Yudas 1

Salam

1:1-2

1Surat ini dari Yudas, yang jadi Yesus Kristus pu pesuru, Yakobus pu sodara.

Untuk kam yang dapa panggil dari Allah Bapa untuk jadi De pu orang-orang. De sayang kam skali trus jaga kam sampe Yesus Kristus datang kembali. 2Sa doa minta supaya Allah kas tunjuk kasian deng sayang, damai deng tenang yang tra habis-habis ke kam.

Allah pu hukuman untuk guru-guru palsu

1:3-16

3Sodara-sodara yang sa sayang, sa mau skali untuk mo tulis surat ke kam tentang slamat yang tong sama-sama su trima, tapi sa rasa sa harus tulis tentang yang lain untuk kas naseat kam. Begitu supaya, kam tetap pegang kuat-kuat percaya yang su dapa kasi ke Allah pu orang-orang smua, percaya ini yang tra perna bruba-bruba. 4Karna su ada orang yang masuk ke tenga-tenga kam deng diam-diam. Dong itu orang-orang yang mlawan Allah karna dong putar balik Allah pu baik yang De kas tunjuk ke dorang, dong yang kas ajar kalo dong bisa bikin apa saja ikut dong pu napsu jahat. Dong juga su tolak Yesus Kristus yang jadi pemimpin yang satu itu saja deng tong pu Tuhan. Orang-orang yang sperti itu yang su dari dulu dapa bilang kalo De nanti hukum dorang.

5Tapi, biar kam su tau smua itu deng tra ragu lagi, sa tetap mo kas ingat kam kalo Tuhan yang kas hancur orang-orang yang tra percaya dari tenga-tenga orang Israel, padahal De baru kas slamat dong dari tana Mesir.#Keluaran 12:51; Bilangan 14:29-40 6Ingat baik-baik juga, malaikat-malaikat yang su dapat kuasa dari Allah tapi dong tra jaga itu trus lari kas tinggal dong pu tempat tinggal. Dong itu Allah ikat deng rante sampe trada akir dalam tempat yang paling glap skali, untuk dapa tahan disana sampe hari Tuhan jadi hakim untuk dunia ini. 7Ingat baik-baik juga tentang kota Sodom deng Gomora deng kota-kota yang ada di dekat situ. Dong juga bikin yang jahat sperti malaikat-malaikat itu. Dong bikin barang kurang ajar yang tra pantas hanya untuk kas puas dong pu napsu saja. Dong itu su dapa bakar deng api yang tra bisa padam, itu tanda untuk kas ingat smua orang.#Kejadian 19:1-25

8Biar su begitu juga, orang-orang yang masuk di tenga-tenga kam ni dong tetap bikin deng cara yang sama. Orang-orang tukang mimpi ini juga dong bikin barang kurang ajar yang bikin kotor dong pu badan. Trus dong tra mo akui yang pegang kuasa di surga, juga dong hina malaikat-malaikat. 9Mala, Mikhael, malaikat pu pemimpin saja, de tra brani untuk hukum Iblis deng kata-kata hina waktu dong dua baku mlawan untuk sapa yang mo dapat Musa pu mayat. De cuma bilang, “Biar Tuhan yang nanti tegur ko!”#Ulangan 34:6; Daniel 10:12; Wahyu 12:7 10Tapi orang-orang itu dong hina apa yang dong tra tau. Mala dong hanya ikut dong pu napsu yang sama sperti binatang liar yang trada otak, sampe lewat dong pu klakuan yang jahat itu, dong pasti hancur. 11Dong claka skali, dong su ikut Kain pu jalan. Trus hanya untuk mo dapat uang saja dong nekat skali masuk ke Bileam pu jalan yang sesat. Jadi dong pasti hancur karna dong lawan Allah sperti Korah.#Kejadian 4:3-8; Bilangan 16:1-35; 22:1-35

12Guru-guru palsu itu sperti batu karang yang bahaya skali yang bikin rusak kam pu pesta makan sama-sama. Dong tra malu-malu deng rakus makan banyak-banyak di pesta itu, karna dong hanya pikir diri sendiri. Dong itu sperti awan yang trada air, yang bisa dapa tiup deng angin. Dong sperti pohon-pohon yang trada bua waktu musim bua, yang tacabut dari akar-akar trus mati sama skali. 13Dong hanya tau bikin barang-barang yang bikin malu saja, sperti ombak besar di laut yang hanya bawa kotoran ke pinggir pante. Dong sperti bintang-bintang yang kluar dari de pu jalan yang benar. Untuk dorang, Allah su kas siap tempat yang paling glap skali yang trada akir.

14Henokh, Adam pu turunan yang ketuju, de juga su kastau Allah pu pesan tentang dorang, de bilang, “Kam dengar, Tuhan nanti datang deng De pu malaikat-malaikat suci yang tong tra bisa hitung de pu banyak,#Kejadian 5:3-18, 21-24 15dong jadi hakim untuk smua orang. Trus De nanti hukum orang-orang yang tra ikut Dia, karna smua yang jahat yang dong su bikin, juga kata-kata hina yang dong bilang untuk mlawan Tuhan.”

16Orang-orang itu dong slalu sungut-sungut deng orang lain karna tra perna rasa puas deng dong pu hidup. Dong itu orang-orang yang hidup ikut dong pu napsu jahat. Dong pu mulut tu bicara kata-kata yang sombong trus dong suka puji-puji orang supaya bisa dapat apa yang dong mau.

Naseat-naseat untuk kas kuat kam pu percaya

1:17-23

17Tapi kam, sa pu sodara-sodara yang sa sayang, kam harus ingat baik-baik apa yang dulu tong pu Tuhan Yesus Kristus pu utusan-utusan su kastau ke kam. 18Dong su bilang begini ke kam, “Waktu su mo akir jaman tu nanti ada orang-orang yang hina-hina kam. Dong itu orang-orang yang mlawan Allah trus hidup ikut dong pu napsu jahat.”#2 Petrus 3:3 19Dong suda yang bikin kam tapisa-pisa. Dong hidup ikut dunia pu mau, karna trada Roh Allah dalam dong pu hidup.

20Tapi kam, sa pu sodara-sodara yang sa sayang, kam harus brusaha untuk sunggu-sunggu bangun kam pu hidup di atas kam pu percaya yang suci, lewat doa pake Roh Allah pu kuasa. 21Deng cara itu kam harus tinggal dalam Allah pu sayang waktu kam ada tunggu Tuhan Yesus Kristus pu kasian deng sayang, yang bikin kam bisa hidup sampe trada akir.

22Kam harus kas tunjuk kasian deng sayang sama dong yang ragu-ragu. 23Trus kas slamat dong yang lain, sperti kam tarik dong kluar dari dalam api. Kam harus kas tunjuk kasian deng sayang ke orang-orang yang tetap bikin dosa, tapi deng hati-hati. Kam harus jaga kam pu diri dari dong pu baju yang su kotor skali trus deng dong pu napsu jahat.

Salam tutup

1:24-25

24Hanya Allah saja yang pu kuasa untuk jaga kam supaya kam pu percaya tra goyang. De juga yang bisa bawa kam untuk bediri depan De yang luar biasa, deng trada sala trus deng hati yang snang skali. 25Allah yang cuma satu, De yang su kas slamat tong lewat tong pu Tuhan Yesus Kristus. Hanya Allah saja yang pantas dapa puji kas tinggi, De yang paling besar, yang paling kuat deng yang pu kuasa, dari dulu, skarang deng sampe trada akir. Amin.

Currently Selected:

Yudas 1: MPapua

Highlight

Copy

Compare