Shaahiyoo 7
7
1Ta bushoocho, ta qaaroon waayebe; ta geteenaꞌonoo ne mullooch kotiibe. 2Ta geteenaꞌon quyeree kashoona beebe; ta sheeroonoo ne aafee aachoochoommon quyebe. 3Eboshin ne kishee yapherooch gede; ne mullee cilloochoo kooribe. 4Shalligoon “Ta manee neene” gete; ariyoonoo “Ta katini xibeene” geti ceege. 5Eboshi shunimaayee waanee, noonoo nooccaabeeti ashi mechee waanee neen quyemminaꞌone.
Yahechi Ure Mooyo
6Ikke areddoon, ta kechi mallee kelloonaa maach ciinnaa beeho. 7Tuusheenaꞌo daggoochee, gurimaasheenaꞌo daggoocheenoo mullaalli ikke gurimaashoon beeggeho. 8Ikke ureechi kexo waan daammiibeeti wotte kaattoona beshee beehe. 9Ebiyoo showoo xumeꞌi mandereti saatoochiye. 10Aroochee ikke ure biinna danahan; areyoo yahechi ure tahaa beetoommi tahoon tahetine; muriciyoyichoo gabaꞌa kechetine. 11Cookechi yeellaalli ureene; kexooch heeyaani baatechine. 12Biyoo ikkoochaa gommooch, ikkoochaa gabiyee godooch, beshe kaattoo bulliich ottaa beetine. 13Ebi gurimaashoon oppaa gaappaachaa shummahan; yeelleyaanoonoo ishichiyan: 14“Deejjoon giddiiyeshi ta aahee, hanaach ta tiikkeshoon ceechiti taane. 15Ebich neenna daneya kechehoye; kupphiyaꞌanoo neen qaawiyoye; ebiyoche and neen daneti taane; 16Gibitsee waati macecikkiti tahoon ta qeenooch yaggiti taane; 17ta qeenoochoo hareboochee, ereetoonaa qarefoonoochee shuuneeti shittoon wuciti taane. 18Ne waataa harimmi wottoon shunoon mamone; shunoon mamonoo emiribone. 19Ta keno kexooch aalloone; wohi gommon shaꞌetone. 20Gijjoon kolloona yechii bi hammitoyich, gutte shabaattoyee hach wotteyaachemmone” iyan. 21Wodde tappaashoona biin muriciihan; shaawi bi yibbaatoonoo biin dawushiyan. 22Gattoo bi guureyemmi xaaꞌooch hamoommon, boyijjo afaafinoona kambooch bi gimoommon, biyoo bekkech areen dabbiꞌi hammiye. 23Shango bi qamooch kochitoommon tunehe; kambooch giyeti kafeen shaahiye; ebich bi qoccemmi gatiyoo bi kashoon bi tunoon ariyaanoone.
24And illa ta bushiisheenaꞌote, ta waanee ellebote; ta noonoochee kechiibeeti qaaroon gaawichi waayebote. 25Ittoshi mulloon bi gommo waan gaꞌiyaahote; bi gommon dabboona muriccaahote. 26Kochaa bi dichitinaꞌo meetinaꞌone; bi wuxitinaꞌoo mattiqutteenaꞌone. 27Bi kexo maash daammiibeeti boochoone; qite asheenaꞌo beeti gatooch kindii beetone.
Currently Selected:
Shaahiyoo 7: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.