Juan 18
18
Jesústa prësu achkuyanqan
Mateo 26.47-56; Marcos 14.43-50; Lucas 22.47-53
1Dios Yayata Jesús mañakuskirnam discïpulunkunawan Cedrón raqrapa wak tsimpanman päsaskir jatun huertaman yaykuyarqan.#Mat. 26.36; Mar. 14.32.
2Tsayman discïpulunkunawan Jesús imaypis aywashqa kaptinmi Jesústa rantikuq Judas tsayman aywayanqanta musyarqan. 3Tsaymi Jesústa prësu achkuyänanpaq aktsinkunawan y espädankunawan wardiakunata y atska soldädukunata pusharkur Judas aywarqan. Tsay wardiakunata y soldädukunatam mandakuq sacerdötikuna y fariseukuna kachayarqan.
4Jesúsqa tsay llapan päsananpaq kaqkunatam musyarqan. Tsaymi prësu achkuyänanpaq aywaqkunawan tinkuskir tapurqan: <<¿Pitatan ashiykäyanki?>>
5Tsaynam niyarqan: <<Nazaretpita Jesústam ashiykäyä>>.
Jesúsnam nirqan: <<Noqam Kä>>.#18.5 Noqam Kä nirmi Jesucristo tantiyatsirqan kikin Dios kanqanta. Tsaypaq masta musyanaykipaq liyinki Éxo. 3.14; Juan 10.30-33.
(Jesústa rantikuq Judaspis tsaychömi kaykarqan.)
6<<Noqam Kä>> niptinmi sikpar ankallaskiyarqan. 7Jesúsnam yapay tapurqan: <<¿Pitatan ashiyanki?>>
Paykunanam yapay niyarqan: <<Nazaretpita Jesústam>>.
8Jesúsnam nirqan: <<Niyashkaqnam: <Noqam Kä>. Noqata ashiyämarqa noqallata prësu achkuyämay. Kay runakunataqa aywakuyänanpaq dëjaykuyay>>.
9Tsaynö kananpaqmi puntata mañakur Dios Yayata nirqan: <<Podernïman churamunqayki kaqkunata manam ni mayqantapis oqrashkätsu>>.#Juan 17.12.
10Tsaymi Simón Pedro espädanta jipiskir juk runapa derëchu kaq rinrinta walluskirqan. Tsay runaqa mas mandakuq sacerdötipa serviqninmi karqan. Paypa shutinmi karqan Malco. 11Pedrutanam Jesús nirqan: <<¡Espädaykita kutitsiy! Taytä qaramanqan cöpata ¿manaku upyäman?>>#18.11 Dios Yayapa cöpanqa mana cäsuqkunata castiganqanmi. Tsaymi tsay cöpata upyananpaq Jesús nirqa Diosta mana cäsuq runakunapa rantin castigashqa kananpaq nirqan.#Sal. 75.8; Isa. 51.17, 22; Jer. 25.15-17; Eze. 23.31-34; Hab. 2.16; Apoc. 14.9-10; 16.19.
Mas mandakuq sacerdötipa wajinman Jesústa apayanqan
Mateo 26.57-58; Marcos 14.53-54; Lucas 22.54
12Tsaypitanam capitanninkunawan soldädukuna y templu täpaq wardiakunapis Jesústa prësu achkuskir watäyarqan. 13Tsaypitanam Caifáspa suegrun Anáspa wajinman apayarqan. Tsay watam Caifás mas mandakuq sacerdöti kaykarqan. 14Paymi autoridä majinkunata nishqa karqan: <<Llapantsik wañunqantsikpa rantin mas allim kanman juk runalla wañuptin>>.#Juan 11.49-50.
Jesústa Pedro nëganqan
Mateo 26.69-70; Marcos 14.66-68; Lucas 22.55-57
15Simón Pedrunam juk discïpulu majinwan Jesúspa qepanta aywayarqan. Tsay discïpulunmi mas mandakuq sacerdötiwan reqinakur ruri patiuyaq yaykurqan. 16Pedrunam punkullachö quëdarqan. Tsaymi ruriman yaykuq discïpuluqa punkuchö cuidaq warmita rugarqan Pedrutapis yaykatsinanpaq.
17Tsay warminam Pedruta tapurqan: <<¿Manaku qampis taqay runapa discïpulun kanki?>>
Pedrunam nirqan: <<Manam>>.
18Alläpa alalaptinmi servikuqkuna y templu täpaq wardiakuna ninata tsarirkatsir mashakuykäyarqan. Paykunawanmi Pedrupis mashakuykarqan.
Mas mandakuq sacerdöti Anás Jesústa tapunqan
Mateo 26.59-66; Marcos 14.55-64; Lucas 22.66-71
19Tsaypitanam mas mandakuq sacerdöti Jesústa tapur nirqan: <<¿Pitan discïpuluykikuna? ¿Imatatan yachatsinki?>>
20Jesúsnam nirqan: <<Noqaqa manam imatapis pakayllapa yachatsikushkätsu. Sinagögakunachö y templuchö llapan runakunam yachatsikunqäta wiyayämashqa. 21¿Imanirtan tapumanki? Yachatsikunqäta wiyaq runakunata tapuy. Paykunam imata yachatsikunqätapis musyayan>>.
22Tsaynö niptinmi juk wardia Jesústa laqyaskir nirqan: <<¿Tsaynöku mas mandakuq sacerdötita ninki?>>
23Jesúsnam nirqan: <<Mana allita parlashqa kaptïqa mä nimay. Imatapis llutanta mana parlaykaptï ¿imanirtan laqyamanki?>>
24Tsaypitanam watashqallata mas mandakuq sacerdöti Caifásman Anás apatsirqan.#18.24 Anás mas mandakuq sacerdöti kaykaptinmi Roma runakuna payta qarquskir mashan Caifástana churayarqan.
Jesústa Pedro yapay nëganqan
Mateo 26.71-75; Marcos 14.69-72; Lucas 22.58-62
25Simón Pedro mashakuykaptinmi yapay tapuyarqan: <<Qampis ¿manaku taqay runapa discïpulun kanki?>>
Pedrunam nirqan: <<Manam>>.
26Tsaypita unay rätullatam mas mandakuq sacerdötipa serviqnin nirqan: <<Qamtam paywan paqta kaykaqta huertachö rikashkaq>>.
(Tsaynö niq runapa ayllunpa rinrintam Pedro wallushqa karqan.)
27Pedrunam yapay nëgarqan. Tsay höram gällu cantaskirqan.
Pilatuman Jesústa apayanqan
Mateo 27.1-2, 11-14; Marcos 15.1-5; Lucas 23.1-5
28Patsa waraykaptinnam Caifáspa wajinpita Roma gobernadorpa despächunman Jesústa apayarqan. Israel autoridäkunaqa manam tsay despächuman yaykuyta munayarqantsu. Paykunam yarpäyarqan tsayman yaykurqa impüru kar Pascua mikuykunata mana mikuyänanpaq kanqanta. 29Tsaymi despächunpita yarquskir Pilato tapurqan: <<¿Ima jutsanpitatan kay runata apayämushkanki?>>
30Tsaymi niyarqan: <<Jutsayuq kaptinmi apayämushkä. Jutsannaq kaptinqa manam apayämümantsu karqan>>.
31Pilatunam nirqan: <<Leynikikuna ninqannö juzgayänaykipaq apayay>>.
Tsaynö niptinmi Israel runakunapa autoridäninkuna niyarqan: <<Noqakunaqa pitapis wañutsiyänäpaq manam poderyuqtsu kayä>>.
32Tsaynö nirmi cruzchö wañunanpaq Jesús ninqanta cumpliyarqan.#Juan 3.14; 12.32.
33Despächunman Pilato kutiskirmi Jesústa qayaskir tapurqan: <<¿Rasunpaku Israel runakunapa mandakuqnin rey kanki?>>
34Jesúsnam nirqan: <<¿Kikikipa yarpayllaykipitaku o runakuna niyäshuptikiku tsaynö tapumanki?>>
35Pilatunam nirqan: <<Tsaykunata musyanäpaq noqa manam Israel runatsu kä. Marka majikikunawan mandakuq sacerdötikunam prësu apayämushushkanki. Prësu apayämushunaykipaq ¿imatatan rurashkanki?>>
36Jesúsnam nirqan: <<Noqa manam kay patsachö mandakuqtsu kä. Kay patsachö mandakuq kaptïqa prësu achkuyämaptin discïpulükunam pelyayanman karqan>>.
37Pilatunam tapurqan: <<Tsaypunqa ¿rasunpaku rey kanki?>>
Jesúsnam nirqan: <<Rasun kaqtam nikanki. Rasun kaqta willakunäpaqmi kay patsachö yurishkä y tsaypaqmi kay patsaman shamushkä. Pipis rasun kaqta musyayta munarqa willakunqäkunatam creyin>>.
38Tsaynö niptinmi Pilato nirqan: <<¡Imaraq tsay rasun kaqqa!>>
Jesústa crucificäyänanpaq Pilato mandanqan
Mateo 27.15-31; Marcos 15.6-20; Lucas 23.13-25
Jesústa tapuskirmi despächunpita Pilato yapay yarquskir Israel runakunata nirqan: <<Noqa manam kay runapa ima jutsantapis tarïtsu. 39Peru qamkunam musyayanki Pascua fiestachö wata wata juk prësuta qarqunqäta. ¿Munayankiku Israel runakunapa mandakuqnin reyta qarqunäta?>>
40Tsaynö niptinmi llapan niyarqan: <<¡Jesústaqa ama qarquytsu! ¡Barrabásta qarquy!>>
Barrabásqa Romachö mas mandakuq reypa contran shäriqmi karqan.
Currently Selected:
Juan 18: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.