Lukas 1

Untuk Bapa Teofilus

1:1-4

1Bapa Teofilus yang sa hormat.

Banyak orang su usaha tulis smua yang su jadi di tenga kitong. 2Dong tulis apa yang dong dengar dari orang-orang yang liat sendiri waktu smua jadi trus pigi kastau brita itu ke mana-mana. 3Juga sa cek smua itu dari awal, jadi sa rasa perlu sa tulis ikut deng smua yang jadi waktu itu untuk bapa. 4Deng begitu, bapa bisa tau deng pasti kalo smua yang orang su kas ajar ke bapa itu betul.

Malaikat kastau Zakharia tentang Yohanes

1:5-25

5Waktu Herodes jadi raja di Yudea, disitu ada satu imam de pu nama Zakharia. De ni dari klompok Abia,#1:5 Abia tu nama satu orang yang jadi kepala dari imam-imam agama Yahudi yang pu tugas di Ruma Allah. Klompok Abia ni klompok ke dlapan (1 Tawarikh 24:3-19), Zakharia ada di klompok ini. de pu istri pu nama Elisabet. Dong dua ni Harun pu turunan.#1:5 Harun ini de yang pertama jadi imam di Israel. 6Dong dua orang yang benar di depan Allah, slalu ikut Tuhan deng tra perna lupa bikin Tuhan pu printa. 7Dong dua su tua trus trada anak karna Elisabet de mandul.

8Satu hari waktu klompok Abia pu giliran, Zakharia de tugas jadi imam#1:8 Imam ni orang yang pu tugas bakar korban untuk Allah. di Ruma Allah.#1:8 Ruma Allah ‒ Cuma ada satu saja, tempat ini ada di Yerusalem. Di tempat ini imam-imam dong bakar korban untuk Allah, biasa orang-orang Yahudi bawa korban ke tempat ini. Tempat ini beda deng tempat-tempat ibada biasa karna Allah ada di tempat ini. 9Biasa imam-imam dong buang undi untuk kasi tugas.#1:9 buang undi untuk kasi tugas ‒ Waktu itu di Israel ada skitar 18.000 pemimpin agama jadi itu satu tugas luar biasa untuk bikin tugas di dalam Tempat Suci di Ruma Allah. Juga dong pasti snang skali kalo dapat tugas satu kali di hidup. Jadi Zakharia yang dapa pili untuk bakar kemenyan#1:9 kemenyan ‒ Bahan wangi yang dong bakar supaya de pu asap bau wangi, biasa dong bakar jadi korban untuk Tuhan. dalam Allah pu Tempat Suci.#1:9 Allah pu Tempat Suci ‒ Ini tempat yang ada di dalam Ruma Allah itu. Itu tempat yang suci skali karna Allah ada disitu. 10Waktu de bakar kemenyan itu, smua orang dong kumpul di luar Tempat Suci itu trus dong berdoa. 11Waktu itu Tuhan pu malaikat kas tunjuk diri sama Zakharia, de bediri di sebla kanan dekat meja tempat bakar kemenyan. 12Liat begitu Zakharia de kaget deng takut.

13Tapi malaikat itu bicara sama dia,

“Zakharia ko jang takut, karna Tuhan su dengar ko pu doa. Ko pu istri Elisabet de nanti mlahirkan anak laki-laki. Ko kasi nama de Yohanes. 14Waktu anak itu lahir, ko nanti snang skali trus orang lain juga dong snang sama anak itu. 15Karna nanti de jadi orang yang penting depan Tuhan. Trus de tra bole minum anggur ato minum minuman kras.#1:15 tra bole minum anggur ato minum minuman kras ‒ Ini tanda kalo anak ini de dapa pili kusus untuk Tuhan (Bilangan 6:1-8). Nanti Roh Allah kuasai de mulai dari dalam de pu mama pu perut. 16De nanti bawa banyak orang Israel balik kembali sama Tuhan, dong pu Allah. 17Trus de yang duluan buka jalan untuk Tuhan. De pu kuasa yang kuat sama sperti Elia dulu. De kas damei bapa-bapa deng dong pu anana kembali. Trus, orang yang su jalan sala de bikin dong kembali pikir yang benar. Deng begitu de kas siap orang-orang yang mo hidup ikut Tuhan.”#Maleakhi 4:5, 6

18Habis tu Zakharia bilang sama malaikat begini, “Bagemana sa mo tau kalo yang sa dapa kastau itu nanti jadi? Karna sa ni su tua baru sa pu istri juga su tua.”

19Malaikat de jawab dia,

“Sa ni Gabriel yang bediri dekat Allah, sa dapa printa untuk kastau tentang brita baik ini sama ko. 20Dengar ini! Apa yang sa bilang pasti jadi pas de pu waktu nanti, tapi karna ko tra percaya apa yang sa bilang, ko tra bisa bicara sampe smua yang sa bilang ini jadi.”

21Di luar Tempat Suci itu orang-orang dong su tunggu-tunggu Zakharia. Dong heran karna de su lama di dalam Tempat Suci itu. 22Begini waktu Zakharia de kluar, de su tra bisa bicara sama dorang, de cuma pake kode-kode saja. Jadi orang-orang dong tau kalo Tuhan ada kas tunjuk satu tanda sama Zakharia dalam Tempat Suci itu. 23Begitu de pu tugas kerja di Ruma Allah slesai, Zakharia de pulang ke de pu ruma.

24Tra lama de pu istri Elisabet hamil, trus Elisabet ni de tinggal dalam ruma saja sampe lima bulan. 25De bilang, “Tuhan yang tolong sampe sa bisa hamil, Tuhan su bikin sa tra malu lagi depan orang-orang.”

Malaikat kastau brita Yesus lahir

1:26-38

26Begini Elisabet su hamil enam bulan, Allah suru malaikat Gabriel pigi ke kampung Nazaret di daera Galilea. 27De ke prempuan satu yang pu nama Maria, de masi nona deng blum kawin. Maria de ni su jadi calon istri dari laki-laki satu pu nama Yusuf, dari raja Daud pu turunan.

28Malaikat de datang bilang Maria begini, “Salam Maria, Tuhan su kasi ko berkat besar. Tuhan ada sama-sama deng ko!”

29Dengar begitu Maria takut deng bingung, trus de tanya dalam hati, “De pu maksud apa eee?”

30Trus malaikat itu bilang,

“Maria jang takut, Allah su kas tunjuk De pu baik sama ko. 31Dengar ini! Ko nanti hamil trus mlahirkan anak laki-laki satu, ko harus kasi nama anak itu Yesus. 32Anak ini nanti De jadi orang penting, trus nanti dong panggil De Allah Yang Paling Tinggi pu Anak. Juga nanti Tuhan Allah kasi De kursi raja dari De pu nene moyang Raja Daud. 33Trus De ni nanti jadi raja yang printa Yakub pu anana cucu trus-trus, De pu krajaan trada akir.”

34Tapi Maria de bilang malaikat itu, “Bagemana smua ni bisa jadi? Karna sa blum perna tidur deng laki-laki.”

35Malaikat itu bilang,

“Roh Allah nanti turun sama ko, trus Allah Yang Paling Tinggi pu kuasa tutup ko, karna begitu Anak yang nanti ko lahir itu dong panggil De Allah pu Anak, De nanti hidup kusus untuk Allah. 36Dengar ini! Ko pu sodara Elisabet de su hamil enam bulan, padahal de su tua trus orang bilang de tra bisa pu anak. 37Karna untuk Allah trada yang tra bisa.”

38Trus Maria de bilang, “Sa ni cuma Tuhan pu pesuru, biar smua jadi sperti yang ko bilang itu.” Trus, malaikat itu de pigi kas tinggal Maria.

Maria pigi ke Elisabet

1:39-45

39Habis tu lewat brapa hari Maria pigi cepat-cepat ke kota satu yang ada di gunung di daera Yudea. 40De pigi ke Zakharia pu ruma, pas sampe di sana, Maria kasi suara ke Elisabet. 41Begitu Elisabet dengar Maria pu suara, anak dalam de pu perut grak kuat-kuat. Trus Roh Allah kuasai Elisabet, 42trus Elisabet batariak deng snang,

“Heee, ko ni yang paling dapa berkat dari smua prempuan, begitu juga deng Anak yang dalam ko pu perut ini. 43Sa ni sapa ka sampe sa pu Tuhan pu mama de datang liat sa? 44Dengar ini! Waktu sa dengar ko pu suara, anak dalam sa pu perut ni grak kuat-kuat karna snang skali. 45Ko untung skali, karna ko yang percaya kalo apa yang Tuhan kastau sama ko itu pasti jadi.”

Maria puji Tuhan

1:46-56

46Maria bilang,

“Sa pu hati puji deng hormat sama Tuhan!

47Sa pu hati snang skali,

karna Allah kas slamat saya.

48De ingat saya, De pu pesuru yang trada arti ini!

Mulai skarang smua orang di dunia bilang sa ni prempuan yang paling untung.

49Karna Allah Yang Pu Kuasa Paling Besar su bikin smua yang besar sama saya,

Allah tu suci deng trada sala apapa.

50Tuhan slalu kas tunjuk De pu kasian deng sayang

trus-trus ke orang yang dong pu hidup takut Tuhan.

51Tuhan kas tunjuk De pu kuasa besar,

De juga kas kaco orang yang tinggi hati.

52Tuhan kas turun pejabat dari dong pu kursi pejabat,

baru De kasi kuasa sama orang-orang yang di bawa.

53De kasi smua yang baik sama orang-orang lapar sampe dong puas,

trus orang-orang kaya De suru pigi deng tangan kosong.

54-55Tuhan su tolong Israel, De pu pesuru,

karna Tuhan ingat De pu kasian deng sayang, sperti De su janji sama tong pu nene moyang.

Tuhan janji kalo De nanti bikin smua yang baik sama Abraham

deng de pu anana cucu sampe trada akir.”#Kejadian 17:7

56Kira-kira sampe tiga bulan Maria tinggal sama Elisabet, habis itu de pulang kembali.

Yohanes Tukang Baptis lahir

1:57-66

57Pas su waktu untuk Elisabet de mo mlahirkan, de lahir anak laki-laki satu. 58Waktu orang-orang di tempat itu deng de pu sodara dong dengar kalo Tuhan su kas tunjuk De pu kasian deng sayang sama dia, dong smua ikut snang sama-sama deng dia.

59Waktu anak kecil su dlapan hari, dong smua datang liat anak itu dapa sunat ikut dong pu aturan agama.#Imamat 12:1-3 De pu sodara dong mo kas nama de Zakharia sperti de bapa, 60tapi anak itu pu mama bilang, “Tra usa! Kas nama de Yohanes saja.”

61Trus dong bilang dia, “Tapi trada ko pu sodara yang nama begitu baru?” 62Trus dong kode sama Zakharia, dong tanya de pu anak mo kasi nama apa.

63Zakharia de minta tempat tulis untuk de tulis, “De pu nama tu Yohanes.” Baru dong smua langsung heran. 64Waktu itu juga Zakharia langsung bisa bicara lagi trus de mulai puji Allah.

65Smua orang yang tinggal samping-samping ruma dong jadi takut, trus pristiwa itu orang crita dari mulut ke mulut di smua tempat di daera gunung Yudea. 66Smua orang yang dengar dong bilang dalam hati, “Anak ini kalo besar nanti de jadi apa eee?” Karna dong liat Tuhan pu kuasa ada sama-sama deng anak ini.

Zakharia puji Tuhan

1:67-80

67Begini Roh Allah kuasai anak itu pu bapa Zakharia, trus de bapa bawa Allah pu pesan, de bilang begini,

68“Puji Tuhan, Allah yang kitong orang Israel percaya!

De su datang mo tolong kas bebas De pu orang-orang.

69Tuhan kasi satu Orang yang De pu kuasa besar, datang kas slamat kitong.

Orang itu turunan dari Tuhan pu pesuru, Raja Daud.

70De bikin sperti De janji dulu skali dari mulut nabi-nabi yang De pili itu,

71untuk kas slamat kitong dari musu-musu pu kuasa deng smua yang tra suka skali sama kitong.

72Allah bikin begitu untuk kas tunjuk De pu kasian deng sayang sama tong pu nene moyang,

karna De ingat De pu janji yang suci yang pasti jadi.

73Itu janji yang De su bilang deng sumpa sama tong pu moyang Abraham:

74Supaya tong bebas dari musu-musu,

trus bisa ikut layani Tuhan deng trada rasa takut.

75Slama tong hidup musti hidup untuk Tuhan trus mo bikin yang baik di depan Dia.

76Baru ko Yohanes sa pu anak ni, nanti orang panggil ko tu Allah Yang Paling Tinggi pu nabi.

Ko yang nanti jalan duluan supaya ko kas siap Tuhan pu jalan.#Maleakhi 3:1

77Ko juga mo kastau Tuhan pu orang yang De pili kalo De mo kas slamat dorang,

deng cara kas ampun dong dari dong pu dosa-dosa.

78Karna Allah kasian deng sayang sama kitong sampe De mo kas slamat kitong.

Itu sama sperti sinar matahari pagi yang muncul.

79De datang mo kas trang smua orang yang hidup dalam glap deng yang takut mati.#Yesaya 9:1

Trus untuk kas tunjuk tong pu langka kaki ke jalan hidup yang penu rasa damai.”

80Anak ini de tamba besar trus de pu roh tamba kuat. Trus de tinggal di tempat sepi yang kring, sampe hari de musti kas tunjuk diri sama orang Israel.

Currently Selected:

Lukas 1: MPapua

Highlight

Copy

Compare