Joel 1
1
Murushqa mikuykunata chukllushkuna chipyat ushayanqan
1 Dios Yaya revelanqantam Petuelpa tsurin Joel willakur nirqan:
2Mayor runakuna, kanan niyanqaqta shumaq wiyayämay.
Judá nacionchö täkuq runakunapis, kanan willayanqaqta wiyayämay.
Kay castïgutanöqa ¿imayllapis rikäyashkankitsuraq?
Taytaykikuna kawayanqan witsay kaynö mantsaypaq castïgu ¿kashqatsuraq?
3Kay castïgu imanö kanqanta tsurikikunata willayanki.
Tsurikikunapis tsurinkunata willayanqa.
Willkaykikunapis tsurinkunata willayanqa.
4Jatusaq chukllushkuna katuyanqantapis taksha kaq chukllushkunam ushayashqa.
Taksha chukllushkunapita quëdaqtapis shiwrikunam mikuyashqa.
Tsaynömi llapan mikuyta mana dëjar ushayashqa.#Deut. 28.38; Joel 2.2-11; Amós 4.9; 7.1.
5Machashqalla kakuq runakuna, tantiyakuyay.
Machashqa kayanqaykipita kutikarkur waqayay.
Chukllushkuna üvata ushayaptinmi upyayänaykipaq vïnupis kannatsu.
6Yupaytapis mana puëdiypaq soldädukunanömi tsay chukllushkuna markantsikman juntäyämushqa.
Kirunkunapis imayka leonpa curmïllunnömi fïlu.#Apoc. 9.8.
7Llapan üvakunatam chakranpa ushayashqa.
Hïgustapis jankatmi ushayashqa.
Yurankunatawan rämankunatapis mana imannaq qerullantam dëjayashqa.
8Casarananpaqna kaykaq jöven wañuskiptin doncëlla jipash lütu llatapata shukukurkur waqanqannö ikyaypa ikyar waqayay.
9Sacerdötikunapis waqaykäyan tsaki mikuy ofrendata ni vïnutapis Dios Yayapa templunman pipis manana apaptinmi.
10Trïgupis manam kannatsu.
Üvakunapis jankatmi tsakishqa.
Olïvu jachakunapis chipyatmi ushakashqa.
Llapan chakrakunapis mana imannaqmi quëdashqa.
11Chakrachö aruqkuna, üvata cosechaqkuna, makillaykikunata tsoqparkur waqayay.
Trïguta y cebädatapis manakaqllapaqmi muruyashkanki.
12Üvakunapis jankatmi tsakishqa.
Hïguskunapis chipyatmi ushakäyashqa.
Granadïllakuna, palmërakuna, manzänakunawan llapan plantakunam jankat tsakiyashqa.
Runakunapis alläpa mantsakashqam kaykäyan.#Ose. 4.3; Amós 4.6-9.
13Dios Yayata altarchö serviq sacerdötikuna, lütu llatapata shukukurkur waqayay.
Tsaki mikuypis ni vïnupis Diosnintsikpa wajinman apayämunanpaq mananam kannatsu.
14Mayor runakunatawan llapan runakunata Diosnintsikpa wajinman qorikäyänanpaq qayatsiyay.
Dios Yayata mañakur llapayki ayunayay.
15¡Allaw noqantsik, Dios Yaya juzganan junaq chaykämunnam!
Tsay junaq chämuptin ¡allaw imanöraq runakuna ñakayanqa!
Tsay junaqmi llapanpaq poderyuq Dios Yaya maytsikaq runakunata ushakätsinqa.#Isa. 13.6; Eze. 30.2-3; Sof. 1.14-18.
16Mikuynintsik jankat ushakaptinmi alläpa muchuychö kaykantsik.
Tsaymi Diosnintsikpa templunman aywarpis kushikuntsiknatsu.
17Murunqantsik trïgupis manam jeqamushqanatsu.
Mikuy churakuna wajikunachöpis wayrallanam tumaykan.
18Qewata maychöpis mana tarirmi wäkakunapis alläpa llakipaypaq waqayan.
Üshakunawan cabrakunapis wañurmi ushakaykäyan.
19¡Dios Yaya, yanapaykayällämay!
Jallqachö qewakunatawan jachakunatapis ninam rupar ushashqa.
20Raqrakunachö yakukunapis jankatmi tsakishqa.
Desiertuchö qewakunatapis ninam rupashqa.
Tsaymi chucaru wätakunapis qamman mañakamur waqapaykäyäshunki.#Amós 7.4-5.
Currently Selected:
Joel 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
