KA BUKE ʻAHĀ A MOSE, I KAPA ʻIA NĀ HELU 2
2
MOKUNA II.
1 Ka hōʻike ʻana i nā wahi hoʻomoana o nā ʻohana a ʻIseraʻela.
1¶ ʻŌlelo maila ʻo Iēhova iā Mose a iā ʻAʻarona, ʻī maila,
2“E noho kēlā kanaka kēia kanaka o nā mamo a ʻIseraʻela ma kona hae iho, me ka hae o ka hale o ko lākou kupuna; e noho kūpono ana lākou i ka halelewa o ke anaina.
3“Ma ka ʻaoʻao hikina, ma ka puka ʻana o ka lā e noho ai ka poʻe no ka hae o kā Iuda hoʻomoana ʻana, ma ko lākou poʻe kaua; a ʻo Nahesona ke keiki a ʻAminadaba, ʻo ia ka luna no nā mamo a Iuda.”
4A ʻo kona poʻe kaua, a ʻo nā mea o lākou i helu ʻia, he kanahikukumamāhā tausani, me nā haneri keu ʻeono.
5“A ʻo ka poʻe e noho kokoke iā ia, ʻo ia ka ʻohana a ʻIsakara; a ʻo Netaneʻela ke keiki a Zuara, ʻo ia ka luna o nā mamo a ʻIsakara.”
6A ʻo kona poʻe kaua, a ʻo ka poʻe o lākou i helu ʻia, he kanalimakumamāhā tausani, me nā haneri keu ʻehā.
7“ʻO ka ʻohana hoʻi a Zebuluna; a ʻo ka luna o nā mamo a Zebuluna, ʻo ia ʻo ʻEliaba ke keiki a Helona.”
8A ʻo kona poʻe kaua, a ʻo ka poʻe o lākou i helu ʻia, he kanalimakumamāhiku tausani, a me nā haneri keu ʻehā.
9“ʻO nā mea a pau i helu ʻia, ma kahi hoʻomoana o kā Iuda, hoʻokahi ia haneri a me kanawalukumamāono tausani, a me nā haneri keu ʻehā, ma ko lākou poʻe kaua; ʻo kēia poʻe ke hele ma mua.
10¶ “Ma ka ʻaoʻao hema ka hae o kahi hoʻomoana o kā Reubena, ma ko lākou poʻe kaua; a ʻo ka luna o nā mamo a Reubena, ʻo ia ʻo ʻElizura ke keiki a Sedeura.”
11A ʻo kona poʻe kaua, a ʻo nā mea o lākou i helu ʻia, he kanahākumamāono tausani, a me nā haneri ʻelima.
12“A ʻo ka poʻe e noho kokoke iā ia, ʻo ka ʻohana o Simeona; a ʻo ka luna o nā mamo a Simeona, ʻo ia ʻo Selumiʻela ke keiki a Zurisadai.”
13A ʻo kona poʻe kaua, a ʻo nā mea o lākou i helu ʻia, he kanalimakumamāiwa tausani, me nā haneri keu ʻekolu.
14“A laila ʻo ka ʻohana a Gada; a ʻo ʻEliasapa ke keiki a Reuʻela, ʻo ia ka luna o nā mamo a Gada.”
15A ʻo kona poʻe kaua, a ʻo nā mea o lākou i helu ʻia, he kanahākumamālima tausani me nā haneri ʻeono, a me ke kanalima.
16“ʻO ka poʻe a pau i helu ʻia ma kahi hoʻomoana o kā Reubena, hoʻokahi ia haneri me kanalimakumamākahi tausani, ʻehā haneri a me kanalima keu, ma ko lākou poʻe kaua: a ʻo lākou ke hele ma ka lua o ka huakaʻi.
17¶ “A laila e neʻeneʻe aku ka halelewa o ke anaina, me ka poʻe hoʻomoana o nā Levi, i waenakonu o ka poʻe hoʻomoana; e like me ko lākou hoʻomoana ʻana, pēlā nō lākou e neʻeneʻe aku ai, ʻo kēlā kanaka kēia kanaka ma kona wahi ma ko lākou hae.
18¶ “Ma ka ʻaoʻao komohana ka hae o ka poʻe hoʻomoana o kā ʻEperaima, ma ko lākou poʻe kaua; a ʻo ka luna o nā mamo a ʻEperaima, ʻo ia ʻo ʻElisama ke keiki a ʻAmihuda.”
19A ʻo kona poʻe kaua, a me nā mea o lākou i helu ʻia, he kanahā tausani a me nā haneri keu ʻelima.
20“A e pili iā ia ka ʻohana a Manase; a ʻo ka luna o nā mamo a Manase, ʻo ia ʻo Gamaliʻela ke keiki a Pedazura.”
21A ʻo kona poʻe kaua, a me nā mea o lākou i helu ʻia, he kanakolukumamālua tausani a me nā haneri keu ʻelua.
22“A laila ʻo ka ʻohana a Beniamina; a ʻo ka luna o nā mamo a Beniamina, ʻo ia ʻo ʻAbidana ke keiki a Gideoni.”
23A ʻo kona poʻe kaua, a me ka poʻe o lākou i helu ʻia, he kanakolukumamālima tausani a me nā haneri keu ʻehā.
24“ʻO ka poʻe a pau i helu ʻia no kahi hoʻomoana o kā ʻEperaima, hoʻokahi ia haneri me kumamāwalu tausani me ka haneri hoʻokahi, ma ko lākou mau poʻe kaua; a e hele aku hoʻi lākou ma ke kolu o ka huakaʻi.
25¶ “Ma ka ʻaoʻao ʻākau ka hae o ka poʻe hoʻomoana o kā Dana ma ko lākou poʻe kaua; a ʻo ka luna o nā mamo a Dana, ʻo ia ʻo ʻAhiezera ke keiki a ʻAmisadai.”
26A ʻo kona poʻe kaua, a ʻo nā mea o lākou i helu ʻia, he kanaonokumamālua tausani me nā haneri keu ʻehiku.
27“A ʻo ka poʻe hoʻomoana me ia, ʻo ia ka ʻohana a ʻAsera; a ʻo ka luna o nā mamo a ʻAsera, ʻo ia ʻo Pagiʻela ke keiki a ʻOkerana.”
28“ʻO kona poʻe kaua, a me nā mea o lākou i helu ʻia, he kanahākumamākahi tausani a me nā haneri keu ʻelima.
29“A laila ka ʻohana a Napetali; a ʻo ka luna o nā mamo a Napetali, ʻo ia ʻo ʻAhira ke keiki a ʻEnana.”
30“ʻO kona poʻe kaua, a me nā mea o lākou i helu ʻia, he kanalimakumamākolu tausani a me nā haneri keu ʻehā.
31“ʻO ka poʻe a pau i helu ʻia ma kahi hoʻomoana o Dana, hoʻokahi haneri me kanalimakumamāhiku tausani a me nā haneri keu ʻeono; a ʻo lākou nei ke hele ma hope me ko lākou mau hae.”
32¶ ʻO kēia ka poʻe i helu ʻia o nā mamo a ʻIseraʻela, ma ko ka hale o ko lākou poʻe kūpuna; ʻo nā mea a pau i helu ʻia o nā wahi hoʻomoana, ma ko lākou mau poʻe kaua, he ʻaono haneri me ke kumamākolu tausani, me nā haneri keu ʻelima a me ke kanalima.
33Akā, ʻaʻole i helu ʻia nā Levi me nā mamo a ʻIseraʻela; e like me kā Iēhova i kauoha mai ai iā Mose.
34A hana ihola nā mamo a ʻIseraʻela e like me nā mea a pau a Iēhova i kauoha mai ai iā Mose; pēlā lākou i hoʻomoana ai ma ko lākou mau hae, a pēlā hoʻi lākou i hele aku ai, ʻo kēlā mea kēia mea ma muli o ko lākou mau ʻohana, e like me ko ka hale o ko lākou poʻe kūpuna.
Currently Selected:
KA BUKE ʻAHĀ A MOSE, I KAPA ʻIA NĀ HELU 2: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.