KA BUKE ʻAHĀ A MOSE, I KAPA ʻIA NĀ HELU 3
3
MOKUNA III.
1 No nā keiki a ʻAʻarona. 5 Ua hoʻokaʻawale ʻia nā Levi i poʻe kōkua i nā kāhuna. 14 Ua helu ʻia nā Levi. 40 Ka hoʻōla pānaʻi ʻana i nā hiapo kāne.
1¶ Eia hoʻi nā hanauna o ʻAʻarona lāua ʻo Mose, i ka lā a Iēhova i ʻōlelo mai ai iā Mose ma ka mauna ʻo Sinai.
2Eia hoʻi nā inoa o nā keiki a ʻAʻarona: ʻo Nadaba ka hiapo, ʻo ʻAbihu, ʻo ʻEleazara, a ʻo ʻItamara.
3ʻO ia nā inoa o nā keiki a ʻAʻarona, nā kāhuna i poni ʻia, āna i hoʻolaʻa ai e lawelawe ma ka ʻoihana kahuna.
4A make ihola ʻo Nadaba lāua ʻo ʻAbihu i mua o Iēhova, iā lāua i kaumaha aku ai i ke ahi ʻē i mua o Iēhova ma ka wao nahele ʻo Sinai, ʻaʻole hoʻi a lāua keiki; a lawelawe akula ʻo Eleazara lāua ʻo ʻItamara ma ka ʻoihana kahuna i mua o nā maka o ʻAʻarona ʻo ko lāua makua kāne.
5¶ ʻŌlelo maila ʻo Iēhova iā Mose, ʻī maila,
6“E hoʻoneʻeneʻe mai i ka ʻohana a Levi a kokoke, a e hoʻonoho iā lākou i mua o ʻAʻarona ke kahuna, i lawelawe lākou nāna.
7“Na lākou e mālama i kāna ʻoihana, a me kā ke anaina kanaka a pau ma ke alo o ka halelewa o ke anaina, e lawelawe i nā mea o ka halelewa.
8“Na lākou e mālama i nā mea hana a pau o ka halelewa o ke anaina, a me ka hana a nā mamo a ʻIseraʻela, e hana ai i ka ʻoihana o ka halelewa.
9“E hāʻawi aʻe ʻoe i nā Levi no ʻAʻarona a no kāna mau keiki: ua hāʻawi ʻia lākou a lilo loa nona, no loko o kā ʻIseraʻela.
10“E kauoha aku ʻoe iā ʻAʻarona a me kāna mau keiki, a e lawelawe lākou ma kā ke kahuna ʻoihana; a ʻo ke kanaka ʻē ke hele mai a kokoke, e make ia.”
11¶ ʻŌlelo maila ʻo Iēhova iā Mose, ʻī maila,
12“ʻO wau nei hoʻi, ua hoʻokaʻawale aʻe nei au i nā Levi mai waena mai o nā mamo a ʻIseraʻela, i pānaʻi no nā hiapo a pau i hānau mua o nā mamo a ʻIseraʻela; no ia mea, noʻu nō nā Levi;
13no ka mea, noʻu nō nā makahiapo a pau; i ka lā aʻu i luku ai i nā makahiapo a pau ma ka ʻāina ʻo ʻAigupita, hoʻolaʻa ihola hoʻi au noʻu i nā makahiapo ma kā ʻIseraʻela, i kā nā kānaka a me kā nā holoholona; noʻu nō lākou; ʻo wau nō Iēhova.”
14¶ ʻŌlelo maila ʻo Iēhova iā Mose ma ka wao nahele ʻo Sinai, ʻī maila,
15“E helu ʻoe i nā mamo o Levi ma muli o ko ka hale a ko lākou poʻe kūpuna, ma ko lākou mau ʻohana; ʻo nā kāne a pau mai ka malama hoʻokahi a keu aku kāu e helu aku ai.”
16A helu ihola ʻo Mose iā lākou ma muli o ka ʻōlelo a Iēhova, e like me ia i kauoha ʻia mai ai.
17Eia hoʻi nā keiki a Levi ma ko lākou mau inoa: ʻo Geresona, ʻo Kohata, a ʻo Merari.
18A eia nā inoa o nā keiki a Geresona, ma kā lāua mau ʻohana: ʻo Libeni a ʻo Simei.
19Eia hoʻi nā keiki a Kohata ma kā lākou mau ʻohana: ʻo ʻAmerama, ʻo ʻIzehara, ʻo Heberona a ʻo ʻUziʻela.
20A ʻo nā keiki a Merari, ma kā lāua mau ʻohana: ʻo Maheli a ʻo Musi; ʻo ia nā ʻohana o nā Levi, ma ko ka hale o ko lākou poʻe kūpuna.
21¶ Na Geresona ka ʻohana o nā Libeni a me nā Simei; ʻo ia nā ʻohana o nā keiki a Geresona.
22ʻO ko lākou poʻe i helu ʻia ma ka helu ʻana i nā kāne a pau, mai ka malama hoʻokahi a keu aku, ʻo ka poʻe o lākou i helu ʻia, he ʻehiku tausani a me nā haneri keu ʻelima.
23A e hoʻomoana nā ʻohana o kā Geresona ma hope o ka halelewa ma ka ʻaoʻao komohana.
24A ʻo ka luna ʻohana o ke kupuna o kā Geresona, ʻo ia ʻo ʻEliasapa ke keiki a Laʻela.
25ʻO ka mea a nā mamo a Geresona e mālama ai ma ka halelewa o ke anaina, ʻo ia ʻo ka halelewa ma loko, ka hale lole a me ka mea uhi ma luna, a me ka pākū no ka puka o ka halelewa o ke anaina,
26a me nā pākū o ka pā, a me ka pale no ka puka o ka pā, ka mea e pili ana ma ka halelewa a ma ke kuahu a puni, a me kona mau kaula no nā ʻoihana a pau ona.
27¶ Na Kohata ka ʻohana o kā ʻAmerama, me ka ʻohana o kā ʻIzehara, a me ka ʻohana o kā Heberona, a me ka ʻohana o kā ʻUziʻela; ʻo ia nā ʻohana o kā Kohata.
28I ka helu ʻana i nā kāne a pau mai ka malama hoʻokahi a keu aku, he ʻewalu tausani a me nā haneri keu ʻeono, e mālama ana i nā mea o kahi hoʻāno.
29E hoʻomoana nā ʻohana a nā keiki a Kohata ma ka ʻaoʻao hema o ka halelewa.
30A ʻo ka luna o ka ʻohana kupuna o nā ʻohana o kā Kohata, ʻo ia ʻo ʻElizapana ke keiki a ʻUziʻela.
31ʻO kā lākou mea e mālama ai, ʻo ia ka pahu, ka papa ʻaina, ka ipukukui, nā kuahu, a me nā ipu o ke keʻena kapu, nā mea a lākou e lawelawe ai, a me ka pale a me kāna ʻoihana a pau.
32A ʻo ʻEleazara ke keiki a ʻAʻarona ke kahuna, ʻo ia ka luna ma luna o ka luna o nā Levi, a e nānā aku ia ma luna o ka poʻe mālama i ka ʻoihana o ke keʻena kapu.
33¶ Na Merari ka ʻohana o kā Maheli a me ka ʻohana o kā Musi; ʻo ia nā ʻohana na Merari.
34ʻO nā mea o lākou i helu ʻia, ma ka helu ʻana i nā kāne a pau, mai ka malama hoʻokahi a keu aku, ʻeono ia tausani a me nā haneri keu ʻelua.
35A ʻo ka luna o ko ka hale o ka makua nāna nā ʻohana o Merari, ʻo ia ʻo Zuriʻela ke keiki a ʻAbihaila; e hoʻomoana lākou ma ka ʻaoʻao ʻākau o ka halelewa.
36A ʻo ka ʻoihana mālama a nā keiki a Merari, ʻo ia nā papa o ka halelewa, me kona mau kaola, a me kona mau pou, a me kona mau kumu, a me kona mau ipu, a me ka ʻoihana a pau i laila,
37a me nā pou o ka pā a puni, a me ko lākou mau kumu, a me ko lākou mau mākia, a me ko lākou mau kaula.
38¶ Akā, ʻo ka poʻe hoʻomoana ma ke alo o ka halelewa, ma ka ʻaoʻao hikina, i mua o ka halelewa anaina ma ka hikina, ʻo ia ʻo Mose a me ʻAʻarona a me kāna mau keiki, i mea e mālama ai i ke keʻena kapu, no ka ʻoihana a nā mamo a ʻIseraʻela; a ʻo ke kanaka ʻē ke hele mai a kokoke, e make nō ia.
39ʻO nā Levi a pau i helu ʻia, a Mose lāua ʻo ʻAʻarona i helu ai ma muli o ke kauoha ʻana mai a Iēhova, ma nā ʻohana o lākou; ʻo nā kāne a pau mai ka malama hoʻokahi a keu aku, he iwakāluakumamālua tausani.
40¶ ʻŌlelo maila ʻo Iēhova iā Mose, “E helu ʻoe i nā makahiapo kāne a pau o nā mamo a ʻIseraʻela, ʻo ka malama hoʻokahi a keu aku, a e helu hoʻi i nā inoa o lākou.
41“E lawe ʻoe i nā Levi noʻu, (ʻo wau nō Iēhova,) i pānaʻi no nā hiapo a pau i waena o nā mamo a ʻIseraʻela; a i nā holoholona o kā Levi i pānaʻi no nā holoholona hiapo o nā mamo a ʻIseraʻela.”
42A helu akula ʻo Mose i nā makahiapo a pau i waena o nā mamo a ʻIseraʻela, e like me kā Iēhova i kauoha mai ai iā ia.
43ʻO nā makahiapo kāne a pau, ma ka helu ʻana i nā inoa, ʻo ka poʻe o lākou i helu ʻia mai ka malama hoʻokahi a keu aku, he iwakāluakumamālua tausani, me nā haneri ʻelua a me ke kanahikukumamākolu.
44¶ ʻŌlelo maila ʻo Iēhova iā Mose, ʻī maila,
45“E lawe ʻoe i nā Levi i pānaʻi no nā makahiapo a pau i waena o nā mamo a ʻIseraʻela, a me nā holoholona o nā Levi i pānaʻi no ko lākou poʻe holoholona, a noʻu nō nā Levi; ʻo wau nō Iēhova.
46“A no ka poʻe e pānaʻi ʻia he ʻelua haneri me kanahikukumamākolu o nā hiapo o nā mamo a ʻIseraʻela, kai ʻoi ma mua o nā Levi,
47e ʻauhau aku ʻoe i nā sekela ʻelima no ke poʻo hoʻokahi; ma ka sekela o ke keʻena kapu kāu e ʻauhau aku ai; (he iwakālua gera, hoʻokahi ia sekela);
48a e hāʻawi aku ʻoe i ke kālā a ka poʻe keu o lākou i pānaʻi ʻia ai, iā ʻAʻarona a me kāna mau keiki kāne.”
49Lawe aʻela ʻo Mose i ke kālā pānaʻi a ka poʻe i koe o nā mea i pānaʻi ʻia e nā Levi.
50Lawe aʻela ʻo ia i ke kālā a nā hiapo o nā mamo a ʻIseraʻela; hoʻokahi tausani, ʻekolu haneri me kanaonokumamālima nā sekela, ma ka sekela o ke keʻena kapu.
51A hāʻawi akula ʻo Mose i ke kālā a ka poʻe i pānaʻi ʻia, iā ʻAʻarona a me kāna mau keiki kāne, e like me ka ʻōlelo a Iēhova, me ka mea a Iēhova i kauoha mai ai iā Mose.
Currently Selected:
KA BUKE ʻAHĀ A MOSE, I KAPA ʻIA NĀ HELU 3: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.