Isaías 51
51
Jerusalén runakunata animatsinqan
1 Dios Yayam nin:
<<Allita rurar kawayta munaqkuna, wiyayämay.
Llapan shonquykikunawan mañakamaqkuna, wiyayämay.
Mayqan qaqapita jipiyämunqaqta tantiyakuyay.
Maylächö rumipita yarqayämunqaykita tantiyakuyay.#51.1 Kay textuchömi unay castan Abrahamta y Sarata qaqaman y rumikunaman iwalatsirqan. Tsaymi kay textu nirqan Israel runakunapa unay castan Abrahamta y Sarata yanapanqannö kananpis Israel runakunata Dios Yaya yanapananpaq kanqanta.
2Unay castaykikuna Abrahampaq y Sarapaq yarpäyay.
Qayanqä höram paykuna wamrannaqllaraq kayarqan.
Bendicionnïta churaptïmi paypita miraqkuna atskaman mirayashqa.#Gén. 12.1-3.
3Tsaynöllam raqällana kaykaq Siónman bendicionnïta yapay churashaq.
Desiertunö kaptinpis Edén huertanö kananpaqmi permïtishaq.
Tsaymi Siónchö alläpa kushikur alabayämanqa.#Gén. 2.8; Eze. 36.35.
4<<Kuyanqä runakuna, shumaq wiyayämay.
Israel runakuna, shumaq tantiyakuyay.
Maytsaychömi leynïkunata willakuyanqa.
Entëru markakunachö yachatsikuynïta chaskirmi aktsichönöna kawakuyanqa.
5Kuyanqä runakunata salvanäpaq ichikllanam pishin.
Llapan nación runakunatam jutsa rurayanqanman juzgashaq.
Karu nacionchö täkuq runakunapis noqallamanna creyikurmi shuyaräyämanqa.
6Ciëluta rikar tantiyakuyay.
Kay patsata rikar tantiyayay.
Rikäyanqayki ciëlum qoshninölla illakanqa.
Kay patsapis llatapa ushakaqnömi ushakanqa.
Tsaynöllam runakunapis chuspinölla ushakäyanqa.
Peru salvacionnïmi sïqa imaypis ushakanqatsu.
Munanqämi imaypis cumplinqa.#Sal. 102.25-28; Mat. 24.35.
7<<Yachatsinqäkuna imanö kanqanta musyaqkuna, wiyayämay.
Leynïkunata chaskiqkuna, wiyayämay.
Runa majikikuna ashayäshuptikipis ama llakikuyaytsu.
Imaykata niyäshuptikipis ama jaqayäyaytsu.
8Llatapata y millwata puyu ushanqannömi tsay runakunatapis kuru ushanqa.
Peru salvacionnïmi sïqa imaypis ushakanqatsu.
Munanqämi imaypis cumplinqa>>.
9¡Dios Yaya, rikchayna!
Alläpa poderösu kanqaykita musyatsikuy.
Unay tiempu ruranqaykinö kananpis ruray.
¿Manaku jatunkaray mantsaypaq Rahab wätatapis ushakätsirqayki?#Job 9.13; 26.12.
10¿Manaku lamar yakutapis tsakitsirqayki?
¿Manaku salvanqayki runakuna päsayämunanpaq näniman tikratsirqayki?#Éxo. 14.21-22.
11Tsaynöllam kananpis salvayämunqayki runakuna cantaraykar Siónman kutiyämunqa.
Tsaychömi imaypis kushishqalla kawakuyanqa.
Llakikuypis ni waqaypis manam kanqanatsu.#Isa. 35.10.
12Dios Yayam nin:
<<Kikïmi animatsiyaq.
Qewanö ushakaqlla kaykäyaptin ¿imanirtan runakunata mantsayanki?
13Kamayaqniki Dios Yayam kä.
Noqam ciëlutapis y kay patsatapis kamashkä.
¿Tsaynö kanqäta musyaykarku qonqayämashkanki?
Chikiyäshuqniki runakuna ushakätsiyäshunaykipaq kanqanta musyaskirmi waran waran alläpa mantsakashqa kaykäyanki.
Mantsaykäyaptikipis tsay jurapuyäshuqniki runakunam ushakäyänanpaqna kaykäyan.
14Prësu apayanqantam dëjayämunqa.
Apayanqan runakuna manam carcelchötsu wañuyanqa
ni mikuyänanpaqpis faltanqatsu.
15<<Noqam Diosnikikuna kä.
Llapanta mandaq Yahwehmi shutïpis.
Lamarpis <laqchikay> niptïmi qayarar laqchikan.
16Ciëluta mashtarmi kay patsatapis shumaq patsakätsishkä.
Willakuynïta willakuyänaykipaqmi qamkunata churayashkaq.
Imayka desgraciapitapis makïwanmi tsapashkaq.
Sióntam nirqä: <Akranqä markam kanki> >>.
Jerusalén runakunata Dios Yaya manana castigananpaq ninqan
17¡Jerusalén marka,#51.17 Kay versïculukunachömi Jerusalén markata warmiman iwalatsin. Tsaymi Jerusalénpa wawankuna Jerusalénchö täkuqkuna kayan. apuray rikchay! ¡Sas shäriy!
Cöpan junta wiñaraykaq rabyayninta upyatsishurnikim Dios Yaya alläpa castigashushkanki.
Tsaymi shäriytapis manana puëdir machashqanö kaykanki.#Jer. 25.15; Apoc. 14.10; 16.19.
18Atska wawayuq kashqa kaptikipis manam jukllayllapis pusharäshunaykipaq kannatsu.
Llapan wätanqayki wawaykikunapita makipita janchashunaykipaq manam jukllayllapis kannatsu.
19Ishkay desgraciam päsashushkanki.
Jukmi kaykan nacionnikita ushakätsir imaykaykikunata apakuyanqan.
Jukaqnam kaykan mallaqay y guërra.
¿Piraq llakipäshunki?
¿Piraq shoqashunki?
20Toqlla achkuptin lluytsu jitaraqnömi wawaykikunapis cällikunachö y esquïnakunachö desmayashqa jitaräyan.
Dios Yaya alläpa rabyarmi tsaynö castigashushkanki.
21Jerusalén runakuna, musyämi llakikur machashqanö kayanqaykita.
Manam vïnuwantsu machashqanö kaykäyanki, sinöqa Diospa castïgunwanmi.
Dios Yaya niyäshunqaykita kanan shumaq wiyayay.
22Kuyanqan runankunapa favornin shäriq Dios Yayam nin:
<<Castigakunä cöpa#51.22 Kay textuchömi Dios Yaya castïgunta cöpaman iwalatsin. aptaräyanqaykitam qechuyashkaqna.
Kananpitaqa rabyar upyatsiyanqaq cöpata mananam upyayankinatsu.
23Tsay cöpatam alläpa sufritsishuqnikikunatana upyatsishaq.
Paykunam niyäshurqayki: <Janaykipa päsayänäpaq patsaman ujüyay>.
Tsaymi ujüyaptiki patsata jaruqnö jarur ushayäshurqayki>>.
Currently Selected:
Isaías 51: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
