Juan 21
21
Qanchis discïpulunkunata Jesús yuripunqan
1Tsaypitanam Tiberias#21.1 Tiberias niyanqan qochaqa Galilea qocham kaykan. qocha kuchunchö discïpulunkunata Jesús yapay yuripurqan. 2Tsaychömi kaykäyarqan Simón Pedro, Millïshu niyanqan Tomás y Natanael. Natanaelmi Galileachö Caná markapita karqan. Tsaynöllam Zebedeupa ishkan tsurinkuna y mas ishkay discïpulukunapis kaykäyarqan. 3Paykunatam Simón Pedro nirqan: <<Pescädu achkuqmi aywaykä>>.
Tsaymi niyarqan: <<Aku noqakunawanpis aywashun>>.
Tsaynö nirmi büquiman lätarkur llapan aywayarqan. Peru tsay paqasqa warat pescaykarpis manam ni jukllayllatapis achkuyarqantsu.#Luc. 5.5. 4Patsa waraykaptinnam qocha kuchunchö juk runa kaykaqta rikaskiyarqan. Peru Jesús kanqantaqa manam musyayarqantsu. 5Paymi nirqan: <<Amïgukuna, ¿pescäduta achkuyashkankiku?>>
Paykunanam niyarqan: <<Taytay, manam ni jukllayllatapis achkuyätsu>>.
6Tsaynö niyaptinmi nirqan: <<Büquipa derëcha kaq lädunman atarräyaykita jitayay. Tsaychömi pescäduta achkuyämunki>>.#Luc. 5.6.
Ninqannö atarräyata jitaykurmi sutaytapis mana puëdiyanqanyaq maytsika pescäduta achkuyarqan. 7Tsaymi Jesús kuyanqan kaq discïpulunqa Pedruta nirqan: <<¡Payqa Señornintsikmi!>>
Tsaynö niptinmi llatapanta tseqllanman watarkur Simón Pedro sas Jesús kaqman nädaypa aywarqan. 8Wakin discïpulukunanam atarräyachö maytsika pescäduta qarachashqa büquiwan aywayarqan. Qocha kuchunman chäyänanpaqqa pachak (100) metrunöllam karqan. 9Büquipita yarpuskirnam rikäyarqan tantata y shansha jananchö pescädu kankashqata.
10Jesúsnam nirqan: <<Achkuyämunqayki pescäduta juk ishkayta apayämuy>>.
11Tsaynö niptinmi Simón Pedro büquiman lätarkur atarräyata qarachämurqan pescädukunata apayänanpaq. Tsay atarräyachömi pachak pitsqa chunka kimsa (153) jatusaq pescädukuna karqan. Maytsika pescäduwanpis atarräya manam rachirqantsu. 12Jesúsnam nirqan: <<Mikuq shayämuy>>.
Señor Jesús kanqanta musyarmi mayqan discïpulunpis pï kanqanta tapupäyarqantsu. 13Paykuna kaqman witiykurnam tantatawan pescäduta Jesús qararqan.
14Tsaychö yuripunqanwanqa kawamunqanpita kimsa kutinam discïpulunkunata Jesús yuripurqan.
Simón Pedruwan Jesús parlayanqan
15Mikuyta ushaskirnam Simón Pedruta Jesús tapurqan: <<Jonáspa tsurin Pedro, wakin discïpulükunapita ¿masku kuyamanki?>>
Pedrunam nirqan: <<Taytay, musyankim kuyanqaqta>>.
Jesúsnam nirqan: <<Mallwa üshäkunata shumaq cuidanki>>.
16Jesúsnam yapay tapurqan: <<Jonáspa tsurin Simón, ¿kuyamankiku?>>
Pedrunam nirqan: <<Taytay, musyankim kuyanqaqta>>.
Niptinmi nirqan: <<Üshäkunata shumaq mitsinki>>.
17Tsaypitanam yapay tapurqan: <<Jonáspa tsurin Simón, ¿rasunpaku kuyamanki?>>
Tsaynölla kimsa kuti tapuptinmi Pedro llakishqa nirqan: <<Taytay, qammi llapanta musyanki. Musyankim kuyanqaqta>>.
Jesúsnam nirqan: <<Üshäkunata shumaq cuidanki. 18Rasun kaqtam niq: Jövinllaraq karqa llatapaykita shukukurmi munanqaykipa aywarqayki. Peru awkinyaskirmi sïqa rikraykita kicharkuptiki jukna shukutsishunki.#21.18 Jukna shukutsishunki nirqa Jesucristo manam llatapanta shukutsiyänanpaqtsu nirqan, sinöqa crucificäyänanpaqmi nirqan. Tsaynöllam aywayta mana munanqaykipa apayäshunki>>.
19Tsaynömi Pedruta Jesús tantiyatsirqan Dios Yaya munanqannö kawar imanö wañunanpaq kanqanta. Tsaypitanam Pedruta nirqan: <<Qatimay>>.
Librupa ushanan
20Tsaypitanam tikraykur Jesús kuyanqan kaq discïpuluta Pedro rikarqan. Tsay discïpulum Pascua meriendata mikuyanqanchö Jesúspa lädunchö tapurqan mayqan discïpulun contran shärinanpaq kanqanta.#Juan 13.25. 21Payta rikaykurmi Jesústa Pedro tapurqan: <<Taytay, paytaqa ¿imatan päsanqa?>>
22Jesúsnam nirqan: <<Munaptïqa kutimunqäyaqpis kawanqam. ¿Imanirtan paypaq tapumanki? Qamqa qatimay>>.
23Jesús tsaynö ninqanta musyaskirmi maytsaychöpis wawqikuna y panikuna yarpäyarqan tsay discïpulun imaypis mana wañunanpaq kanqanta. Peru tsaynö yarpäyaptinpis Jesús manam mana wañunanpaqtsu nirqan, sinöqam nirqan: <<Noqa munaptïqa kutimunqäyaqpis kawanqam. ¿Imanirtan paypaq tapumanki?>>
24Jesús kuyanqan discïpulum kay libruta qellqashqa. Llapan qellqanqankunam rasunpa kaq. 25Jesús ruranqankunaqa mas atskam kan. Llapanta qellqaptinqa entëru kay patsachö papelpis manam paqtanmantsu. [Amén.]
Currently Selected:
Juan 21: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.