1 John 1
1
1I gemelu melu kekede fuamolu sulia na Baea ana mouria. A Christ naa na Baea ana na mouria nae na e too ua na mai ana hafalilaa. Gemelu melu rongoa naa, ma melu ka rikia naa ana maamelu. Ma melu ka hamotoona na ana na aba melu. 2Ma si kada na mouria naa e daofaatai, melu ka rikia naa. Nia naa melu ka bae sulia, ma melu ka faarongo gomolu ana na mouria firi na e too fai nia a God na Maa ma ka faatai naa fuamelu. 3Haia, si doo gi na melu rikia ma melu ka rongoa, nia na melu ka ainitalo laugo ana fuagamu, hai muka oofu fai gemelu ana na oofulaa na melu too ana fai nia na Maa ma a Jesus Christ na Wela nia. 4Melu kedea si doo naa haia gia ka eele asianaa.
A God naa na raralaa.
5Ma na faarongolaa na melu rongoa faasia na Wela nia a God ma melu ka haea fuagamu e urii: a God e iilingia na raralaa sulia nia e diana ka tasa asianaa, ma e langi ta rorodolaa ani nia. 6Ma lea gia haea hasa gia oofu naa fai nia, ma gia ka too ua go aga i laona na rorodoa, gia gi suge asianaa ana baelaga gi ma na aadelaga gi. 7Haia, lea gia too i laona na raralaa, iilingia a God e too i laona na raralaa, urinae gia ka oofu fai gia kwailiu, ma na abuna a Jesus na Wela nia ka faafaalu gia faasia na aade taꞌalaa gi sui.
8Ma lea gia haea gia langi go ta garolaa, gia gi suge gia i talaga, ma e langi ta mamanalaa ani gia. 9Ma lea so gia ka faarongoa ana na garolaa gia gi fuana a God, nia tara ka manata lukea na garolaa gia gi ma ka faafaalu gia faasia na aade taꞌalaa gia gi sui, sulia i nia tara ka faamamanaa na bae aalualu nia uria iililana na doo nae, ma ka iilia na doo oꞌolo. 10Ma lea so gia haea gia langi go ta garolaa ani gia, tama gia haea a God nia na wane susuge go ana naa, ma na baelana a God ka langi si too go ani gia.
A Christ e lafua na aade taꞌalaa gia gi.
Currently Selected:
1 John 1: llu
Highlight
Copy
Compare
Share
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
