HOSEA 2
2
MOKUNA II.
1 No ka hui ʻana o kā ʻIseraʻela a me kā Iuda ma lalo o ke poʻo hoʻokahi. 6 Hoʻākāka ʻia mai ko lākou hewa, a me ka ʻino e hiki mai ana ma luna o lākou. 14 A hoʻopōmaikaʻi hou ke Akua iā lākou.
1¶ E kapa aku ʻoukou i ko ʻoukou poʻe hoahānau kāne, ʻo “ʻAmi,” a i ko ʻoukou mau hoahānau wahine, ʻo “Ruhama.”
2E hakakā ʻoukou me ko ʻoukou makuahine, e hakakā ʻoukou;
No ka mea, ʻaʻole ʻo ia ʻo kaʻu wahine;
ʻAʻole hoʻi wau ʻo kāna kāne;
I haʻalele ai ʻo ia i kona hoʻokamakama ʻana mai kona maka aku,
A me kona moekolohe hoʻi mai waena aku o kona mau ū;
3O wehe aku au iā ia a ʻōlohelohe,
A e hoʻokū iā ia e like me ia i ka lā āna i hānau ai,
A e hoʻolilo iā ia e like me ka wao akua,
A e hoʻokū hoʻi iā ia e like me ka ʻāina maloʻo,
A e pepehi iā ia i ka make wai.
4“ʻAʻole au e aloha aku i kāna poʻe keiki;
No ka mea, he poʻe keiki lākou na ka moekolohe.
5“No ka mea, ua moekolohe ko lākou makuahine,
Ua hana hilahila ka mea nāna lākou i hāpai;
No ka mea, ʻī ihola ia,
‘E hele aku au ma muli o kuʻu mau ipo,
Ka poʻe i hāʻawi mai i kaʻu ʻai, a me koʻu wai,
I koʻu hulu hipa a me kuʻu olonā, ʻo koʻu ʻaila, a me koʻu mea inu.’
6“No ia mea, aia hoʻi, e hoʻopuni au i kou ala i nā lāʻau kukū,
A e hana au i pā pōhaku nona,
I mea e loaʻa ʻole ai iā ia kona mau alanui.
7“A hahai aku nō ia i kona mau hoaaloha, ʻaʻole e loaʻa lākou iā ia;
A ʻimi aku hoʻi ia iā lākou, ʻaʻole e loaʻa;
A laila, e ʻī iho ia, ‘E hele au, a e hoʻi hou i kuʻu kāne ma mua;
No ka mea, ua ʻoi aku koʻu pono i kēlā wā ma mua o kēia.’
8¶ “ʻAʻole ʻo ia i noʻonoʻo, ua hāʻawi aku au iā ia i ka mea ʻai, a me ka waina hou, a me ka ʻaila,
A hoʻomāhuahua aku hoʻi i ke kālā, a me ke gula nona,
Nā mea a lākou i hoʻomākaukau ai no Baʻala.
9“No ia mea, e hoʻi hou mai au, a e lawe aku i kaʻu palaoa i kona manawa,
A me kaʻu waina hou i kona manawa iho,
E lawe aku hoʻi au i koʻu hulu hipa, a me koʻu olonā, nā mea i uhi ai i kona ʻōlohelohe.
10“ʻĀnō e hōʻike aku au i kona mea hilahila i mua o nā maka o kona mau hoaaloha,
ʻAʻohe mea e hoʻopakele iā ia mai koʻu lima aku.
11“A e hoʻopau aku au i kona leʻaleʻa a pau,
I kāna mau ʻahaʻaina, i kona mau Mahina Hou, i kona mau lā Sābati, a me kona mau ʻahaʻaina a pau.
12“A e luku aku au i kona mau kumu waina, a me kona mau lāʻau fiku, i nā mea āna i ʻī mai ai, ‘ʻO ia kaʻu uku, ʻo koʻu mau ipo i hāʻawi mai ai iaʻu’;
A e hoʻolilo au ia mau mea i ulu lāʻau,
A e ʻai iho nā holoholona ia mau mea.
13“A e hoʻopaʻi aku au ma luna ona i nā lā o nā Baʻala,
I nā lā āna i kuni ai i ka mea ʻala no lākou;
A i kāhiko ai iā ia iho i kona mau apo ihu, a me kona mau lei ʻāʻī,
A hahai nō ia ma muli o kona mau ipo,
A hoʻopoina ia iaʻu,” wahi a Iēhova.
14¶ “No laila, aia hoʻi, e hoʻowalewale au iā ia, a e alakaʻi aku iā ia i ka wao nahele,
A e ʻōlelo ʻoluʻolu aku iā ia.
15“A e hāʻawi aku au nona i kona mau māla waina mai laila mai,
A i ke awāwa ʻo ʻAkora, i puka o ka manaʻolana;
A e mele nō ia ma laila, e like me ia i kona wā ʻōpio,
A e like me ia i ka wā āna i puka mai ai mai ka ʻāina ʻo ʻAigupita mai.
16“A i kēlā manawa, wahi a Iēhova, e kapa mai ʻoe iaʻu ʻo ʻIsi;
ʻAʻole e kapa hou iaʻu, ʻo Baʻali.
17“A e lawe aʻe au i ka inoa o nā Baʻala mai kona waha aku,
ʻAʻole e hoʻomanaʻo hou iā lākou ma ko lākou inoa.
18“A i kēlā manawa e hana aku au no lākou i berita
Me nā holoholona o ke kula, a me nā manu o ka lewa,
A me nā mea kolo o ka honua;
A e haki iaʻu ke kakaka, a me ka pahi kaua, a me ka mea kaua mai ka honua aku,
A e hoʻomoe iho au ia lākou me ka maluhia.
E hoʻopalau aku au iā ʻoe naʻu a mau loa aku;
19“A e hoʻopalau aku au iā ʻoe naʻu ma ka pono,
A ma ka hoʻopono, a ma ka lokomaikaʻi, a ma ke aloha.
20“A e hoʻopalau aku nō hoʻi au iā ʻoe naʻu ma ka ʻoiaʻiʻo:
A e ʻike aku ʻoe iā Iēhova.
21¶ “A i kēlā manawa, e hoʻolohe nō au,” wahi a Iēhova,
“E hoʻolohe nō au i nā lani, a e hoʻolohe lākou i ka honua;
22“A e hoʻolohe ka honua i ka ʻai, a me ka waina, a me ka ʻaila;
A e hoʻolohe nō lākou iā Iezereʻela.
23“A e kanu iho au iā ia ma ka honua;
A e aloha aku au i ka mea i aloha ʻole ʻia;
A e ʻōlelo aku au i ka poʻe kānaka ʻaʻole noʻu, ‘ʻO ʻoe koʻu poʻe kānaka’;
A e ʻōlelo mai hoʻi lākou, ‘ʻO ʻoe ko mākou Akua!’”
Currently Selected:
HOSEA 2: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.