Abdías 1
1
Edomita runakunata Dios Yaya castigananpaq ninqan
1Kaychömi Edom nación runakunapaq profëta Abdíasta Dios Yaya revelanqan qellqashqa kaykan.
Dios Yayam nacionkunaman juk willakuqta kacharqan.
Tsay willakuqmi nin:
<<¡Aku aywashun edomita runakunata atacanapaq!>>#Isa. 34.5-17; 63.1-6; Jer. 49.7-22; Eze. 25.12-14; 35.1-15; Amós 1.11-12; Mal. 1.2-5.
2Edomita runakunatam Dios Yaya nin:
<<Wakin nacionkunapita mas wallkalla kayänaykipaqmi castigayäshayki.
Tsaynöpam alläpa penqakuyman churayäshayki.
3Qamkunaqa qaqakunata uchkur wajikikuna rurashqa karmi allish tukuykäyanki.
Altu qaqakunachö täkurmi pipis mana venciyäshunaykipaq kanqanta yarpäyanki.
Tsayman confiakurmi kikillaykikuna engañakuykäyanki.
4Peru imayka pitsaknö altupa päriptiki y qoyllurkuna kaqchö qeshuyki ruraptikipis jitarpamushaykim>>.
Dios Yayam tsaynö nin.
5<<Paqaspa suwa yaykurpis ¿manaku puëdinqan kaqllata apan?
Üva pallaqkuna ¿manaku juk ishkay sarta üvakunata yuranchö dëjayan?
Peru noqam sïqa chipyat ushakätsiyäshayki.
6Edomita runakuna, llapan imaykaykikunatam qechuyäshunki.
Mas allin kaqta pakäyaptikipis ashiykur ashiykurmi apayanqa.
7Llapan yanapashuqnikikunapis contrayki tikrarmi engañayäshunki.
Venciyäshurnikim nacionnikikunapitapis qarquyäshunki.
Amïguykikunapis contraykim tikrayanqa.
Tsaymi paykunaman confiakuykaptiki yachayllapa desgraciaman qarpuyäshunki.
Edomita runakuna, ¡maytan alli yachayyuq kayanqayki!>>
8 Dios Yayam edomita runakunata mastapis nin:
<<Qamkunata castigayanqaq junaqmi llapan alli yachayyuq y musyaq runakunata ushakätsishaq.
Täkuyanqayki qaqakunachö manam ni jukllayllapis alli yachayyuq musyaq runakuna quëdayanqatsu.
9Temánchö täkuq valienti runakunapis mantsakaywan tsuktsukyäyanqaraqmi.
Täkuyanqayki kaqchö jankatmi wañutsishqa kayanqa.
Edomita runakunapa jutsan ima kanqan
10<<Qamkunaqa castaykikuna kaykäyaptinmi Israel runakunata sufritsirnin wañutsiyashkanki.
Tsaynö wañutsiyanqaykipitam kikikikunapis penqakuypaq jankat ushakäyanki.#Joel 3.19.
11Karupita shamuq contran soldädukuna imaykakunata apayaptin y Jerusalénpa punkunkunata pakiyaptinpis qamkunam tsay soldädukunata yanapayarqayki.
Qechuyanqankunata rakipunakuyänanpaq sortiyayaptin tsay runakunanömi qamkunapis imaykankunata apayarqayki.
12¡Imanirtan kushipäyarqayki castaykikunata desgracia päsaptin!
¡Imanirtan kushipäyarqayki Judá nación raqällana quëdaptin!
¡Imanirtan asipäyarqayki llakipaypaqta rikaykar!#Sal. 137.7; Lam. 4.21.
13¡Imanirtan desgracia päsaykaptin akranqä markaman yaykuyarqayki!
¡Imanirtan makillan tsoqpashqa waqaykäyaqta rikaykar kushipäyarqayki!
¡Imanirtan contrankuna venciyaptin imaykankunatapis suwayänaykipaq yaykuyarqayki!
14¡Imanirtan qeshpir aywakuqkunata cruzaq nänikunachö shuyaykur wañutsiyarqayki!
¡Imanirtan ayqikuqkunata achkuskir contrankunapa makinman entregayarqayki!
Dios Yaya juzganan junaq kanqan
15<<Llapan nación runakunata juzganäpaq junaq ichikllanam faltaykan.
Tsay junaqmi runakunata sufritsiyanqaykinölla qamkunatapis sufritsiyäshayki.
16 Sagrädu lömächö kuyanqä runakunata sufritsiyanqaykinömi qamkunata y llapan nación runakunatapis sufritsiyäshayki.
Castigaptïmi jankat ushakäyanqa.
17Kawaykar quëdaqkunam sïqa Sión lömakunaman tsinkakuyanqa.
Tsay löma sagrädu kaptinmi Jacobpita miraq runakuna salvakurnin herenciankunata qorikuyanqa.
18Tsay witsaymi Jacobpita y Josépita miraq runakuna imayka lunyaq ninanö kayanqa.
Esaúpita miraqkunanam#1.18 Esaúpita miraqkunaqa edomita runakunam kayan. imayka tsakishqa oqshanö kayanqa.
Edomita runakunata jankat ushakätsiyaptinmi ni jukllayllapis kawaykar quëdayanqatsu.
Noqa Dios Yayam nï>>.
Israel runakunata Dios Yaya yanapananpaq ninqan
19Tsaypitanam Neguevchö täkuq Israel runakuna Edom partita qechuyanqa.
Sefelachö täkuq Israel runakunam filisteo runakuna täkuyanqan partita qechuyanqa.
Wakin kaq Israel runakunam Efraín partita y Samaria partita qoriyanqa.
Benjamín trïbu Israel runakunam Galaad partita qoriyanqa.
20Juklä nacionpita maytsikaq Israel runakuna kutimurmi cananeo runakuna täkuyanqan partita Sarepta markayaq qoriyanqa.
Jerusalénpita Sefarad markaman prësu apayanqan runakuna kutimurmi Neguevchö markakunata qoriyanqa.
21Llapanta venciskirmi Sión lömaman witsäyanqa Esaúpita miraqkunata juzgayänanpaq.
Dios Yayapa poderninchömi llapanpis kanqa.
Currently Selected:
Abdías 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
