MEKO MA ATŨMWA 12
12
Kũthĩnw’a nĩ Elote: Vetelo akyuma kolokolonĩ
1 #
Meko 4.3. Na ta ĩvinda yĩu mũsumbĩ Elote atambũũkya moko make amathĩn’ye andũ amwe ma ĩkanisa. 2Na amũaa Yakovo mwana‐a‐inyia wa Yoana na ũvyũ. 3Na oona kana Ayuti mendeew’a nĩ ũu, aendeea naw’o na amũkwata Vetelo nake. Na mĩthenya ĩsu yaĩ mĩthenya ya kĩmũtũ kĩte ĩlawa. 4Na amũkwata amwĩkĩa kolokolonĩ, na amũnengane kwa asikalĩ, ana, ana, kũndũ kũna, mamũsũvĩe; akyenda ĩtina wa Vasaka kũmumya na kũmwia mbee wa andũ. 5#Yak 5.16.Na Vetelo ĩndĩno asũvĩwa kolokolonĩ: ĩndĩ ĩkanisa yamũvoya Ngai na ũthangaau kwondũ wake. 6#Meko 5.22,23.Na yĩla Elote wendie kũmumaalya, ũtukũ o ũsu Vetelo akomete katĩ wa asikalĩ elĩ, ovetwe na mĩnyololo ĩlĩ: na asũvĩi ma mũomonĩ maisũvĩa kolokolo. 7#Meko 5.19.Na sisya, mũlaĩka wa Mwĩaĩi aũngama ũtee wake, na kyeni kyakena kasũmbanĩ kala waĩ: na amũkũna Vetelo mbaunĩ, amũamũkya, akyasya, Ũkĩla mĩtũki. Na ĩla mĩnyololo yavalũka yauma mokonĩ make. 8Na mũlaĩka amwĩa, Ĩvotoe noiĩkĩa iatũ syaku. Nake eeka ũu. Na amwĩa, Ĩvw’ĩke ngũa yaku noimbikĩla. 9Nake aumaala nza, amũvikĩla; na ndeesĩ kana nĩ w’o ũla weekwa nĩ mũlaĩka, ĩndĩ aasya nĩwona woni. 10Na mavĩtũka ũsũvĩo wa mbee na wa kelĩ, mavika mbingĩlonĩ ya kĩaa ĩla ĩendaa ndũanĩ; nayo yamevingũĩa e yo: na maumaala, na mavĩta maienda na mbee na nzĩa ĩmwe nene na oyu mũlaĩka athi amũtia. 11Na Vetelo avindũka, asya, Yu nĩnamanya vyũ kana Mwĩaĩi nĩwatũma mũlaĩka wake na anumya kw’okonĩ kwa Elote na weteelonĩ w’onthe wa andũ ma Ayuti. 12#Meko 12.25; 15.37.Na aisũanĩa ũndũ ũsu, avika nyũmbanĩ ya Meli nyinyia wa Yoana ũla waĩ na syĩtwa yĩngĩ ya Maliko; vala andũ aingĩ mombanĩte makĩvoya. 13Na aivingũsya mũomonĩ wa mbingĩlo, mwĩĩtu ooka kwĩthukĩĩsya, eetawa Lota. 14Na amanya wasya wa Vetelo, ndaavingũa mbingĩlo kwondũ wa kũtana, ĩndĩ asemba nthĩnĩ, na amatavya andũ kana Vetelo aũngeme mbee wa mbingĩlo. 15#Meko 26.24; Lk 24.37.Nao mamwĩa. Wĩ na ndũũka we. Ĩndĩ alũlũmĩlya mũno, akyasya kana nĩ w’o. Namo masya, Nĩ mũlaĩka wake. 16Ĩndĩ Vetelo ekala aivingũsya: na mamũvingũĩa, mamwona, na maseng’a. 17Ĩndĩ we amavindĩthya na kw’oko, na amatavya ũndũ Mwĩaĩi wamumya kolokolonĩ. Na amea, Mũtavyei Yakovo na ana‐a‐asa maũndũ asu. Na aumaala, aenda vandũ vangĩ. 18#Meko 5.21,22.Na kwakya kwaya kĩthokoan’yo kĩnene kya asikalĩ atĩ Vetelo aangie ata. 19Na Elote amũmantha, na alea ũmwona, amakũlya ala asũvĩi, na indĩ atw’a moawe. Na ĩtina atheea kuma Yutia athi Kaisalea, na ekala kw’o.
Kĩkw’ũ kya Elote
20 #
Esek 27.17. Nake amathatĩa mũno andũ ma Tile na Sitoni: na maenda kwake na ngoo ĩmwe, na matuma ndũũ na Vilasito ũla waĩ mũsũviĩ wa nyũmba ĩla mũsumbĩ Elote wakomaa, mamũvoya methĩwe na mũuo, nũndũ nthĩ yoo yonaa lĩu ũndũ wa nthĩ ya mũsumbĩ. 21Na mũthenya ũmwe ũla watw’ĩtwe, Elote eevw’ĩka ngũa sya kĩũsumbĩ, na ekalĩla kĩvĩla kya ũsumbĩ, na atavan’ya ndeto nzeũvye mbee wamo. 22#Esek 28.2.Na yĩla ĩkomano yaneena mũno, yĩkyasya, Nĩ wasya wa ngai, ti wasya wa mũndũ. 23#Nda 5.20.Na kavinda kau mũlaĩka wa Mwĩaĩi amũkũna, nĩkwĩthĩwa ndaamũnenga Ngai ndaĩa: nake aĩwa nĩ iinyũ, na aumwa nĩ veva.
24 #
Meko 6.7; Isa 55.11. Ĩndĩ ndeto ya Ngai yeana na yaingĩva.
25 #
Meko 11.29; 12.12; 15.37. Na Valanava na Saulo mamina kwĩanĩsya ũthũkũmi woo mauma Yelusaleme, me na Yoana ũla waĩ na syĩtwa yĩngĩ ya Maliko.
Currently Selected:
MEKO MA ATŨMWA 12: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
