Proverbios 29
29
1Consejayaptin mana chaskikuq runam kikillan ushakanqa.
2Alli ruraq runa autoridä kaptinmi kushikuyan.
Peru mana alli ruraq autoridä kaptinmi llakikuyan.
3Tsurin tantiyakuq kaptinmi taytan kushikun.
Prostitütakunawan kakurmi qellayninta ushar waktsayan.
4Nacionpa mandakuqnin rey alli mandakuptinmi llapanpis tranquïlu kawakuyan.
Peru imaykallapitapis impuestuta cobraptinmi sïqa jankat waktsayäyan.
5Amïgun mana allita ruraptin aläbar mana corrigirmi jutsa rurayman jitarpun.
6Mana alli ruraq runam jutsanpita sufrinqa.
Peru alli ruraq runam sïqa imaypis kushishqa cantar kawakun.
7Alli ruraq runam waktsakunapa favornin shärir respitatsin.
Peru mana alli runam sïqa allqutsäkuyaptinpis respitatsintsu.
8Wajukuq runam pïmaywan ofendinakun.
Peru yachayyuq runam sïqa rabyashqatapis chawätsin.
9Yachayyuq runam mana yachayyuq runawan piñanakur arreglayta puëdinqatsu.
Piñapaptin y alli shimillanpa parlapaptinpis manam chaskikunqatsu.
10Wañutsikuq runam jutsannaqkunata alläpa chikin.
Peru alli runam sïqa runa majinta llakipan.
11Mana yachayyuq runam rabyayninwan imaykatapis llutalla ruran.
Peru yachayyuq runam sïqa tantiyakur pacienciakun.
12Llullakuqkunata chaskiq autoridämi llapan yanapaqninkunatapis mana alliman chätsinqa.
13Sufriqpis sufritsikuqpis Dios Yayapitam kawayta chaskiyan.#Prov. 22.2; Mat. 5.45.
14Waktsakunata llakipaq reytam pipis mandakuq kanqanpita jipinqatsu.
15Wamrapis astar corrigishqaraqmi yachayyuq kayta yachakun.
Mana corrigishqa wamraqa mamantam penqakuyman churan.
16Diosta mana cäsuqkuna maytsikaq kayaptinmi jutsa ruraypis maytsika.
Peru tsay runakunata päsanqantam alli ruraq runakuna rikäyanqa.
17Tsurikita corrigirqa tranquïlum kawakunki.
Alli kawakuptinmi kushikunki.
18Diospa willakuyninta mana cäsurmi runakuna mana alli kawayan.
Peru Dios Yayapa leyninkunata cäsurmi sïqa kushishqa kawakuyan.
19Servikuq runa mana allita ruraptinqa mana llakipar corriginki.
Alli shimillaykipa tantiyatsiptikim cäsushunkitsu.
20Imaykatapis llutalla parlaq runapitam mana tantiyakuq runallapis confiakuypaq.#Prov. 26.12.
21Serviqnikita wamra kanqanpita mana corrigirmi waray warantin pësakunki.
22Imallapitapis rabyaq runam pïmaywanpis piñanakun.
Wajukuq runaqa imayka jutsamanmi ishkin.
23Allish tukuq runataqa pïmaymi penqakatsin.
Peru qollmi shonqu runatam sïqa pïmaypis respitar aläbanqa.#Mat. 23.12; Luc. 14.11; 18.14.
24Suwapa compinchin runaqa mayjina juratsir declaratsiptinpis manam willakuntsu.
Musyaykar mana willakunqanpitam castigashqa kanqa.
25Mantsallïshu runam mana alliman chan.
Peru Dios Yayaman confiakuq runam sïqa tranquïlu kawakuyan.
26Pïmaymi mandaqnin yanapananta munan.
Peru tsaynö kaptinpis Dios Yayaraqmi alli justiciataqa ruran.
27Diosta cäsuqkunaqa jutsa ruraqkunata manam chaskiyantsu.
Jutsa ruraqkunanam alli ruraqkunata rabyapar chikiyan.
Currently Selected:
Proverbios 29: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
