Kutsama 15

Wira wa Musa

1 # Maono 15:3 Phahi Musa na Aiziraeli amuimbira Mlungu wira hinyu:

“Nindamuimbira Mwenyezi Mlungu mana vyo chivyoshinda iye vina nguma.

Akahosa farasi na apandadzi-farasi aho baharini.

2 # Zaburi 118:14; Isaya 12:2 Mwenyezi Mlungu ndiye mkpwotse na nguvu yangu

iye ndiye achiyenitivya.

Iye ni Mlungu wangu, nami ndamtogola kpwa mawira.

Iye ni Mlungu wa akare angu, nami nindaimba kumtogola.

3Mwenyezi Mlungu ni sujaa wa viha,

na dzinare ndiye Mwenyezi Mlungu.

4Magari ga kuvwehwa ni farasi ga Farao na anajeshie akaahosa baharini.

Akulu a jeshi a kumanyikana vihani akafwa madzi Bahari ya Shamu.

5Vivwa vya madzi vyaabwiningiza,

azama tsini ya bahari dza mawe.

6Mkpwonoo wa kulume uwe Mwenyezi Mlungu una nguvu za nguma.

Mkpwonoo wa kulume nkuvundza-vundza adui vipande-vipande.

7Kpwa ukuluo wa nguma ukuangamiza akupingao,

uwe uchitsukirwa u dza moho uochao,

na ni kuocha maaduigo dza nyasi mbifu.

8Wakuta pulayo, nago madzi gachidzipanga dzulu

gachiima wima dza kuta.

Vivwa vya madzi ga bahari vichiganda.

9Adui wadzikarya achiamba,

‘Nindaalunga-lunga na nindaagbwira,

ndaafuta vitu vyao niviganye zewe na niahende nilondavyo;

nindatsomola upanga wangu

na mkpwono wangu undaangamiza.’

10Ela wareha phutoro naro richipiga, nago madzi ga bahari gachiabwiningiza,

aho azama vilindi vya bahari dza chuma chiziho cha risasi chizamavyo kpwenye madzi manji.

11Kahi za milungu, ni mlungu yuphi ariye dza uwe, Mwenyezi Mlungu?

Utakatifuo tauwezekana,

mahendogo ga nguma ganahutishira,

mambo makulu uhendago uwe, ganahuangalaza.

12Wahumira nguvuzo na tsi ichimiza maadui gehu.

13Kpwa mendzwayo isiyosika undalongoza nyo atu urioakombola.

Undaalongoza kpwa nguvuzo kuphiya kpwenye makalogo matakatifu.

14Mataifa gakasikira na ganakakama kpwa wuoga;

atu asagalao Filisti akainjira wuoga.

15Akulu a Edomu akaogofyerwa.

Vilongozi a Moabu akagbwirwa ni wuoga mkpwulu;

atu osi asagalao Kanani akavundzika moyo.

16Ao akagbwirwa ni wuoga na wasiwasi.

Kpwa sababu ya ukulu wa nguvuzo

anyemere zii dza dziwe,

hadi atuo urioakombola atsupe,

ee Mwenyezi Mlungu.

17Undaareha wedze uaike dzulu ya mwangoo mwenye,

phatu ambapho uwe waphatsambula phakale makalogo,

phatu phatakatifu ambapho waphadzenga kpwa mikonoyo,

uriphophatenga kpwa kukuabudu,

uwe Mwenyezi Mlungu.

18Nawe Mwenyezi Mlungu utawale hata kare na kare!”

19Aiziraeli avyoga tsi kavu pho kahi-kahi ya bahari hata achivuka. Ela farasi a Farao, magarige ga kuvwehwa ni farasi na aphirikie, ariphokala kahi-kahi ya bahari, Mwenyezi Mlungu wauyiza madzi ga bahari gachiabwiningiza.

20Phahi Miriamu, nabii wa chichetu, ndugungbwa wa Aruni wagbwira tamburini mwakpwe mkpwononi, na achetu anjina osi achihala tamburini zao achimlunga kuno anazipiga na kuvwina. 21Na Miriamu achiaimbira wira uambao,

“Muimbireni Mwenyezi Mlungu, sababu akashinda kpwa nguma,

Amisiri na farasi aho akaahosa baharini.”

Madzi ga utsungu hiko Mara

22Ariphouka Bahari ya Shamu, Musa waalongoza Aiziraeli hadi achiinjira jangbwa ra Shuri. Asafiri siku tahu ko jangbwani, bila kuona madzi. 23Aphiya hadi achifika phatu phoihwa Mara, ambako aona madzi, ela gakala ga utsungu, kpwa hivyo taayaweza kuganwa. (Hicho ndicho chisa cha phatu hipho phaihwa Mara, manage Chieburania ni utsungu.) 24Aiziraeli amnungʼunikira Musa na achimuuza, “Vino hundanwani?” 25Musa wamvoya Mwenyezi Mlungu kpwa moyowe wosi, naye achimuonyesa Musa chipande cha muhi, ambacho wachitabwisa ndani ya madzi, nago gachikala manono kunwa.

Hipho Mara, Mwenyezi Mlungu waapha Aiziraeli amuri na malagizo. Achiapima, 26achiamba, “Mchiphundza sauti yangu kpwa makini na kuhenda garigo sawa, na mchiphundza amuri na kulunga malagizo gangu, sindakureherani makongo dza nrigoarehera Amisiri. Mana mimi, ndimi Mwenyezi Mlungu, Mlungu wenu, ambaye nkukuphozani.”

27Bada ya kuuka Mara, Aiziraeli afika Elimu, ambako kala kuna vidzuho kumi na viiri na mitende mirongo sabaa na achichita kambi phephi na go madzi.

Currently Selected:

Kutsama 15: dig

Highlight

Copy

Compare