Kisah Para Rasul 18

Paulus di Kota Korintus

18:1-17

1Habis itu Paulus kas tinggal Kota Atena, baru pigi ke Kota Korintus. 2Disana de ketemu deng satu orang Yahudi, de nama Akwila de asal dari daera Pontus. De baru datang dari negri Italia deng de pu istri Priskila, karna Raja Besar Klaudius su kas printa untuk smua orang Yahudi kas tinggal Kota Roma.#18:2 Roma tu ibu kota Romawi yang ada di negri Italia. Raja Besar Klaudius usir orang-orang Yahudi dari Roma skitar taun 49 Masehi karna ada kaco skali trus ada alasan deng agama. Paulus pigi ke dong pu ruma. 3Karna dong pu kerja itu sama, de tinggal deng kerja sama-sama, dong bikin tenda untuk jual. 4Baru stiap hari ibada orang Yahudi dalam dong pu tempat ibada tu, Paulus de baku tukar pikiran deng orang Yahudi deng orang-orang bukan Yahudi supaya dong percaya Yesus.

5Waktu Silas deng Timotius datang dari Propinsi Makedonia, Paulus bisa pake de pu waktu smua untuk kastau Allah pu kata-kata#18:5 Paulus bisa pake de pu waktu smua untuk kastau Allah pu kata-kata ‒ Silas deng Timotius bawa uang yang jemaat-jemaat dong kumpul untuk Paulus, ke Propinsi Makedonia (2 Korintus 11:9; Filipi 4:14-15). Karna itu untuk sdikit waktu Paulus brenti kerja jadi tukang tenda. sama orang-orang Yahudi kalo Yesus itu Raja Yang Allah Pili. 6Tapi orang-orang Yahudi dong lawan deng hina dia, jadi Paulus de kebas debu dari de pu pakean. Baru de bilang, “Allah nanti hukum kam, itu karna kam pu sala. Sa trada sala apapa! Mulai skarang sa pigi ke orang-orang yang bukan Yahudi.” 7Trus de kluar dari situ baru pigi tinggal di Titius Yustus pu ruma yang baku sebla deng tempat ibada itu. Orang ini de bukan orang Yahudi tapi de hidup takut Allah. 8Tapi Krispus de ni kepala tempat ibada, de deng smua yang ada di de pu ruma jadi percaya sama Tuhan Yesus. Juga banyak orang Korintus yang lain dong dengar trus percaya sama Yesus deng dapa baptis.

9Satu malam Tuhan bicara sama Paulus sperti mimpi, “Jang ko takut! Kastau Brita Baik deng jang stop! 10Karna Sa ada sama-sama deng ko. Trada satu orang yang bisa bikin jahat sama ko, karna di kota ini ada banyak orang yang mo jadi Sa pu orang-orang.” 11Jadi Paulus de tinggal satu stenga taun deng kas ajar Allah pu kata-kata di tenga dorang.

12Waktu Galio jadi Gubernur Propinsi Akhaya, orang-orang Yahudi dong jadi satu lawan Paulus, trus dong bawa de pigi ke gubernur pu depan kursi sidang. 13Dong tudu dia, “Orang ini de kas pengaru orang-orang untuk semba Allah deng cara yang lawan hukum Musa!”

14Waktu Paulus de mo bicara, Galio su duluan bicara ke orang-orang Yahudi,

“Hey orang-orang Yahudi, kalo benar kam tudu de bikin jahat, su harus sa trima kam pu masala ini. 15Tapi karna masala itu tentang kata-kata, nama-nama deng kam pu hukum agama, jadi kam yang harus kas slesai itu. Sa tra mo jadi hakim deng masala begitu.”

16Trus Galio usir dong kluar dari ruang sidang. 17Trus dong smua pigi serbu Sostenes, de kepala tempat ibada disitu baru dong pukul de depan ruang sidang. Tapi Galio sama skali tra mo tau deng itu.

Paulus kembali ke Kota Antiokhia

18:18-23

18Stela Paulus tinggal cukup lama di Kota Korintus, de minta ijin untuk pigi sama sodara-sodara yang sama-sama percaya yang ada disitu. Di plabuhan Kengkrea de potong rambut, karna de su bikin janji sama Allah. Habis itu Paulus naik kapal pigi ke daera Siria. Akwila deng Priskila brangkat sama-sama deng dia.

19Dong sampe di Kota Efesus, Paulus de kas tinggal Akwila deng Priskila disitu. Trus de pigi masuk tempat ibada, trus baku tukar pikiran deng orang-orang Yahudi disitu. 20Dong minta de tinggal disitu sdikit lama, tapi de tra bisa. 21De mo pigi deng bilang, “Kalo Allah kas ijin saya, nanti sa kembali kesini.” Habis itu de naik kapal pigi dari Kota Efesus. 22Stela sampe di plabuhan di Kaisarea, de turun disitu, trus pigi ke Yerusalem untuk kasi salam ke orang-orang percaya disitu baru de lanjut pigi ke Kota Antiokhia. 23Stela tinggal cukup lama di Kota Antiokhia, Paulus pigi lagi ke Propinsi Galatia deng Frigia untuk kas kuat smua orang yang ikut Yesus pu ajaran.

Apolos di Kota Efesus deng Korintus

18:24-28

24Waktu itu ada orang Yahudi satu datang ke Kota Efesus, de pu nama Apolos, de asal dari Kota Aleksandria. De orang yang pintar bicara deng mngerti skali isi Kitab Suci. 25De su blajar deng knal Yesus pu ajaran, jadi deng smangat skali de bicara trus kas ajar deng benar tentang Yesus, tapi de hanya tau baptis yang Yohanes buat. 26Deng brani Apolos kas ajar di orang Yahudi pu tempat ibada. Tapi stela Akwila deng Priskila dengar de kas ajar, dong bawa de ke dong pu ruma. Baru dong kas jlas deng lebi pas sama de ajaran tentang Allah.

27Karna Apolos de mo pigi ke Propinsi Akhaya, sodara-sodara yang percaya di Kota Efesus kas smangat dia deng tulis surat kesana, supaya orang yang ikut Yesus pu ajaran bisa trima dia. Waktu de sampe di Propinsi Akhaya, de tolong skali orang-orang yang percaya karna Allah kas tunjuk De pu baik. 28Karna tra takut-takut de baku banta deng orang-orang Yahudi di depan umum deng kas bukti dari Kitab Suci kalo Yesus itu Raja Yang Allah Pili.

Currently Selected:

Kisah Para Rasul 18: MPapua

Highlight

Copy

Compare