Mateo 2
2
Qoyllur estudiaqkuna Jesústa adoraq chäyanqan
1Rey Herodes mandakunqan witsaymi Judea provincia Belén markachö Jesús yurirqan. Yuriskiptinmi qoyllur estudiaqkuna rupay yarqamunan kaqläpita Jerusalénman chaykur 2tapukuyarqan: <<¿Maychötan Israel runakunapa mandakuqnin rey kananpaq llullu yurishqa kaykan? Qoyllurnin yurimuqta rikarmi adoraqnin shayämushkä>>.
3Tsayta wiyaykurmi rey Herodes y Jerusalénchö täkuq runakunapis alläpa yarpachakuyarqan. 4Tsaymi mandakuq sacerdötikunata y ley yachatsikuqkunata qayaskatsir Herodes tapurqan: <<Salvamaqnintsik Cristo ¿maychö yurinanpaqtan kaykan?>>
5Paykunanam niyarqan: <<Taytay, Judea provincia Belén markachömi. Tsaychö yurinanpaqmi Dios Yayapa profëtan qellqarqan:
6<< <Belén marka, Judáchö wakin markakunapita mas takshalla kaptikipis
qamchömi Israel runakunapa mandakuqnin rey yurinqa.#Miq. 5.2.
Paymi Israel runakunata üsha mitsikuqnö cuidanqa> >>.
7Tsayta wiyaykurmi qoyllur estudiaqkunata pakayllapa Herodes qayatsirqan. Chaykuyaptinnam tsay qoyllurta imaypitana rikäyanqanta tapurqan. 8Willayaptinnam Herodes nirqan: <<Belénman aywar tsay wamrata ashiyämuy. Tariskirqa willayämanki noqapis adoraq aywanäpaq>>.
9Belénman aywayaptinmi tsay rikäyanqan qoyllurpis puntankunata aywarqan. Wamra kaykanqan waji jananman chaykurmi qoyllur ichiskirqan. 10Tsayta rikarmi alläpa kushikuyarqan. 11Wajiman yaykuskirnam wamratawan maman Maríata tariyarqan. Tsaymi wamrapa puntanman qonqurikuykur adorayarqan. Tsaypitanam apayanqan qorita, inciensiuta y mïrrata qarayarqan.
12Herodes kaqman mana kutiyänanpaq sueñuyninkunachö Dios Yaya revelaptinmi juklä nänipana markankunaman kutikuyarqan.
Egiptuman Jesústa José qeshpitsir apanqan
13Qoyllur estudiaqkuna aywaskiyaptinnam Joséta sueñuyninchö Dios Yayapa angelnin nirqan: <<Herodesmi wamrata wañutsinanpaq ashitsinqa. Jina höra sharkur wamrata mamantinta Egiptuman qeshpitsiy. Tsaychömi yapay willanqaqyaq täkuyanki>>.
14Tsaymi jina höra rikcharkurnin patsapis manaraq waraptin wamrata mamantinta aparkur Egiptuman aywayarqan. 15Tsaychömi Herodes wañunqanyaq täkuyarqan. Tsaynöpam Dios Yayapa profëtan qellqanqanta cumpliyarqan. Tsay profëtam nirqan: <<Tsurï kaptinmi Egiptupita qayamurqä>>.#Ose. 11.1.
Belénchö wamrakunata wañutsiyanqan
16Qoyllur estudiaqkuna mana kutiyaptinmi rey Herodes alläpa rabyarqan. Tsaymi soldädunkunata kacharqan Belén markachö y cercan estanciakunachöpis ollqu wamrakunata wañutsiyänanpaq. Qoyllurta imay rikäyanqanta willayanqanpita calculaskirmi wamrakunata wañutsiyarqan tsayraq yurishqapita ishkay watayuqyaq. 17Tsaynö wañutsirmi profëta Jeremías qellqanqanta cumpliyarqan. Tsay qellqanqanchömi nin:
18<<Ramá markachö llakikur waqanqanmi wiyakämun.
Tsayqa Raquel waqanqanmi.
Wawankuna wañushqa kaptinmi shoqayaptinpis mana päraypa waqaykan>>.#Jer. 31.15.
Egiptupita kutiyämunqan
19Herodes wañuskiptinnam Egiptuchö José kaykaptin Dios Yayapa angelnin sueñuyninchö 20nirqan: <<Wamrata mamantinta aparkur Israelman kutikuyay. Wamrata wañutsiyta munaqkuna wañuyashqanam>>.
21Tsaynö niptinmi wamrata mamantinta aparkur Israelman kutiyarqan. 22Kutiykarnam José musyarqan Judeachö rey Herodespa rantin tsurin Arquelauna mandakuq kaykanqanta. Tsayta musyaskirmi Judeaman kutiyta mantsakurqan. Tsaymi sueñuyninchö Dios Yaya willaptin Galileaman aywayarqan. 23Tsaynöpam Nazaret markaman täkuq aywayarqan.#Mar. 1.24; Luc. 2.39; Juan 1.45. Tsaychö täkurmi Dios Yayapa profëtankuna niyanqanta cumpliyarqan. Tsay niyanqanmi nin: <<Nazareno kanqantam runakuna niyanqa>>.
Currently Selected:
Mateo 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.