Proverbios 25
25
Salomón yachatsikunqan wakin kaq proverbiukuna
1Kay qellqanqankunapis rey Salomón parlanqan proverbiukunam. Kay proverbiukunata qoriskirmi Judá nacionchö rey Ezequíaspa yanapaqninkuna qellqayarqan.
2Runa mana tantiyanqantam Dios Yaya musyan.
Wakin runakuna mana tantiyaptinpis reymi averwar rasun kaqta tantiyan.
3Ciëlupa altun mayyaq kanqanta,
patsapa rurin mayyaq kanqanta
y rey imata yarpanqantapis manam ni pï musyantsu.
4Yuraq qellayta tsulluskatsir taqranta jipiskirmi tsay qellaypita kuyakuypaq cöpata rurayan.
5Tsaynöllam mana alli ruraq runata qarquskirqa rey tranquïluna mandakun.
6Reypa puntanchö ama yachaq tukuytsu.
Mayor runakuna jamakuyänanmanqa ama jamakuytsu.
7Tsaypa rantinqa jamayanqan kaqman qayashuptikiraq jamakunki.
Mayor runakuna rikaykaptin qarquyäshuptikim alläpa penqakunki.#Luc. 14.8-10.
8Imatapis manaraq allipa musyarqa ama autoridäkunata willaq aywaytsu.
Jina höra willaskiptikiqa qepaykita shamuq runa juknö willaptin manam ni imanakaytapis puëdinkitsu.
9Contraykiwan piñanakuskir cuidädutaq pipis confiakushunqaykita parlankiman.
10Willaptikiqa penqakuymanmi churashunki.
Tsaynöpam mana alli quëdanki.
11Allipa musyar tiempullanchö consejanqaykim imayka yuraq qellaywan adornashqa qori manzänanö.
12Yachayyuq runapaqmi yachaq runa yätsinqan qoripita rurashqa sortïjanö y qoripita rurashqa wallqanö.
13Alläpa achaychö alaq yakuta upyar yakunashqa runa kushikunqannömi mandakunqan runa confiakuypaq kaptin mandaqninpis kushikun.
14Tsaki usya pukutayta wayra puritsiqnöllam imatapis qarananpaq änikuskir mana cumpliq runaqa.
15Pacienciakuq runam rabyashqatapis chawätsin.
Alli yachayninwan tantiyatsikuq runam contrantapis yarpachakatsin.
16Abëjapa mishkinta tarirpis ama alläpa mikunkitsu.
Alläpa mikuptikim lanzatsishunki.
17Amïguyki kaptinpis ama yapay yapay wajinman aywankitsu.
Alläpa aywaptikim ajayäshunki.
18Imayka mäzunö, cutsillunö y flëchanömi amïgunpa contran parlaq runa.
19Llakikuychö kanqayki höra traicionëru runaman ama confiakuytsu.
Payman confiakurmi chakiki pakishqanö y kiruyki nanaykaptin mikuqnö kanki.
20Llakishqa kaykaqta ama cantapaytsu.
Cantaparmi herïdaman kachita wiñaqnö y alalaychö llatapanta llushtitsiqnö kanki.
21Chikishuqniki mallaqaptin mikuynin qaraykuy.
Yakunaptinpis yakun makyaykuy.
22Tsaynö ruranqaykipitam Dios Yaya pägashunki.
Peru chikishuqniki runam sïqa alläpa penqakunqa.#Rom. 12.20.
23Norti kaqläpita wayrämuptinmi imaypis tamyan.
Tsaynöllam runa majinpa contran parlaptin pïmaypis rabyakun.
24Mas allim kanman piñaykachaq warmiwan alli wajichö täkunqanpa rantin tsukllallachöpis tranquïlu täkunqan.#Prov. 21.9, 19.
25Alläpa yakunaq runapaq yaku kushikuypaq kanqannömi karu markapita apamunqan alli willakuypis kushikuypaq.
26Chuya yakuman putka yaku tallukanqannömi jutsannaq runapis jutsa ruraq runakunawan tallukanqan.
27Alläpa mishkita mikuptiki däñashunqaykinömi runakuna alläpa aläbayäshunqaykipis mana alli.
28Murällannaq marka peligruchö kanqannömi caracterninta mana controlakuy yachaq runapis peligruchö kaykan.
Currently Selected:
Proverbios 25: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
