ɛTomɛ 6
6
Ninyi ɛNiitaa Nɛ Nibhɛ Yaa Phyik Ninɔn ne Tom
1Ndɔ nituk kɛnaa nggyɛ wo nɛ ninaa ne roos sa kɛ hantey yɛ nibhɛ te gbom mo, niYahodawa na nɛ nibhɛ ibol ilem ne iGirik ge ne yaa bol daa ne ito niYahodawa de nɛ nibhɛ bol ilem ne iRamik ge, nibhɛ bo wu hang i wɛɛ nikusang nibhɛ daa nikɔn na ne i hosop izenge ne ihwɛlɛ wo. 2Ninɔn ne tom ɛnduwubɔ nɛ nibhɛ ifaa na ne tuma idira ninaa ne roos de gbik ɛlɔ ɛdaan, nibhɛ ne yaak nibhɛ, “Sɔng iphɛ kɛ jam mɛ njwi tek ɛtomɛ ne mɛmɛ ninyi na ne ibol ɛTaanggbey de njwi mak ghe ne ibol ne ire de nang. 3iPhɛ ɛlɛy nigwaa en, ne ɛ kasa ɛn ninyi ɛniitaa ndɔ mon no nɛ nibhɛ so hyɔrɔ ne ikabyik ne ntsɛntsɛng. Nibhɛ ne njwi yaa ne yɛk nibhɛ ne ɛtomɛ ne wɛɛ ire gha. 4Te njwit to njwi ne ji re ɛnu ɛyisɛ ne bol ne ɛTaanggbey ya gbik ne mɛmɛ ninyi na ne ibol ɛTaanggbey de.”
5iDira ninaa ne roos de gbik ne yaang ibol lɛ kɛ jam, nibhɛ ne sim iphɛ, nibhɛ ne ji kasa ninyi ɛniitaa na. Nibhɛ kaa ne kasa ɛSitivin ne ne ɛ so hyɔrɔ ne itin ne ibol gbik ne iKabyik ɛTaanggbey, ne ɛFilibus, ne ɛPorokos, ne ɛNikanos, ne ɛTimɔn, ne ɛParamɛnas, ne ɛNikɔlas ne ɛ kaa soye ɛnyi ne iNtakiya ne ɛ kɛ teye ɛhaa ne roos ikpii niYahodawa. 6Ne ji bo ninyi yɛnaa wo i nang ninɔn ne tom ma. Ninɔn ne tom ma ne i tek ɛrɔngɔ ne iwɔ, nibhɛ boote ne ɛTaanggbey.
7iBol ɛTaanggbey de ne shwalat. Ninaa ne roos sa ne hantey yɛ gbom ndɔ ne iYɛrushɛlɛm be. Nibo ɛTaanggbey ya gbom ne ma say ibol ne ìnang ne itin de.
Kɛ Wum ɛSitivin Ne
8Kɛ ne so ɛnggyɛ wo, ɛTaanggbey ya ne sit ɛSitivin ne gha ne ɛwɛng, ne ɛ yaa mɔn igbaang nikɔn ne kparat, nɛ nikɔn ne ɛnik ndɔ ninyi na. 9Nidɛng niYahodawa nɛ nibhɛ kaa ne les nigarang ne iSɛrene, ne ɛLɛzɛndariya, ne iSilisiya nɛ nibhɛ so ne ivel ne iSiya kaa ne so ɛnggyɛ wo. Nibhɛ kaa ne re ntsong ɛlɔ gha ne i bok ɛbhɛ iJwee ne itɔɔy ne ninyi nɛ nibhɛ kaa so nikpuru. Ninyi yɛnaa nggyɛ wo kaa ne tum ishamas ne ɛSitivin na. 10Sɔng nibhɛ ne yɛɛ nɛ ne ɛSitivin na nang, daa ɛli ne iKabyik ge kaa so ndɔ ɛbhɛ ne ɛ bol ne ntsɛntsɛng. 11Nibhɛ ne bhɛ nang nidɛng ninyi na ijam gying wu tɛ nibhɛ rop ne ihyoo, nibhɛ yɔngɔ, “Njwi kɛ phok ɛSitivin negha ɛ bol ivol ne bɛɛs ɛMuusaa ye ne ɛTaanggbey.” 12iBol lɛ iphɛ ne ji te ninyi na, nɛ ninu ne ikɔɔn na gbik nɛ ninaa ne kpɛl ɛshara gha ne te njenjek, nibhɛ wum ɛSitivin ne gha nibhɛ phɛ ne ɛbhɛ ɛnu ɛyisɛ ne itɔrɔng ngge. 13Nibhɛ ne bhɛ bo nidɛng ninaa ne iwul irywɛɛk ga nɛ nibhɛ kɛ yɔngɔ, “Ɛnyi yɛghaa wo ku bol ivol ikpɛɛ daa ne iDeng ɛTaanggbey gbik ne iMɛmɛ ɛMuusaa da. 14Njwi kɛ phok ɛli ne ɛ bo wu ɛYɛso ne iNazarat tɛghaa wo yaa phɔsɔm iDeng ngge ne ɛ ta sunu ihywee ne ihywel da ne ɛMuusaa gha kɛ yɔng te njwɛɛn hyel lo.” 15Gbik ninaa ne itɔrɔng nga ne see ɛSitivin ne gha ne irwisɛ, nibhɛ ne yaang ɛyisɛ ɛbhɛ gha so te ɛhaa ɛmalɛka.
Currently Selected:
ɛTomɛ 6: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
