Asteeri 9
9
Ayihudeenaꞌo Boonoshi Shixechinaꞌon Kochii Wochoo
1Adaari getteebeeti aaraa guttinnee agenee aaraa keejjinnee qemo, taatoo getaa kechiti awaajjo ceennemmi aaboone. Ayihudeenaꞌochi etteenaꞌo arooba boonoshi toommooch giidoon bekkiiya gabitinaꞌone; tunebaani Ayihudeenaꞌo boonoshi etteenaꞌo toommooch boonoshi giidoon boonoshi bekkiyemmoyich mooyo shaddeehe. 2Ayihudeenaꞌo boonoshin aalliiya qaawimmo koninolla kocha, taatoo Yekisesi woraafeenaꞌo bulliich beeti boonoshi katemi katemooch kiceeheete. Asho bulli boonoshich bi shattitoyich, kuppheꞌi boonoshi aafooch neexoon hakkito koniyoona aalloone. 3Woraafee showoo bulliich beeti geppee taateenaꞌo, iraasheenaꞌo, woraaferasheenaꞌonaa taatoo ukkiriiti ukkireenaꞌona Ayihudeenaꞌon gaacheheete. Ebin boonoshi tuniito, Mordokiyoosin boonoshi shattitoyichiye. 4Mordokiyoosi taatee kechi daggooch aricheti ashoon tunehe; bi mooyo woraafeenaꞌo bulliich waayeehe; biyoo oogoona beshii beshii hammiye.
5Ebich Ayihudeenaꞌo boonoshi etteenaꞌo bullin goraadoona wuxii ciichiyeete; boonoshi etteenaꞌo toommooch boonoshi shunnimmon shuuneheete. 6Inde katemoo Suusaa baach uuche balle asheenaꞌon wuxii aalliiheete. 7Boonoshiyoo wotta Farishandaati, Dalifooni, Asifaati, 8Foraati, Adaaliyaahi, Aridaati, 9Farimaashiti, Arsaayi, Aridaayinaa Bayzaatina getteebeeti, 10Ayihudeenaꞌochi etto, Hamedaati bushoo Hamaanichi aashire anaami bushiisheenaꞌon wuxiyeete. Tunebaani ciroona amee mooyonona tiijjii daamaaneenaꞌone.
11Arooba inde katemoo Suusaa qititi asheenaꞌo haddoo taatoyich getteehe. 12Taatoo gennee abeeti Asteerich ishichiye: “Ayihudeenaꞌo inde katemoo Suusaa baach uuche balle asheenaꞌonaa Hamaanichi aashire anaami bushiisheenaꞌonon wuxii aalliitinaꞌone. Wotta echeti woraafeenaꞌooch amoon tunii beeyeheete! Illa and ne qaawaabeeto, amooniye? Neech ichemmone. Ne qollaabeeto, amooniye? Neech daaggeyemmone” iye.
13Asteeriyoo wochaꞌa ishichiyan: “Taatoon emirikkito bi tunegaata, Suusa beeti Ayihudeenaꞌo hanaach boonoshi tuniyemmoyich daaggeetoommon, yaachoo wochinnoon daakkibeete. Hamaanichi aashire anaami bushiisheenaꞌo dubeno giimbooch yooddebe” iyan.
14Taatoo ebi tunemmoyich gettiye; awaajjo Suusaa getteehe. Hamaanichi aashire anaami bushiisheenaꞌo dubeno yooddehe. 15Suusa beeti Ayihudeenaꞌo wotta Adaari agenee aaraa awuddinnee qemooba kiceeꞌi, keejje balle asheenaꞌon Suusaa wuxiyeete. Tunebaani ciroona amee mooyonona tiijjii daamaaneenaꞌone.
16Arooba taatoochi bare woraafeenaꞌooch beeti Ayihudeenaꞌo boonoshi qelloon quyoyich kiceeheete; boonoshi etteenaꞌo kishoocheenoo kasheheete. Boonoshi etteenaꞌo daggoochee shabaa uuche hume asheenaꞌon wuxiyeete. Tunebaani ciroona amee mooyonona tiijjii daamaaneenaꞌone. 17Ebi tuneto, Adaari agenee aaraa keejjinnee qemoobane. Aaraa awuddinnee qemooba kasheꞌi, are aabooba gifiroon geddiꞌi emiree aaboon tuniiheete.
18Tunebaani Suusa beeti Ayihudeenaꞌo aaraa keejjinnee qemoobinaa aaraa awuddinnee qemoobinon kiceeheete. Aroochee aaraa uuchinnee qemooba kasheꞌi, are aabooba gifiroon geddii emiree aaboon tuniiheete. 19Ebina xaqqee uxeraalli gafooch beeti Ayihudeenaꞌo Adaari agenee aaraa awuddinnee qemon gifiroon geddiꞌi emiree baaroon baarii beetinaꞌone; ebi aabo asheenaꞌo boonoshinaa boonoshina ikkoo baroyich maayoon immiibee boonoshi baariibeeti baaroone.
Fuuriimee Baaroo
20Mordokiyoosi ebi tuneti mooyon kooriꞌi, koorichoon katinooch tuneba wohooch beeti, taatoo Yekisesichi woraafeenaꞌo bulliich beeti Ayihudeenaꞌo bullich daachiihe. 21Bi daachiito, Adaari agenee aaraa awuddinnee qemonaa aaraa uuchinnee qemonon nati natona boonoshi baaremmoyich tuniyoyichiye. 22Boonoshi baaremmi naboo, Ayihudeenaꞌo boonoshi etteenaꞌo waanee boonoshi kasheti aabo, boonoshi ayinoo emiroona, boonoshi eefoo emiree baaroona bi shaddeeti aabo bi tunetoyichiye. Ebi aaboonoo emiree aaboonaa baaree aaboonon tuniiree, boonoshinaa boonoshina ikkoo baroyich maayoon imibee bi baaremmoyich, wotta girechinaꞌoyich maayoon imibee boonoshi baaremmoyich gettiye.
23-25Ayihudeenaꞌo bullichi etto, Agaagi yaroochee tuneti Hamedaati bushoo Hamaani Ayihudeenaꞌon aalliyoyich koceetone; wuxii aalliyoyicha iꞌi Fuuri boonoshi ii beeti ixoon duppitone. Tunebaani Asteeri taatoo waan giddahan; taatoo bi getoon kooriꞌi imaa, Hamaani Ayihudeenaꞌon aalliyoyich bi gabiti gonde gaboo bi toommooch wottehe; biinnaa bi anaami bushiisheenaꞌona giimbooch yooddeheete. Ebich Ayihudeenaꞌo Mordokiyoosi boonoshich kooriton ceechooch giyiyeete; ebi baaroon kuxaanoon nati natona baaroyich maacciyeete.#Ast. 3:5-7 26Ebi aabeenaꞌo Fuuri ii beeti shigoona yeshiitaa, Fuuriimi getteeheete. Mordokiyoosi kooriti koorichee naboonaa boonoshi toommooch tuneti mooyo bullichi naboona, 27Ayihudeenaꞌo boonoshich, woyemmi boonoshi shiijjereenaꞌonaa Ayihudo tunoyich boonoshi waan wottetinaꞌo bullinoyich kuxeyaachemmi doyoon tuniiheete. Ebiyoo Mordokiyoosi boonoshich kooritoommon tuniiree, taajjeeti aabooba ebi gutte aabeenaꞌon kuxaanoon nati natona boonoshi baaremmoyichiye. 28Ebi aabeenaꞌon Ayihudo tuneti, gubb woyemmi shiijjeroo bulli bi kexi kexona, bi woraafi woraafoonaa bi katemi katemoona bi baaremmonaa bi oogiyemmonoyich, ebi Fuuriimee aabeenaꞌon Ayihudeenaꞌo baaraanoon boonoshi qayaachemmonaa woyemmi boonoshi shiijjereenaꞌo waanee ebi mooyo kuxeyaachemmonoyich manjiiheete.
29Aroochee Abihayili bushee, gennee abeeti Asteeri Ayihudo tuneti Mordokiyoosina tookkaa tunaꞌa, Fuuriimee baareechon kooreeti guttinnee koorichoon manjiyoyich, biich beeti hakkoona koorichoon kooriihan. 30Diggoona keqqaalli beemon boonoshi beeyemmon bekkiibeeti, ebi koorichoo taatoo Yekisesi taatee showoo tuneti balli hiyaa shabaatte woraafeenaꞌooch beeti Ayihudeenaꞌo bullich shaccehe. 31Bi shacceto, Ayihudo Mordokiyoosinaa gennee abeeti Asteerina Ayihudeenaꞌoyich gettitoommon tuneree, ebiyoommon wotta coomeechonaa muusheneechonon tunemmi doyoon boonoshi qelloonaa boonoshi shiijjereenaꞌonoyich boonoshi kichitoommon tuneree, ebi Fuuriimee aabeenaꞌo boonoshi taajjeeti goorooba boonoshi baareyemmoyichiye. 32Asteerichi awaajjo Fuuriimee mooyon ciinniibeeti doyoon manjiihe; ebiyoo macaafooch kooreehe.
Currently Selected:
Asteeri 9: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.