Езекиел 32

Перғауынды жоқтау

1(Біздің Бабыл еліне жер аударылғанымыздан кейінгі) он екінші жылдың, он екінші айының бірінші күні#32:1 Б.з.д. 585 ж. 3-наурыз. Жаратқан Ие маған сөзін арнап былай деді: 2«Пендем, Мысыр патшасы перғауынды жоқтап былай де:

Өзіңді ұлттардың арасындағы жас арыстандай көресің, ал шынында теңіздегі айдаһарға#32:2 Немесе: қолтырауынға (крокодилге) (29:3; Иш 27:1). ұқсайсың. Еліңдегі өзен тармақтарында әрлі-берлі шапқылап жүресің, аяқтарыңмен суды сабалап, лайлайсың».

3Жаратушы Тәңір Ие тағы мынаны айтады: «Енді Мен көп халықтарды#32:3 Немесе: көп әскерлерді. сенің үстіңе ауымды тастауға жіберемін. Олар сені сол аумен судан тартып шығарып алады.#32:3 Әйүп 26:13. 4Осылайша сені жерге лақтырып, ашық далаға тастаймын. Аспандағы барлық жыртқыш құстарды саған қондырамын, түздің жыртқыш аңдарының бәріне де денеңді жем қыламын.#32:4 29:5; 31:12-13. 5Сенің етіңді тауларға шашып, аңғарларды да қалдықтарыңмен толтырамын. 6Мен жерді тауларға дейін аққан қаныңмен қандырамын, әрі сай-салалар да қалдықтарыңмен толып кетеді. 7Сені жоқ қылғаннан кейін Мен аспанды жауып тастаймын. Ондағы жұлдыздарды түнертіп, күнді де бұлтпен жауып қоямын. Ай да сәуле шашуын доғарады.#32:7 30:3,18; Иш 13:10; 34:4; Жое 2:31; 3:15. 8Аспандағы барлық жарық көздерін сенің үстіңде қараңғы қылып, еліңе қара түнек орнатамын».#32:8 Жар 1:14; Жыр 101:26-27; Әйүп 9:7. — Жаратушы Тәңір Ие осыны нық айтады.

9«Өзіңе беймәлім елдердің арасына да сенің жойылғаныңды жария қылғанымда#32:9 Немесе: сенің жойылғаныңнан қалған қалдығыңды жібергенімде. көптеген халықтардың жүректерін қорқынышпен қобалжытамын. 10Осылайша көп ұлттарды саған аңтарылып, үрейлене қарайтын қыламын. Мен олардың патшаларының алдында семсерімді сілтегенде, олар саған қарап төбе шаштары тік тұратын болады. Сен күйреген кезде олардың әрқайсысы әр сәт сайын өз өмірі үшін дір-дір ететін болады.

11Өйткені Мен, Жаратушы Тәңір Ие, тағы мынаны айтамын: Бабыл патшасының семсері саған сілтенбек. 12Мен сенің қалың әскеріңді мықты жасақшылардың семсерлерінен қаза таптырамын. Халықтардың ішіндегі ең қатыгездері,#32:12 Яғни бабылдықтар (28:7; 30:11; 31:12). олар, Мысырдың тәкаппарлығынан түк қалдырмайды. Сонда осы елдің қалың әскері түгелдей қырылады. 13Мен Мысырдың көптеген өзен тармақтарының бойында жайылатын барлық малдарын құртамын. Енді қайтып не адам аяғы, не мал тұяғы олардың суын лайламайтын болады. 14Сөйтіп Мен өзендердің суын тұндырып, оларды зәйтүн майындай бірқалыпты ағатын етемін, — деп нық айтады Жаратушы Тәңір Ие. — 15Осылайша Мен Мысыр елін қаңыратып, онда тұратындардың барлығын құртып, бүкіл елді өзіндегі барынан айырамын. Сонда олар Менің Жаратқан Ие екенімді білетін болады.

16Бұл жоқтау Мысыр туралы айтылмақ. Ұлттардың қыздары оны Мысыр мен оның шулы әскері#32:16 Немесе: оның зор байлығы. Яки: Оның шулы халқы (29:19; 30:4; 31:2). жайлы айтатын болады», — деп нық айтады Жаратушы Тәңір Ие.

Мысырдың о дүниеге түсуі

17(Біздің Бабыл еліне жер аударылғанымыздан кейінгі) он екінші жылдың он екінші айының он бесі күні#32:17 Б.з.д. 585 ж. 17-наурыз. Немесе: бірінші айының он бесінші күні, яғни б.з.д. 587 ж. 27-сәуір. Жаратқан Ие маған сөзін арнап былай деді: 18«Пендем, Мысырдың қалың әскері туралы жоқтау айт! Оларды да, үлкен халықтардың қыздарын да о дүниеге түсіріп, тұңғиықтың түбіне аттанып бара жатқандармен бірге лақтырып таста!#32:18 31:14-18; Иш 14:12,15; Ерм 1:10; Ош 6:5. 19Оларға былай де:

«Ей, Мысыр, сенің көркің басқалардікінен асқан ба? Жоқ, төмен түс те, әділетсіздермен#32:19 Немесе: сүндеттелмегендермен (28:10; 31:18). бірге жатып тыныштал!»#32:19 Иш 14:15-16; 18-20. 20Мысырлықтар семсерден қаза тапқан көптеген адамдардың арасында о дүниеге түсетін болады, өйткені семсер оларға қарсы суырылған. Мысыр халқы оның қалың әскерімен бірге сол жаққа сүйретіліп әкетілмек. 21О дүниенің ортасынан ең мықты батырлар#32:21 Яки: қуатты билеушілер (32:27; Иш 14:9-12). Мысырға және оны қолдаған одақтастарына таңырқап былай демек: «Пай-пай, олар төмен түсіп, әділетсіздермен әрі семсерден қаза тапқандармен бірге тыныш жатыр екен!»

22Ассур да өзінің семсерден қаза тапқан бүкіл әскерімен бірге сонда. Олардың көрлері оны қоршап, 23о дүниенің ең шалғай бөліктерінде орналасқан. Осылайша Ассурдың жасақшылары оның қабірінің айналасында жатыр. Солардың бәрі тірі кездерінде өзгелерге қорқыныш сепкендер, әрі семсерден қырылып мерт болғандар.

24Елам#32:24 Ерм 49:35-39. да сонда жатыр, қалың қолы да оның қабірінің айналасында. Барлығы да семсерден қырылып мерт болғандар, о дүниеге сүндеттелмеген күйі аттанғандар. Олар тірі кездерінде басқаларға үрей себетін еді, ал енді басқа әділетсіздермен бірге масқараланып, көрге түсті. 25Еламға өзінің қалың қолымен бірге қырылғандардың арасынан төсек дайындалды. Солардың көрлері оның айналасында. Бұлардың бәрі де сүндеттелмегендер, семсерден қырылғандар. Олар тірі кездерінде өзгелерге қорқыныш туғызатын еді. Ал енді көрге түскендермен бірге өз істерінің ұяттарын арқалап, мерт болғандардың ортасына қойылды.

26Мешех пен Тұбал#32:26 Қазіргі Түркиядағы орталық Анадолу өлкесін мекендеген ежелгі халықтар (27:13; 38:2-3; 39:1-2; Жар 10:2). да сонда жатыр. Олардың қалың қолдарының көрлері Мешех пен Тұбалдың қабірлерінің айналасында. Сол жасақшылардың барлығы да сүндеттелмеген, семсерден мерт болған. Өйткені олар тірі кездерінде өзгелерге үрей туғызатын еді. 27Олар ежелде қаза тапқан батырлармен бірге жатпайды. Сол батырлар өздерінің қару-жарағымен бірге, семсерлері бастарының астында, қалқандары сүйектерінің үстінде қабірге қойылған.#32:27 Пат2 23:8-39. Бірақ едомдықтардың әділетсіздігі олардың мойындарында, өйткені олар мықты жасақшылар болып тірі кездерінде басқаларға қоқан-лоқы жасайтын.

28Сен де, уа, перғауын, талқандалып, семсерден қаза тапқан әділетсіздердің арасында жататын боласың.

29Едом да өз патшалары мен әміршілерінің барлығымен бірге сонда болады. Олар кезінде қаншама қуатты болғанмен, семсерден қырылғандармен әрі сүндеттелмеген күйінде көрге түскендермен бірге жатыр.

30Солтүстіктің күллі әміршілері де, сидондықтар да түгелімен сонда болады.#32:30 38:6; 28:21; Ерм 1:15; 25:22,26. Олар кезінде күш-қуаттарымен қатты үрей туғызғандықтан ұятқа қалады. Олар сүндеттелмеген күйі семсерден қырылғандармен бірге жатыр және көрге түскен басқалармен бірге өздеріне лайықты масқарасын арқалайды.

31Перғауынның өзі және оның бүкіл әскері солардың бәрін көргенде, өзінің де, қалың қолының да семсерден қырылып мерт болғандарына жұбанады. Мен, Жаратушы Тәңір Ие, осыны нық айтамын.

32Мен перғауынға көзі тірісінде бұ дүниеде үрейін себуге жол бергенмен, енді перғауын мен оның қалың қолы семсерден қырылған сүндеттелмегендермен бірге қойылады», — деп ескертеді Жаратушы Тәңір Ие.

Currently Selected:

Езекиел 32: КК 2010

Highlight

Copy