Shaahiyoo 8
8
Shalligeen Naadoo
1Shalligee ceeggaa beetaachane?
Gabeyoo cookaa beetaachane?
2Gommi gasheexi xoobooch,
wotte kaattooch neexaa beetine.
3Katemooch gimi kellee gaꞌoochaa
ishichaꞌa cookaa beetine:#Shaah. 1:20-21
4“Asheenaꞌote, ittoshin ceeggaabeeti taane;
ashi bushiisheenaꞌo waanoo cookaabeeti taane.
5Hini tuusheenaꞌote, acon doyibote;
mullaalleenaꞌote, mullechon tunebote.
6Aafechi mooyon yibbaatemmi ta tunetoyich ellebote;
kaame mooyo ta noonoochee kechemmone.
7Iberoon yibbaateebeeti taane;
ta noonoo gonde mooyon yibbaatoon ciigehe.
8Ta noonoochee kechiibeeti qaaro bulli iberoone;
xummoo woyee wuuqqoo toonoone.
9Shalligechoyich, bulliyona kaamoone;
ariyechi ashoyichoo tatoone.
10Birewoyee ta ciicoon deꞌote;
xalle aachoyee ariyoon kaacote.
11Shalligee ceelle inqoyee besheene;
ittoshi qaatiibeeti mooyo aabiyona
biinna tatoon hakkaache.
12“Shalligee ta, acona koteti taane;
ariyoonaa gaawe gaboonon daneti taane.
13Doono Yeerin shato gonde mooyon shixone;
ta, geecoonaa coodonon shunaache;
gonde gommonaa xumme yibbaatoonon shixxehoye.
14Ciicoonaa gaawe shalligoona taach beetone;
gaawe gaboo taach beetone; giidoo taach beetone.
15Taateenaꞌo taateebeeto taannane;
iraasheenaꞌo tate nalloon nalliibeeto taannane.
16Woraaferasheenaꞌo yaabii qeejjiibeeto taannane;
iraasheenaꞌo showoon qeejjiibeeto taannane.
17Taan shunnii beetinaꞌon shunnehoye;
kupphiiꞌi taan qaawii beetinaꞌo taan danemminaꞌone.
18Gaannoonaa oogoona bi beeto ta waaniye;
abbetechi adduunoonaa beemi gaawoona taachone.
19Ittoshich ta immaabeeti mooyo, xalle aachoyee,
xure birewoyeenoo beshe aaxxoone.
20Ta shaꞌaabeeto cadiqee gommonane;
ta boocho dayinnetee boochoone.
21Taan shunnii beetinaꞌoyich, gaannoon immemmi taane;
boonoshi ginjabeetoonoo ceechemmi taane.
22“Doono Yeeri, batti batti bi shuunoyee aaf,
bulliyee shiichiꞌi taan halliye.
23Batti batti showoo halleyoyee shiichaꞌa,
wonnee wonna halleehoye.
24Aachi xuupheenaꞌo xuuphoyee,
waarwaare aaco#8:24 Waarwaare aaco, baharoyee beshi ooge gabini aacone. danoyee shiichaꞌa shiijjehoye.
25Guudinaꞌonaa geppeenaꞌona, halleyoyee shiichaꞌa shiijjehoye.
26Doono Yeeri showoon bi halloyee aaf,
batti batti buttoon bi halloyee aaf, shiijjehoye.
27Shimaayoon Doono Yeeri yaggiyooba,
waarwaare aaconaa gumoonochi danoon bi daarehooba,
arooch beeti taane.
28Quboon damba gumooch bi kotiihooba,
waarwaare aachi tunoon bi qechiyooba,
29baharoyich gaagemoon bi geddiyooba,
aacinaꞌo bi getoyee besheyaachemmoyich,
showee kotoon bi hecciyooba,
30ebiyooba bi gaꞌoochaa shuunoyich aafo taane;
qemi qemona biin emirikkaa beeho;
bulli aaboon bi aafoochaanoo emiraa beeho.
31Bi halliti alemoona emiraa beeho;
ashi bushiisheenaꞌonoo emiraa beeho.
32“Ta bushiisheenaꞌote, andoo ta waanee ellebote;
ta gommon dabbii beetinaꞌo diireetinaꞌone.
33Ta dojjaa beeton waayebote;
mullechon tunebote; beeneyaahote.
34Ta waanee waayeebeeti asho,
qemi qemona ta kellooch daneebeeti,
ta kellee gaꞌooch taan quyeebeeto, diireetone.
35Taan daneto kashoon danehe;
Doono Yeeriyoo biin gaawe aafoona ciinnemmone.
36Tunebaani taan mucceto bi qellich gondiihe;
taan shixxiibeeto bulli, qitoon shunniye” iyane.
Currently Selected:
Shaahiyoo 8: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.