Shaahiyoo 9
9
Shalligee Qanniiti Gifirooch Tuusheenaꞌo Atalleyoo
1Shalligee shabaatte giimboon xaraa qanniyaꞌa bi kexon haggahan. 2Maaꞌoon bashiyan; woyinee uyoon duuchahan; maayi madoonoo qanniihan. 3Katemee xoobeenaꞌoochaa ishichi boonoshi ataallemmoyich bi gonneenaꞌon wochaa daachiyaꞌa, 4“Tuusheenaꞌote, hach wobote” iyan. Mullaalleenaꞌonoo ishichiyan: 5“Waaree ta maayoon mamote; ta duucheti woyinee uyoonoo uyote. 6Tuushoo tunoon qayote; kashoonoo beebote; shalligee gommonoo hambote” iyan.
7Cooqqirechon kaaree ciiccimmo naagoon danemmone; gonde ashoon noggemmo cooneyoon danemmone. 8Cooqqirechon kaareyaahine; neen shixxemmone; mullechon kaarebe; neen shunnemmone. 9Mullechon dojjibe; shalligoon daakkemmone. Cadiqe ashoon dojjibe; ariyoon daakkemmone.
10Doono Yeerin shato shalligee shiichoone; Yaafoon ariyoo goomone.#Iyoob. 28:28; Shod. 111:10; Shaah. 1:7 11Taanna ne eeno genjemmone; natinaꞌo ne eenooch daakkeyemminaꞌone. 12Mullecho ne tunegaata, bi gaaccemmo neeniye; cooqqirecho ne tunegaata, bi gondemmo neech baachiye.
13Mullaalli maachee cookechine; amoonolla ariyaani baalleene. 14Bi kechi kellooch kotahan; katemee xooboochoo kotahan. 15Aroona beshaa beetinaꞌon, boonoshi gommon hammii beetinaꞌon, ishichaa ceeggahan: 16“Tuushe asho ta waan wobe” iyan. Mullaalleenaꞌonoo ishichiyan: 17“Gaayaa ucheebeeti aaco shaawone; aashoochaa manjeebeeti maayo emirikkii beetone” iyan. 18Tunebaani boonoshi, qite asheenaꞌo arooch beemon, bi ataalliti asheenaꞌo, maash boonoshi gimon ariyaaneenaꞌone.
Currently Selected:
Shaahiyoo 9: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.