ɛMarakus 1
1
iBol ɛYohana ne Yaak ne iBatisima
(ɛMac 3.1-12; ɛLuk 3.1-9,15-17; ɛYoh 1.19-28)
1iBol iYɛnɛng ngɛdee wo so idee ɛYɛso ɛKiriti ne ɛ soye ɛNgɔn ɛTaanggbey. 2iPhɛ kaa ne tsa ɛli ne ɛTaanggbey ya kaa boote ɛnu ɛnɛbi ɛShaa kaa boote ɛ yɔngɔ,
“Naa tom ɛngɔn ne tom nge te
ɛ ho ɛyisɛ mo ɛbhɛ ryɔng ngɛ
ɛnkiinɛ mo wo.”
3“Ɛbhɛ soye izɔlɔs ne ihywɛ
bol ndɔ ɛhay ihywɛ bo,
‘Ryɔng ɛn ɛDaray yeghaa
ɛnkiinɛ ɛbhɛ wo.
Ryɔng ɛn ɛbhɛ ɛnkiinɛ
ɛbhɛ wo cik.’ ”
4iPhɛ ɛlɛy yang, ɛYohana gha kaa ne i shɛɛ ndɔ ɛhay, ɛɛ yaak ninyi na ne ibatisima de, ɛ ta tɔng nibhɛ ibol ɛTaanggbey de ɛɛ bok nibhɛ wu tɛ nibhɛ tek ɛfɔt nibhɛ te yɛk nyini ne ibatisima te ɛTaanggbey hana nibhɛ ne ɛfɔt nibhɛ. 5iDira ninyi de kaa ne wuru gbom, nibhɛ phɛ ɛlɔ ɛYohana gha. Nibhɛ kaa ne les ne ivel ne iYahudiya, gbik ne iYɛrushɛlɛm nibhɛ bhɛ san ɛbɔk ka ɛlɔ ɛYohana gha. ɛYohana gha ne ji yaak nibhɛ ne ibatisima de. Ɛ kaa ne yaak nibhɛ nɛ ndɔ iHywel ne iWurudun.
6ɛYohana gha kaa ne i yaak ghe ne itsura ne kɛ ryɔng ne itsotso ne ɛlangkumɛ ne ɛ ji robhos se ɛgagha ne ihuhu. Ire ɛbhɛ de kaa ne so isɔk gbik ne itsong iven. 7Ɛ kaa ne yaak ninyi na, “ɛDɛ ɛgbaang ɛnyi wo, ne ɛ phyin me, ɛ yaaso ɛtsim nge. Sɔng nggɛ ma yung hɔn nzɛ biri ɛbhɛ irwik ne ikpikpangat nang. 8Nzi ne yaak nyini ne ibatisima de ne inɛn, ɛnyi yɛghaa nggyɛ wo sɛ ne yaak nyini ne ibatisima de ne iKabyik ɛTaanggbey.”
ɛYohana gha kɛ yɛk ɛYɛso yegha ne iBatisima
(ɛMac 3.13-17; ɛLuk 3.21-22)
9Kɛ ne so ndɔ ɛnggyɛ wo nang, ɛYɛso gha ne bhɛ le ɛgarang ne iNazarat ne ɛ so ne ivel ne iGalili, ɛ phɛ ɛlɔ ɛYohana gha. ɛYohana gha ne ma bhɛ yɛk ɛbhɛ ne ibatisima de ndɔ iHywel ne iWurudun no. 10Kɛ ne sɛ ɛli ɛYɛso gha wuusi ndɔ inɛn da nang, ne ɛ yaang irywa kɛ phaal le. iKabyik ɛTaanggbey de, ne iphɛ so te ihywihywaa, ne shii le daa ne irywa wo iphɛ soos ɛbhɛ ɛgoy. 11iZɔlɔs ne ji le daa ne irywa wo ihywɛ boote ne ɛYɛso gha ihywɛ yaak ɛbhɛ, “iGyɛ ɛ soyɛ ɛNgɔn nge ne nzi sim. Ne n bok irway ihwala ne igyɛ gbom.”
ɛShɛtan kɛ Tɛrɛk ɛYɛso ye
(ɛMac 4.1-11; ɛLuk 4.1-13)
12ɛTsim mɛ ɛlɛy yang, iKabyik ɛTaanggbey de ne shii bo ɛYɛso yegha iphɛ phɛ nɛ ndɔ ɛceree ɛhay. 13ɛYɛso gha ne shɛɛ ndɔ ɛhay ya, ɛ hɔn nituk nzuwubɔ nwaas ɛShɛtan ne i tɛrɛk ɛbhɛ. ᐩiNyam-ɛhay kaa ne so ɛnggyɛ wo, niMalɛka ɛTaanggbey kaa ne i wɛɛ ɛYɛso yegha.
ɛYɛso gha kɛ Tsa ɛTomɛ Ɛbhɛ Gha
(ɛMac 4.12-17; ɛLuk 4.14-15)
14Kɛ ne sɛ ɛli ne ɛgɔm ɛHyiridus sa kɛ wum ɛYohana yegha ɛ cwaal ɛbhɛ ndɔ ne ijwee ne inyang ngo nang ɛYɛso gha ne phɛ ne ivel ne iGalili, ɛ yaa bhɛ tɔng ninyi na ibol iyɛnɛng ɛTaanggbey de. 15Ɛ kaa ne tɔng nibhɛ, ɛ bok nibhɛ, “Nten nɛ kɛ tuu. iGbɔm ɛTaanggbey ba yek cɛcɛk! San ɛn ɛbɔk te ɛ nang ɛn ne itin nɛ ibol iyɛnɛng ngedee wo!”
ɛYɛso gha kɛ Yel-le Ninaa ne Lok iZing Nwaas
(ɛMac 4.18-22; ɛLuk 5.1-11)
16Kaa ne sɛ ɛdɛ ɛtuk kɛ nang ɛYɛso gha ne i hyel ɛmbambang ɛLing ne iGalili. Ɛnggyɛy yo ne ɛ yaang ɛSimɔn ne nibhɛ so ne ɛgwaa ɛbhɛ ɛNdarawus. Ninyi yenaa nggyɛ wo kaa ne bok ikpara nibhɛ lok izing ndɔ ɛrenes sa. Nibhɛ kaa soye ninaa ne lok izing. 17ɛYɛso gha ne shii yaak nibhɛ, “Kungus ɛn mɛɛn, naa yɛk nyini ne ɛtomɛ ne tɔk me ninyi.” 18Ninyi yɛnaa nggyɛ wo ne shii hana nikɔn nibhɛ na, tsasang, nibhɛ roos ɛYɛso yegha.
19Kɛ ne sɛ ɛYɛso gha kɛ shompeey ncɛt ne ɛ yaang ɛngɔn ɛZɛbɛdi ye ne i bok ɛbhɛ ɛYakub, nibhɛ so ne ɛgwaa ɛbhɛ ɛYohana. Nibhɛ kaa soos ndɔ ne ikparak nibhɛ ryɔng ikpara nibhɛ. 20ɛYɛso gha ne shii yel-le nibhɛ, nibhɛ ne yɔng ɛvok! Nibhɛ tek ɛkyɛɛ nibhɛ ɛZɛbɛdi yegha, nɛ ninaa ne phyik ɛbhɛ ne ɛtomɛ gha ndɔ ne ikparak ko, nibhɛ roos ɛYɛso yegha.
ɛYɛso gha kɛ tul niPhoo ndɔ ɛNyi
(ɛLuk 4.31-37)
21ɛYɛso gha, nɛ ninyi yɛnaa nggyɛ wo ne phɛ ɛgarang ne iKafanahum. Kɛ ne sɛ ɛtuk ne wɛsɛ niYahodawa na kɛ tuu nang ɛYɛso gha ne bhɛ lel ndɔ ne ijwee ne itɔɔy nibhɛ wo, ɛ yaa mɛmɛ ninyi na nɛ. 22Ninyi na ne yaang ɛkɔn ne kparat gbom daa ne ivol ɛYɛso ba. iVol Ɛbhɛ ba kaa lap bhɛ ne ivaa ne ninaa ne kpɛl ɛShara gha. Ɛ kaa bol te ɛgɔm.
23Kɛ ne se ɛYɛso gha so ndɔ ne tɔng ninyi na ivol ba nang, ɛdɛ ɛNyi gha nɛ niphoo so ndɔ ɛbhɛ ne ma shii lel ndɔ ne ijwee ne itɔɔy yo. Ne ɛ ta ikun, 24ɛ yaak ɛYɛso yegha, “ɛYɛso ne ɛ le ne iNazarat! iNɛn mos ne igyɛ woo! Njwii ku yɛɛ yɛ. iGyɛ so ɛNgɔn ɛTaanggbey ne ɛ so kang. Ɛ kɛ ne yɛɛs te ɛ phopho njwii yee?”
25ɛYɛso gha ne sit niphoo na ne ɛbung, ɛ yaak nibhɛ, “Ku ɛn nggbyak! Wuru ɛn ndɔ ɛNyi yɛghaa wo.” 26Niphoo na ne ta ikun, nibhɛ kabhare ɛnyi gha gbom, nibhɛ ne ji wuru nibhɛ tek ɛbhɛ.
27Gbik ninaa nɛ nibhɛ kaa so ɛnggyɛ wo, ne yaang ɛkɔn ne kparat. Nibhɛ ne yaa phomos en nibhɛ bo, “Ya kuk! Ji ta so ɛyakɔn naa woo? ɛDɛ ɛkɔn ɛphas se ghaa wo dɔng nge? ɛNyi yɛghaa wo bok ito-ndiinday gbom. Ɛɛ ji ta nep niphoo nibhɛ phok ɛbhɛ!”
28iBol lɛdee wo ne shii shwalat gbarang ndɔ ne ivel ne iGalili ba nɛ nten nɛ.
ɛYɛso kɛ te ɛGyinɛ ɛKuk ɛBiturus ɛKen
(ɛMac 8.14-15; ɛLuk 4.38-39)
29Kɛ ne sɛ nibhɛ kɛ wuru ndɔ ne ijwee ne itɔɔy yo nang, ɛYɛso gha ne bo ɛYakub bhe ne ɛYohana nibhɛ phɛ ne ijwee niSimɔn ne, ne ɛNdarawus. 30Ndɔm kaa ne bok ɛgyinɛ ɛkuk ɛSimɔn na, ne ɛ so ndɔ ne ijwee wo ɛ kɛ laal. Kɛ ne sɛ niYɛso yena kɛ bhɛ tuu ijwee wo nang, nidɛng ninyi na ne shii mɔng ɛbhɛ ibol ne ishwa ɛgyinɛ ɛSimɔn de. 31ɛYɛso gha ne phɛ ɛlɔ gha ne ɛkuk ka kɛ laal lɛ wo, ɛ wum ɛbhɛ iwɔ ɛ phyik ɛbhɛ ne yilitsik. Nɛ nten nɛ ndɔm ba ne shii tek ɛbhɛ ɛ mɔn nibhɛ ire.
ɛYɛso gha kɛ tes Ninyi gbom niKen
(ɛMac 8.16-17; ɛLuk 4.40-41)
32Kɛ ne sɛ iroy kɛ hooy ɛlɔ yɛ kɛ yaa tes ywii, ninyi na ne yaa yɛɛset ɛYɛso yegha nɛ ninaa ne ishwa na ihywee-ihywee. Nibhɛ ne ta yɛɛset ɛbhɛ nɛ ninaa nɛ nibhɛ bok niphoo. 33Ninaa ɛGarang ngɛnaa nggyɛ wo ne bhɛ tumɛɛy ɛsaa ne ijwee gha ne ɛYɛso gha sonɛ wo, gbarang. 34ɛYɛso gha ne jii tes nisha na niken ihywee-ihywee. Ɛ ta tuul niphoo na ndɔ ninyi na gbom. Sɔng ne ɛɛ kyii sim niphoo na ne boote nang, daa ɛli nɛ niphoo na kaa ku yɛɛ ɛli ne ɛYɛso gha so ɛNgɔn ɛTaanggbey ya.
ɛYɛso gha kɛ Tul le Kang Ɛbhɛ Bol ne ɛTaanggbey
(ɛLuk 4.42-44)
35Kɛ ne cwiil ne ihwɛlɛ yɛ nang ɛYɛso gha ne tɛ ne ɛlɔ, ɛ wuru ɛ bo nikɔn, ɛ phɛ ɛlɔ gha ne hame ɛnyi shɛɛ nɛ ɛbhɛ roo ne ɛTaanggbey. 36ɛSimɔn na nɛ nyini ɛbhɛ na ne yaa bhɛ tɔk ɛbhɛ. 37Kɛ ne sɛ nibhɛ kɛ bhɛ sɛ ɛbhɛ nang nibhɛ ne yaak ɛbhɛ, “iDira ninyi de kɛ yaa tɔk kɛ.”
38ɛYɛso gha ne kyii nɛ ɛ yaak nibhɛ, “Njwɛɛn te phɛ ɛbyin nigarang nga nɛ nibhɛ so cɛcɛk ɛbɛ wo te ma mbɛ tɔng ninyi yɛ ibol iyɛnɛng ngge. iPhɛ ne nggɛ yɛɛs ne mɔn.”
39iPhɛ ɛlɛy yang ɛYɛso gha ne roos nigarang nga nɛ nibhɛ so ndɔ ne ivel ne iGalili ba gbik, ɛ leesel ndɔ ne idee ne itɔɔy nibhɛ ba gbik, ɛ tɔng nibhɛ ibol iyɛnɛng ngge. Ɛ ta phyii tuul niphoo na nɛ nibhɛ sos ndɔ ninyi na dɔng.
ɛYɛso gha kɛ Tul ɛKparong iVebhe
(ɛMac 8.1-4; ɛLuk 5.12-16)
40ɛDɛ ɛkparong nga kaa ne phɛ ɛlɔ ɛYɛso gha ɛbhɛ cwi ne irwa-nggburuk, ɛ roo ne ɛbhɛ ɛ yaak ɛbhɛ, “Wu ˆɛ kɛ sim, ˆɛ sɛ ne te me ɛken, ˆɛ tul ivebhe nge ba.”
41ɛYɛso gha ne san iyɔm ɛbhɛ, ne ɛ dat ɛbhɛ, ɛ ji yaak ɛbhɛ, “Nggɛ sim, te ɛken te ivebhe mo ba tek kɛ!” 42Nɛ nten nɛ, ikparong ngga ne shii tek ɛnyi gha, ɛ te ɛken. 43ɛYɛso gha ne yɛk ɛbhɛ nkiinɛ, ɛtsim mɛ ne ɛ kɛ kpɛngke ɛbhɛ, ɛ yaak ɛbhɛ: 44“Sɔng ɛbhɛ mɔng ɛnyi ibol lɛdee wo nang, yang cwi ɛbhɛ tɔɔl ito mo ɛlɔ ɛBo ɛTaanggbey ya, te ne ɛ hap itsanga de ne ɛMuusaa gha kaa ku tɔng nyini wo. Cwi ɛbhɛ mɔn ɛlɔ wo nang, ninyi na yaa ne seng ɛli ne ivebhe mo da kɛ tek kɛwo.”
45ɛNyi yeghaa nggyɛ wo ne jung bhɛ sanga ibol lɛ ɛli ne ivebhe ba kɛ tek ɛbhɛ wo. iBol lɛ ne te ɛYɛso yegha yaa roos nilɔ ne gying. Gbik ne iphɛ ɛlɛy ninyi na ne jung les nilɔ na gbarang nibhɛ yɛɛset ɛlɔ ɛYɛso gha.
Currently Selected:
ɛMarakus 1: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project