MEKO MA ATŨMWA 7
7
Ũtavan’yo wa Sitivini
1Na mũthembi mũnene amũkũlya Sitivini, Nĩw’o mailyĩ maũndũ asu? 2#Sav 29.3; Mwa 11.31; 15.7.Na asũngĩa,
Ana‐a‐asa na aasa, ĩthukĩĩsyei: Ngai ũla ũtaĩawa amumĩlĩle asa waitũ Avalaamu, yĩla watwĩe nthĩ ya Mesovotamĩa, atanamba ũtũa nthĩ ya Aalani, 3#Mwa 12.1; 48.4.na amwĩa, Uma nthĩ ĩno yaku, ũtie andũ maku, ũthi nthĩ ĩla ngakwon’ya. 4#Mwa 11.32; 12.5.Na ĩndĩ auma nthĩ ya Akalitei, na atũa nthĩ ya Aalani: na yĩla ĩthe wake wakwie, Ngai amũthamya amũete nthĩ ĩno, ĩla mũtwĩe yu: 5#Mwa 12.7; 13.15; 17.8; 48.4; Kũt 2.5.na ndaamũnenga ũtiĩwa wayo, aiee, o na veana kwia ũnyaĩĩ wake: na amwatha kana akamũnenga nthĩ ĩno yĩthĩwe ng’ũndũ yake, na ya ũsyao wake ĩtina wake, yĩla ũtaĩ mwana. 6#Mwa 15.13,14; Kuma 2.22; 12.40.Na Ngai aneena ũu, kana ũsyao, wake ũkekala ũeni nthĩ ngeni, na kana makatuwa ngombo syoo, na kwĩkwa naĩ, ĩvinda ya myaka maana ana. 7#Kuma 3.12.Na mbaĩ ĩla makethĩwa ngombo syayo ngamĩsilĩla, aisye ũu Ngai: na ĩtina wa ũu makauma nthĩ ĩsu, na kũnthũkũmĩa vaa. 8#Mwa 17.10; 21.4.Na amũnenga ũtianĩo wa nzaĩko: na ĩndĩ Avalaamu amũsyaa Isaka, na amwaĩka mũthenya wa nyanya; na Isaka amũsyaa Yakovo, na Yakovo amasyaa ala atumĩa maitũ ĩkũmi na elĩ. 9#Mwa 37.11,28; 39.1,2,21; 45.4.Na atumĩa asu mamwĩw’ĩe Yosevu kĩwĩu, na mamũthoosya athi Misili: na Ngai aĩ nake, 10#Mwa 39.21; 41.38–45; Sav 105.21.na amumya mathĩnanĩ make onthe, na amũnenga waĩlu na ũĩ mbee wa Valao, mũsumbĩ wa Misili; na amũtw’a ngavana ĩũlũ wa Misili na ĩũlũ wa nyũmba yake yonthe. 11#Mwa 41.54; 42.5.Na kwooka yũa ĩũlũ wa nthĩ yonthe ya Misili na ya Kanaani, na ũnyamao mũnene: na aasa maitũ maiaaona syĩndũ sya ũmavũn’ya. 12#Mwa 42.2.Ĩndĩ Yakovo eew’a kana lĩu wĩ Misili, amatũma aasa maitũ, ya mbee. 13#Mwa 45.3,16.Na ya kelĩ Yosevu eeyumbũla kwa ana‐a‐ĩthe make; na mbaĩ ya Yosevu yamanyĩka kwa Valao. 14#Mwa 45.9–11; 46.27; Kuma 1.5; Kũt 10.22.Na Yosevu atũmana Yakovo ĩthe wake, amwĩta oke kwake na andũ make onthe, andũ mĩongo muonza na atano. 15#Mwa 46.1; 49.33; Kuma 1.6.Na Yakovo atheea alika Misili; na akw’a, we na aasa maitũ; 16#Mwa 23.16,17; 33.19; Yos 24.32.nao makuwa matwawa Sekemu, na maiwa mbũanĩ ĩla Avalaamu wathooie na thooa wa vetha kwa ana ma Amolu nthĩ ya Sekemu. 17#Kuma 1.7.Ĩndĩ ĩvinda ya watho ũla Ngai wamũnengie Avalaamu yathengeea, andũ asu meana na maingĩva nthĩ ya Misili, 18mũvaka kwookĩla mũsumbĩ ũngĩ ĩũlũ wa Misili, ũtaamwĩsĩ Yosevu. 19#Mwa 24.7; Kuma 1.9,22.Ũsu amĩkĩe mbaitũ ũseleke, na kũmeka naĩ aasa maitũ, kana mekye tũũkenge twoo ĩtheka tũikethĩwe thayũ. 20#Kuma 2.2; Aevl 11.23.Na ivĩnda yĩu Mose asyawa, nako kaĩ kanake mũno; na kaeewa nyũmbanĩ ya ĩthe myei ĩtatũ: 21#Kuma 2.5,10.na kekw’a ĩtheka, mwĩĩtu wa Valao akosa, akaea akatw’a mwana wake. 22Na Mose amanyĩiw’e ũĩ w’onthe wa Amisili; nake aĩ mwai ndetonĩ syake na mekonĩ make. 23#Kuma 2.11.Ĩndĩ avikya myaka yake mĩongo ĩna, kwamũlika ngoonĩ yake kũenda kũmasisya ana‐a‐ĩthe make, ana ma Isilaeli. 24#Kuma 2.12.Na akyona ũmwe wamo akĩnyamaw’a, amũtetheesya, na amũĩvanĩĩsya ũsu wanyamaaw’a, na amũaa ũla Mũmisili: 25nake atalĩlya kana ana‐a‐ĩthe nimamanyite kana Ngai nũmanengete wovosyo na kw’oko kwake; ĩndĩ matyaamanya. 26#Kuma 2.13.Na ũnĩ ũsu amaumĩlĩla maiũkita, nake enda ũmew’anĩthya ĩngĩ, aimea, Mavwana, mwĩ ma ĩthe ũmwe; nikĩ mũkwĩkana nai? 27#Kuma 2.14; Lk 12.14.Ĩndĩ ũla ũmwĩkĩte ũngĩ naĩ amũluuta, aisya, Ũtw’ĩtwe mũnene na mũsili ĩũlũ waitũ nũũ? 28Wĩenda ũmbũaa, ũndũ ũnamũaie Mũmisili ĩoo? 29#Kuma 2.15,22; 18.3,4.Na Mose akĩa nũndũ wa ndeto isu, na atw’ĩka mwĩkali wa ũeninĩ nthĩ ya Mitiani, na asyaĩa ana elĩ kw’o. 30#Kuma 3.2; Kũt 33.16.Na avikya myaka mĩongo ĩna e kw’o, aumĩlĩlwa nĩ mũlaĩka ũmũĩnĩ wa mwaki wĩ kakuthunĩ, weũnĩ wa kĩĩma kya Sinai. 31Na Mose awona, aseng’w’a nĩ woni ũsu: na akĩthengeea asisye, kwooka wasya wa Mwĩaĩi, ũiasya, 32#Kuma 3.6.Nyie nĩ Ngai wa aaĩthe maku, Ngai wa Avalaamu, na wa Isaka, na wa Yakovo. Na Mose atetema, na akĩa kũsisya. 33#Kuma 3.5.Na Mwĩaĩi amwĩa, Umya iatũ maũũnĩ maku: nũndũ vandũ vau ũũngeme nĩ nthĩ ntheu. 34#Kuma 2.24; 3.7,10.Nyie nĩnonete nesa monyamao ma andũ makwa me Misili, na nĩnĩw’ĩte kũluma kwo, nakwa natheea kũmatangĩĩa: na yu ũka, nĩngũũtũma Misili. 35#Kuma 2.14.Mose ũsu ũla maleile, maiasya, Ũtw’ĩtwe mũnene na mũsili nũũ? Nĩwe watũmiwe nĩ Ngai ethĩwe mũnene, na ĩngĩ ethĩwe mwovosya kwondũ wa kw’oko kwa mũlaĩka ũla wamumĩlĩle kakuthunĩ. 36#Mot 14.33; Kuma 7.3,10; 14.21.Mũndũ ũsu amatongoesye, akĩka momakyo na syama nthĩ ya Misili, na Ukanganĩ Mũtune, na weũni, ĩvinda ya myaka mĩongo ĩna. 37#Meko 3.22; Kũt 18.15.Mose ũsu nĩwe ũla wamatavisye ana ma Isilaeli, Ngai akamũkĩlĩlya mwathani kuma kwa ana‐a‐ĩthe menyu, ũilyĩ takwa. 38#Meko 7.53; Kuma 19.3; Kũt 9.10.Ũsu nĩwe ũla waĩ ũmbanonĩ weũnĩ, vamwe na mũlaĩka ũla waneenie nake kĩĩmanĩ kya Sinai, na vamwe na aasa maitũ: ũla wosie ndeto syĩ thayũ atũnenge ithyĩ: 39#Mot 14.3.na aasa maitũ maiaaĩtĩkĩla kũmwĩw’a, ĩndĩ mamũluuta kũasa, na ngoonĩ syoo maalũka Misili, 40#Kuma 32.1,23.Aluni, Tũseũvĩsye ngai ila syĩtũtongoeasya: nũndũ Mose ũsu, ũla watumisye nthĩ ya Misili, tũtyĩsĩ ũndũ ũmũkwatĩte. 41#Kuma 32.4,6.Na mĩthenya ĩsu maseũvya mũvw’anano wa kasaũ ka ng’ombe, na mootwaĩa mũvw’anano ũsu nthembo, na kũtanĩa mawĩa ma moko moo. 42#Yel 19.13; Amo 5.25–27.Ĩndĩ Ngai eethyũũa, na aekana nao mathũkũme nguthu ya ĩtunĩ; o ũndũ kũandĩkĩtwe ĩvukunĩ ya athani, atĩĩ,
Mwaandetee nyie indo mbũae na nthembo sya kũtonywa
Ĩvinda ya myaka mĩongo ĩna weũnĩ, inyw’ĩ nyũmba ya Isilaeli?
43Na inyw’ĩ mwakuĩte kakalũ ka Moleki,
Na ndata ya ĩla ngai yetawa Levani,
Mĩvw’anano ĩla mwaseũvisye mũmĩthaithe:
Nakwa ngatuma mũenda mwĩ atave kũasa kũvĩta Mbaviloni.
44 #
Kuma 25.40. Aasa maitũ maĩ na ũla wĩkalo wa ũkũsĩ weũnĩ, o ũndũ Mose weaĩwe nĩ ũla waneenie nake, kana ayĩseũvye kwĩanana na ngelekan’yo ĩla wonie. 45#Mwa 17.8; 48.4; Kũt 32.49; Yos 3.14; 18.1.Naw’o aasa maitũ nĩmookuanasya, na kũete me na Yosua, yĩla malikile kũmĩmeesya nthĩ sya i mbai ila Ngai walũngilye mbee wa mothyũ ma aasa maitũ kũvika mĩthenya ya Ndaviti; 46#2 Sam 7.2; Sav 132.5.ũla wonie waĩlo vala ve Ngai, nake nĩwendie kũmwonea Ngaĩ wa Yakovo wĩkalo. 47#1 Asu 6.1.Ĩndĩ Solomoni amwakĩa nyũmba. 48#Isa 66.1,2.Ĩndĩ Ũla Wĩ lũlũ wa Onthe ndekalaa nthĩnĩ wa nyũmba syakĩtwe na moko; o ũndũ mwathani waitye,
49Ĩtu nĩ kĩvĩla kyakwa kya ũsumbĩ,
Na nthĩ nĩ kavila kakwa ka nyaĩĩ syakwa;
Mwĩaĩĩ easya, Mũkambakĩa nyũmba ĩilyĩ ata?
Kana nĩ vandũ vailyĩ ata vala ngathũmũa?
50Ti kw’oko kwakwa kwoombie syĩndũ ii syonthe?
51 #
Kuma 32.9; Ali 26.41; Mot 27.14; Yel 9.26; Isa 63.10. Inyw’ĩ mwĩ na ngingo nyũmũ, na ngoo syenyu na matũ menyu mate maike, mĩthenya yonthe nĩmũmũsiĩĩaa Veva Mũtheu: o ũndũ aaĩthe menyu meekie, nĩw’o inyw’ĩ mwĩkaa. 52#2 Mav 36.16; Mt 23.31.Nĩ mwathani wĩva ũla aaĩthe menyu mataamũthĩn’ya? Na ĩngĩ nĩmamoaie ala mambie ũmwon’ya kũka kwa Ũla Mũlũngalu; na ũsu inyw’ĩ yu nĩmũtw’ĩkĩte amũvũnyanĩi na amũai; 53#Kuma 20.1–26; Aka 3.19; Aevl 2.2.inyw’ĩ ala mwoosie ĩla mĩao ũndũ kwatwiwe nĩ alaĩka, na mũtyaamĩkwata.
Kĩkw’ũ kya Sitivini
54 #
Meko 5.33. Na meew’a maũndũ asu, matemwa ngoonĩ syoo, na mamũvevetanĩsye maeo moo. 55#Lk 22.69.Ĩndĩ ausũĩtwe nĩ Veva Mũtheu, ang’elela aketee ĩtuni, na oona ũtheu mũtisu wa Ngai, na Yesũ aũngeme ngalĩ ya kw’oko kwa aũme kwa Ngai, 56na asya, Sisya, nĩngwona ĩtu yĩvingũkĩte, na ũla Mwana wa mũndũ aũngeme ngalĩ ya kw’oko kwa aũme kwa Ngai. 57Ĩndĩ makaya na wasya mũnene, na malinda matũ moo, mamũthaanyũkĩa na ngoo ĩmwe; 58#Meko 22.20.mamũkusũlan’ya mamũtwaa ũtee wa ndũa, na mamũkimanga na mavia: na ila ngũsĩ syaia ngũa syoo maũũnĩ ma mwanake wĩtawa Saulo. 59#Sav 31.5; Lk 23.46.Na mamũkimanga Sitivini, aimwĩkaĩla Mwĩaĩi, ayasya, Mwĩaĩi Yesũ, osa veva wakwa. 60#Lk 23.34.Nake atulya ndu, na aneena na wasya mũnene, Mwĩaĩi, ndũkamatalĩle naĩ ĩno. Na amina ũneena ũu, akoma.
Currently Selected:
MEKO MA ATŨMWA 7: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
