kũmanyĩthan’ya vinya wake, nĩwomĩĩsye na wũmĩĩsyo mwingĩ mĩio ya ũthatu ĩla yombiwe ya wanangĩko: 23#Aev 1.3–12; Alo 2.4; 8.29.nĩ kana amanyĩthan’ye wĩngĩ wa ndaĩa yake ĩũlũ wa mĩio ya tei, ĩla waseũvisye mbee yĩthĩwe ya ũtaĩo, 24nayo nĩ ithyi, ala watwĩtie, ti kuma kwa Ayuti oka, ĩndĩ kuma kwa Andũ‐ma‐mbaĩ‐ingĩ nao?
25 #
Osea 2.23. O ũndũ waisye ĩvukunĩ ya Osea,
Ngameta asu andũ makwa, ala mataĩ andũ makwa;
Na ngamwĩta mwendwa, ũla ũtaĩ mwendwa.
26 #
Osea 1.10. Na kũkeethĩwa, vala meeiwe, Inyw’ĩ mũi andũ makwa,
Vau makeetwa ana ma Ngai ũla wĩ thayũ.
27 #
Isa 10.22,23; Alo 11.5. Na Isaia eumya wasya wake kwondũ wa Isilaeli, Ethiwa ũtalo wa syana sya Isilaeli ũkethiwa ta kĩthangathi kya ũkanga, nĩ ũtialo ũla ũkatangĩĩwa: 28nũndũ Mwĩaĩi akeanĩsya ndeto yake ĩũlũ wa nthĩ, aimĩminũkĩlya na kũmĩtila nguvi. 29#Isa 1.9.Na, tondũ Isaia wambie ũneena,
Keka Mwĩaĩi wa Savaothi watũtiĩe ũsyao,
#
Isa 1.9. Twĩthiwa twatw’ĩkie ta Sotomo, na tũkavw’ananw’a na Ngomola.
Kĩtumi kya ũvalũko wa Isilaeli
30 #
Alo 10.20. Twĩasya ata ĩndĩ? Kana Andũ‐ma‐mbaĩ‐ĩngĩ, ala mataaatĩĩa ũlũngalu, nĩmoonie ũlũngalu, naw’o nĩ ũlũngalu, ũla wa mũĩkĩĩo: 31#Alo 10.2,3.ĩndĩ Isilaeli, maatĩĩa mwĩao wa ũlũngalu, matyaavikĩa mwĩao ũsu. 32#Isa 8.14.Nĩ ũndũ wa kĩ? Nũndũ matyaamantha kwa kũĩkĩĩa, ĩndĩ kwa kwĩka. Nĩmalulutĩkilw’e nĩ yĩla ĩvia yĩlulutĩkasya; 33#Isa 28.16; Mt 21.42; 1 Vet 2.6.o tondũ kũandĩkĩtwe,
Sisyai, nĩngwia nthĩnĩ wa Saioni ĩvia ya kũtulya na ĩvia ĩnene ya kũlulutĩkya:
Na ũla ũmwĩtĩkĩlaa ndakasonokw’a.
Currently Selected:
ALOMI 9: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
