Proverbios 27
27
1<<Kaytam waktam waray rurashaq>> nir ama aläbakuytsu.
Manam musyankitsu waray junaq ima päsashunaykipaq kanqantapis.#Stg. 4.13-16.
2Kikiki aläbakunqayki manam allitsu.
Mas allim kanman juk aläbashunqayki.
3Rumipis arenïllapis alläpam lasan.
Peru tsaypitapis mas peormi mana tantiyakuq runa rabyanqan.
4Rabyaq runaqa manam ni pitapis llakipantsu.
Rabyayninwanmi imaykantapis ushakätsin.
Peru envidiösu runam sïqa rabyaq runapitapis mas peorraq.
5Wakin runaqa amïguyki kaykarpis mana allikunata ruraptiki manam ni ima nishunkitsu.
Peru wakin runam sïqa alli kawakunaykipaq consejashunki.
6Jaqayänayki kaptinpis amïguyki corrigishunqaykim mas alli.
Peru chikishuqniki runaqa mana allita ruraptikipis aläbashunkim.
7Pacha junta mikushqa runam abëjapa mishkintapis munannatsu.
Peru mallaqashqa runam sïqa ayaq mikuykunatapis mishki mishki mikun.
8Qeshunta dëjaskir aywakuq pishqunömi purikuq runapis yurinqan markanta dëjaskin.
9Mushkuq perfümi shonquta kushitsinqannömi alli amïgupa yätsikuyninpis kushitsikun.
10Ima problëmayki kaptinpis karuchö kaykaq wawqikiman aywanqaykipa rantin amïguykiman o taytaykipa amïgunman aywar willanki.
Mas allim kanman karuchö kaq aylluykipita cercaykichö vecïnuyki yanapashuptiki.
11Hïju, yachayyuq kaptikim kushishqa kawakushaq.
Tsaynöpam manakaqman churamaqkunapis upällayanqa.
12Tantiyakuq runam ima peligrupitapis witikun.
Peru mana tantiyakuq runam sïqa peligru kanqanta rikaykarpis mëtikun.
Tsaynöpam imayka desgraciapis päsan.#Prov. 22.3.
13Juklä runapa garantian yaykuq runata llatapantapis prenda qechuy.
Dëbikunqanta pägakunqanyaq tsay prendata katsinki.#Prov. 6.1-5; 20.16.
14Tsaka tsakallana büllata rurar amïgunta saludarmi runa majinta ashaqnö kaykan.
15Tamya tiempuchö shutuq wajinömi imaykallapitapis rabyaykachaq warmiqa.#Prov. 19.13.
16Tsaynö warmitam wayrata tsapayta mana puëdiqnö y aceitita maki paltaykichö katsiyta mana puëdiqnö upällatsiytapis puëdinkitsu.
17Lïmawan fiërruta afilanqannömi yachayyuq runapis runa majinta tantiyatsin.
18Hïgusta cuidaq runam wayuyninta mikur kushikun.
Patronnin mandanqanta cäsuq runapis alli rikashqa karmi kushikun.
19Yakuchö qaqllanta rikäkuqnömi juk runatapis qaqllanllachö reqintsik imanö kanqanta.
20Wañuywan sepultürapis manam contentakuyantsu maytsikaq wañuqkunata pampayaptinpis.
Tsaynöllam ayrajashqa runapis imaykata qorirpis contentakuntsu.
21Qorita y yuraq qellaytapis ninawan tsullutsirraqmi alli kanqanta musyantsik.
Runatapis alli kanqanpita aläbayaptinmi alli kanqanta musyantsik.#Prov. 17.3.
22Mana tantiyakuq runam trïguta wiruqnö mayjina wiruptinpis mana tantiyakuq kayninta dëjanqatsu.
23Üshaykikunata shumaq mitsiy.
Cabraykikunatapis shumaq rikay.
24Rïcu kay y rey kaypis päsaqlla kanqannömi üshaykikunapis ushakanqa.
25Qewa tseqllimur jirkakunata verdiyätsiptin
y qewakunqayki qewata qaraptikim
26üshaykikunapis atska millwayuq kayanqa llatapayki ruranaykipaq.
Tsaynöllam cabraykikunapis mirayanqa rantikuskir chakrata rantinaykipaq.
27Wajikichö kaqkuna y servishuqnikikunapis lichita upuyänanpaq cabraykikunapis maytsikam kanqa.
Currently Selected:
Proverbios 27: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
