Proverbios 17
17
1Allillata mikurnin chikinakur kawanqanpa rantin mas allim kanman yakuta upurllapis kuyanakur kawakunqan.
2Tantiyakuq serviqnintam patronnin churan mana cäsukuq tsurinta cuidananpaq.
Tsay serviqninmi patronninpa tsurinkunawan herenciata rakipunakuyanqa.
3Rasunpa qori y qellay kanqanta musyananpaqmi ninachöraq tsullutsin.
Tsaynöllam runapa yarpaynin alli o mana alli kanqanta musyananpaq Dios Yaya pruëbaman churan.#Prov. 27.21.
4Mana alli runaqa mana alli majin yätsinqantam cäsun.
Llullakuq runapis llulla majin ninqantam wiyan.
5Waktsakunata manakaqman churarmi kamakuq Dios Yayata manakaqman churan.
Runa majinta desgracia päsaptin kushiparmi castigashqa kanqa.
6Willkankunam corönanö awilunkunapaq kayan.
Mamankuna y taytankuna kawayaptinmi wamrankunapis kushishqa kawakuyan.
7Mana tantiyakuq yachayyuq tukur parlaptin penqakuypaq kanqannömi autoridä llullakunqan penqakuypaq kaykan.
8Qarayta apapuqkunam pïmaytapis änitsiyan.
Llapan imayka yarpäyanqantam tariyan.
9Perdonakuq karmi atska amïguyuq kayan.
Rincorta apar mana perdonarmi amïgunpitapis rakikan.
10Tantiyakuqqa plëtuyaptillanmi wiyakun.
Peru mana tantiyakuqmi sïqa atska kuti astaptinpis cäsukuntsu.
11Mana alli runam pïmaywanpis maqanakuyllachö kaykan.
Peru paypita mas kallpasapa karmi sïqa kikintapis maqan.
12Mana tantiyakuq rabyashqa runaqa wawan oqrashqa ösupitapis masmi mantsaypaq.
13Yanapaykaptin mana alliwan kutitsiptinmi ayllunkunachö desgraciakunalla kanqa.
14Maqanakatsiq runam juchu aywaqnö.
Maqanakunqanpa rantin mas allim kanman witikuptin.
15Jutsayuqta castiganqanpa rantin culpannaqta castigaptinmi Dios Yaya alläpa rabyan.#Éxo. 23.7.
16¿Imapaqraq välin mana tantiyakuq runa atska qellayyuq kanqan?
Atska qellayyuq karpis yachayta manam rantiyta puëdintsu.
17Alli amïguqa manam ni imaypis amïgunta dëjantsu.
Imayka ñakaychö kaptinpis wawqintanömi yanapan.
18Mana tantiyakuq runam pipapis garantian yaykun.
Garantianqan runa mana pägakuptinmi kikin pägakunqa.
19Runa majinta ofendiq runaqa piñanakuyllatam ashin.
Shimisapa runam shimin shimin laqyaytukun.
20Mana allikunata rurananpaq yarpaq runam imaypis alli kawayta tarinqatsu.
Llullakuq runatam imaypis desgraciakuna päsan.
21Tsurin mana tantiyakuq kaptinmi taytan llakikun.
Mana alli ruraq kaptinmi rabyakun.
22Kushishqa kawakuq runam sänu kawakun.
Peru llakishqa kawaq runam sïqa imaypis qeshyapäkurlla kawakun.#Prov. 18.14.
23Mana alli runam pakayllapa qarayta chaskipakun.
Chaskipakuskirmi jutsayuq kaqpa favornin shärin.#Éxo. 23.8; Deut. 16.19.
24Tantiyakuq runam yachayyuq kananpaq imaypis yarpachakun.
Peru mana tantiyakuq runam sïqa ni imapaqpis yarpachakuntsu.
25Mana tantiyakuq wamraqa taytantam rabyatsin y mamantanam llakikatsin.
26Manam allitsu jutsannaq runata castiganqan.
Tsaynöllam allitsu respitashqa runata astanqan.
27Tantiyakuq runaqa manam alläpa parlakuntsu.
Yachayyuq runam ima kaptinpis pacienciakun.
28Mana yachayyuq runapis upälla kakur pacienciakuptinmi yachayyuq kanqanta yarpäyan.
Currently Selected:
Proverbios 17: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
